WINEWEUDO TINENA 2
2
Pentakosotaa
2:1-13
1 #
Ima. 23:15-21; Win. 16:9-11 Mansano haweako oleo Pentakosotaa, luwuno mia mpompe'ala-ala mpepumpu i asa po'ianga. 2Borono metiiomo inso i langi aasa uni kana pepuurino angi mokora buketio asa laro raha, a mpo'iangado mpentoro; 3ka domengkitaomo hadio elo kana langano api anu tesiarawo metii ndi ondae nte'o'asa mia. 4Onaemo ka domebukeako Penaa Mempori, ka do'amba mpompu'u mpepauako hadio pau susua kana anu iweeako ira Penaa atuu ka domempauo.
5Tempo atuu i Yerusale mpo'ia ira to Yahudi anu mpesomba ntu'u inso a luwuno tongku i totono langi. 6Tempono ipetii uni atuu, mpehowu iramo mia hadio. Mebulalingo ira hangano singge mia rumongeo pauno dompepauako tinena atuudo. 7Mengkokodoho ira ka mengkohali-hali, ka do'amba mpotae, ”Kombake luwudo anu mpepau atuu to Galilea? 8Kana'umpe ka tosingge merongeo dompepauako pauto, onaemo pauto i wita insoato: 9ontae to Paratia, to Media, to Elami, palilino Mesopotamia, Yudea ka Kapadokia, Pontu ka Asia, 10Perigia ka Pampilia, Masiri ka luwuno wita Libia anu tepo'umpeda saru Kirene, mia mehawe inso i Roma, 11moiko to Yahudi maupo anu mpotonda agamado to Yahudi, to Kereta ka to Ara, tomeronge ira mpepauako pauto ontaeto mongkona luwuno wineweu langkai anu wineweu-Do Ue Ala.” 12Luwudo ntekokodoho ka tedoa mengkokooro ka dompepau-pau pada ondaedo, ”Hapa pengkonaano andio?” 13Sine mia mehano mpopasinggiri, ”Kontongaado memolanguako anggoro mo'ahi.”
Pontutuluno i Peturu
2:14-40
14Ka mentadeomo i Peturu saru hopulu ka aasa tinena atuu, ka mepau meroku ipotaeako ira, ”Hei omiu to Yahudi ka luwumiu anu mpo'ia i Yerusale, ka imento'oriomo ka impe'ihilaroomo pinauku andio. 15Mia andiodo nahi domemolangu kana potaemiu, hangano da mo'oru langku osio, 16sine onaemo pau-Do Ue Ala anu pinauno Nabi Yoeli:
17 #
Yoe. 2:28-32
Ta gagi a oleo pokotompa –
kanandiomo pau-Do Ue Ala –
nine Aku motiio Penaa-Ku a luwuno mia;
ka anamiu tama ka beine ira mpompau anu ta gagi,
ka mangalitaumiu ira mpohawe pongkita,
ka miamiu anu mota'u ira memo'ipi.
18A luwuno mbo'u tetenaa-Ku tama ka beine
Aku motiio Penaa-Ku a oleo atuu
ka ira mpompau anu ta gagi.
19Ka Aku mompokohina anu mengkinohali-haliako i wawono, i langi
ka luwuno petondoni i totono, i tolino:
rea ka api ka ahu mpeboto-boto.
20Mata oleo ta bali gagi wongi mpusu
ka wula gagi rea
se'eluno napi hawe oleo-Do i Ue,
oleo anu langkai ka maramba atuu.
21Ka ba isema anu mebooli a nee-Do i Ue ta kinadudui.
22Hei to Isaraeli, imerongeomo pau andio: Anu tinooku onaemo Ondae i Yesu inso i Nasare, asa mia anu Dopakosiomo Ue Ala ka anu pinokomengkaako roso ka anu mengkinohali-haliako ka luwuno petondoni ndi omiu anu wineweu-Do Ue Ala mesala ndi Ondae i tonga-tongamiu, kana anu tino'orimiu. 23#Mat. 27:35; Mrk. 15:24; Luk. 23:33; Yoh. 19:18 Ondae anu Dopeweengako Iramo Ue Ala montonda tinoo-Do ka pinakosi-Do, imempaso Iramo a ngkeu pinotamba ka impepateako Ira kaedo tongku anu tedoa lambaha. 24#Mat. 28:5-6; Mrk. 16:6; Luk. 24:5 Sine Ondae Ue Ala wangu Ira ka Dopotola Ira inso a marasaino matea, hangano nahi Ira mo'ia mpiha a laro mpabawano matea atuu. 25#Pud. 16:8-11 Hangano i Daudi mepau mongkona Ondae:
Mengkita aku mpiha ndi Ondae i Ue,
hangano mentade Ira i koanaku, nahi kutelelu.
