WINEWEUDO TINENA 17
17
Tegagaa i Tesalonika
17:1-9
1I Paulu ka i Silasi montonda sala lumaloo kota Ampipoli ka Apolonia ka dohawe i Tesalonika. I tu'ai hinao aasa raha tepumpuado to Yahudi. 2Kana gauno mpiha i Paulu mewinso a raha tepumpua atuu. Otolu oleo Saba metonda-tonda ipopauako ira ihino Wunta Mempori. 3Ipokomengkaako ira ka i itisoako ira, nine i Mesia asalakono Ira tebobarasai ka mewangu inso a mpo'iangado mia mate, ka i'amba motae, ”Ndiomo i Mesia Ondaemo i Yesu anu pinaleleku ndi omiu.” 4Ba opia mia inso ndi ondae anu mpe'ala-alao mentonda ira i Pulu ka i Silasi ka hadio mbo'u to Yunani anu doitoako Ira Ue Ala, ka komba tedei beine anu pinelangkai. 5Sine mengkohili ira to Yahudi ka dompokowali ira ba opia mia mpe'iaki a olu, mpoweweu ira magagaa ka mporisui a ngkota atuu. Domensapoio rahano i Yasoni hangano tinoodo wawa ira i Paulu ka i Silasi a nterisoado palili. 6Sine mansano nahi domehawe ira, domerendeo i Yasoni ka ba opia ira pepaekompo i arodo anu langkai potorodo a ngkota, saru mpebooli, ”Mia anu mpopokomarisu i asa wawontolino mehawe ira koa mbo'u ramai, 7ka i tarima ira i Yasoni mperato i rahano. Luwudo mposongka me'ewaio luwuno pompakosido Datu ka domempauo, nine hinao aasa mokole susua, onaemo Ondae i Yesu.” 8Mansado merongeo mia hadio ka anu langkai potorodo a ngkota luwuno atuu, medanggara iramo. 9Sine mansado mpohawe pe'inia inso ndi Yasoni ka inso a ba opia ira pepaekompo mehano, dompotola iramo.
I Paulu ka i Silasi i kota Berea
17:10-15
10Sine a wongi koa mbo'u atuu mpotuturako iramo pepaekompo i tu'ai tumena ira i Paulu ka i Silasi melungka lumako i Berea. Sahawedo i tu'ai lumako iramo a raha tepumpuado to Yahudi. 11To Yahudi i kota atuu mpe'aroa irapo sekono to Yahudi i Tesalonika, hangano domentarimao pau-Do i Ue atuu a mawongkono aroado ka sompo oleo dompepenteeo Wunta Mempori ka domento'orio, ba mentee luwuno atuu kanandio. 12Hadio i olodo anu mpompe'ala-ala; ka komba tedei i olodo beine pinelagkai ka tama to Yunani. 13Sine mansado mento'orio to Yahudi inso i Tesalonika, nine ipaleleomo mbo'u i Paulu pau-Do Ue Ala i Berea, mehawe iramo mbo'u i ra'ai mpomposingki ka mpokodanggarao aroado mia hadio. 14Sine mpetena ira pepaekompo ka ironga melungka i Paulu lumako a wiwi ntahi, sine i Silasi ka i Timotiu da mo'ia ira i Berea.
15Mia anu mentondao i Paulu mperongaakono hawe i Atena, ka do'amba mpekule ka ipe'oliwiako ira i Silasi ka i Timotiu, ka doronga lumako ndi onae.
