WINEWEUDO TINENA 6
6
Opitu mia bininiki mpopekakaako mia mongkokolaro
6:1-7
1I tempo atuu, ana guru koteti-tetiangino hadiodo, hinaomo anu mpewuruki i olodo to Yahudi anu mpepau Yunani a nto Ibarani, hangano petiaa a ntuwu beinedo kinolupe a pompekakaakodo sompo oleo. 2Onaemo pu'uno ana guru hopulu ka orua atuu ka dompoboi ira luwu ana guru mpepumpu ka dompotae, ”Nahi kimpompesompo, hangano nahi kimempaleleo pau-Do Ue Ala ka kimpompekakaako a meda. 3Onaemo pu'uno, luwuno pepaekompo, impobinikimo opitu mia inso i olomiu, anu teto'ori moiko, ka anu bukeako Penaa ka ponto'ori anu mentee, ka kimpontoro ira a anggaa atuu, 4ka omami ka kimpo'asao pinewowolo a mpekakai ka mpompau pau-Do Ue Ala.” 5Pinau atuu domentarimao moiko luwuno bawaa, ka do'amba mebinikio i Setepanu, asa mia anu bukeako pompe'ala-ala ka Penaa Mempori, ka i Pilipu, i Perokoru, i Nikano, i Timoni, i Paramena ka i Nikolau, asa mia anu me'agama Yahudi inso i Antiokia. 6Ondae atuu mewinawa i arodo tinena, ka do'amba mpekakai tinena atuu ka menaao kaedo i wawodo.
7Kotepale-paleleno pau-Do Ue Ala, ka koteti-tetiangino hadiodo ana guru i Yerusale; hadio mbo'u sando mpesomba anu mpetonda mpompe'ala-ala.
Pontuluri ndi Setepanu
6:8-15
8Ka i Setepanu, anu bukeako pe'aroa ka pabawa, moweweu hadio anu mengkinohali-haliako ka petondoni i olodo mia hadio. 9Sine mehawe iramo ba opia mia inso a bawaa Yahudi anu nineeako bawaado to Liberetini – bawaa atuudo onaemo mia anu nte'inso i Kirene ka inso i Alesande – mperonga saru ba opia ira to Yahudi inso i Kilikia ka inso i Asia. Mia atuudo mpesangki-sangki pau saru i Setepanu, 10sine nahi dompoko'ewaio ponto'orino ka Penaa anu tumenao ka ipepau. 11Ka do'amba mposingki ira ba opia mia ka dompotae, ”Kimerongeomo ipepaukiako ira i Musa ka Ondae Ue Ala.” 12Kanatuumo pesalaado mpoweweu aasa tepotowoa i olodo mia hadio saru mia memota'u ka anu mponto'ori Taura; domerakoo i Setepanu, merendeo ka domewawao i arono Puu Mpobitara Agama. 13Ka do'amba mpowawa hadio sakosii mpegaupi anu mpotae, ”Mia andio wela mpiha mompau anu mokongkodeio po'ianga mempori andio ka songka Taura, 14hangano kimerongeomo ipotae, nine Ondae i Yesu, to Nasare atuu, Ira mobangkuo po'ianga andio ka balio gau anu iweeakita i Musa.” 15Luwuno mia anu mpentoro a nterisoa Pobitaraa agama atuu mekokontoo i Setepanu, ka do'amba mengkitao rupano i Setepanu mengkena kana rupano aasa mala'eka.
Currently Selected:
WINEWEUDO TINENA 6: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
