ROMA 1
1
Tabea
1:1-7
1Inso ndi Paulu, tetenaa-Do i Yesu Kerisituu, anu pinoboi gagi tinena ka pinokomempori ka ipaleleo Lele Mawongkoa inso ndi Ondae Ue Ala. 2Lele Mawongkoa atuu Dodandiomo se'eluno anu mempinaudo nabi-Do a luwuno wunta mempori, 3mongkona Ana-Do, anu montonda ihi pine'anaako inso a inuleno i Daudi, 4ka montonda Penaa, memporia pinokomengkaa a mpewangu-Do inso i olodo mia mate, nine Ondaemo Ana-Do Ue Ala anu pabawa, i Yesu Kerisituu Ueto. 5Omami mpohawe pompehohawa inso ndi Ondae ka potoro tinena anu tumaate ira luwu tongku, ka dompompe'ala-ala ka mpetenunu a nee-Do. 6Omiu mbo'u tewinso saru ondae, omiu anu mempinoboi komiumo gagi mia-Do i Kerisituu. 7Ndi omiu luwu anu mpo'ia i Roma, anu pinehohawa-Do Ue Ala, anu mempinoboi ka mempinokogagi mia mempori: Pompehohawa ka pe'aroa kumongkomi komiu ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu.
I Paulu ta lumako i Roma
1:8-15
8Amba-ambano ku'unde-unde Ira Ue Ala Ueku mesala ndi Ondae i Yesu kerisituu hangano luwumiu, hangano teleleomo mongkona pompe'ala-alamiu i asa wawontolino. 9Hangano Ondae Ue Ala anu kupo'anggaako Ira tompaano aroaku a pompalelea Lele Mawongkoa mongkona Ana-Do, Ondaemo sakosiiku, nine a laro mpekakaiku kuwela rumambe komiu: 10Mekakai aku, ba Dope'eheo Ue Ala ongkue ka kupohawe tempo tepohaweakomiu. 11Hangano mingki aku kumita komiu ka kupoweeakomiu pompowee-Do Penaa mokoroso komiu, 12onaemo, ka kukongko i olomiu ka topada ntetarero hangano pompe'ala-alato mperonga-ronga, moiko pompe'ala-alamiu maupo pompe'ala-alaku. 13#Tin. 19:21 Pepaekompo, ineheku, ka imento'orio, nine mararuomo kupontoo aku aiwa ndi omiu – sine ranta kanandio-andio wela aku tetombolei – ka kupohawe wua i tonga-tongamiu, kana koa mbo'u i tonga-tongado tongku komba to Yahudi anu susua. 14Ongkue mepasua moiko a nto Yunani, maupo a mia komba to Yunani, moiko a mia tepaguru, maupo a mia nahi tepaguru. 15Onaemo pu'uno ka kumingki paleleo mbo'u Lele Mawongkoa ndi omiu anu mpo'ia i Roma.
Lele Mawongkoa atuu roso-Do Ue Ala
1:16-17
16 #
Mrk. 8:38
Hangano moroso pompe'ala-alaku a Lele Mawongkoa, hangano Lele Mawongkoa onaemo roso-Do Ue Ala anu kumaduduio sompo mia anu mompe'ala-ala, amba-ambano to Yahudi, sine saru koa mbo'u to Yunani. 17#Hab. 2:4 Hangano i larono mengkaa mentee-Do Ue Ala, anu mepu'u inso a pompe'ala-ala ka metewawa a pompe'ala-ala, kana hinao teburi, ”Mia mentee ta tuwuako pompe'ala-ala.”
Pohuku-Do Ue Ala a gau mosa'o ka lambahano mia
1:18-32
18Hangano tekuda-Do Ue Ala mengkaa inso i suruga a luwuno gau mosa'o ka lambahano mia, anu mokonsiio menteea saru lambaha. 19Hangano hapa anu pinokonto'orido mongkona Ondae Ue Ala mengkaa ndi ondae, hangano Dopokomengkaaomo Ue Ala ndi ondae. 20Hangano hapa anu nahi tengkita inso ndi Ondae, onaemo roso-Do anu nahina tampulaano ka pabawa-Do, pinokompewowolo inso a inangga-Do mompu'u ipinokogagi wawontolino, ranta nahi domempolio mpokomenteeo koroido. 21#Eps. 4:17-18 Hangano maupo domento'ori Ira Ue Ala, nahi dompelangkai Ira kana Ondae Ue Ala ke me'unde-unde Ira. Tendeano pinewowolodo gagi nahina tuduno ka aroado anu monge-monge gagi wongi-wongi. 22Mpoweweu ira kana mebukeako ira ponto'ori anu mentee, sine megagi iramo memonge-monge. 23#Win. 4:16-18 Maramba-Do Ue Ala anu nahina tampulaano dome'euakono tinaha kana mia anu ta tampula, manu-manu, kondehora anu mekaru opaa ke kondehora anu melele.
24Onaemo pu'uno ka Dopeweengako ira Ue Ala a mokoburuano anu minosisiriakono aroado, ranta ka dosingge mengkokoburutio koroido. 25Hangano mentee-Do Ue Ala dome'euakono pegaupi ka mpelangkaio ka mpesombaio anu tuwu sine domengkolupeo Anu Mokogagi ira anu asalakono inunde-unde ranta nahina tampulaano, ami. 26Onaemo pu'uno ka Dopeweengako ira Ue Ala a mpo'eheno koroi anu mompokoko'ii, hangano beinedo dome'euomo pewowalido montonda gau ka anu nahi pontonda gau. 27Kanatuu koa mbo'u luwuno tamado mebintao mpewowaliakono kombiado montonda gau ka domambemosisiri pada ondaedo, ranta ka dompoweweu anu mokoburu, tama saru tama, ka onaemo pu'uno ka domentarimao a ngkoroido sulono anu menunu a mpoweweudo hala. 28Ka hangano nami domebehe mpesomba ndi Ondae Ue Ala, onaemo ka Dopeweengako ira Ue Ala a mpinewowolo anu tetotonaa, ranta ka dompoweweu hapa anu nahi tekona: 29bukeako mperupa-rupa molengkua, wineweu mosa'o, mo'uri ka mokoburu, bukeako kohili, pompepatea, teposisalaa, pompopo'oo ka gau mosa'o. 30Ondaemo anu mpompepaukiako, mara mpontuluri, umo'aliaako Ira Ue Ala, nahi domponto'ori gau, mpompelangka-langkai, mpehamba-hamba, mempande a wineweu mosa'o, nahi dompomperorongeako a mia mota'u, 31nahi domponto'ori mpompewowolo, nahi dompetenunu, nahi dompompehohawa, nahi dompe'aroa. 32Hangano maupo domento'orio luwuno anu po'eheno songka-Do Ue Ala, onaemo nine sompo mia anu weweu ira anu kanandio, tekona ihinuku mate, ondae komba butu meweweuo ondaedo, sine dompemoiko ira koa mbo'u anu meweweuo.
Currently Selected:
ROMA 1: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
