WINEWEUDO TINENA 19
19
I Paulu i Epesu
19:1-12
1Tempono i Apolo da kongko i Korinti, i Paulu kontongaanomo sumompoo wita anu olai inso a ngkota ka ihawe i Epesu. I tu'ai ihaweo ba opia ira ana guru. 2Ipotaeako ira, ”Mpohawe komiumo Penaa Memporike, tempono impompe'ala-alamo?” Sine mesangki ira, ”Naapo, maupo merongeo napi kimehori, nine hinao Penaa Mempori.” 3Ka i'amba i Paulu motaeako ira, ”Tewala kanatuu pebaho anu isuake imebinahoako?” Mesangki ira, ”Pobahono i Yohane.” 4#Mat. 3:11; Mrk. 1:4, 7-8; Luk. 3:4, 16; Yoh. 1:26-27 Motae i Paulu, ”Pobahono i Yohane onaemo pobahoa mia anu tepidiomo, ka ipotaeako ira mia hadio, nine asalakono ka dompe'ala-ala Ira anu hawe umarino onae, onaemo Ondae i Yesu.” 5Mansado merongeo pauno atuu, mpepebaho ira a nee-Do Ue Yesu. 6Ka tempono i Paulu dumampoako ira kaeno, metiiomo Penaa Mempori ndi ondae, ka mpompu'u iramo mpepau a mpauno penaa ka mpompau anu ta gagi. 7Porokodo bara'ura ta tehopulu ka orua mia.
8I larono otolu wula i Paulu wela lumako a raha tepumpua i tu'ai ka mosia mompaguru. Hangano pompaleleno i'ungkeakono mokomanasaako ira mongkona Poparentaa-Do Ue Ala. 9Sine hinao ba opia mia anu motea aroado. Nahi domebehe mpompe'ala-ala, tendeano mpepaukiakono Sala ndi Ondae i Ue i arodo mia hadio. Onaemo pu'uno ka ibinta ira i Paulu ka monsia ira ana guru inso ndi ondae, ka sompo oleo mepau a mpesikolaa Tiranu. 10Anu kanandio iweweuo orua nta'u tehineno, onaemo ka domporonge pau-Do i Ue luwuno mia anu mpo'ia i wita Asia, moiko to Yahudi maupo to Yunani.
11Mesala ndi Paulu hadio wineweu-Do Ue Ala anu tedoa kinohali-haliako, 12tendeano mia mpowawa lenso ke sawu anu horio ipakeo i Paulu ka domenaao a wawodo mia memahaki, ka moliuomo hakido ka mpeluarako iramo onitu nsa'o.
Anano i Sekewa
19:13-20
13Ba opia ira mbo'u to Yahudi anu pande mpopakuliako tino'ori, anu mpelempa mesompoo wita atuu, mpo'arahako mempauo nee-Do Ue Yesu a mia anu pinewinsokino onitu nsa'o saru mpebooli dompotae, ”Kutotonaakomiu a nee-Do i Yesu anu pinaleleno i Paulu.” 14Ondae anu mpoweweu kanatuu onaemo opitu mia anano aasa petewawa sando mpesombado to Yahudi anu meneeako i Sekewa. 15Sine sumangki onitu nsa'o, ”Ondae i Yesu kuto'ori Ira, i Paulu kuto'orio, sine omiu, isemake omiu?” 16Ka mia anu pinewinsokino onitu nsa'o atuu melonso ka iperangkami ira ka inangi ira luwu, ranta ka dompolai inso a rahano mia atuu mengkolambe-lambe ka memobebela. 17Anu gagi atuu domento'orio luwu mia mpo'ia i Epesu, moiko to Yahudi maupo to Yunani, ka medoito iramo luwu ka kotele-telelenomo nee-Do Ue Yesu. 18Hadio i olodo anu mpompe'ala-ala iramo, mehawe ka memangaku i arodo mia hadio, nine mehori ira mpoweweu kana wineweu atuu. 19Hadio koa mbo'u i olodo, anu mehori ira ponsihiri, mepumpuo wuntado ka do'amba mentunuo i arodo mia hadio. Olino wunta atuudo tinasere lima pulu nsowu doi salaka. 20Mesala a luwuno anu gagi andio kotele-teleleno ka kopaba-pabawano pau-Do i Ue.
