ROMA 11
11
To Isaraeli anu da tebinta
11:1-10
1 #
Plp. 3:5
Onaemo ka kupesikeno: Polioke bawaa-Do Ue Ala Dopebungkui ira? Mentee ntu'u naahi! Hangano ongkue isa'a mbo'u to Isaraeli, inso a inuleno i Burahima, inso a nsuku Benami. 2Ondae Ue Ala komba Dopebungkui ira bawaa-Do anu bininiki-Do. Ke nahi imento'orio, hapa anu pinauno Wunta Mempori mongkona i Elia, tempono ipohaweo poweweudo to Isaraeli ndi Ondae Ue Ala, 3#1Mok. 19:10 ”Ue, luwuno nabi-Miu dompepate iramo, luwuno meda pontunua pesomba ndi Omiu domerongkaomo; butumo koa ongkue asa-asaku anu da tuwu ka inehedo mpepate aku.” 4#1Mok. 19:18 Sine kana'umpeke pau-Do Ue Ala ndi onae? ”Da pitu nsowupo mia Kupobinta tia-Ku anu nahi dohori mpesomba a Baala.” 5Kanatuu koa mbo'u i tempo andio hinao mo'ia toreano, montonda pobinikino pompehohawa-Do. 6Sine tewala mongkona atuu gagi hangano pompehohawa, ka komba mbo'u hangano wineweu, hangano tewala komba kanatuu, asalakono pompehohawa atuu komba pompehohawa mbo'u. 7Gaagi kana'umpe? To Isaraeli nahi domehaweo hapa anu inungkedo, sine mia anu tebiniki mpohawe iramo. Ka mia anu mehano moteaomo aroado, 8#Win. 29:4; Yes. 29:10 kana hinao teburi,
”Ondae Ue Ala weweu ira ntekoturi rodo,
moweeako ira mata ka si dompongkita
ka biri ka si domporonge,
hawe a oleo kanandio-andio.”
9 #
Pud. 69:23-24
Ka i Daudi motae,
”Po'ineeomo kaanga pinatindado gagi oho ka pompete'umala,
pompokotesaa ka pombaloa ndi ondae.
10Ka po'ineeomo matado ka igagi wongi-wongi, ranta nahi dompongkita,
ka weweuomo torukudo ka imelongku mpiha.”
To Isaraeli ntetidu, tongku susua ntekadudui
11:11-24
11Onaemo ka kupesikeno: Nde ntetidu irake ka asalakono ntebangku? Mentee ntu'u naahi! Sine hangano halado, tekaduduia haweomo a luwuno tongku susua, weweu ira ka domemonsiri. 12Hangano tewala salado pengkonaano kaeano wawontolino, ka makurado kaeado luwuno tongku susua, tamoako mbo'u ba dompompe'ala-ala.
13Kupauakomiu, hei luwuno tongku komba to Yahudi. Hangano ongkue Tinena a luwuno tongku komba to Yahudi, kutuduo atuu marambano pompekakaakoku, 14onaemo ba kumansa mokontesingkao monsiri i laro aroado pe'asa tongkuku montonda tuwu ntolino ka mokontekaduduio ba opia mia inso ndi ondae. 15Nde tewala nahi domentarimao pengkonaano sintuwua i wawontolino, polioke pontarimado hinao pengkonaano susua sekono tuwu inso i olodo mia mate? 16Tewala mempori roti amba-ambano, asalakono luwuno anu sinalo mempori koa mbo'u, ka tewala mempori haka, asalakono luwuno sampano mempori koa mbo'u. 17Onaemo pu'uno tewala pinuduomo ba te'opia sampano ka omiu kana tumba susua pinotakoomo i olono ka mpohawe mbo'u tia a hakano saitu anu buke uwoino, 18si memawongkoakono luwuno sampa atuu! Tewala memawongko komiu, impewowoloo, nine komba omiu anu tumumboo haka atuu, tendeano haka atuu anu tumumbo komiu. 19Bara'ura komiu mpotae: hinao ba opia sampano anu pinudu, ka kupinotako i olono kana tumbano. 20Moikoomo! Mempinudu ira hangano nahi dompompe'ala-ala, ka omiu tepontade moleo hangano pompe'ala-ala. Si mpompelangka-langkai, sine imedoitomo! 21Nde ba nahi Dopehohawa ira Ue Ala lano sampano, nahi Ira mehohawa komiu mbo'u. 22Onaemo pu'uno imengkitaomo pe'aroa-Do Ue Ala ka motea-Do, onaemo motea Ira a mia anu mentedonta iramo, sine ndi omiu pe'aroa-Do, onaemo tewala mekongko komiu mpiha a mpe'aroa-Do; tewala naahi, komiu koa me'inonini mbo'u. 23Sine ondae mbo'u ira wali mempinotako, tewala komba mekongko ira mpiha a laro nahi pompe'ala-alado, hangano pabawa Ira Ue Ala wali motako ira. 24Hangano tewala me'inonini komiu kana sampano saitu anu tuwu onaeno, ka nahi pengkena saru teweweumiu atuu mempinotako komiumo a ngkeu saitu ntu'u, tamoako lahi ondae andio, anu montonda insoado ira mempinotako a ngkeu saitudo ondaedo.
Pongkaduduia to Isaraeli
11:25-36
25Hangano, ka si mpotae mempande komiu pepaekompo, ineheku ka imento'orio rahasia andio: Asa ntia inso a nto Isaraeli megagi iramo motea aroa hawe ka isompo doado luwuno tongku susua mpewinso. 26#Yes. 59:20 Kanandiomo pesalaano luwuno to Isaraeli ira mengkinadudui, kana hinao teburi,
”Inso i Sioni Ira hawe Pontolosi,
Ira umoninio luwuno pinogauno i Yako anu mosa'o.
27 #
Yer. 31:33-34
Ka onaemo andio pedandia-Ku saru ondae,
tewala Ku'oniniako ira halado.”
28Mongkona Lele Mawongkoa dome'ewai Ira Ue Ala hangano omiu, sine mongkona pobiniki ondae pinehohawa-Do Ue Ala hangano uempu'u. 29Hangano komba Dope'o'oleakono Ue Ala pompehohawa ka pepoboi-Do. 30Hangano mengkena kana omiu i ndi'upua nahi mpetenunu ndi Ondae Ue Ala, sine kanandio-andio mpohawe pe'aroa hangano nahi dompetenunu, 31kanatuu koa mbo'u ondae kanandio-andio nahi dompetenunu, hangano pe'aroa anu hinawemiumo, ondae koa mbo'u mpohawe pe'aroa. 32Hangano Do'uko iramo Ue Ala luwuno mia a laro nahi dompetenunu, ka Dopopokitao pe'aroa-Do ndi ondae luwudo.
33 #
Yes. 55:8
O, tedoa ntu'u ondalo kaea-Do, ponto'ori-Do ka pande-Do Ue Ala! Mentee ntu'u nahi pinokompepentee luwuno pomputusi-Do ka mentee ntu'u nahi pinokonto'ori luwuno pesalaa-Do!
34 #
Yes. 40:13
Hangano, isemake anu tumo'orio pinewowolo-Do i Ue?
Ke isemake anu horio gagi puu pompatudu-Do?
35Ke isemake anu horio moweeako Ira hapa-hapa,
ranta asalakono Ira umeuo?
36 #
1Kor. 8:6
Hangano luwuakoano inso ndi Ondae, ka hangano Ondae, ka ndi Ondae: Ndi Ondaemo marambaa hawe nahina tampulaano!
Currently Selected:
ROMA 11: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
