ROMA 9
9
Tebinikido to Isaraeli
9:1-29
1Ongkue mompau menteea hangano Ondae i Kerisituu, nahi kupegaupi. Pompauno aroaku mesakosii mbo'u hangano Penaa Mempori, 2nine tedoa aku mompemasusa ka wela masusa aroa. 3Tendeano, ineheku tetotonaa ka teponsia inso ndi Ondae i Kerisituu hangano luwuno pepaekompoku, pe'asa tongkuku montonda tuwu ntolino. 4#Pel. 4:22 Hangano ondae to Isaraeli, nahi domempinotoro gagi ana, ka mpontarima iramo marambaa, ka luwuno pedandia, ka songka Taura, ka mpesomba, ka luwuno dandi. 5Ondae inuledo luwuno uempu'u, anu umule Ira i Mesia a nteweweu-Do kana mia, anu i wawono luwuakoano. Ondaemo Ue Ala anu asalakono inunde-unde ranta nahina tampulaano. Ami!
6Sine pau-Do Ue Ala komba nahi ta gagi. Hangano komba luwuno mia anu nte'inso i Isaraeli ondae to Isaraeli, 7#Teg. 21:12 ka komba mbo'u luwuno anu tewinso a inuleno i Burahima ondae anano i Burahima, sine, ”Anu nte'inso ndi Saki anu ta nineeako inulemu.” 8Pengkonaano: komba ana montonda koroi ntolino onaemo ana-Do Ue Ala, sine ana pedandia anu nineeako inule anu mentee. 9#Teg. 18:10 Hangano pau-Do Ue Ala andio hinao dandi, ”A tempomo kanandio Aku hawe ka i Sara ta hinao aasa anano tama.” 10Sine komba butu onaemo koa. Lalu mengkaa mbo'u onaemo i Ribeka anu mentia inso a asa mia, onaemo inso ndi Saki, uempu'uto. 11Hangano tempono napi dopine'anaako nana'ote atuudo ka napi dopoweweu anu moiko ke anu mosa'o, – ka ipinokoroso tinoo-Do Ue Ala mongkona pobiniki-Do, komba me'empehiako wineweu, sine me'empehiako pepoboi-Do – 12#Teg. 25:23 pinauako i Ribeka,
”Ana anu aka gagi atano ana anu uai,”
13 #
Mal. 1:2-3
kana hinao teburi,
”Kupehohawao i Yako, sine Ku'o'aliaakono i Esau.”
14Tewala kanandio, hapake anu kita mempauo? Nde nahi Domoleoke Ondae Ue Ala? Komba mentee! 15#Pel. 33:19 Hangano mepau Ira ndi Musa,
”Aku mehohawao ndi isema anu inehe-Ku mehohawao
ka Aku me'aroa ndi isema anu inehe-Ku me'aroaakono.”
16Gagi mongkona atuu komba montonda po'eheno mia, sine a pompehohawa-Do Ue Ala. 17#Pel. 9:16 Hangano Wunta Mempori mepau ndi Pirao, ”Onaemo pu'uno ka Kupontadeko, onaemo ka Kupopokitao pabawa-Ku ndi omue, ka ipinalele nee-Ku i asa wawontolino.” 18Gagi Dopehohawao ndi sema anu inehe-Do ka Dopokomoteao aroano isema anu inehe-Do.
19Kanandio-andio komiu mpotae ndi ongkue, ”Tewala kanandio, hapapo mbo'u anu da Dopokonsalao? Hangano isema anu umewaio po'ehe-Do?” 20#Yes. 29:16; 45:9 Isemake omiu, hei mia, ka ime'ewai Ira Ue Ala? Polioke anu pinokogagi motaeakono anu mokogagio, ”Tembioke ka upokogagi aku kanandio?” 21Nde nahina pabawanoke puu mponsuu kuro a wita puluno, ka iweweuo inso a aasa boto anu mengkena aasa parewa ka ipinake a ntinoo anu maramba ka aasa parewa susua anu pinake a ntinoo anu biasa? 22Gaagi, tewala Ira mopokitao tekuda-Do ka mokomengkaao pabawa-Do, Ondae Ue Ala monaa sabara-Do anu langkai a luwuno parewa tekudaa-Do, anu pinatindaomo tiano matea – 23tendeano ka ipinokomengkaa kaeano maramba-Do a luwuno parewa pompehohawa-Do anu Dopatindaomo tiano marambaa, 24onaemo ontae, anu Dopoboi kitamo komba butu inso i olodo to Yahudi, sine inso mbo'u a luwuno tongku susua, 25#Hos. 2:22 kana anu Dopauo koa mbo'u a wuntano Nabi Hosea,
”Anu komba bawaa-Ku Aku numeeakono: bawaa-Ku
ka anu komba kinekewoi: Aku numeeakono kinekewoi.”
26 #
Hos. 1:10
Ka a mpo'ianga, ba isua ira mempinauako,
”Omiu andio komba bawaa-Ku,”
i ra'ai ira mempinauako, ”Ana-Do Ue Ala anu tuwu.”
27 #
Yes. 10:22-23
Ka i Yesaya mebooli mongkona Isaraeli, ”Maupo porokono anano i Isaraeli kana one a ntahi, sine butu toreano ta kinadudui. 28Hangano hapa anu Dopauomo, Ira ronga weweuo i Ue i wawontolino soompo ntu'u.” 29#Yes. 1:9 Ka kana anu pinauno i Yesaya se'eluno,
”Bakanaano Ondae Ueno luwuakoano
nahi Dopobintaakita inule,
megagi kitamo kana Sodomo
ka mengkena kana Gumora.”
Tekaduduido tongku susua ka tesosaelodo to Isaraeli
9:30–10:3
30Tewala kanandio, hapake anu kita mpompau? Ndio: nine luwuno tongku susua anu nahi dompo'ungke menteea, mpohawe iramo menteea, onaemo menteea hangano pompe'ala-ala. 31Sine: nine to Isaraeli, maupo dome'ungkeo songka anu ta mowawa menteea, nahi domehaweako a songka atuu. 32Hapa pu'uno? Hangano to Isaraeli me'ungkeo komba hangano pompe'ala-ala, sine hangano wineweu. Mentetidu ira a watu tetidua, 33#Yes. 28:16 kana hinao teburi,
”Menteeano, Aku numaao i Sioni
aasa watu tetengkua ka aasa watu tetidua,
ka ba isema anu me'ala-ala Ira, nahi ta pinokoko'ii.”
Currently Selected:
ROMA 9: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
