Yohanes 13
13
At Yesus en osi onoyuk petne emerenebegei wene
1Ye, loruk oʼgwe seni Paskah ano aʼge nouwogoluk welat, at Yesus en,
“An aphwami o ʼgwiangma yema honoboluk naik eʼbek togolik laik ano arat horok lau waga o,” oluk, at aluk welaga. Ye, at uʼgwarek osi ʼgwiangma aʼge ede hwedik welagarik, pobuk enebe ebirom erlakma en ede hwedik modok welaga. 2Welat e, at osi ebano enemin o hubaʼgo soʼboru mesikmu noʼgumu, Yudas, Simon Iskariot omlogo ano, ogola Iblis ʼgwegei ʼgal e, Yesus ebe woruagoluk e,
“Yoʼgo lak o,” oluk ogola ʼgagalegei. 3Asogo ogola ʼgagalegeimu, at Yesus ogola en e,
“Naik en di aʼge yu aʼge ʼberlegat an neʼgik pam pesimu oruak ebano re. Ye, an nebe Allah oruakma en ʼbu egirik, pobuk togolik at eʼbek ligegeik ani o,” oluk aluk welagayat. 4Asogo aluk welat, soʼboru nasu lagarik ebe inagarik e, osum ebe ʼbuktak aʼge noʼgorlogo poluk e, sum ʼgume wit-wat enebetne horogwi aʼge wesirik ebagaseʼgwe herle ʼgelaʼge ʼbetesogo pesi. 5Asogo tegeitik e, sogoluak loyang pam ik naʼgogo ʼgwelakpesirik e, at osi iak wogu legesa aʼge ebano onoyuk petne emerenebegeitik e, sum ebagase herle ʼbuksogo pesi aʼge ano pam enaʼbosu ho enebil laga. 6Asogo tagenebil lasu lagarik e, hwerli at Simon onuk mesik Petrus ano eʼbek lau wagoam e, at en e, disogo moʼgulesi,
“Nue, hat ʼgain Honuk Logo aʼge en an noyuk petne emerigoluk a? Mia o,” oluk moʼgulese lagama, 7at Yesus en e, disogo moʼgulesi,
“Not o. An tegis yu, ebe ʼgesogo ʼgelaʼgeat, hat heperlak o. Aʼgeat de, pobuk en haluk ema o,” oluk moʼgulese lagama, 8at Petrus en e, disogo moʼgulesi,
“Nue. Hat en an noyuk petne modok emerogun erlak o!” oluk moʼgulese lagama, at Yesus en e, disogo moʼgulesi,
“An en hat emethebik erlak holuk e, hat hebe an eiye wolorogun erlak o,” oluk moʼgulese lagama, 9at Simon onuk mesik Petrus en e, disogo moʼgulesi,
“Ai holuk e, nue. Noyuk petne nak emetnobogun o. Neʼgik emin, naʼgul emin, ʼberlegat emetnebin o,” oluk moʼgulesimu re, 10at Yesus en e, disogo moʼgulesi,
“At ap sa en, ebe arat ʼgume werak oruak holuk, at ebe ʼgume werak modok oruak ai en e, pobuk emeru mia o. Wen, oyuk nak emeru elit o,” oluk moʼgulesirik, is ʼberlegat moʼgulentasulat e,
“His asogo emerak modok welegep aʼgeat de, henebe ʼberlegat emerak welegep puk. Mesik e, emerak erlagat oruak o,” oluk, moʼgulentesi. Wene asogo moʼgulentesi ai re, at ogola en e,
11“At ai en an nebe watnobuagoluk yoʼgo louwa,” oluk aluk welat no oluk e, disogo moʼgulentesi,
“His emerak modok welegep aʼgeat de, henebe ʼberlegat emerak welegep puk. Erlak o,” oluk moʼgulentesi o. 12Arat asogo onoyuk petne emerenebegeitik e, osum noʼgorlogo pesi aʼge ano ʼbuktegeitik, togolik hweriogo welagoma ebano huragarik e, disogo moʼgulentesi,
“An en his takhenebegi ai pobi tigep a? Erlak a. 13Ye, his en an moʼgulnogulat e,
