WINEWEUDO TINENA 21
21
I Paulu i kota Tirusu ka i kota Kaisarea
21:1-14
1Umarino pensuaa anu mobea atuu mpelungka kamimo ka ntetutu mensumomba te'aro i Kosi. Tisomono mehawe kamimo i Rodoso ka inso i tu'ai melako kami i Patara. 2I Patara mpohawe kami kapala, anu ta mesakiako lumako i Penisia. Mpe'ula kami a ngkapala atuu, ka kimensumomba. 3Ka i'amba tengkita Sipuru i manggali, sine kimelaloo ka nte'aro i Siria. Poko'ariano mehawe kamimo i Tirusu, hangano inulano kapala asalakono pinotii a ngkota atuu. 4I tu'ai melako kami ntepohaweako ira ana guru ka mpo'ia i tu'ai opitu oleo tehineno. Hangano pepopoto'ori-Do Penaa ana guru atuudo mempauakono i Paulu ka si lako i Yerusale. 5Sine mansano laloomo tempono, mpelungka kami mpotilaloakono pelempaamami. Luwuno ana guru saru beinedo ka anado mporonto kami hawe i bungkuno kota; ka i wiwi ntahi mpenggolontu kami ka mpekakai. 6Umari mpetompa mpe'ula kami a ngkapala, ka ondae mpekule i raha. 7Inso i Tirusu mehawe kami i Potolemai ka i tu'ai poko'arianomo posumombamami. Mpetabe kami a mpepaekompo ka mpo'ia asa oleo i olodo. 8#Tin. 6:5; 8:5 Tisomono mpelungka kami inso i tu'ai ka mehawe i Kaisarea. Mpewinso kami a rahano i Pilipu, puu pompalele Lele Mawongkoa atuu, onaemo aasa inso a opitu mia anu bininiki i Yerusale, ka mpo'ia kami i rahano. 9I Pilipu hinao anano opaa ira ana beine anu mpohawe pompowee mpompau anu ta gagi.
10 #
Tin. 11:28
Mansano ba opia oleo kimpo'ia i tu'ai, haweomo aasa nabi inso i Yudea meneeako i Agabu. 11Onae aiwa ndi omami, ka i'amba umalao peboo ntongano i Paulu. Ka iponguo karuno ka kaeno onaeno ipotae, ”Kanandiomo pau-Do Penaa Mempori: Kanandiomo mia anu me'ueo peboo ntonga andio ira memponguo to Yahudi i Yerusale ka pineweengako a ngkaedo tongku susua.” 12Rumongeo atuu mperonga-ronga saru ana guru a mpo'ianga atuu me'emao, i Paulu ka si lako i Yerusale. 13Sine sumangki i Paulu, ”Tembio ka impengese ka ba kanandio imerago-ragoo aroaku? Hangano ongkue andio tetinda komba butu ka kupinongu, sine saru mbo'u mate i Yerusale hangano nee-Do Ue Yesu.” 14Hangano nahi behe tumarimao paumami, mentedungku kami ka kimpotae, ”Ka igagimo po'ehe-Do i Ue!”
Tepohawedo i Paulu saru i Yakobu i Yerusale
21:15-26
15Mansano ba opia oleo tehineno kimpo'ia i Kaisarea, mpopakale kamimo, ka ki'amba mpelungka melako i Yerusale. 16Mperonga saru omami mpetonda mbo'u ba opia ira ana guru inso i Kaisarea. Domewawa kami a rahano asa mia anu meneeako i Manaso. Onae inso i Sipuru ka tehineomo igagi ana guru. Kami mperato a rahano.
