WINEWEUDO TINENA 13
13
1I tempo atuu a laro bawaa i Antiokia hinao ba opia ira nabi ka anu mpompaguru, onaemo: I Baranaba ka i Simo anu nineeako i Nigeri, ka i Lukiu to Kirene, ka i Menahe anu tine'ia meronga saru mokole Herode, ka i Saulu.
2Pohona tempono dompesomba ndi Ondae i Ue ka mempuasa, Mepau Iramo Penaa Mempori, ”Pesusuaa-Kunemo i Baranaba ka i Saulu a anggaa anu Kupakosiako iramo.” 3Onaemo ka domempuasa ka mpekakai, ka mansado medampoakono kaedo a orua mia atuu, dompo'inee ira ka dolako orua ira.
I Saulu ka i Baranaba i togo Sipuru
13:4-12
4Hangano petena-Do Penaa Mempori, i Baranaba ka i Saulu melungka lumako i Seleukia, ka inso i tu'ai sumomba ira lumako i Sipuru. 5Sahawedo i Salamisi dopaleleo pau-Do Ue Ala a luwuno raha tepotowoado to Yahudi. Ka i Yohane metonda mokowali ira.
6Domesompoo asa wawo witano togo atuu hawe i Paposo. I tu'ai dotepohaweakono aasa to Yahudi meneeako i Barayesu. Onae asa mia puu ponsihiri ka nabi megaupi. 7Onae wali-walino i Seregiu Paulu, guberenuu, mia anu pande mompewowolo. Guberenuu atuu moboi ira i baranaba ka i Saulu, hangano ineheno moronge pau-Do Ue Ala. 8Sine i Elimasi – kanandiomo neeno a mpau Yunani –, puu ponsihiri atuu, umewai ira ka i'ungkeakono mokopansiao guberenuu atuu inso a pompe'ala-alano. 9Sine i Saulu, nineeako mbo'u i Paulu, anu bukeako Penaa Mempori, kumokontoo, 10ka ipotae, ”Hei anano i Mosa'o, omue bukeako mperupa-rupa pompopo'oo ka mosa'oa, omue iwalino luwuno menteea, nahi komenaa-naake mokopansiao Sala-Do i Ue anu moleo atuu? 11Kanandio-andio, kitaomo, kae-Do i Ue hawe umaluko, ka ugagi morawu, ba opia oleo tehineno nahi komongkita mata oleo.” Ka i tempo koa mbo'u atuu mia atuu kana i tutuwio gawu ka wongi-wongi, ka kontongaano merare onae asalakono mo'ungke mia anu tumaateo. 12Kumitao hapa anu gagiomo atuu, mompe'ala-alaomo guberenuu atuu; ikohali-haliakono pompaguru-Do i Ue.
Lumako i Antiokia i wita Pesidia
13:13-49
13Ka i'amba i Paulu ka wali-walino mebintao Paposo ka mensumomba melako i Perega i Pampilia; sine i Yohane binta ira ka i'amba mekule i Yerusale. 14Inso i Perega dompotilaloakono pelempaado, ka do'amba mehawe i Antiokia i Pesidia. A oleo Saba melako ira a raha mpesombaa, ka do'amba mpentoro i tu'ai. 15Mansano umari pobasaa songka Taura ka wuntado nabi, mpetena iramo petewawa a raha tepumpua mpesikeno ndi ondae, ”Luwumiu pepaekompo, tewala hinao pe'oliwi anu mowangu ka montarero bawaa andio, imempauako iramo!” 16Ka mentadeomo i Paulu. Itasiakono kaeno, ka ipotae, ”Hei to Isaraeli ka omiu anu medoitoako Ira Ue Ala, imerongeomo! 17#Pel. 1:7; 12:51 Ondae Ue Alado to Isaraeli andio Dobiniki iramo uempu'uto ka weweuo bawaa atuu gagi langkai, tempono dompo'ia i Masiri gagi mia mehawe. Saru kae-Do anu maramba Dowawa ira mpeluarako inso i wita atuu. 18#Win. 1:31 Pato pulu nta'u tehineno Dosabaraakono luwuno gaudo i pada one. 19#Win. 7:1 Ka umari-Do rumopu ira opitu tongku i wita Kana'a, Dotia-tiaako ira wita atuu ka dompe'umbuo 20#Mpo. 2:16; 1Sam. 3:20 bara'ura pato etu ka lima pulu nta'u tehineno. Umarino atuu Doweeako ira puu mpobitara hawe a tempono Nabi Semueli. 21#1Sam. 10:17-21 Ka do'amba mpo'ema aasa mokole ka Ondae Ue Ala weeako ira i Saulu anano i Kisi inso a nsuku Benami, pato pulu nta'u tehineno. 22#1Sam. 13:14; Pud. 89:21 Mansano liniahako i Saulu, Dopotoroo Ue Ala i Daudi gagi mokoledo. Mongkona i Daudi Dopokomengkaaomo Ue Ala: Kuhaweomo i Daudi anano i Isai, asa mia anu ineheno aroa-Ku ka anu weweuo luwuno po'ehe-Ku. 23Ka insomo a inuleno, menunu saru anu dinandi-Do, Ondae Ue Ala moweeako iramo Puu Pongkaduduido to Isaraeli, onaemo Ondae i Yesu. 24#Luk. 3:3 Rangku hawea-Do umariomo i Yohane mebooliako ira luwuno tongku Isaraeli ka dontepidi ka mpepebaho. 25#Yoh. 1:20, 27 Ka tempono i Yohane tamo ronga moko'umario anggaano, ipotae: Ongkue komba Ondae anu ino'aroamiu, sine Ira hawe umarino ongkue. Maupo lumohuo sapatu-Do nahi pototoku.
