WINEWEUDO TINENA 1
1
Penaa Mempori anu dinandi
1:1-5
1 #
Luk. 1:1-4
Hei Teopilu, a wuntaku anu amba-ambano kuburio mongkona luwuakoano anu inangga ka pompaguru-Do i Yesu, 2hawe a oleo ka Dotetande. Se'eluno atuu a mpabawano Penaa Mempori Do'oliwi iramo tinena anu bininiki-Do. 3Ndi ondae mepopokita Ira mansano umariomo teweweu nsa'o-Do, ka saru hadio petondoni Dopokomengkaao, nine tuwu Ira. Hangano i larono pato pulu oleo mararu Dopepopokita ka mepauako ira mongkona Poparentaa-Do Ue Ala.
4 #
Luk. 24:49
I asa oleo tempono Dopongkaa meronga saru ondae, Do'onto ira mebintao Yerusale, ka tumena ira mpo'ia i tu'ai sumikorio dandi-Do i Ama, anu – kanandio Dopotae – ”imerongeomo inso ndi Ongkue. 5#Mat. 3:11; Mrk. 1:8; Luk. 3:16; Yoh. 1:33 Hangano i Yohane mobahoako uwoi, sine nami tehine mbo'u komiu mebinahoako Penaa Mempori.”
Ondae i Yesu tetande i suruga
1:6-11
6Ka mpesikeno iramo anu mpepumpu i tu'ai, ”Ue, nde behe Komiu a tempo andio momuleo poparentaado to Isaraeli?” 7Sumangki Ira, ”Komba to'oriamiu tempo ka langkuno, anu pinakosi-Do Ondae-Do i Ama montonda pabawa-Do. 8#Mat. 28:19; Mrk. 16:15; Luk. 24:47-48 Sine komiu mpotarima pabawa, tewala metii Penaa Mempori ndi omiu, ka komiu megagi sakosii-Ku i Yerusale ka i asa wawo wita Yudea ka Samaria ka hawe i tompano tolino.”
9 #
Mrk. 16:19; Luk. 24:50-51 Umari-Do mepau kanandio, tetande Iramo domensakosii ira, ka seru tumutuwi Ira inso a pongkitado. 10Kontongaado mpentombu i langi tempono Dopewuatako atuu, borono mentade iramo orua mia anu mesangka mopute umpeda ndi ondae, 11ka dopotaeako ira, ”Hei to Galilea, tembio ka impentade mpentombu i langi? Ondae i Yesu andio, anu tetande i suruga binta komiu, Ira wali hawe mengkena kana imengkita Ira Dopewuatako i suruga.”
Tinena mpesisikori
1:12-14
12Ka mpekule iramo tinena atuudo i Yerusale inso a pongku anu nineeako Pongku Saitu, anu butu asa pelempaa oleo Saba olaino inso i Yerusale. 13#Mat. 10:2-4; Mrk. 3:16-19; Luk. 6:14-16 Mansado mehawe a ngkota, mpewuatako iramo a bolongko i wawono, po'iangado mperato. Ondae atuu onaemo i Peturu ka i Yohane, i Yakobu ka i Andarea, i Pilipu ka i Toma, i Batolomeu ka i Matiu, i Yakobu anano i Alipeu, ka i Simo to Seloti ka i Yudasi anano i Yakobu. 14Luwudo ntepo'asa aroa mpekakai mpiha mperonga-ronga, saru ba opia ira beine saru i Maria, ine-Do i Yesu, ka luwuno pepaekompo-Do i Yesu.
I Matia bininiki umeuo i Yudasi
1:15-26
15A oleo atuu mentadeomo i Peturu i tonga-tongado pepaekompo anu kontongaado mpepumpu atuu, bara'ura asa etu ka rua pulu mia hadiono, ka i'amba motae, 16”Hei pepaekompo, asalakono inihii pau a Wunta Mempori, anu pinohawe-Do Penaa Mempori mesala ndi Daudi mongkona i Yudasi, petewawado mia anu rumako Ira i Yesu atuu. 17Ndi'upua onae tewinso a doamami ka mo'ala tia a mpompekakaakoa andio.” 18#Mat. 27:3-8 – I Yudasi andio mo'oliomo wita asa ntia inso a ntambo poweweuno anu mosa'o, ka i'amba tebangku tepo'opo, ka tebonsi kompono ranta te'uweti luwu ihi kompono. 19Mongkona atuu domento'orio luwu palilino Yerusale, onaemo wita atuu domeneeakono a mpaudo ”Hakal-Dama,” pengkonaano Wita Rea –. 20#Pud. 69:26; 109:8 ”Hangano hinao teburi a wunta Penani Po'unde-unde:
Po'ineeomo pekemaano ka igagi boni-boni,
ka po'ineeomo nahina anu mo'ia i larono:
ka: Po'ineeomo potorono i'alao mia susua.
21Gaagi asalakono ka kimentiniangiako asa mia inso ndi ondae anu wela mehawe mpepumpu saru omami tempono Ondae i Ue Yesu da Dokongko saru omami, 22#Mat. 3:16; Mrk. 1:9; 16:19; Luk. 3:21; 24:51 onaemo mompu'u inso a mpobahoano i Yohane hawe a oleo Dotetande i Yesu lumako i suruga binta kami, ka igagi sakosii saru omami mongkona pewangu-Do.”
23Ka do'amba me'emao orua mia: i Yusupu anu nineeako i Barasaba ka anu nineeako mbo'u i Yusutusu, ka i Matia. 24Luwudo mpekakai ka dompotae, ”Oo Ue, Omiumo anu tumo'orio aroano luwuno mia, po'ineeomo ka Itisoakami isema anu bininiki-Miu inso a mia orua andio, 25ka itarimao potoro pompekakaakoa, onaemo potoro tinena anu binintano i Yudasi anu tedontaomo a mpo'ianga anu pototono.” 26Ka do'amba mpontendeako ira undi mia orua ira atuu ka anu kona undi onaemo i Matia ka kanandiomo onae gagi tiangido tinena hopulu ka aasa atuu.
Currently Selected:
WINEWEUDO TINENA 1: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