26Onaemo pu'uno ka imawongko aroaku ka sumangaku meboo-booli,
maupo koroiku ta mo'ia momperodo,
27hangano nahi Ipeweengakune a mpo'iangado mia mate,
ka nahi po'ineeo Mia Mempori-Miu mongkita matea.
28Omiu mompauakune sala ntuwua;
Komiu moweeakune hadio ntu'u mawongkoa i aro-Miu.
29Pepaekompo, moiko ba kupepau a manasaano ndi omiu mongkona i Daudi, amado tongkuto. Mate iramo ka kinaburu, ka kaburudo da kongko ndi ontae hawe oleo andio. 30#Pud. 132:11; 2Sam. 7:12-13 Sine ondae aasa nabi ka doto'orio, nine Ondae Ue Ala medandi Iramo ndi ondae saru mesumpa, nine Ira montoroo asa mia inso a inuledo isa'a i Daudi a ngkadera poparentaado. 31Onaemo pu'uno dokitaomo anu ta gagi lembuino ka mepau iramo mongkona pewangu-Do i Mesia, tempono dopotae, nine nahi Dobininta a mpo'iangado mia mate, ka nine koroi-Do nahi ta masola. 32Ondaemo i Yesu andio anu winangu-Do Ue Ala, ka mongkona luwuno atuu omami luwu gagi sakosii. 33Ka umari-Do tinandeako kae ngkoana-Do Ue Ala ka montarima Penaa Mempori anu dinandi atuu, ka Dopotiio hapa anu kinitamiu ka rinongemiu i ndi'ai. 34#Pud. 110:1 Hangano komba i Daudi anu mewuatako i suruga, tendeano onaeno i Daudi motae:
Mepau Iramo i Ue ndi ondae ueku:
35Pentoromo i koana-Ku, hawe ka Kuweweu ira iwali-Miu gagi pelandaano karu-Miu.
36Gagi luwuno suku Isaraeli asalakono mento'orio manasa, nine Dopokogagi Iramo Ue Ala i Yesu, anu pinasomiu atuu a ngkeu pinotamba, gagi Ue ka i Kerisituu.”
37Mansado merongeo mongkona atuu tedoa te'urense aroado, ka do'amba mpotaeakono i Peturu ka tinena anu mehano, ”Hapamoke kami mpombio, pepaekompo?” 38Isangki ira i Peturu, ”Intepidimo ka po'ineeomo singge mia ka ipepebaho a nee-Do i Yesu Kerisituu ka ite'ampuni halamiu, ka komiu mpotarima pompowee Penaa mempori. 39Hangano tiamiumo dandi atuu ka tiado anamiu ka tiado mia anu da olai, onaemo montonda hadiono anu Ira moboio Ue Alato.” 40Ka saru hadio mbo'u pau susua onae mompowee asa ponsakosii anu mentee ntu'u ka ipompauako ira, ipotae, ”Impeweengakonomo koroimiu ka ikinadudui inso a mia anu mosa'o andiodo.”
Mongkona tuwudo bawaa anu amba-ambano
2:41-47
41Mia anu mentarimao pinauno atuu mpepebaho ka a oleo atuu porokodo tetiangi bara'ura tolu nsowu mia. 42Dompo'asao aroado a pompagurudo tinena ka a ntepo'asaa. Ka wela ira mpepumpu ka domensiba-sibao roti ka mpekakai.
43Ka medoito iramo luwu, kontongaado tinena atuudo mpopokohina hadio kinohali-haliako ka petondoni. 44#Tin. 4:32-35 Ka luwuno mia anu mpompe'ala-ala iramo memoroko ira mpiha, ka luwuno arataado onaemo arataa morokoado, 45ka wela hinao i olodo anu mo'asa arataano, ka i'amba tumia-tiaako ira luwuno mia menunu saru kinereno nte'o'asa mia. 46Saru pompedato ka mpe'asa aroa sompo oleo dompepumpu a Raha-Do Ue Ala. Domensiba-sibao roti a sompo-sompo rahado mpe'eu-eu ka mpongkaa mperonga-ronga memawongko ka inso ntu'u i aroado, 47saru me'unde-unde Ira Ue Ala. Ka ondae dome'ineheako ira luwu mia. Ka sompo-sompo oleo Dotiangiako ira i Ue mia anu kinadudui.
Currently Selected:
WINEWEUDO TINENA 2: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