26Hei pepaekompoku, moiko anu tewinso a inuleno i Burahima, maupo anu doitoako Ira Ue Ala, lele tekaduduia atuu pinohaweomo ndi ontae. 27Hangano palili i Yerusale ka luwuno petewawado nahi dompe'ala-ala Ira i Yesu. Hangano domehuku mate Ira, dome'ihiiomo pinaudo nabi anu binasa sompo oleo Saba. 28#Mat. 27:22-23, 57-61 Ka maupo nahi dompohawe te'asa anu gagi pepu'uano pohuku mate atuu, sine dome'emaomo ndi Pilatu ka Dopinepate. 29Ka mansado me'ihiio luwuakoano anu teburi mongkona Ondae, dompotii Ira inso a ngkeu pinotamba, ka do'amba mpombole Ira a laro ngkaburu. 30Sine Ondae Ue Ala wangu Ira inso i olodo mia mate. 31#Tin. 1:3 Ka i larono ba opia tempo Dopepopokita ndi ondae anu mentonda Ira inso i Galilea lumako i Yerusale. Ondaemo atuu anu kanandio-andio gagi sakosii-Do a bawaa andio. 32Ka omami kanandio-andio mempaleleo lele mawongkoa ndi omiu, onaemo nine dandi anu domewineeako uempu'uto, 33#Pud. 2:7 Do'ihiiomo Ue Ala ndi ontae, inuledo, hangano Dowangu Ira i Yesu, kana anu hinao teburi a wunta penani po'unde-unde ko'orua:
Omue Ana-Ku!
Kupe'anaako-Mumo a oleo andio.
34 #
Yes. 55:3
Ondae Dowangu Iramo Ue Ala inso i olodo mia mate ka nahi Ira wali pineweengako a matea. Mongkona atuu Dopokomengkaao i Ue a mpau-Do andio:
Aku umihiio ndi omue luwuno dandi anu mempori anu pine'ala-ala,
anu Kuweeakonomo i Daudi.
35 #
Pud. 16:10
Onaemo pu'uno ka Dopauo a Mpenani po'unde-unde anu susua: Nahi Komiu mo'inee Ira Mia Mempori-Miu mengkitao matea. 36Hangano i Daudi weweuo po'ehe-Do Ue Ala a tempono, ka i'amba mate ka pinombole i horino uempu'uno, ka onae lano pineweengako a matea. 37Sine Ondae i Yesu, anu winangu-Do Ue Ala, komba kanandio. 38Gagi ka imento'oriomo, hei pepaekompo, hanganomo Ondae onaemo ka ipinalele ndi omiu po'ampunia hala. 39Ka ndi Ondaemo sompo mia anu mompe'ala-ala ipohawe tepotolaa inso a luwuno hala, anu nahi komiu mpohawe inso a songkano i Musa. 40Onaemo pu'uno, impetangkoromo, ka si gagi ndi omiu hapa anu pinauomo a wuntado luwuno nabi:
41 #
Hab. 1:5
Impewowoloo, hei omiu anu inehemiu mpompokongkodei, imengkohali-halimo ka imeropumo,
hangano Kuweweuo aasa anggaa a tempomiu,
aasa anggaa anu nahi komiu mpe'ala-alao,
ba imentinutuluako.”
42Tempono dompeluarako i Paulu ka i Baranaba, dome'emao ndi ondae ka dotutuluo mongkona tinutuludo mbo'u atuu a oleo Saba anu ta hawe. 43Mansano umari pesombaa, hadio to Yahudi ka anu mpe'agama Yahudi anu doitoako Ira Ue Ala, tumonda ira i Paulu ka i Baranaba; orua ira tinena atuu paguru ira ka umoliwi ira ka domentuwu mpiha a pompehohawa-Do Ue Ala.
44A oleo Saba tudano mehawe iramo mingki luwuno ihino kota atuu mpepumpu ira mporonge pau-Do Ue Ala. 45Sine, tempono domengkitao to Yahudi mia hadio atuu, mebukeako iramo kohili ka saru mpepauki, dome'ewaio hapa anu pinauno i Paulu. 46Sine i Paulu ka i Baranaba mosia mepau, ”Lano asalakono ndi omiumo se'elu ipinalele pau-Do Ue Ala, sine nahi imentarimao ka impotae nahi pototomiu mpohawe tuwua anu nahina tampulaano. Onaemo pu'uno kami mpewolili a luwuno tongku susua. 47#Yes. 49:6 Hangano onaemo andio anu kimentinenaako:
Kupakosikomo gagi mewinedo luwuno tongku anu nahi domento'ori Ira Ue Ala,
ka upowawa tekaduduia hawe i tompano tolino.”
48Rumongeo atuu mpo'unde iramo luwuno mia anu nahi domento'ori ira Ue Ala ka dome'unde-undeo pau-Do i Ue; ka luwuno mia anu Dopakosio Ue Ala a ntuwua anu nahina tampulaano, gagi mpompe'ala-ala. 49Ka i'amba pinalele pau-Do i Ue i asa wawo wita atuu.
Lumako i Ikoniu, i Lesitera ka i Derebe
13:50–14:20
50To Yahudi mposingki ira beine mempinerorohi anu doitoako Ira Ue Ala, ka anu langkai potorodo i kota atuu. Ka hangano ondae ka dowineweunsa'o i Paulu ka i Baranaba ka sumaari ira inso i wita atuu. 51#Mat. 10:14 Sine i Paulu ka i Baranaba dotapisio pampawu a ngkarudo gagi pepopoto'ori a mia atuudo, ka do'amba lumako i Ikoniu. 52Ka ana guru i Antiokia bukeako mawongkoa ka Penaa Mempori.
Currently Selected:
WINEWEUDO TINENA 13: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
