WINEWEUDO TINENA 7
7
Pe'alaakono i Setepanu
7:1-53
1Motae Sando Mpesomba Langkai, ”Menteeke kanatuu?” 2#Teg. 11:27–17:14 Sumangki i Setepanu, ”Hei pepaekompo ka ama luwumiu, imerongeomo! Ondae Ue Ala anu Tedoa Maramba mepopokita Iramo ndi Burahima uempu'uto, tempono da ipo'ia i Mesopotamia, se'eluno napi po'ia i Harani, 3ka Dopepau ndi onae: Peluarakomo inso i witamu ka pe'etumu ka lakomo i wita anu Aku tumisoakomu. 4Onaemo ka ipeluarako inso i witado to Kasidimi, ka i'amba mo'ia i Harani. Ka mansano mate amano, Dotenao Ue Ala ka ipelimba inso i tu'ai i wita andio, po'iangamiu kanandio-andio; 5#Teg. 12:7; 13:15; 15:18; 17:8 ka i tu'ai Ondae Ue Ala nahi Dopoweeakono tia pusaka, maupo te'asa mpelandaa nahina, sine Dodandiakono Ira weeakono wita atuu gagi tiano ka tiado inuleno, maupo i tempo atuu napi hina anano. 6#Teg. 15:13-14 Kanandiomo pau-Do Ue Ala, onaemo nine inuleno ira megagi mia hawe i wita susua ka nine ira mempine'ata ka mewineweu nsa'o pato etu nta'u tehineno. 7Sine tongku anu ta me'ata ira atuu ta hinuku, pau-Do Ue Ala, ka umarino atuu ira mpeluarako inso i tu'ai ka mpesomba ndi Ongkue a mpo'ianga andio. 8#Teg. 21:2-4; 25:26; 29:31–30:24; 35:16-18 Ka Do'amba Ue Ala moweeakono pedandia mpetindi; ka kanandiomo ipine'anaako i Saki anano i Burahima, ka i'amba tumindio a oleo anu ko'oalu; ka i Yako anano i Saki ka hopulu ka orua ira uempu'uto anano i Yako.
9 #
Teg. 37:1–50:14
Hangano kohilido uempu'uto, i Yusupu dome'asao i wita Masiri, sine onae Dokongkomio Ue Ala, 10ka motolao inso a luwuno pompokonsii ka mehohawao pompehohawa ka ponto'ori, tempono ipe'aro ndi Pirao, mokoledo to Masiri. I Pirao motoroo gagi pabawaio wita Masiri ka a luwuno langkanaeno. 11Ka haweomo mokoninggoa umaluo asa wawo wita Masiri ka wita Kana'a saru marasaia anu langkai, ranta uempu'uto nahi dompohawe kaanga. 12Sine mansano rumongeo i Yako, nine i wita Masiri hinao gandu, itena ira uempu'uto melako i ra'ai. Onaemo atuu lakodo anu amba-ambano; 13a lakodo anu kompenduano mepopoto'oriomo i Yusupu a mpepaekompono, ka i'amba teto'oriomo ndi Pirao insoano i Yusupu. 14Ka i'amba i Yusupu metena lumako umalao amano, ka luwuno pe'etuno, pitu pulu ka olima mia hadiono. 15Ka i'amba lumakoomo i Yako i wita Masiri. I tu'ai imate, onae ka uempu'uto; 16wata ngkoroido linimba i Sikemi ka kinaburu a ngkaburu anu inoliakono i Burahima doi salaka inso a anano i Hemoro i Sikemi. 17#Pel. 1:7–3:10 Sine korangku-rangkuno ihiiano dandi anu Doweeakono Ue Ala i Burahima, koteti-tetiangino hadiodo tongku atuu i wita Masiri, 18hawe ka ipentade aasa mokole susua meparenta i wita Masiri, asa mia anu nahi to'orio i Yusupu. 19Mokole atuu mopo'oo ira tongkuto ka weweunsa'o ira uempu'uto saru metena ka domentadi ira anado anu da sarai ipine'anaako, ka si dontetiangi tongkuto. 20I tempomo atuu ipine'anaako i Musa ka onae montama a pongkita-Do Ue Ala. Otolu wula tehineno ipinekaria a rahano amano. 21Ka i'amba tinadi, sine ibinio ana beineno i Pirao ka metena mekariao kana anano onaeno. 22Ka i Musa pinaguru a luwuno ponto'orido to Masiri, ka onae pabawa a mpepauno ka wineweuno.
