WINEWEUDO TINENA 18
18
I Paulu i kota Korinti
18:1-17
1Umarino atuu i Paulu bintao Atena, ka i'amba lumako i Korinti. 2I Korinti itepohaweakono aasa to Yahudi meneeako i Akiwila, anu te'inso i Pontu. Onae da sarai ihawe inso i Italia saru i Perisikila, kombiano, hangano meparentaomo Datu Kelaudiu, luwuno to Yahudi ka domebintao Roma. I Paulu tetoro a rahado. 3Ka hangano mengkena po'anggaado, mo'iaomo saru ondae. Mo'angga ira meronga-ronga, hangano pada ira puu mpoweweu kema. 4Ka sompo oleo Saba i Paulu mepau a raha tepumpua ka i'ungkeakono ka dompe'ala-alao to Yahudi ka to Yunani.
5Mansado hawe i Silasi ka i Timotiu inso i Makedonia, i Paulu tompaano aroano mokopaleleo pau-Do i Ue, ka sumakosiio a nto Yahudi, nine Ondae i Yesu Ondaemo i Mesia. 6Sine mansado mpe'iwaliakono mia ka mpepaukiakono, itantamio pampawu inso a sangkano ka ipotaeako ira, ”Po'ineeomo ka ite'uwu reamiu a wawo ulumiu omiu-miu; ongkue morina, nahina salaku. Mompu'u kanandio-andio aku lumako a tongku susua.” 7Onaemo ka ipeluarako inso i tu'ai, ka i'amba hawe a rahano asa mia meneeako i Titiu Yusutusu, anu mesomba ndi Ondae Ue Ala, ka anu rahano mehori saru raha tepumpua. 8Sine i Kerisipu, petewawa a raha tepumpua atuu, mompe'ala-alaomo ndi Ondae i Ue meronga saru pe'asa rahano, ka hadio inso a nto Korinti, anu merongeo pompaleleno i Paulu, mpompe'ala-ala ka mpepebaho.
9A asa wongi mepau Iramo i Ue ndi Paulu a laro aasa pongkita, ”Si doito! Paleleomo mpiha pau-Do i Ue ka si komino! 10Hangano Kukongkomiko ka nahina maupo te'asa mia anu ta motiio kaeno ka bobarasaiko, hangano hadio bawaa-Ku i kota andio.” 11Ka mo'iaomo i Paulu i tu'ai i larono asa nta'u ka onoo wula ka ipaguruako ira pau-Do Ue Ala i tonga-tongado. 12Sine mansano i Galio gagi guberenuu i Akaya, mpentade iramo to Yahudi memoroko me'ewaio i Paulu, ka do'amba mewawao i arono pebitaraa. 13Dompotae, ”Onae andio mokomanasaako ira mia ka dompesomba ndi Ondae Ue Ala montonda sala anu nahi pengkena songka Taura.” 14Tempono i Paulu ta mompu'u mepau, mepauomo i Galio a nto Yahudi atuudo, ”Hei to Yahudi, tewala pekalakimiu mongkona aasa polaloa songka ke aasa wineweu mosa'o, lano tekona kutarimao kara-karamiu, 15sine tewala pekalakimiu atuu teposisalaa mongkona pau ke nee ke songka anu tinondamiu, ka po'ineeomo omiu i sa'a me'orusuo; nahi kubehe gagi puu mpobitara a ngkara-kara anu kanandio.” 16Ka i'amba sumaari ira inso a bolongko pebitaraa. 17Onaemo ka domensapoio luwuno mia atuu i Sositene, petewawa a raha tepumpua, ka do'amba mentunduhio i arono pobitaraa atuu; sine i Galio nahi perioo anu gagi atuu.
I Paulu mekule i Antiokia
18:18-23
18 #
Pod. 6:18
I Paulu mo'ia ba opia oleo mbo'u i Korinti. Ka i'amba metompa a luwuno pepaekompo i tu'ai, ka isumomba lumako i Siria, umarino kumeruo wuuno i Kengkerea, hangano montangaomo. I Perisikila ka i Akiwila tumondao. 19Ka i'amba mehawe iramo i Epesu. I Paulu binta ira i Perisikila ka i Akiwila i tu'ai. Onae mewinso a raha tepumpua ka ipepauako ira to Yahudi. 20Dome'emao ndi onae ka ipo'ia tehi-tehine i tu'ai, sine nahi indu ira. 21Onae metompa ka ipotae, ”Aku koa mekule ndi omiu, tewala Dope'eheo Ue Ala.” Ka i'amba sumombaomo inso i Epesu. 22Haweomo i Kaisarea ka mansano mewuatako a ntuwu wita ka ipetabe a bawaa, melungkaomo lumako i Antiokia. 23Mansano ba opia oleo tehineno ipo'ia i tu'ai, melungkaomo mbo'u, ka i'amba sumompoo asa wawo wita Galatia ka Pirigia ka ipokorosoako ira aroado luwuno ana guru.
I Apolo i Epesu
18:24-28
24Kontongaano atuu haweomo i Epesu aasa to Yahudi meneeako i Apolo, anu te'inso i Alesanderia. Onae aasa mia anu pande mepau ka tedoa ito'orio mongkona Wunta Mempori. 25Onae mepaguruomo a nsala-Do i Ue. Moroso ipepau ka mompesu'ui ipompaguru mongkona Ondae i Yesu, sine butu pobahono i Yohane tino'orino. 26Onae mompu'u mosia mompaguru a raha tepumpua. Sine mansado rumongeo i Perisikila ka i Akiwila, dowawao i rahado ka dopesu'uio pauako ira pesalaa lumako ndi Ondae Ue Ala. 27Hangano i Apolo mingki mesakiako lumako i Akaya, luwuno pepaekompo i Epesu mpo'oliwi wunta a ana guru i tu'ai, ka domentotowoo. Sahaweno i Akaya, hangano pompehohawa-Do Ue Ala, onae gagi asa mia anu tedoa mentudu a mia anu mpompe'ala-ala. 28Hangano nahi te'osa menge-ngeako ira to Yahudi i arodo mia hadio ka itisoako ira inso a Wunta Mempori nine Ondae i Yesu Ondaemo i Mesia.
Currently Selected:
WINEWEUDO TINENA 18: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
