WINEWEUDO TINENA 8
8
1aIneheno koa mbo'u i Saulu ba ipinepate i Setepanu.
Poweweunsa'oa a bawaa i Yerusale
8:1b-3
1bI tempo atuu mompu'uomo poweweunsa'oa anu mongkokongiri a bawaa i Yerusale. Ntesiarawo iramo luwu i asa wawo wita Yudea ka Samaria sangkadio luwuno tinena. 2Mia anu mpesomba ntu'u mengkaburuo wata ngkoroino i Setepanu saru mensabangio tedoa mpopemasusa. 3#Tin. 22:4-5; 26:9-11 Sine i Saulu merokuhi bobarasai ira bawaa atuu ka ipewinsoki ira a sompo raha ka iwawa ira tama ka beine mpeluarako ka ipeweengako ira ka domewininso a laro torungku.
I Pilipu i Samaria
8:4-25
4Ondae anu ntesiarawo atuu melakopio asa wawo wita atuu saru mempaleleo Lele Mawongkoa. 5Ka i Pilipu lumako a aasa kota i Samaria ka palele Ira i Mesia a luwuno mia i tu'ai. 6Tempono domerongeo mia hadio atuu pompaleleno i Pilipu ka mengkita luwuno petondoni anu pinokohinano, bobotoli luwu aroado mentarimao hapa anu pinaleleno atuu. 7Hangano hadio mia anu pinewinsokino onitu nsa'o mpeluarako onitu nsa'o atuu saru mpebooli meroku, ka hadio koa mbo'u mia puungku ka mia tiimpa karu anu pinokotompa. 8Onaemo ka itedoa langkai mawongkoa a ngkota atuu.
9Asa mia anu meneeako i Simo anu inso i ndi'upua moweweu sihiri a ngkota atuu ka mokontengiri ira palilino Samaria, ka peleluno kana-kana onae asa mia anu tedoa kinere. 10Luwuno mia, langkai kodei, mentondao ka dompotae, ”Mia andio onaemo pabawa-Do Ue Ala anu teto'ori gagi Pabawa Langkai.” 11Ka domentondao, hangano tehineomo ipokontengiriako ira sihirino. 12Sine kanandio-andio dompe'ala-alao i Pilipu anu paleleo Lele mawongkoa mongkona Poparentaa-Do Ue Ala ka mongkona nee-Do i Yesu Kerisituu, ka mpepebaho iramo, moiko tama maupo beine. 13I Simo mbo'u gagiomo mompe'ala-ala, ka umarino binaho, onae wela merongaakono i Pilipu, ka tengiri tempono ikita ira petondoni ka kinohali-haliakoa langkai anu gagi.
14Mansado merongeo tinena i Yerusale, nine i wita Samaria tinarimaomo pau-Do Ue Ala, domentenao i Peturu ka i Yohane lumako i tu'ai. 15Sahawedo i tu'ai tinena orua ira atuu mekakai, ka dompohawe Penaa Mempori to Samaria atuudo. 16Hangano napi hina maupo te'asa mia petiia-Do Penaa Mempori i olodo, hangano ondae butu mebinaho a nee-Do i Yesu. 17Ka i'amba orua ira dumampoako ira kaedo i wawodo, ka do'amba mpontarima Penaa Mempori. 18Tempono ikitao i Simo, nine ka pompoweea Penaa Mempori hangano tinena atuudo dumampoako ira kaedo, ipontasiako ira doi, 19ka ipotae, ”Ipowee aku mbo'u ngkuda pabawa atuu, tewala kudampoo kaeku i wawono asa mia, ka ipontarima Penaa Mempori.” 20Sine i Peturu motaeakono, ”Po'ineeomo ka itampula doimu atuu saru omue, hangano uko'aro-aroa, nine komoko'oliakono doi pompowee-Do Ue Ala. 21Anu kanandio nahina tia ke to'oriamu, hangano aroamu nahi moleo i aro-Do Ue Ala. 22Gagi tepidimo inso a mpoweweumu anu mosa'o andio ka pekakaimo ndi Ondae i Ue, ka Do'ampuniakomu tinoono aroamu andio; 23hangano kukitao, nine aroamu kanaomo upeu anu mopa'i ka teponguako anu mosa'o.” 24Sumangki i Simo, ”Omiumo mekakaiakune ndi Ondae i Ue, ka si mansa gagi luwuno hapa anu ipauakunemo atuu.”