23I tempono tinuwuno pato pulu nta'u, hinaomo aroano ta lumako tepohaweako ira pepaekompono, onaemo to Isaraeli. 24Tempo atuu ikitao asa mia wineweu nsa'ono to Masiri, ka i'amba tumulungio ka i'ala-alaakono mia atuu mepateo to Masiri atuu. 25Iko'aro-aroa ira koa mpokonto'orio pe'etuno, nine onae pesalaa-Do Ue Ala kumadudui ira, sine nahi dompokonto'orio. 26Tisomono onae hawe mbo'u tempono orua ira to Isaraeli kontongaado metitidu, ka i'amba merokuhi mokomoiko ira, ipotae, ”Pepaekompo! Kombake omiu andio mepaekompo? Tembio ka imambe weweu nsa'o?” 27Sine mia anu moweweu sala a walino atuu nahi perorongeakono i Musa ka ipotae: Isemake anu motoroko gagi petewawa ka puu mpobitaramami? 28Nde tinoomu komepate aku, mengkena kana indiawai upepateo to Masiri atuu? 29#Pel. 18:3-4 Rumongeo pau atuu, molaiomo i Musa ka tuwu gagi mia hawe i wita Midia. I tu'ai dohina orua ira anano tama.
30Ka umarino patopulu nta'u ikitaomo aasa mala'eka i pada one torukuno Sinai a laro langano api anu meluarako inso a ntonga ewo rui. 31Ikohali-haliakono i Musa mongkona anu kinitano atuu, ka tempono lumako i tu'ai ta kumitao rangku, haweomo pau-Do i Ue ndi onae: 32Ongkuemo Ue Alado uempu'umu, Ue Alano i Burahima, i Saki ka i Yako. Ka mondidi-ndidiomo i Musa, ka nami sapa mbo'u kumitao. 33Ka Do'amba mepau Ue Ala ndi onae: Lohuomo sapatumu, hangano po'ianga pentadeamu atuu, onaemo wita anu mempori. 34Kupepenteeomo ntu'u marasaido bawaa-Ku i wita Masiri ka Kurongeomo pompemasusado, ka metii Akumo motola ira; onaemo pu'uno aiwamo, omue Aku tumenako lumako i wita Masiri.
35I Musa andio, anu nahi domperorongeakono, ka dompotae: Isemake anu motoroko gagi petewawa ka puu mpobitara? – I Musa koa mbo'u andio anu Dotenaomo Ue Ala mesala a mala'eka gagi petewawa ka anu mongkadudui, anu mepopokita Iramo ndi onae a ntonga ewo rui atuu. 36#Pel. 7:3; 14:21; Pod. 14:33 Onaemo anu wawa ira mpeluarako saru mompokohina anu mengkinohali-haliako ka hadio petondoni i wita Masiri, i Tahi Motaha ka i pada one, patopulu nta'u tehineno. 37#Win. 18:15, 18 I Musa koa mbo'u andio anu motaeako ira to Isaraeli: Aasa nabi kana ongkue andio Ira mokohinaakomiu Ue Ala inso i olodo pepaekompomiu. 38#Pel. 20:18-21 I Musamo andio anu gagi po'oloti a bawaa i pada one i olodo mala'eka anu mepau ndi onae i torukuno Sinai ka uempu'uto; ka onaemo anu tumarimao pau anu tuwu ka ipohaweo ndi omiu. 39Sine uempu'uto nahi domebehe domperorongeakono, tendeano dompebungkuio. I laro aroado inehedo mpekule i wita Masiri. 40#Pel. 32:1-6 Dompotaeakono i Haruni: Poweweuakamimo ba te'opia pesombaa susua anu ta melempa i aromami, hangano i Musa andio anu wawa kamimo mpeluarako inso i wita Masiri – nahi kimento'orio hapamo anu gagi ndi onae. 41Ka i'amba i tempo atuu mpoweweu ira aasa kana ana nsapi ka mpesombaakono pesomba a lahumoa atuu ka dompo'undeakono hapa anu wineweudo ondaedo. 42#Amo. 5:25-27 Onaemo ka Dopewolili Ue Ala inso ndi ondae ka mo'inee ira mpesomba a anano wula i langi, kana anu teburi a wuntado nabi:
Nde impesombaakonoke ndi Ongkue pesomba sinumbele ka pesomba
i larono pato pulu nta'u i pada one atuu, hei suku isaraeli?
