WINEWEUDO TINENA 20
20
Inso i Makedonia lumako i Toroasi
20:1-12
1Mansano temontoomo marisua atuu, ipoboi ira i Paulu ana guruno ka ipokorosoako ira aroado. Ka umarino metompa, melungkaomo lumako i Makedonia. 2Isompoo wita atuu ka hadio patudu mokorosoako ira aroado pepaekompo i tu'ai. Ka i'amba haweomo i wita Yunani. 3Umarino otolu wula tehineno i po'ia i tu'ai mingkiomo sumomba lumako i Siria. Sine i tempo atuu to Yahudi mpontoo ira mpepateo. Onaemo pu'uno ka ipakosio ta mekule telalo i Makedonia. 4Onae domentondao i Sopateri anano i Pirusu, inso i Berea, ka i Aritariku ka i Sekundu, orua ira inso i Tesalonika, ka i Gaiu inso i Derebe, ka i Timotiu ka orua ira to Asia, onaemo i Tikiku ka i Toropimu. 5Ondae atuu mpelungka tese'elu ka domensikori kami i Toroasi. 6Sine umarino oleo langkai Roti Nahi Peragi mensumomba kami inso i Pilipi ka opaa oleo ka ki'amba mehawe i Toroasi ka ntepohaweako ira. I tu'ai mpo'ia kami opitu oleo tehineno. 7A oleo ko'aasa i larono minggu atuu, tempono kimpepumpu mposiba-siba roti, i Paulu mepauako ira pepaekompo i tu'ai, hangano tinoono ta melungka tisomono. Pepaua atuu tehine hawe porontonga wongi. 8A bolongko i wawono, pepumpuamami, hadio hulu pinolanga. 9Aasa mangalitau meneeako i Eutiku mentoro a pentangoa. Hangano i Paulu mepau tehine ntu'u, mangalitau atuu nahi pokompeteao mongkokoturino. Poko'ariano onae tekoturi rodo ka itedonta inso a ntudano ko'otolu hawe i totono. Tempono domentandeo mia, mateomo. 10Sine i Paulu metii i totono. Onae mebangkuako a wawono mangalitau atuu, ikopuio, ka ipotae, ”Si mpohohoi, hangano da tuwuo.” 11Mansano mekule a bolongko i wawono, i Paulu monsiba-siba roti ka i'amba kumaano; umari mongkaa da tehine mbo'u ipepau, hawe tebosiomo towea. Ka i'amba melungka. 12Kontongaano atuu domewawao mangalitau atuu tuwu lumako i rahano, ka luwuno tedoa ntetarero.
Inso i Toroasi lumako i Miletu
20:13-16
13Omami mpelungka tese'elu melako a ngkapala ka sumomba melako i Asosi, tinoomami kami mentotowoo i Paulu i tu'ai menunu saru pe'oliwino, hangano onae ta mewita melempa ngkaru. 14Mansano itepohaweakami i Asosi, kimewawao a ngkapala, ka ki'amba mpotilaloakono posumombamami melako i Metilene. 15Inso i tu'ai mpotilalo kami mensumomba ka tisomono kime'o'aroo togo Kiosi. A oleo tudano nte'aro kami i Samosi ka asa oleopo mehawe kamimo i Miletu. 16Ipakosiomo i Paulu nahi ta tetoro i Epesu, ka si pingko tempono i Asia. Hangano idaduo ka ipokohawe koa i Yerusale a oleo langkai Pentakosotaa.
