ROMA 8
8
Tuwu hangano Penaa
8:1-17
1Kanatuumo kanandio-andio nahina pohuku ndi ondae anu mekongko i laro-Do i Kerisituu Yesu. 2Penaa, anu mompowee tuwua mokomaradeka komiumo ndi Ondae i Kerisituu inso a songkano hala ka songkano matea. 3Nde hapa anu nahi pokoweweuo songka Taura hangano telusaako tuwu ntolino, Doweweuomo Ue Ala. Ka mesala tumenao Ana-Do isa'a a ngkoroi ntolino, anu merupa kana koroi ntolino anu pinabawaino hala ka hangano hala, Dohukuomo hala a ngkoroi ntolino, 4ka i'inihii ndi ontae po'eheno songka Taura, anu nahi tuwu montonda tuwu ntolino, sine montonda Penaa. 5Hangano ondae anu mentuwu montonda tuwu ntolino, mpompewowolo mongkona anu inso a ngkoroi ntolino; ondae anu mentuwu montonda Penaa, mpompewowolo mongkona anu inso a Mpenaa. 6Hangano po'eheno tuwu ntolino onaemo matea, sine po'ehe-Do Penaa onaemo tuwua ka rodoa. 7Hangano po'eheno tuwu ntolino onaemo umewa ndi Ondae Ue Ala, hangano nahi tondao songka-Do Ue Ala; mongkona andio lano nahi polio. 8Ondae anu mentuwu a tuwu ntolino, nahi Ira memoikoo Ue Ala.
9Sine omiu komba mentuwu a tuwu ntolino, tendeano a Mpenaa, tewala Penaa-Do Ue Ala lano mo'ia i laromiu. Sine tewala mia nahina Penaa-Do i Kerisituu, onae komba mia-Do i Kerisituu. 10Sine tewala Ondae i Kerisituu kongko i laromiu, ka koroi lano mate hangano hala, sine penaa onaemo tuwua hangano menteea. 11#1Kor. 3:16 Ka tewala Penaa-Do, anu wangu Iramo i Yesu inso i olodo mia mate, mo'ia i laromiu, asalakono Ondae, anu wangu Iramo i Kerisituu Yesu inso i olodo mia mate, Ira motuwuakono mbo'u Penaa-Do koroimu anu ta mate atuu, anu mo'ia i laromiu.
12Gaagi, pepaekompo, ontae andio mia mpepasua, sine komba a ntuwu ntolino, ka tomentuwu montonda tuwu ntolino. 13Hangano, Tewala mentuwu komiu montonda tuwu ntolino, komiu memate; sine tewala hangano Penaa ka impepateo luwuno wineweuno koroimiu, komiu mentuwu. 14Luwuno mia anu tinaate-Do Penaa-Do Ue Ala, ondaemo ana-Do Ue Ala. 15#Mrk. 14:36 #Gal. 4:5-7 Hangano omiu nahi mpontarima penaa te'ataa anu weweu komiu gagi medoito mbo'u, sine mpontarima komiumo Penaa anu mokogagi komiu ana-Do Ue Ala. Hangano Penaa atuu ka tompebooli, ”Oo Aba, oo Ama!” 16Penaa atuu mesakosii meronga saru penaato, nine ontaemo ana-Do Ue Ala. 17Ka tewala ontae ana, asalakono ontaemo mbo'u mpe'umbuo pusaka, tinoono luwuno mia anu tekona tumarimao luwuno dandi-Do Ue Ala, anu ira mentarimao meronga saru Ondae i Kerisituu, onaemo tewala memarasai kita meronga saru Ondae, ka tomempinokomaramba koa mbo'u meronga saru Ondae.
Pomperorohido ana-Do Ue Ala
8:18-30
18Hangano kupe'ala-alao, nine marasaia tempo kanandio-andio nahi petoto ba ipinongkenaako saru marambaa anu ta pinokomengkaa ndi ontae.