43Nahi mehori, tendeano imenselao kemano i Molo
ka buntala pinesombaino i Repani,
luwuno tinaha anu mewineweumiu atuu ka ipinesombai.
Onaemo ka Aku wawa komiu a laro pontadia, hawe i asambalino raane Babeli.
44 #
Pel. 25:40
Kema Ponsakosii kongko a uempu'uto i pada one, kana petena-Do Ue Ala ndi Musa ka iweweuo montonda pandiri anu ikitaomo. 45Kema atuu anu tinarimado uempu'uto ka a mpetewawano i Yosua winawa mewinso i wita andio, onaemo tempono ipinongko'ala wita andio inso a luwuno tongku susua anu sinaari-Do Ue Ala inso i arodo uempu'uto; Kanandiomo hawe a tempono i Daudi. 46#2Sam. 7:2 I Daudi mohaweomo pompehohawa i aro-Do Ue Ala ka i'emao, ka i'ineheako mowangu aasa po'ianga-Do Ue Alano i Yako. 47#1Mok. 6:1-38 Sine i Salomo koa anu mowanguako Ira Ue Ala aasa raha. 48Sine Ondae Anu Lalu Mantande nahi Dopo'ia a laro hapa anu wineweuno kaeno mia, kana anu pinauno nabi:
49 #
Yes. 66:1-2
Langi onaemo kadera poparentaa-Ku,
ka tolino onaemo pelandaano karu-Ku.
Raha hapake anu komiu mpowangua-Kune,
kanandiomo pau-Do i Ue,
po'ianga kana'umpeke ta gagi penaa-naaa-Ku?
50Kombake kae-Ku Ongkue-Ku anu weweuo luwuno andio?
51 #
Yes. 63:10
Hei mia anu memotea ulu ka anu nahi petindi aroa ka biri, omiu wela me'ewaio Penaa Mempori, mengkena kana uempu'umiu, kanandio koa mbo'u omiu. 52Isemake inso a luwuno nabi anu nahi domeweweunsaoo uempu'umiu? Tendeano dompepate ira mia anu ntese'elu mempaleleo mongkona hawe-Do Mia Mentee, anu kanandio-andio impeweengako Iramo ka mpepate Ira. 53Imentarimaomo songka Taura anu pinohawedo mala'eka, sine nahi mentondao.”
I Setepanu pinepate – i Saulu kongko
7:54–8:1a
54Mansado merongeo anu Mpobitara agama luwuno atuu, tedoaomo ntu'u mahaki aroado. Onaemo ka domengkoroduo ngisido. 55Sine i Setepanu, anu bukeako Penaa Mempori, mentombu i langi, ka i'amba kumitao maramba-Do Ue Ala ka Ondae i Yesu mentade i koana-Do Ue Ala. 56Ka i'amba motae, ”Mentee ntu'u, kukitao langi te'ungkahi ka i Ana Manusia mentade i koana-Do Ue Ala.” 57Ka mengkokora-kora iramo saru metompoo birido mperongaako mensapoio. 58Domerendeo i bungkuno kota, ka do'amba mewunoo. Ka luwuno sakosii menaao lemba meloedo a mpuu karuno aasa mangalitau anu meneeako i Saulu. 59Kontongaado mewunoo i Setepanu mekakai, ipotae, ”Oo Ue Yesu, Itarimaomo penaaku.” 60Kontongaano menggolontu ka ipebooli meroku, ”Ue, siimo Ipopotembiako ira hala andio!” Ka umarino pauo atuu mateomo.
Currently Selected:
WINEWEUDO TINENA 7: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