Pensuado i Paulu ka luwuno penatuano bawaa i Epesu
20:17-38
17Onaemo pu'uno ka itenao asa mia inso i Miletu lumako i Epesu saru pe'oliwi ka dome'aiwa i Miletu luwu penatuano bawaa. 18Mansado mehawe, ipotaeako iramo, ”Imento'orio, kana'umpe kutuwu i olomiu mompu'u oleo amba-ambano kuhawe i Asia andio: 19A mpe'urumakoku kupo'anggaako Ira i Ue. A laro mpo'anggaa atuu hadio uwoi mataku nte'i'iti ka mararu kupompembasai po'ara-arahako inso a nto Yahudi anu ira mpepate aku. 20Maupo kanatuu nahi kuhori kumolupeo hapa anu mentudu ndi omiu. Luwuno kupaleleo ka kupaguruakomiu, moiko i arono mia hadio maupo a luwuno tepumpua a rahamiu; 21mesakosii aku mpiha a nto Yahudi ka a nto Yunani, ka dontepidi ndi Ondae Ue Ala ka mpompe'ala-ala ndi Ondae Ueto, i Yesu Kerisituu. 22Sine kanandio-andio gagi mia tinawa-Do Penaa aku lumako i Yerusale ka nahi kuto'orio hapa anu ta gagi a ngkoroiku i tu'ai 23umarino anu pinokomengkaa-Do Penaa Mempori ndi ongkue inso a ngkota lumako a ngkota, nine torungku ka marasaia sumikori aku. 24#2Tim. 4:7 Sine maupo tedei nahi kuperioo penaaku, polomo koa ka kupokohaweo garesi pokotompa ka moko'umario anggaa anu Dotenaakune Ue Yesu ka kupesakosii mongkona Lele Mawongkoa pompehohawa-Do Ue Ala. 25Ka kanandio-andio kuto'orio, nine nami komiu mengkitao mbo'u rupaku, luwumiu anu kutepohaweakomiumo paleleo Poparentaa-Do Ue Ala. 26Onaemo pu'uno a oleo andio mesakosii aku ndi omiu, nine ongkue morina, nahina salaku maupo ndi sema anu ta mate. 27Hangano nahi kukolupeo paleleo luwuno tinoo-Do Ue Ala ndi omiu. 28Onaemo pu'uno imedagaiomo koroimiu ka luwuno bawaa, hangano omiumo anu pinakosi-Do Penaa Mempori gagi puu mpompakambi anu pakambi ira bawaa-Do Ue Ala anu Dotolosiakono rea-Do Ana-Do. 29Kuto'orio, nine ba lumako akumo, serigala anu melambaha ira mpewinso i tonga-tongamiu ka nahi ta hina pompehohawado a bawaa atuu. 30Maupo inso i olomiu ta hina ba opia mia, anu saru pompaguru nahi mentee me'ungkeakono popandei ira ana guru inso a nsala anu mentee ka domentonda ira. 31Onaemo pu'uno impentangkoromo ka impewowoloo, nine ongkue otolu nta'u tehineno, meene wongi, nahi kupenaa-naa patudu komiu nte'o'asa mia meronga uwoi mata. 32Ka kanandio-andio kupeweengakomiu ndi Ondae i Ue ka a mpau pompehohawa-Do, anu pabawa wangu komiu ka moweeakomiu tia anu pinakosiako luwuno mia anu Dopokomemporiomo. 33Salaka ke wulaa ke sangka nahi kuhori mosisiriakono maupo inso ndi semamo koa. 34Imento'orio liomiu, nine kaeku ongkueku kupo'anggaako ka isompo kinereku ka kineredo wali-waliku a mpelempaaku. 35A luwuakoano kupoweeakomiumo pandiri, nine ba topo'angga kanandio asalakono ka totulungi ira mia anu memolema ka asalakono topewowoloo pau-Do Ue Yesu, hangano Ondae isa'a motae: Me'uraopo mompowee sekonopo montarima.” 36Umarino mepau kanatuu menggolontu i Paulu ka dompekakai mperonga-ronga saru luwudo. 37Ka mpengese iramo luwu mesensedu ka domengkopuio i Paulu, dompopowali-walio mewoo-wooo. 38Tedoa ira mpompemasusa, tamoako hangano ipauo, nine nami ira mengkitao mbo'u rupano. Ka do'amba mporontoo hawe a ngkapala.
Currently Selected:
WINEWEUDO TINENA 20: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
