ROMA 2
2
Pohuku-Do Ue Ala a luwuno mia
2:1-16
1 #
Mat. 7:1; Luk. 6:37 Onaemo pu'uno, hei mia, maupo isema omue, anu mompokonsala mia susua, omuemu isa'a nahi tola inso a mpoweweu anu sala. Hangano, i larono mompokonsala mia susua, upokonsalao koroimu omuemu, hangano omue anu mompokonsala mia susua, weweu ira anu kanatuu pengkenano. 2Sine tomento'orio, nine pohuku-Do Ue Ala pinotii a menteeano ndi ondae anu mpoweweu kanatuu. 3Ka omue, hei mia, omue anu mokonsala ira anu mpoweweu kanatuu, sekono omue isa'a moweweuko koa mbo'u, nde uko'aro-aroa, nine kotola inso a mpohuku-Do Ue Ala? 4Inehemuke me'uru-uruo langkaino pe'aroa-Do, sabara-Do ka sanaano aroa-Do? Nahi uto'orioke, nine pe'aroa-Do Ue Ala onaemo tumaateko a ntepidia? 5Sine hangano moteano aroamu anu nahi behe tepidi, mohowuko pontekudaako a ngkoroimu omuemu a oleo tempo isua pontekudaako ka pohuku-Do Ue Ala anu moleo ta pinokomengkaa. 6#Pud. 62:13; Pow. 24:12 Ira sumuloakono sompo mia montonda wineweuno, 7onaemo tuwua nahina tampulaano a mia anu mokua moweweu moiko, umungkeo marambaa, pompelangkai ka anu nahi ta tampula, 8sine pontekudaako ka bamburu ndi ondae anu mpo'ungke tiano koroido ondaedo, anu nahi dompetenunu a menteea, tendeano mpetenunu a wineweu mosa'o. 9Marasaia ka ma'isoa ta umaluo sompo mia anu tuwu moweweu anu mosa'o, amba-ambano to Yahudi ka to Yunani mbo'u, 10sine marambaa, pompelangkai ka rodoa ira mehaweo luwuno mia anu mpoweweu moiko, amba-ambano to Yahudi, ka to Yunani mbo'u. 11#Win. 10:17 Hangano Ondae Ue Ala nahi Dopobiniki rupano mia.
12Hangano luwuno mia anu ntehala nahi domento'orio songka Taura ira memate nahi domento'orio songka Taura; ka luwuno mia anu ntehala domento'oriomo songka Taura ira mebinitaraako songka Taura. 13Hangano komba mia anu moronge songka Taura anu mentee i aro-Do Ue Ala, sine mia koa anu weweuo songka Taura anu pinokomentee. 14Tewala luwuno tongku susua anu nahi dompe'umbuo songka Taura po'ehedo ondaedo meweweuo hapa anu po'eheno songka Taura, ka, maupo nahi dompe'umbuo songka Taura, ondae megagi songka Taura a ngkoroido ondaedo. 15Hangano kanatuu dompokomengkaao, nine ihino songka Taura hinao teburi i laro aroado ka pohaweno aroado metonda mesakosii ka pinewowolodo mambe tuluri ke mambe alaako. 16Mongkona atuu ta mengkaa a oleo, menunu saru Lele Mawongkoa anu kupaleleo, Ondae Ue Ala Ira bitarao luwuakoano anu tewuni i laro aroano mia, hangano Ondae i Yesu Kerisituu.
Songka Taura ka petindi nahi pongkadudui to Yahudi
2:17-29
17Sine, tewala impotae omiu to Yahudi ka mpehonda a songka Taura, mawongko ndi Ondae Ue Ala, 18ka mento'orio po'ehe-Do, ka hangano pinaguru a songka Taura, mpokonto'orio isua anu moiko ka isua anu naahi, 19ka memanasao, nine omuemo anu tumaate ira mia morawu ka mewinedo anu a laro wongi-wongiano, 20anu paguru ira mia monge-monge, ka gurudo mia anu napi sompo tinuwudo, hangano a songka Taura upe'umbuo ihiino luwuno ponto'ori ka menteea. 21Gaagi, kana'umpeke omue anu mompaguru mia susua, nahi upaguruoke koroimu omuemu? Omue anu mompaguru, ”Si ponako,” tembio ka omuemu isa'a monako? 22Omue anu mepau, ”Si ponsosabo,” tembio ka omuemu isa'a monsosabo? Omue anu mokoburuakono luwuno lahumoa, tembio ka omue isa'a morontu a raha mpelahumoaa? 23Omue mawongkoakono songka Taura, tembio ka omuemu isa'a mokongkodei Ira Ue Ala lumaloo songka Taura atuu? 24#Yes. 52:5 Kana hinao teburi, ”Nde hanganomo omiu ka ipinepaukiako nee-Do Ue Ala i olodo tongku susua.”
25Metindi lano hinao tuduno, tewala utondao songka Taura; sine tewala ulaloo songka Taura, ka petindimu nami hina mbo'u tuduno. 26Gagi tewala mia anu nahi petindi tumondao luwuno po'eheno songka Taura, nde nahi tinuduke mengkena saru mia anu tinindiomo? 27Tewala kanandio, asalakono mia anu nahi petindi, sine anu tumondao songka Taura, ta bitara komiu anu hinao songka teburi ka mpetindi, sine anu melaloo songka Taura. 28Hangano anu nineeako to Yahudi komba mia anu koroino to Yahudi, ka anu nineeako metindi, komba koroino anu tinindi. 29#Win. 30:6 Sine to Yahudi ntu'u onaemo onae anu nahi tengkita to Yahudino ka petindi onaemo petindi i laro aroa, montonda pompe'ala-ala, komba montonda binuri. Ka unde-undeno komba hawe inso a mia, tendeano inso ndi Ondae Ue Ala.
Currently Selected:
ROMA 2: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