19Hangano tedoa domengkekewoio luwuno anu tuwu mensikorio tempo domempinokomengkaa ana-Do Ue Ala. 20#Teg. 3:17-19 Hangano luwuno anu tuwu pinokompetuundu iramo a anu nahina tuduno, komba hangano po'ehedo ondaedo, sine hangano po'ehe-Do, anu mokompetuundu ira, 21sine a laro pomperorohia, hangano anu mentuwu atuu ira koa mbo'u mempinokomaradeka inso a pompe'atano matea ka dompewinso a meredeaa marambado ana-Do Ue Ala. 22Hangano tomento'orio, nine hawe kanandio-andio luwuno anu mentuwu pada mompemapari ka pada mpompemahaki kana mahaki me'ana. 23#2Kor. 5:2-4 Ka komba butu ondaemo koa, sine ontae anu mpontarima kitamo Penaa pompowee anu amba-ambano, ontae mbo'u mompemapari i laro aroato kontongaato mensikorio ka tomempinotoro gagi ana, onaemo tetolosiano koroito. 24Hangano ontae mengkinadudui a laro pompe'osaia. Sine pompe'osaia anu kinita, komba pompe'osaia mbo'u; hangano kana'umpe mia da mompe'osai hapa anu kinitano? 25Sine tewala tompe'osaio hapa anu nahi tomengkitao, modato aroato mensikorio.
26Kanandio koa mbo'u Penaa tumulungi kita a laro molemato; hangano nahi tomento'orio, kana'umpe menteeano ba tompekakai; sine Penaa mekakaiakita luwuno pinemasusato anu nahi pinokopau ndi Ondae Ue Ala. 27Ka Ondae Ue Ala anu mepenteeo laro aroa, tumo'orio tinoo-Do Penaa atuu, onaemo nine Ondae, mekakaiako ira mia mempori menunu saru po'ehe-Do Ue Ala. 28Tomento'orio kanandio-andio, nine Ondae Ue Ala mo'angga Ira a luwuakoano mompokohina moikoado anu kumekewoi Ira, onaemo tiado mia anu mempinoboi menunu saru tinoo-Do Ue Ala. 29Hangano luwuno mia anu bininiki-Do se'eluno, ondae koa mbo'u pinakosi-Do se'eluno ka domegagi kana rupano Ana-Do, ka igagi anu amba-ambano i olodo hadio pepaekompo, Ondae, Ana-Do atuu. 30Ka ondae anu pinakosi-Do se'eluno, ondae koa mbo'u pinoboi-Do. Ka ondae anu pinoboi-Do, ondae koa mbo'u pinokomentee-Do. Ka ondae anu pinokomentee-Do, ondae koa mbo'u pinokomaramba-Do.
Manasaano pompe'ala-ala
8:31-39
31Onaemo pu'uno hapake anu ta pinauto mongkona luwuno atuu? Tewala Ondae Ue Ala me'alaako ndi ontae, isemake ta umewai kita? 32Ondae, anu nahi Dopehohawao ana-Do Ondae-Do, sine anu meweengako Ira hangano ontae luwuto, kana'umpeke ka nahi Ira moweeakita luwuakoano meronga saru Ondae? 33Isemake anu ta mosebe ira mia bininiki-Do Ue ala? Ondae Ue Ala anu mokomentee ira? Isemake anu ta humuku ira? 34Ondae i Kerisituu Yesu, anu umari mate? Tendeano laluaopo mbo'u: anu mewangu Iramo, anu mentoro i koana-Do Ue Ala, anu tendeano gagi Puu Mpo'alaakoto? 35Isemake anu ta monsia kita inso a pompehohawa-Do i Kerisituu? Pompokonsiia ke ma'isoa ke pobobarasaia, ke mokoninggoa ke kolambe-lambea, ke masukaraa, ke ponai? 36#Pud. 44:23 Kana hinao teburi,
”Hangano Omiu omami mekongko a laro masukaraako matea sompo oleo,
mengkana kamimo bimba sumbelea.”
37Sine i larono luwuno atuu melalua kitapo sekono luwuno mia anu mponangi, hangano Ondae anu mehohawa kitamo. 38Hangano kupemanasao, nine moiko matea, maupo tuwua, moiko luwuno mala'eka, maupo luwuno anu pomparenta, moiko anu kanandio-andio, maupo anu ta hawe, 39ke luwuno pabawa, moiko anu i wawono, maupo anu i totono, ke maupo anu mentuwu susuano, nahi ta polio monsia kita inso a pompehohawa-Do Ue Ala, anu kongko ndi Ondae i Kerisituu Yesu, Ueto.
Currently Selected:
ROMA 8: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