I Paulu i Atena
17:16-34
16Kontongaano i Paulu sumikori ira i Atena, masusa ntu'u aroano hangano ikitao, nine kota atuu bukeako tinaha pelahumoaa. 17Onaemo pu'uno a raha tepumpua onae mambetobosi pinewowolo saru to Yahudi ka mia anu medoitoako Ira Ue Ala, ka a olu sompo oleo saru mia anu tepohaweno i tu'ai. 18Ka ba opia ira mbo'u pande mpompewowolo inso a bawaa i Epikurosi ka i Sitoa mpesangki-sangki pau saru onae ka hinao anu motae, ”Hapake anu mingki pinauno mia me'asengi andio?” Sine anu mehano mpotae, ”Engke-engkeno onae anu mompalele pompagurudo pinesombai susua.” Hangano ipaleleo Lele Mawongkoa mongkona Ondae i Yesu ka mongkona pewangua-Do. 19Ka do'amba mewawao i arono terisoa Areopagu ka dompotae, ”Moiko koake kimento'orio pompaguru wo'ohu hapa anu pinagurumu andio? 20Hangano upoporongeakami anu mompokongkohali-hali. Onaemo pu'uno ka kimingki mento'orio, hapake pengkonaano luwuno atuu.” 21Hangano to Atena ka mia mehawe anu mpo'ia i tu'ai nahina tempodo mpoweweu anu susua sangkadio mpompau ke mporonge luwuakoano anu da sarai.
22I Paulu lumako mentade a wawo Areopagu ka ipotae, ”Hei to Atena, kukitao, nine a luwuakoano mpesomba komiu ntu'u a luwuno pe'uea. 23Hangano tempono kupelempa-lempa a ngkotamiu ka kumikita ira parewa pinesombaimiu, kuhaweo mbo'u aasa meda pontunua pesomba meburi: Ndi Ondae Ue Ala anu nahi tino'ori. Hapa pinesombaimiu nahi imento'orio, onaemo anu kupaleleakomiu. 24#1Mok. 8:27; Yes. 42:5; Tin. 7:48 Ondae Ue Ala anu mokogagiomo tolino ka luwuno ihino, Ondae, anu Ondaemo Ueno langi ka tolino, nahi Dopo'ia a laro raha mpesombaa wineweuno kaeno mia, 25ka mbo'u nahi pinekakaako inso a ngkaeno mia, kana hinao kinere-Do, hangano Ondaemo anu mompowee tuwua ka penaa ka luwuakoano a luwuno mia. 26Inso a aasa mia koa Dopokogagiomo luwuno tongku ka luwuno mia ka dompo'iangario asa wawontolino ka Dopakosiako iramo luwuno tempo ka luwuno tidano po'iangado, 27ka dome'ungke Ira ka ba dompoko'angga Ira ka tepohaweako Ira, maupo nahi Do'olai inso ndi ontae sompo mia. 28Hangano i laro-Do tomentuwu, tompelelu, tomekongko kana koa mbo'u anu pinaudo puu mpowadimiu:
Hangano ontae andio inso a inule-Do koa mbo'u Ue Ala.
29Hangano ontae te'inso a inule-Do Ue Ala, si tompompewowolo, nine tade-Do Ue Ala mengkena kana wulaa ke salaka ke watu, wineweu pepalindoa ka pandeno ntu'u mia. 30Ka nami pinewowolo mbo'u tempo monge-mongea, ka kanandio-andio Dopaleleo Ue Ala a mia, nine isua-suamo koa luwudo asalakono ntepidi. 31Hangano Dopakosiomo aasa oleo, a tempo isua Dobitarao temoleo wawontolino anu ta umanggao aasa mia anu Dopakosiomo, umari-Do moweeako ira luwuno mia aasa pompokomanasa mongkona atuu onaemo wangu Ira inso i olodo mia mate.” 32Mansado merongeo mongkona pewangudo mia mate, onaemo ka ihina anu mompopodeu-deu, ka anu mehano mpotae, ”Ambapo kimerongeo upepau mongkona atuu.” 33Ka i'amba i Paulu lumako binta ira. 34Sine ba opia ira tama mentondao ka mpompe'ala-ala, i olodo i Dionisiu, anu mentoro majelisi Areopagu, ka asa mia beine meneeako i Damari, ka mia mbo'u mehano anu mperonga saru ondae.
Currently Selected:
WINEWEUDO TINENA 17: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