Nonue ʼgain Onuk Logo aʼge wene moʼgulnentasu legen aʼge, oluk moʼgulnogu legep ai re, an nebe honue ʼgain Nonuk Logo aʼge wene moʼgulhentasu aʼge demat holugat ogu legep o. 14Asogo, an nebe honue ʼgain Nonuk Logo aʼge wene moʼgulhentasu aʼge en his honoyuk petne emethenebegis holuk e, his en asogoat his-his honoyuk petne emet-emet ʼbugulom o. 15An en his takhenebegi ai ʼgelaʼge, his en an nebabut wokho asogoat togu lemagoluk moʼgulhentegis o. 16Wene mesik yu moʼgulhentaik,
Ap ʼgain mesik eragam aʼge ʼgelaʼge oruakhwe, at eragam aʼge en logo ʼgelaʼge welago erlak o. Ai ʼgelaʼge, ap yoʼgo perakpasu aʼge ano eneragam ʼgelaʼge oruakhweat de, at yoʼgo lasu aʼge ano logo ʼgelaʼge welago erlak o, oluk demat moʼgulhentegis o. 17An en wene moʼgulhentegis ai henaluk oroguptik togu lorogup holuk e, honogola henagai hogu lorogup o.
18An en wene ai his henebe ʼberlegat henebaget moʼgulhentegis puk. Erlak o. His yu an enat henebe polikhenebegi aʼge naluk aʼgeat de, wene ai paget Allah iak pam disogo oluk pelal wokho pegesa,
Ap mesik soʼboru neʼbirek mesikmu noʼgu lege aʼge
yu en wiagapnebiogoluk inaga o, (Mazmur 41:9=TB 41:10)
oluk egesema pelal wogo oruak aʼge ai sogwi ema modok erlak o. Demat ema o. 19Wene ai pobuk ebe demat ago holuk,
At otok modok welago aʼge ano arat o, oluk pobi nebipogoluk, wene yogodak ai owan om erlak oruakhwe obok naduk moʼgulhentegis o,” oluk moʼgulentesirik e, wene mesik disogo moʼgulentesi,
20“At ap sa en, aphwami an en peragenebaik aʼge wogonobogwi holuk e, anat woknobua o. Ye, at ap sa en an woknebiso holuk e, at an peraknobou waga aʼge anoat wouwa o, oluk demat moʼgulhentegis o,” oluk moʼgulentesi.
At Yesus en Yudas tu aʼge aluksogo moʼgulesi wene
(Matius 26:20-25; Markus 14:17-21; Lukas 22:21-23)
21At Yesus en wene asogo arat moʼgulentesirikmu en, at ogola wiak agama, iak ʼbaksogoat disogo moʼgulentesi,
“His ap henebe ya aʼge mesik en an nebe watnobuagoluk yoʼgo louwayat o, oluk demat moʼgulhentegis,” oluk moʼgulentesi. 22Asogo moʼgulentasu lagama, is en e,
“Ai sa en tua aʼge egei,” oluk enede nalegesarik e, are en e, are yethasulat, are en e, are yethasulat, togu legesa. 23Asogo yet-yet ʼbogukhwe re, is at Yesus iak wogu legesa aʼge mesik at ede hwedik aʼge horoksogo eragam hweriogo welaga. 24Asogo hweriogo oruakma, ap Simon onuk mesik Petrus ano en eʼgik dum ʼbil holuk ap ano moʼguleselat e, disogo moʼgulesi,
“Ap sa paget ese legen, oluk, ebam hin wemen o,” oluk moʼgulesimu, 25at ap ano pobuk at Yesus eragam horoksogoat hegilhai lagarik e, disogo moʼgulesi,
“Nue, ai sa paget egen no?” oluk moʼgulesimu 26at Yesus en e,
“Ebe re, an en soʼboru roti aʼge ik udalogo wogeik aʼge aiat o,” oluk egeitik e, soʼboru roti ano ik udalogo wesirik e, Yudas, Simon Iskariot omlogo ano wogesi. 27Asogo wogesimu, at Yudas soʼboru roti aʼge ano eʼgikmu wasukhwe erianoat, at ogola Iblis ʼgwegei. Asogo ʼgwegeimu, at Yesus en moʼguleselat e,
