WINEWEUDO TINENA 12
12
I Yakobu mate – i Peturu pinotola inso a ntorungku
12:1-19
1I tempo atuu mompu'uomo mokole Herode weweunsa'o ira ba opia mia inso a bawaa. 2Onae metena mepateakono ponai i Yakobu, pepaekompono i Yohane. 3Mansano kumitao, nine anu kanatuu mokomawongkoo aroado to Yahudi, ipotilaloakono wineweuno atuu ka metena rumakoo i Peturu. Tempo atuu oleo langkai Roti Nahi Peragi. 4#Pel. 12:1-27 Mansano rinako i Peturu, metena i Herode ka domentorungkuo ka domedagaio opaa bawaa sorodadu, asa bawaa opaa sorodadu. Tinoono onaemo, sa'umarino oleo langkai Pasa ta wawao i arodo mia hadio. 5Kanandiomo i Peturu inuko a laro torungku. Sine kongkodo bawaa mpekakaiakono ndi Ondae Ue Ala.
6A wongi se'eluno napi wawao i Herode a mia hadio, i Peturu moturi i olodo orua sorodadu, teponguako rante orua. Sorodadu anu mehano kontongaado mpodagai i arono pewowa. 7Borono mentadeomo aasa mala'eka-Do i Ue umpeda ndi Peturu ka wanta mepansari a laro bolongko atuu. Mala'eka atuu tumopao i Peturu ka ipewangu, ipotae, ”Pontuturakomo pewangu!” Ka telohuomo rante atuu inso a ngkaeno i Peturu. 8Ka i'amba mala'eka atuu motaeakono, ”Pokonaomo peboo ntongamo ka pesapatumo!” Iweweuomo kanatuu. Ka i'amba mala'eka atuu motaeakono, ”Pokonaomo lemba meloemu ka tonda akumo!” 9Ka i'amba tumondao mala'eka atuu meluarako ka nahi to'orio, nine hapa anu wineweuno mala'eka atuu mentee gagi koa ntu'u, iko'aro-aroa butu koa pongkitano. 10Mansado telalo a mpodagaia anu ko'aasa ka podagaia anu ko'orua, hawe iramo a mpewowa langkai labu anu te'aro a ngkota. Pewowa atuu te'ungkahiako onaeno ndi ondae. Mansado hawe i bungkuno, melempa ira hawe i tompano sala, ka borono mala'eka atuu bintao. 11Ka mansano tumo'orio i Peturu teweweuno, ipotae, ”Kanandio-andio kuto'oriomo nine mentee ntu'u Ondae i Ue montena Iramo mala'eka-Do kumadudui aku inso a ngkaeno i Herode ka inso a luwuakoano anu pinerorohido to Yahudi.” 12Ka mansano mompewowolo sarai, lumakoomo a rahano i Maria, ineno i Yohane anu nineeako mbo'u i Marakusu. I tu'ai hadio mia mpepumpu ka mpekakai. 13Ka mansano metingko-tingko a mpewowa langkai, aiwaomo aasa ata beine meneeako i Rode ka ito'orio isema anu metingko-tingko atuu. 14Tumampu'u ito'orio suarano i Peturu, sine hangano po'undeno nahi ungkahio pewowa langkai atuu ka mompari-pari mewinso i larono ta pauo, nine i Peturu rauo i arono pewowa langkai. 15Dompotaeakono beine atuu, ”Mokupoko.” Sine kongkono ipauo, nine mentee koa ntu'u andio. Dompotae, ”Mala'ekano koa atuu.” 16Sine i Peturu metingko-tingko mpiha ka mansado me'ungkahio tondo ka domengkitao, mengkohali-hali ira. 17Sine ikawe-kawe ira i Peturu, ka domengkomino, ka i'amba tumutuluo ba kana'umpe Dotaateo i Ue meluarako inso a ntorungku. Ipotae, ”Mongkona andio imepauakono i Yakobu ka luwuno pepaekompoto.” Ka i'amba meluarako ka lumako a mpo'ianga susua.
18Tisomono ntewuka iramo sorodadu atuu. Mpesisikeno ira hapake anu gagi ndi Peturu.
19I Herode metena umungkeo i Peturu, sine nahi hinawe. Ka i'amba i Herode metena paresa ira anu mpodagai atuu ka dompepate ira. Ka i'amba melungka inso i Yudea lumako i Kaisarea ka mo'ia i tu'ai.
I Herode mate
12:20-23
20I Herode tekuda ntu'u a nto Tirusi ka Sidoni. Memoroko ira melako mpe'aro ndi onae. Dompokopopandeio i Belasitu, pegawai langkanaeno mokole, ka ipe'alaako ndi ondae, ka do'amba mpo'ema pesintuwua, hangano i witado mpohawe kaanga inso i witano mokole. 21Ka i asa oleo anu pinakosi, i Herode mompokona sangka mokole, ka i'amba mentoro a ngkadera poparentaa ka ipepauako ira. 22Ka palilino mpebooli mesangkio, ”Ndio suarano pinesombai susua ka komba suarano mia!” 23Ka i tempo koa mbo'u atuu mala'eka-Do i Ue tumampeleo hangano nahi pelangkai Ira Ue Ala; onae mate domengkaano ule-ule.
I Baranaba ka i Saulu tinena
12:24–13:3
24Onaemo ka kotele-teleleno pau-Do i Ue ka kohadi-hadiono domerongeo mia. 25I Baranaba ka i Saulu mekule inso i Yerusale, mansado moko'umario angaa pompekakaakodo. Dowawao i Yohane, anu nineeako mbo'u i Marakusu.
Currently Selected:
WINEWEUDO TINENA 12: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
