I YOHANE 20

Pewangu-Do i Yesu

20:1-10

(Mat. 28:1-10; Mrk. 16:1-8; Luk. 24:1-12)

1A oleo amba-ambano minggu atuu, mo'o-mo'oru ntu'u tempono da wongi-wongi, lumakoomo i Maria Madalena a ngkaburu atuu ka ikitao nine watu inalaomo inso a ngkaburu. 2Onae melulu tepohaweakono i Simo Peturu ka ana guru susua anu pinehohawa-Do i Yesu, ka ipotaeako ira, ”Ondae i Ue dome'ala iramo mia inso a ngkaburu-Do ka nahi kuto'orio ba isua Doninaa.”

3Ka melungka iramo i Peturu ka ana guru anu susua atuu lumako a ngkaburu. 4Meronga-ronga dopelulu orua ira, sine ana guru anu susua atuu magasiopo sekono i Peturu onaemo ka itese'elu hawe a ngkaburu. 5Onae melungaako i larono, ka ikitao sawu tongo-Do tepo'ia a wita; sine nahi pewinso i larono. 6Ka haweomo mbo'u i Simo Peturu tumonda lembuio ka ipewinso a laro ngkaburu atuu. Ikitao sawu tongo-Do tepo'ia a wita, 7sekono sawu wewesino ulu-Do anu hieno kongko a ulu-Do i Yesu nahi po'ia umpeda sawu tongo-Do atuu, sine i horino tedei a mpo'ianga anu susua ka tepalulu. 8Ka mewinsoomo mbo'u ana guru anu susua, anu tese'elu hawe a ngkaburu atuu ka ikitao ka ipe'ala-alao. 9Hangano hawe a tempo atuu napi dompokonto'orio ihino Wunta mempori anu pauo, nine asalakono Ira mewangu inso i olodo mia mate. 10Ka i'amba mekule iramo ana guru orua ira atuu i raha.

Ondae i Yesu mepopokita ndi Maria Madalena

20:11-18

11Sine i Maria mentade umpeda a ngkaburu atuu ka ipengese. Kontongaano mengese onae melungaako a laro ngkaburu atuu, 12ka ikita iramo orua mala'eka mesangka mopute, anu asa mia mentoro i uluno umari naapano wata ngkoroi-Do i Yesu ka anu aasa mbo'u i karuno. 13Dopotaeakono mala'eka atuu, ”Ine, tembio ka upengese?” Sumangki i Maria, ”Ondae Ueku dome'ala Iramo mia ka nahi kuto'orio ba isua Doninaa.” 14Umarino mepau kanandio mewoliliomo i bungkuno ka ikita Ira i Yesu mentade i tu'ai, sine nahi to'ori Ira, nine Ondaemo i Yesu. 15Dopotaeakono i Yesu, ”Ine, tembio ka ipengese? Isemake anu inungkemiu?” Potaeno i Maria mia atuu onaemo anu modagai bonde, ka i'amba motaeako Ira, ”Ue, tewala omiu anu umala Ira, ipauakunemo, ba isua inaa Ira, ka kulako umala Ira.” 16Dopotaeakono i Yesu, ”Maria!” Mewolili i Maria ka ipotaeako Ira a mpau Ibarani, ”Rabuni!”, pengkonaano Guru. 17Motae Ira i Yesu ndi onae, ”Si ini aku, hangano napi Kulako ndi Ondae i Ama, sine lakomo a luwuno pepaekompo-Ku ka pauako ira, nine kanandio-andio Aku lumako ndi Ondae Ama-Ku ka Amamu, ndi Ondae Ue Ala-Ku ka Ue Alamu.” 18Lumakoomo i Maria Madalena ka ipotaeako ira ana guru, ”Kukita Iramo i Ue!” ka nine Ondae koa mbo'u anu pauo luwuno atuu ndi onae.

Ondae i Yesu mepopokita a ana guru-Do

20:19-23

(Luk. 24:36-39, 47-49)

19Tempono wongiomo a oleo amba-ambano minggu atuu mpepumpu iramo ana guru-Do i Yesu i asa po'ianga saru luwuno tondono kinunsi hangano medoito ira a nto Yahudi. I tempo atuu hawe Iramo i Yesu ka mentade i tonga-tongado ka Dopotae, ”Rodoa kumongkomi komiu!” 20Ka umari-Do mepau kanandio, Dopopokitaako ira kae-Do ka lompe-Do. Mpo'unde iramo ana guru atuu tempono domengkita Ira i Ue. 21#Mat. 28:18-19; Mrk. 16:15-16 Onaemo ka Dopotae i Yesu pohona mbo'u, ”Rodoa kumongkomi komiu! Mengkena kana Dotena Aku i Ama, kanatuu koa mbo'u Kutena komiu.” 22Ka umari-Do mepau kanandio, Dopuuri ira ka Dopotae, ”Imentarimaomo Penaa Mempori. 23#Mat. 16:19; 18:18 Tewala ime'ampunio halano mia, halano inampuni, ka tewala impotaeakono mia halano mo'ia mpiha, halano mo'ia mpiha.”

Ondae i Yesu mepopokita ndi Toma

20:24-29

24Sine i Toma, asa mia inso a hopulu ka orua ana guru atuu, anu nineeako i Didimu nahi kongko meronga ondae, tempono Dohawe i Yesu i tu'ai. 25Onaemo ka dompotaeakono ana guru anu mehano atuu, ”Kimengkita Iramo i Ue!” Sine ipotaeako ira i Toma, ”Ba napi kukitao hanga mpaso a ngkae-Do ka napi kuwinsoo wunga ngkaeku a laro hanga mpaso atuu ka winsoo kaeku a lompe-Do, nahi aku mompe'ala-ala.”

26Oalu oleo lembuino ana guru-Do i Yesu wali ira mekongko a raha atuu ka i Toma meronga saru ondae. Kontongaano tondo tekunsi, hawe Ira i Yesu mentade i tonga-tongado ka Dopotae, ”Rodoa kumongkomi komiu!” 27Ka Do'amba motaeakono i Toma, ”Naaomo wunga ngkaekumu i ndi'ai ka kitaomo kae-Ku, tasiomo kaemu ka winsoomo a lompe-Ku ka si nahi upompe'ala-ala mbo'u, tendeano pompe'ala-alamo.” 28Sumangki i Toma, ”Oo Ueku ka Ue Alaku!” 29Motae Ira i Yesu ndi onae, ”Hangano ukita Akumo, onaemo ka upompe'ala-ala. Meme'ura iramo anu nahi domengkitao, sine mpompe'ala-ala.”

Tinoono ka ibinuri Lele Mawongkoa andio

20:30-31

30Lano da hadio petondoni susua anu wineweu-Do i Yesu i arono matado ana guru-Do, anu nahi binuri a wunta andio, 31sine luwuno anu tewinso i ndi'ai binuriomo, ka impe'ala-alao, nine Ondaemo i Yesu i Mesia, Ana-Do Ue Ala, ka impohawe tuwua a nee-Do hangano pompe'ala-alamiu.

Currently Selected:

I YOHANE 20: XMZ

Highlight

Copy