Markus 8
8
Yesu mampakanne: ùpaꞌ sàbunna tau
(Mat. 15:32-39)
1Tempo to, one:‑i se maang i Dekapolis ti Yesu, ara kang tau boso: lumao i Dea. I anto, hari: aka-aka na anne:‑i se. Na hàngona‑mi Yesu ti pasikolaNa moa teꞌ, 2“PinanahangKu malemu mao i dei: se, sàbaꞌ itàlu‑mi se àlona mangulaꞌ‑Kaꞌ, pang hari: hura: na anne:‑i se. 3Ìna Ku suo: sumule: mao i rasangna‑i se pang burorang, malasoa pai dalang sàbaꞌ ara ti ung bùruꞌ nai karaona.”
4Na sùmuinNa‑mi pasikolaNa moa teꞌ, “Iakaa nikaonei: mangala ung nianne:-annena i kaoneang ung tunini mène: tee, nipampakanne:‑ing tau ung sama tee?”
5Na kutikìna‑mi Yesu moa teꞌ, “Pira ti rotimmu se?”
Na sùmui‑i se moa teꞌ, “Pitu.”
6Na suona‑mi Yesu ti tau boso: mesong i tampo:. Na alanna‑mi ti pitu roti to, musumbayang mukurusumangaꞌ, Na tòpe-tòpeke, pang Na àdo:‑ing pasikolaNa mangking na kàlaꞌ-kàlaꞌ‑i se mao i tau boso:. 7Ara ho pira-pira urungna‑i se, hampoꞌ si supi:-supi:‑i. Pang mukurusumangaꞌ mampatu: urung to, Na àdona‑ming mao i pasikolaNa mangking nikàlaꞌ-kàlaꞌ ho mao i tau boso:. 8Manne:‑mi se deaꞌ boro. Nikobu: ti tàranna ung nianne:, pùno: pitu baki:. 9Bosona tau ung manne:, muane pòteng, nikapang ùpaꞌ sàbunna. Ladu to, na suo: Yesu sumule:. 10Millantona‑mi se sahe: i lemmang ti Yesu sola: pasikolaNa pang heteꞌ mao i pangalanna lipu: Dalmanuta.
Tu Parisi mampalau kalle-kalleang
(Mat. 16:1-4)
11Ara pira-pira tu Parisi bùruꞌ mangkakaꞌi Yesu. Sitòkoꞌ sua:‑i se Yesu i laling mampalau tanda kalle-kalleang ung nai suruga. 12Marriuꞌ pinanahanNa ti Yesu, sàbaꞌ mipanaꞌ Na sàding i pinanahanNa, pang musua: moa teꞌ, “Mangaka ti tau ung si mène: tee mangokaꞌ tanda kalle-kalleang? Hari:! Matantu te ung Ku pusua: matung e teꞌ Hang nihengiing‑ko dosse: tanda ung mène: to.”
13Na paliina‑mi se Yesu to tau to‑i se millanto pole i lemmang pang mulemmang heteꞌ.
Pipaturona tu Parisi pang Herodes nipasikantereang‑ing ragi
(Mat. 16:5-12)
14-16Tarrang mulemmang, mupasakiꞌ ti Yesu mao i pasikolaNa moa teꞌ, “Hele-hele‑ko se ti raginna tu Parisi pang raginna Herodes!”*#8:14-16 Hele i Mat. 16:12.
Silàha:-làhana‑mi se ti pasikolaNa moa teꞌ, “Na pusua: mène: to, sàbaꞌ ta puhuta se ti mambaha roti. Besa‑i teng ti roti ung ara.”
17Sàbaꞌ na ìsang Yesu aka ti ung na silàha:-làhai: pasikolaNa, mingkutikìNa‑mi moa teꞌ, “Aka pu u massilàhai: se roti ung dang ara? Ha u ìsang‑mo: se naꞌ? Ha u pahang‑mo: se naꞌ? Makarinning naꞌ ti pinanahammu se? 18U kimata se, ha paita‑ko se naꞌ? U kitalinga se, ha pasàding‑ko se naꞌ?*#8:18 Hele i Yer. 5:21, Yeh. 12:2. U puhuta‑mo se naꞌ 19to lima roti ung Ku tòpe-tòpeke mao i lima sàbunna tau? Pira rota: pùno: ti tàranna ung nianne: ung nu kobu: se?”
Na sùmuinNa‑mi se moa teꞌ, “Sampulo: idua.”
20Na kutiki Yesu pole moa teꞌ, “Pang tempona Ku mantòpe-tòpeke pitu roti mao i ùpaꞌ sàbunna tau, pira baki: pùno: ti tàranna ung nianne: ung nu kobu: se?”
Na sùmui‑i se teꞌ, “Pitu.”
21Na oanna‑mi kang ho ti Yesu moa teꞌ, “Ha u ìsang‑mo: se naꞌ?”