I Demeteriu mompokomarisu i Epesu
19:21-40
21Ka i'amba inso a luwuno atuu tinoono i Paulu ta lumako i Yerusale telalo i Makedonia ka i Akaya. Ipotae, ”Umari aiwa i tu'ai asalakono aku kumitao mbo'u Roma.” 22Ka i'amba tumena ira anu mokowalio orua ira, onaemo i Timotiu ka i Erasitu, mese'elungio lumako i Makedonia, sine onae mo'ia ba opiapo mbo'u tehineno i Asia. 23Bara'ura i tempo atuu hinao marisua langkai mongkona sala ndi Ondae i Ue. 24Hangano hinao asa mia meneeako i Demeteriu, aasa puu mpo'angga salaka, anu moweweu raha-raha memporino pe'uea beine Aratemi inso a nsalaka. Wineweuno atuu mohaweako hasilino anu komba tedei a luwuno puu mpo'anggano. 25Ipumpu ira meronga saru luwuno puu mpo'angga anu mehano a mpo'anggaano atuu ka ipotae, ”Luwumiu pepaekompo, imento'orio, nine manangaito onaemo hasilino po'anggaa andio! 26Kanandio-andio omiu isa'a mengkitao ka merongeo, kana'umpe i Paulu, komba butu i Epesu, sine mingki asa wawo wita Asia mbo'u ipopandei iramo ka mompokontesaa hadio mia ipotae, nine hapa anu wineweuno kaeno mia komba anu pinesombai. 27Ba kanandio pesalaano komba butu po'anggaato mo'ia a laro masukaraa domentetewehio mia, sine raha memporino mbo'u i Aratemi, pe'uea beine langkai atuu, a laro masukaraa nami ta hina pengkonaano. Ka i Aratemi anu dompesombaio asa wawo wita Asia ka asa wawontolino anu monto'ori gau, nami ta pinelangkai.” 28Rumongeo atuu mentekuda iramo ntu'u, ka do'amba mengkokora-kora, dompotae, ”Langkaiomo pabawano i Aratemi pe'uea beine pinesombaido to Epesu!” 29Mentewuka iramo asa kota ka memaroa ntepaerako melako a raha mpepalindoa saru merende ira i Gaiu ka i Aritariku, orua ira to Makedonia ka walino i Paulu a mpelempaano. 30I Paulu ta lumako i tonga-tongado palili atuu, sine nahi dome'eheakono ana guruno. 31Tamoako ba opia ira anu langkai potorodo anu mente'inso i Asia anu mpesambe'eakono i Paulu, mpe'oliwi ndi onae, ka si pewinso a raha mpepalindoa atuu. 32Kontongaano atuu mia anu mpepumpu a laro raha atuu mengkokora-kora; anu asa mia motae kanandio ka anu mehano mpotae kanatuu, hangano anu ntepumpu atuu nahi donte'atora ka hadio inso ndi ondae nahi domento'orio hapa dompepumpuako. 33Ka i'amba asa mia meneeako i Alesande domedandao to Yahudi i arono. Onae mohawe ponto'oriano inso a mia hadio mongkona hapa anu gagi. Ipari-pario tumandeo kaeno ka ta mepau gagi pepokomentee i arodo palili atuu. 34Sine mansado mento'orio, nine onae to Yahudi, mengkora iramo mperonga-ronga bara'ura orua langku tehineno, ”Langkaiomo pabawano i Aritemi pe'uea beine pinesombaido to Epesu!” 35Sine puu mpoburi a ngkota mokorodo ira mia hadio atuu ka ipotae, ”Hei to Epesu! Isemake i wawontolino andio anu nahi to'orio, nine kota Epesumo anu mekariao moiko raha memporino pe'uea beine Aritemi, anu tedoa langkai, sekono tinaha anu metii inso i langi? 36Mongkona atuu nahi pinoko'ewai, onaemo pu'uno imperodo-rodomo ka si memadara mempakosio. 37Hangano imewawa iramo mia andiodo i ndi'ai, maupo nahi domerontuo raha memporino pe'uea beine pinesombaito ka komba dompepaukiakono neeno. 38Gaagi tewala hinao asa mia ta kinalakino i Demeteriu ka puu mpo'anggano, kombake hinao koa pobitaraa ka hinao saru guberenuu, gaagi i tu'aimo dosingge mohaweo pekalakido. 39Ka tewala hinao anu susua po'ehemiu, moikoopo po'ehemiu atuu ipinoko'umari a nterisoado palili anu mentee ntu'u. 40Hangano mpo'ia kita a laro masukaraa kita mentinuluri, nine ontae mpompokomarisu a oleo andio, hangano nahina pepu'uano kita pompohawe pau mokomenteeo pepumpua anu nahi te'atora andio.” Ka umarino mepau kanatuu ipoko'umariomo tepumpudo palili atuu.
Currently Selected:
WINEWEUDO TINENA 19: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
