I YOHANE 19

1Ka i'amba i Pilatu umala Ira i Yesu ka ipontena mia sumepi Ira. 2Sorodadu mpo'ena aasa ramba-ramba ulu inso a haro rui ka domenaao a wawo ulu-Do. Dompokonaako Ira lemba meloe wungo, 3ka kontongaado melako i arono dompotae, ”Tabe, hei mokoledo to Yahudi!” Ka do'amba metampeleo rupa-Do.

4Meluarako mbo'u i Pilatu ka ipotaeako ira, ”Kitaomo, kuwawa Ira meluarako ndi omiu, ka imento'orio, nine nahi kupohawe maupo sala hapa ndi Ondae.” 5Ka Do'amba i Yesu meluarako meramba-ramba uluako rui ka melemba meloe wungo. Ka ipotaeako ira i Pilatu, ”Kita Iramo Mia atuu!” 6Tempono petewawado sando mpesomba ka anu mpodagai atuu mengkita Ira, mpebooli iramo, ”Paso Ira a ngkeu pinotamba, paso Ira a ngkeu pinotamba!” Ipotaeako ira i Pilatu, ”Ime'ala Ira ka imempaso Ira a ngkeu pinotamba; hangano nahi kupohawe maupo sala hapa ndi Ondae.” 7Domesangkio to Yahudi, ”Hinao songkamami ka montonda songka atuu Ondae asalakono mate, hangano Dopauo Ondae AnaDo Ue Ala.”

8Tempono irongeo i Pilatu pau atuu tepaheomo doito, 9ka i'amba mewinso a laro raha pobitaraa ka ipotaeako Ira i Yesu, ”Inso i suake Omiu?” Sine nahi Dosangkio. 10Onaemo ka ipotaeako Ira i Pilatu, ”Nahi Komiu beheke mepauakune? Nahi Ito'orioke, nine pabawa aku motola Komiu, ka pabawa aku koa mbo'u paso Komiu a ngkeu pinotamba?” 11Sumangki Ira i Yesu, ”Nahina maupo hapa pabawamiu ndi Ongkue, tewala pabawa atuu nahi iwineeako inso i wawono. Onaemo pu'uno: onae anu meweenga-Kune ndi omiu, langkaiopo halano.” 12Mompu'u i tu'ai i Pilatu umungkeakono ta motola Ira, sine to Yahudi mpebooli, ”Tewala ipotola Ira, omiu komba sambe'edo Datu. Sompo mia anu tumuduo koroino kana mokole, i'ewai ira Datu.”

13Mansano rumongeo i Pilatu pau atuu, metenaomo ka Dolinuarako i Yesu, ka ipentoro a ngkadera pobitaraa, a mpo'ianga anu meneeako Litosotoroto, a mpau Ibarani Gabata. 14Oleo atuu onaemo oleo pepatindaa oleo langkai Pasa, bara'ura langku hopulu ka orua. Ipotaeako ira i Pilatu to Yahudi atuudo, ”Ndiomo mokolemiu!” 15Ka mpebooli iramo, ”Pepate Ira! Pepate Ira! Paso Ira a ngkeu pinotamba!” Ipotaeako ira i Pilatu, ”Asalakonoke ka kupasoo a ngkeu pinotamba mokolemiu?” Mesangki ira petewawado sando mpesomba, ”Nahina mokolemami sangkadio ondae Datu!” 16aPoko'ariano i Pilatu meweengako Ira i Yesu ndi ondae ka Dopinaso a ngkeu pinotamba.

Ondae i Yesu pinaso a ngkeu pinotamba

19:16b-27

(Mat. 27:32-38; Mrk. 15:21-27; Luk. 23:26, 33-43)

16bDome'ala Ira i Yesu. 17Meluarako Ira ka Dopo'ahao keu pinotamba-Do lumako a mpo'ianga anu meneeako Po'iangano Taku ulu, a mpau Ibarani: Gologota.

18Ka i tu'ai Domempaso Ira a ngkeu pinotamba ka meronga saru Ondae pinaso mbo'u a ngkeu pinotamba orua mia susua, mompombali, Ondae i Yesu i tonga-tongano. 19Ka metena i Pilatu ka ipinonaako mbo'u binuri i wawono keu pinotamba atuu, unino, ”I Yesu to Nasare, Mokoledo to Yahudi.” 20Hadio to Yahudi anu mebasao binuri atuu, hangano po'iangano pasoa-Do i Yesu a ngkeu pinotamba umpeda a ngkota ka pau atuu teburi a mpau Ibarani, pau Lati, ka pau Yunani. 21Mpotae iramo petewawa sando mpesombado to Yahudi ndi Pilatu, ”Si burio: Mokoledo to Yahudi, sine nine Ondae pauo: Ongkuemo Mokoledo to Yahudi.” 22Sumangki i Pilatu, ”Hapa anu binuriku, kongkono teburi.”