Yesu mampapaita besa tau ung buta i lipu: Betsaida
22Nai anto, bùruꞌ‑mo ti Yesu pang pasikolaNa i lipu: Betsaida. Tau i anto mambaha besa tau ung buta mao i Yesu pang mingkalemu‑i se mangking Na papaita. 23Na tadoꞌi Yesu ti tau to pang Na rannang missòhong nai lipu:. Na tangkuduinna‑mi ti matanna, màli: Na simping‑i. Na hungkainna‑mi pang mangkutiki moa teꞌ, “Ara‑mo naꞌ aka u ita?”
24Tau to mihele pàli i heleꞌna, musuana‑mi moa teꞌ, “Ku paita tau ung mammulao-lao, hampoꞌ heleangna mène: teng lòpo:.”
25Na simpingna‑mi pole Yesu ti matanna tau to, màli: mimmùlaka pole pang paita belo:‑mo, dea pùna hela‑mo mangita angkanna pang maritoto tungka. 26Ladu nai anto, na suona‑mi Yesu sumule: mao i tammingna pang musua: moa teꞌ, “Hau mangola: i lummu: lipu:!”
Pangakuangna Petrus
(Mat. 16:13-20, Luk. 9:18-21)
27Ara sangàlo, kakarang ti Yesu sola: pasikolaNa mao i lipu:-lipu: pangalanna Kaisarea Pilipi. I lummu: dalang mingkutiki mao i pasikolaNa moa teꞌ, “Pusuana tau, isai‑Kaꞌ ti te?”
28Pisùmuinna‑i se mène: tee, “Ara ung mangkonai:‑Ke Yohanes Pumpudoiꞌ, tuho: pole. Ara ho ung mangkonai: nabi Elia, minguluꞌ pole. Ara kang ho ung mangkonai: moa teꞌ besanna nai nabi sintàna: ung nai lùlung.”
29Mingkutikìna‑mi ho pole ti Yesu moa teꞌ, “Hampoꞌ dio se deꞌ? U Mi konai: se isai?”
Na sùmuinNa‑mi Petrus moa teꞌ, “Kinta: dea‑mo Datu: Pipasalamaꞌ!” 30Na piapuꞌna‑ming Yesu mao i pasikolaNa moa teꞌ, “Hang mading‑mi tungka u patidolu se ti to, mao i isai-sai pòteng.”
Yesu mampusua: kamateangNaa pang mangaka ti dalang tuho: miluhali pasikolaNa
(Mat. 16:21-28, Luk. 9:22-27)
31Nai anto, na rara‑mo Yesu ti mampaturo: pasikolaNa moa teꞌ Anaka Tulino parallu mangola: boso: kamaparriꞌang pang na tumpaꞌ ung si matua:-tua:, kapala-kapala imang, pang ung si manarangna i aluku. Nipateia, hampoꞌ àlo ung kaitàlu tuhoa pole. 32Makàso: tungka ti ung na pusua: Yesu mao i pasikolaNa. Na kalàbena‑mi Petrus ti Yesu mao i minanaꞌ pang na ràho moa teꞌ, “Hau musua: mène: to.”
33Hampoꞌ mingkuhaling ti Yesu pang manghele pasikolaNa, mangkillainNa‑mi Petrus moa teꞌ, “Malai‑ko mao i keboꞌ ti dio Iblisiꞌ! Sàbaꞌ pantangaꞌmu ti, pantangaꞌ tulino, handei: pantangaꞌ mui Puang.”
34Manghàngona‑mi tau boso: ung one: i anto ti Yesu, sola: pasikolaNa. MusuaNa‑mi moa teꞌ, “Tau ung mio: mangulaꞌ‑Kaꞌ, parallu mampalii: kalinoangna, pang mangkoha: oròngangna, pang tùrung mangulaꞌ‑Kaꞌ. 35Sàbaꞌ isai-sai ti ung mangkeboꞌi‑Kaꞌ mangking mampasalamaꞌ kalaena i lino tee, kahùlìngànga katuhoangna. Hampoꞌ isai-sai ti tau ung marìngang kahùlìngang katuhoangna sàbaꞌ Koi: pang Kareba Belo:, tau to mampasalamaꞌa katuhoangna. 36Aka ti maupaꞌna mao i tau, ìna nasang i lino tee na ampui, hampoꞌ kahùlìngang katuhoangna? 37Mading naꞌ ti kasukiꞌang nipantukaꞌ‑ing katuhoang? 38Sàbaꞌ isai-sai ti ung madia: mangampu‑Kaꞌ pang mampudia: pipaturoKu i latenna i àlaꞌna tulino ung madosa pang dang manuruꞌ, Anaka Tulino madiaa‑da ho mangampu tau to, tempona bùruꞌNaa sìnang kamalabiꞌangna AmanNa, na pasola: malaikaꞌ-malaikaꞌ ung malìsong.”
Currently Selected:
Markus 8: skx
Highlight
Share
Copy
Want to have your highlights saved across all your devices? Sign up or sign in