17Tempono kimehawe i Yerusale, mawongko aroado luwuno pepaekompo mentotowo kami. 18Tisomono melako kamimo meronga saru i Paulu ntepohaweakono i Yakobu; luwuno penatua mehawe iramo i tu'ai. 19I Paulu metabei ira, ka i'amba tumutuluo nte'o'asa hapa anu wineweu-Do Ue Ala i olodo tongku susua hangano po'anggano. 20Rumongeo atuu dome'unde-unde Ira Ue Ala. Ka do'amba mpotaeakono i Paulu, ”Pepaekompo, kitaomo, sowu-sowuno to Yahudi anu mpompe'ala-ala iramo ka luwudo memokua mpotonda songka Taura. 21Sine domerongeo mongkona omue, nine omue anu paguru ira luwu to Yahudi anu mpo'ia i olodo tongku susua ka dompotolao songkano i Musa, hangano upauo, ka si domentindi ira anado ka si domentuwu mpotonda gauto. 22Gagi kana'umpemo kanandio-andio? Manasa ira merongeo, nine aiwakomo ramai. 23#Pod. 6:13-21 Onaemo pu'uno, weweuomo hapa anu pinaumami andio: I olomami hinao opaa mia anu montanga. 24Wawa iramo meronga saru omue, ka pokomemporiomo koroimu meronga saru ondae ka po'owahiako iramo ka dompokokeruo wuudo; ka luwuno mia ira mento'orio, nine luwuno lele anu merinongedo mongkona omue komba mentee, tendeano kongkomu tumondao songka Taura. 25#Tin. 15:29 Sine mongkona luwuno tongku susua, anu mpompe'ala-ala iramo, kimeburiako iramo luwuno pompakosimami, onaemo asalakono ka dome'olaiakono kaanga anu pinesombaako a lahumoa, rea, bauno kondehora anu mate tinolonggeo ka inso a pebelesua.” 26A oleo tudano iwawa ira i Paulu mia atuudo ka ipokomemporio koroino meronga saru ondae, ka i'amba mewinso a Raha-Do Ue Ala ka ipauo, ke te'ipia pompokomemporia ta umari ka pesombano asa mia ka asa mia ta pinesombaako.
I Paulu rinako
21:27-36
27Mansano tamo ronga tampula tempo opitu oleo atuu, to Yahudi anu mehawe inso i Asia, mengkitao i Paulu a laro Raha-Do Ue Ala, ka do'amba mposingki ira palili ka domerakoo, 28saru mpebooli, ”Hei to Isaraeli, impontulungi! Ndiomo mia anu i sua-suamo koa paguru ira luwuno mia ka dome'ewaio tongkuto ka me'ewaio songka Taura ka po'ianga andio! Ka kanandio andio iwawa ira mbo'u to Yunani a laro Raha-Do Ue Ala ka mengkokoburutio po'ianga mempori andio!” 29#Tin. 20:4 Hangano domengkitaomo i Toropimu inso i Epesu se'eluno meronga saru i Paulu a ngkota, ka potaedo, nine iwawaomo i Paulu a laro Raha-Do Ue Ala. 30Ka ntewukaomo asa ngkota, ka palili mehawe mpenggowo, ka do'amba merakoo i Paulu ka merendeo meluarako inso Raha-Do Ue Ala ka i tempo koa mbo'u atuu luwuno pewowa langkaino Raha-Do Ue Ala tinondo.
31Kontongaado mpontoo ira mpepateo, haweomo lele a mpetewawado sorodadu, nine ntewuka asa kota Yerusale. 32Mompari-pari petewawado sorodadu atuu wawa ira sorodadu ka ba opia ira petewawa ka domelako tepohaweako ira mia hadio atuu. Mansado mengkitao ka sorodadu atuudo, mpenaa-naa iramo mentunduhio i Paulu. 33Petewawa sorodadu atuu umpedaakono i Paulu, irakoo ka metena ponguakono orua rante, ka i'amba mesikeno isemake onae ka hapamoke anu wineweuno. 34Sine i olodo mia hadio atuu hinao anu mebooli onae kanandio, hinao mbo'u anu mebooli onae kanatuu. Ka hangano dompohohoi atuu nahi pokonto'orio hapa menteeano anu gagi. Onaemo pu'uno ka ipetena wawao i Paulu a mpo'iangado sorodadu. 35Mansano hawe a ensa domentandeo sorodadu hangano mpehihidi ira mia hadio, 36anu ntehuhu mentondao, saru mpebooli, ”Impepateo!”
I Paulu mo'ema mepau
21:37-40
37Tempono tamo winawa i Paulu mewinso a mpo'iangado sorodadu, ipotaeakono petewawado sorodadu atuu, ”Moiko koake ba kupompau hapa ndi omiu” Isangkio, ”Monto'orikoke pau Yunani? 38Gaagi omue komba to Masiri atuu, anu da sarai andio moweweu pe'ewaa ka iwawa ira mpolai pato nsowu mia mporisui mpowawa parewa mpetea melako i pada one?” 39Sumangki i Paulu, ”Ongkue to Yahudi, inso i Tarusu, palili inso a ngkota anu teto'ori i Kilikia; ku'emao, ka ku'ineheako mepauako ira mia hadio atuu.”
40Mansano umeheakono petewawado sorodadu atuu i Paulu, lumakoomo mentade a ensa ka itandeo kaeno moweeako ira petondoni a mpalili atuu; mansado mperodo-rodo, mompu'uomo mepauako ira a mpau Ibarani, ipotae:
Currently Selected:
WINEWEUDO TINENA 21: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