23Umarino sorodadu atuudo mempaso Ira i Yesu a ngkeu pinotamba, dome'alao sangka-Do ka do'amba mentiao gagi opaa ntia tiano sompo-sompo sorodadu asa ntia – ka lemba meloe-Do mbo'u dome'alao. Lemba meloe atuu nahina seuno, hinoru menggoe inso i wawono hawe i totono. 24#Pud. 22:19 Onaemo pu'uno ka dompepau-pau, ”Siimo tomentia-tiao gagi te'opia mpole, sine moikoopo tome'undio ba isema anu humaweo.” Kanandiomo gagiano ka i'inihiimo anu teburi a Wunta Mempori,

”Dompetia-tiao sangka-Ku i olodo

ka lemba meloe-Ku dome'undio.”

Luwuno atuu domeweweuomo sorodadu atuu. 25Ka umpeda a ngkeu pinotamba-Do i Yesu mentade ira ine-Do ka pepaekompono ine-Do, i Maria, beineno i Keleopa ka i Maria Madalena. 26Tempono Dokitao i Yesu ine-Do ka ana guru-Do anu pinehohawa-Do i horido, Dopotaeako ira ine-Do, ”Ine, ndiomo, anamiu!” 27Ka Do'amba motaeakono ana guru-Do, ”Ndiomo inemu!” Ka mompu'u i tempo atuu ana guru atuu tumarima ira i rahano.

Ondae i Yesu mate

19:28-30

(Mat. 27:45-50; Mrk. 15:33-37; Luk. 23:44-46)

28 # Pud. 22:16; 69:22 Umarino atuu, hangano Doto'orio i Yesu, nine luwuakoano umariomo, mepau Iramo – ka i'inihiimo anu teburi a Wunta Mempori –, ”Mokoranga Aku!” 29I tu'ai hinao aasa mangko bukeako anggoro anu mo'olo. Ka dompo'ala beri nsawu me'emoo a anggoro mo'olo atuu, ka dometangkeiakono intowu, ka do'amba mpo'itio a wiwi-Do i Yesu. 30Umari-Do uminuo i Yesu anggoro mo'olo atuu, motae Iramo, ”Umariomo!” Ka Do'amba metuundu ka Dopeweengakono penaa-Do.

Lompe-Do i Yesu tinobo

19:31-37

31Hangano oleo atuu oleo pepatindaa ka si po'ia wata ngkoroi atuudo tendoe a ngkeu pinotamba a oleo Saba – hangano oleo Saba atuu onaemo oleo langkai – onaemo ka domehawe to Yahudi ndi Pilatu ka me'emao ndi onae ka domempinudu karudo mia atuudo ka wata ngkoroido ka ipinotii. 32Ka mehawe iramo sorodadu ka do'amba mempuduo karuno mia anu amba-ambano ka karuno mia anu aasa mbo'u anu pinaso a ngkeu pinotamba meronga saru Ondae i Yesu; 33sine mansado mehawe ndi Ondae i Yesu ka domengkitao nine mate Iramo, nahi domempuduo karu-Do, 34sine asa mia i olodo sorodadu atuu tumoboakono talombo lompe-Do, ka ronga meluarako rea ka uwoi. 35Ka mia anu kumitaakono onaeno anu gagi atuu onae anu mompowee ponsakosii andio ka ponsakosiino mentee, ka ito'orio, nine onae mompau menteea, ka omiu mbo'u impe'ala-alao. 36#Pel. 12:46; Pod. 9:12; Pud. 34:21 Hangano luwuno atuu gagi, ka i'inihiimo anu teburi a Wunta Mempori, ”Nahina wuku-Do anu ta pinudu.” 37#Sak. 12:10; Meng. 1:7 Ka hinao mbo'u teburi a Wunta Mempori anu motae, ”Ira mpengkita ndi Ondae anu umari tinobodo.”

Ondae i Yesu kinaburu

19:38-42

(Mat. 27:57-61; Mrk. 15:42-47; Luk. 23:50-56)

38Umarino atuu i Yusupu inso i Arimatea – onae ana guru-Do i Yesu, sine mewuni-wuni hangano idoitoako ira to Yahudi – mo'ema ndi Pilatu, ka i'ineheako motiio wata ngkoroi-Do i Yesu. Ka i Pilatu uminduo po'emano atuu. Ka i'amba aiwaomo ka ipotiio wata ngkoroi atuu. 39#Yoh. 3:1-2 I Nikodemu mbo'u hawe i tu'ai. Onaemo anu hawe amba-ambano tempono wongi ndi Ondae i Yesu. Onae mowawa lana mire sinaloako lana gaharu, bara'ura lima pulu kati mobeano. 40Do'alao wata ngkoroi-Do i Yesu, dotongoakono sawu lena ka doponaakono rampa-rampa montonda gaudo to Yahudi ba dompokaburu mia mate. 41Umpeda a mpasoa-Do i Yesu a ngkeu pinotamba hinao aasa bonde ka i larono bonde atuu hinao aasa kaburu wo'ohu anu i larono napi hori dompekaburuio mia. 42Hangano oleo atuu oleo pepatindaado to Yahudi, sekono kaburu atuu komba olai po'iangano, onaemo ka donaao wata ngkoroi-Do i Yesu i tu'ai.

Currently Selected:

I YOHANE 19: XMZ

Highlight

Copy