25Umarido mesakosii ka paleleo pau-Do i Ue, mekule iramo i Yerusale ka a mpelempaado atuu dopaleleo Lele Mawongkoa a hadio inia i Samaria.
Mia langkai potorono inso i wita Etiopia
8:26-40
26Ka i'amba mepauomo asa mala'eka-Do i Ue ndi Pilipu, ipotae, ”Pewangumo ka pelungkamo lumako te'alaako i selata, montonda sala anu montindulu inso i Yerusale lumako i Gasa.” Sala atuu sala anu boni-boni. 27Ka i'amba melungkaomo i Pilipu. Hinao asa to Etiopia, asa mia anu langkai potorono, ka petewawado anu mompekaria arataano i Kandake, mokole beine i wita Etiopia, anu lumako i Yerusale ta mesomba. 28Kanandio-andio mia atuu kontongaano a pelempaa mekule ka mentoro a ngkaretano ka ibasao wuntano Nabi Yesaya. 29Ka i'amba Penaa motaeakono i Pilipu, ”Lakomo i tu'ai ka rangkuhiomo kareta atuu!” 30Mompari-pariomo i Pilipu lumako i tu'ai ka rumongeo anu langkai potorono atuu kontongaano basao wuntano Nabi Yesaya. Motae i Pilipu, ”Ipokonto'orio koake ue hapa anu binasamiu atuu?” 31Sumangki, ”Kana'umpeke aku mokonto'orio, tewala nahina anu montisoakune?” Ka i'amba umemao ka ipe'ula i Pilipu ka mentoro i horino. 32#Yes. 53:7-8 Puu mpau anu binasa atuu kanandio ipotae:
Kana aasa bimba Dowinawa a mposumbelea;
ka kana anano bimba anu bebe i arono mia anu gumontio wuluno,
kanandiomo Dokomino.
33Anu ka Dopinokongkodei melempaomo huku-Do;
isemake anu ta tumutuluo tepu'ua-Do?
Hangano penaa-Do inala inso i tolino.
34Motaeomo anu langkai potorono atuu ndi Pilipu, ”Aku mesikeno ndi omue, mongkona isemake ipotae nabi kanandio? Mongkona koroino onaeno ke mongkona mia susua?” 35Ka mompu'uomo mepau i Pilipu ka me'empehiako puu mpau atuu itutuluakono Lele Mawongkoa mongkona Ondae i Yesu. 36Dopotilaloakono pelempaado, ka hawe i asa po'ianga anu hinao uwoi. Ka i'amba motae anu langkai potorono atuu, ”Kitao, i tu'ai hinao uwoi; hapake montombolei, ba kubinaho?” [37Sumangki i Pilipu, ”Tewala mompe'ala-ala komiu tompaano aroamiu, moiko.” Sangkino, ”Kupe'ala-alao, nine Ondae i Yesu Kerisituu onaemo Ana-Do Ue Ala.”] 38Ka i'amba metena to Etiopia atuu mokompenaa-naao kareta atuu, ka dopetii orua ira a laro uwoi, moiko i Pilipu maupo anu langkai potorono atuu, ka ibahoo. 39Ka mansado me'engkahako inso a uwoi, borono Penaa molaiakono i Pilipu ka nami kitao mbo'u anu langkai potorono atuu. Ipotilaloakono pelempaano saru mo'unde. 40Sine ka hinaano i Pilipu kongko i Asidodi. Onae melempa telalo i wita atuu ka mompalele Lele Mawongkoa a luwuno kota ranta ka ihawe i Kaisarea.
Currently Selected:
WINEWEUDO TINENA 8: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