“Hat en tigoluk epegen aʼge ai perleneat tin o,” oluk moʼgulesi. 28Asogo moʼgulosoam, is hweriogo welat soʼboru noʼgu legesa aʼge ebano en e,
“Ai noʼgwe paget at Yudas moʼgulesi logwe,” oluk pobitu erlakma en wongtak pegesa. 29Asogo pobirak erlak welat, at Yudas ai arilak enemin onouang owiʼga tenakho welagoma no oluk e, disogo epegesa,
“Yesus en nis seni soru aʼge paget di aʼge yu aʼge oʼgo ʼbali louwagoluk moʼgulesi hwi a? Ye, at e, aphwami enaʼge erlak aʼge uang logon mesik-mesik soʼburentai louwagoluk moʼgulesi hwi a,” oluk onogola eberigisa. 30Asogo opogukhwe, at Yudas soʼboru roti aʼge eʼgigem wesi aʼge ano woluk e, o modok hup agamayat de, odipmu ʼbekhit libaga.
At Yesus en wene ʼget aʼge moʼgulentesi wene
31At Yudas arat asogo libagama welat, at Yesus en e, disogo moʼgulentesi,
“Nosi. An abat daklau wegi ano Allah en logo nebasuam, aphwami en Allah erliktua ano arat yogodak horok lau waga o. 32Ye, an en tik ai erlige Allah erliktogwi holuk e, at uʼgwarek ebe erliktogwi ai ʼgelaʼge, an neminat erliknonobogu lemagoluk, at en perleneat logo nobouwa o. 33Neiyagai o. An agauwa wei nak henemin weleiktik en laik o. Laikmu, his en an nebe heranobogu lorogup aʼgeat de, nadugat an en ap Yahudi aʼge moʼgulentesi ʼgelaʼge, o an laikmu eba his en heranebil lagup erlak o, oluk, yogodak his moʼgulhentegisat o,” oluk moʼgulentesi. 34Asogo moʼgulentesirik, wene mesik disogo moʼgulentesi,
“His en tugulom aʼge wene ʼget aʼge mesik moʼgulhentaik,
An en his nedesogo welegi ai ʼgelaʼge, his asogoat, his-his nede-hede togu lemis o. 35His-his asogo nede-hede togu lorogup holuk e, is aphwami ʼberlegat enil hontoluk,
Is yu Yesus osi demat hegi, oluk enaluk ema o,” oluk moʼgulentesi.
At Yesus en Petrus tua aʼge aluksogo moʼgulesi wene
(Matius 26:31-35; Markus 14:27-31; Lukas 22:31-34)
36Yesus en asogo moʼgulentasu lagama, ap Simon onuk mesik Petrus ano en e,
“Nue. Hat o ʼgeba laigoluk en egen,” oluk, moʼgulesimu, at Yesus en e, disogo moʼgulesi,
“An laikmu eba, hat neʼberlik loʼboksogo lagun erlak o. We, pobuk neʼberlik worogun o,” oluk, moʼgulese lagama, 37at Petrus en at ebam hin wokhasulat e,
“Nue. An hat hebaget warom ʼgelaʼgeat welegi aʼgeat de, hat en e, yogodak an neʼberlik wom mia egen ai nopaget,” oluk moʼgulese lagama, 38at Yesus en e, disogo moʼgulesi,
“Hat demat an nebaget wareigoluk welegen a? Erlak o. Sue ayam iak u erlak oruakhwe, hat en,
An Yesus neperlak, oluk heʼgik henaganam elabe togunmu en ayam iak ua o, oluk demat moʼgulhegis o,” oluk moʼgulesi.
Currently Selected:
Yohanes 13: WUL
Highlight
Share
Copy
Want to have your highlights saved across all your devices? Sign up or sign in
