ROMA 10
10
1Pepaekompo, po'eheno aroaku ka pekakaiku ndi Ondae i Ue onaemo, ka domengkinadudui. 2Hangano kupolio mesakosii mongkona ondae, nine mpeteahako ira ntu'u umungke Ira Ue Ala, sine nahina ponto'orido anu mentee. 3Hangano, nahi domento'orio mentee-Do Ue Ala ka hangano mpeteahako ira mpowangu menteeado ondaedo, ka nahi dompe'urumako a mentee-Do Ue Ala.
Menteea hangano pompe'ala-ala
10:4-15
4Hangano Ondae i Kerisituu Ondaemo umihiio songka Taura, onaemo ka dompohawe menteea sompo-sompo mia anu mompe'ala-ala. 5#Ima. 18:5 Nde iburio i Musa mongkona menteea hangano songka Taura, ”Mia anu meleluakono, ta tuwuako onae.” 6#Win. 30:12-14 Sine menteea hangano pompe'ala-ala motae kanandio, ”Si potae i laro aroamu: Isemake ta mewuatako i suruga?” onaemo: ka iwawa Ira i Yesu metii, 7ke, ”Isemake ta metii a mpo'iangado mia mate?”, onaemo: ka iwawa Ira i Kerisituu mewuatako inso i olodo mia mate. 8Sine hapake pinauno? Ndiomo,
”Pau atuu umpeda ndi omue,
onaemo a laro ngangamu ka i laro aroamu.”
Onaemo atuu pauno pompe'ala-ala, anu pinalelemami. 9Hangano tewala impe'induako wiwimiu, nine Ondaemo i Yesu Ue, ka impe'ala-alao i laro aroamiu, nine Dowangu Iramo Ue Ala inso i olodo mia mate, ka komiu mengkinadudui. 10Hangano koa aroa mia mompe'ala-ala, ka pinokomentee, ka saru wiwi ipe'induako mia ka ikinadudui. 11#Yes. 28:16 Hangano pauno Wunta Mempori, ”Ba isema me'ala-ala Ira, nahi ta pinokoko'ii.” 12Hangano nahina teposisinggeno olono to Yahudi ka to Yunani. Hangano Ondae Ue Ala anu aasa atuu Ondaemo Uedo luwuno mia, kaeado luwuno mia anu mpebooli ndi Ondae. 13#Yoe. 2:32 Hangano, ba isema anu mebooli a nee-Do i Ue, ta kinadudui.
14Sine kana'umpe ka dompokompebooli ndi Ondae, tewala nahi dompe'ala-ala Ira? Kana'umpe ka dompokompe'ala-ala Ira, tewala nahi domerongeo mongkona Ondae. Kana'umpe ira merongeo mongkona Ondae, tewala nahina anu palele Ira? 15#Yes. 52:7 Ka kana'umpe ka dompokopalele Ira, tewala nahi domentinena? Kana hinao teburi, ”Tedoa tekosi hawedo anu mpowawa lele moikoa!”
To Isaraeli nahi dompompe'ala-ala
10:16-21
16 #
Yes. 53:1
Sine komba luwuno mia mentarimaomo lele moiko atuu. I Yesaya isa'a motae, ”Ue, isemake anu me'ala-alao pompalelemami?” 17Gaagi, pompe'ala-ala tepu'u inso a mporongea, ka anu rinonge pau-Do i Kerisituu. 18#Pud. 19:5 Sine mesikeno aku: Nde nahi domerongeoke? Lano domerongeomo,
”Suarado hawe i asa wawontolino,
ka paudo hawe i tompano tolino.”
19 #
Win. 32:21
Sine mesikeno aku: Domengkekebaakono koa to Isaraelike? Amba-ambano mepau i Musa,
”Kupokogagi komiu monsisiriako ira mia anu komba bawaa
ka mokontekuda komiu a tongku anu memonge-monge.”
20 #
Yes. 65:1-2
Ka i Yesaya mosia mepau,
”Kupemoikoomo domehawe Aku anu nahi dome'ungke Aku,
mepopokita Akumo ndi ondae anu nahi dompesikenoa-Kune.”
21Sine mongkona Isaraeli ipotae, ”Asa oleo mpobutu Kutasiakono kae-Ku a tongku anu nahi dompetenunu ka mpengenge.”
Currently Selected:
ROMA 10: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
