Matius 25
25
Wene hwelani enede oruak aʼge emin, enede erlak aʼge emin, enebam elitsogo moʼgulentesi wene
1At Yesus en asogo moʼgulentesirik e, wene mesik disogo moʼgulentesi,
“Nenaik Allah en eragam enebasumu eba emin hegit e, hwelani enebe 10 en lampu ʼgwialogo woluk ap mesik ugwe waigoluk wagoma ologotma legesa ai ʼgelaʼgeat o. 2Is enebe 10 aʼge re, nin pema huaben, enede oruak. Ye, nin pema huaben e, enede erlak aʼge welegesa. 3Is enede erlak aʼge ai lampu woluk legesa aʼgeat de, minyak erlak agoam naʼgul aʼge oluk ebaget mesik naʼgogo woluk lo erlak. 4Ye, is enede oruak aʼge eriano nak e, lampu emin, sogoluak mesik minyak neʼgak welago aʼge emin, woluk legesa. 5Aʼgeat de, at ugwe waiyogoluk tago aʼge ano wom erlakma en aregen tiso en e, is ebano enebe ʼberlek nogo enil agama eba nogogisa. 6Asogo nogogukhwe, hup ede ʼburl is aphwami en e,
Ap ugwe wo aʼge ano ebe waga ai o. Ologotma manis o, oluk, eniak loksogo egesema, 7is hwelani ebano enelaluk egesarik e, lampu egerle ebelogo ʼgwialil legesa. 8Is enede erlak aʼge ebano en, is enede oruak aʼge ebano moʼgulontogulat e,
Lampu nis enaʼge nekhi oso yo. Holuk e, minyak his enaʼge logon woknentemit o, oluk, ʼgonu moʼgulentigisema, 9is hwelani enede oruak aʼge ebano en e,
Erlak o. Ado meʼgisogo his wokhontugulat, pema nis horlogulat, tulmu re, erlak ema o. Holuk e, oʼgo ʼbalugumu eba logon oʼgo ʼbali lit o, oluk moʼgulentigisema, 10oʼgo ʼbalhwerlil legesema re, at ap ugwe wo aʼge ano arat wagarik e, is hwelani enede oruak aʼge degelogo pagathorloluk welegesa aʼge ebano enemin seni sakho nouwogoluk wogonoboluk ogola ʼgwegeitik e, ʼgoduk laregei. 11ʼGoduk lasogo ʼgoluk oruakma, is hwelani nin pema ebano wegesarik e,
Nenaik, ʼgoduk hutnentemen o, oluk moʼgulegisema, 12at en e,
His eba salak. Henebe an neperlak o, oluk, demat moʼgulhentegis o,” oluk moʼgulentesi. 13At Yesus en asogo moʼgulentesirik e,
“Ai ʼgelaʼge, an weik eria hegit e, his en,
O ai erlige jam eria hegit wema, oluk, heneperlak ai en e, henebabut heberlogo welat yetniarok welemis o,” oluk moʼgulentesi.
“Ap mesik en, uang eneʼgigem poluk laga o,” oluk, ebam elitsogo moʼgulentesi wene
(Lukas 19:11-27)
14At Yesus en asogo moʼgulentesirik e, mesik disogo moʼgulentesi,
“ʼBogorl pam Allah en eragam enebasumu eba, emin hegit e, ap mesik o walegat momu laigoluk eselat, at eragam aʼge worlentesimu wegesema re, at enaʼge di aʼge yu aʼge is tenak welemagoluk eneʼgigem poluk laga ai ʼgelaʼgeat o. 15Is enebabut ʼbalogo enebe loʼbok wogonto hegitsogoat wogontil laga. Ap mesik 5 juta wogoum ʼgelaʼge uang lok emas aʼge 5 wogeselat, ye, ap mesik 2 juta ʼgelaʼge wogeselat, ye, ap mesik 1 juta ʼgelaʼge wogeselat, tegei. Asogo wogontoluk e, o momu walegat laga. 16Lagama re, ap uang emas 5 juta ʼgelaʼge wesi aʼge ano uang ai pam di aʼge yu aʼge oʼgo ʼbaliselat e, pobuk 5 juta mesik emin mangnosogo pesi. 17Ye, ap mesik 2 juta ʼgelaʼge wesi aʼge ano asogoat pobuk 2 juta mesik emin mangnosogo pesiat. 18Aʼgeat de, ap mesik 1 juta ʼgelaʼge wesi aʼge ano en nak e, woluk lagarik e, uang ue ʼgain aʼge ano en aʼge, ʼgwiang palholuk hisogo pei laga. 19Asogo ʼgwiangma selak poluk oruakma re, onue ʼgain ano welagarik e, pobuk wagarik,
Uang wogentegis aʼge ebano, is en pobuk meren mangno tigisa, oluk, worlentesimu wegesema re, 20ap uang lok emas aʼge 5 juta ʼgelaʼge wesi aʼge ano pobuk 5 juta at mangno tegei aʼge woluk wagarik e,
Nue. Hat en 5 juta woknigen ano re, ʼgwelakhemen o. An en pobuk 5 juta logon emin ebam mangnosogo pegimu ani o, oluk moʼgulesimu, 21at ue ano en e,
Not o! Op modok tigen o. Hat hebabut heʼberik ano en, hegitsogo modok taga legenma hegi o. Wei nagat wokhegis aʼgeat de, hede heʼbisogo tenak welegen ai en e, pobuk modok loksogo tenak wolorogun en, edikhoboluk wokheik o. An hue nogola nagai hasu legi ai ʼgelaʼge, neʼbiregat nenagai hul en, ʼgwi suk o, oluk moʼgulesi. 22Asogo moʼgulesirik oruakma, pobuk ap uang emas aʼge 2 juta ʼgelaʼge wesi aʼge ano eʼbek wagarik e,
Nue. Hat en 2 juta woknigen ano re, ʼgwelakhemen. An en pobuk 2 juta mesik eminat ebam mangnosogo pegimu ani o, oluk moʼgulesi. 23Moʼgulesimu at ue ano en e,
Not o! Op modok tigen o. Hat hebabut heʼberik ano en, hegitsogo tigenma hegi o. Wei nagat wokhegis aʼgeat de, hede heʼbisogo tenak welegen ai en, pobuk modok loksogoat tenak wolorogun en, edikhoboluk wokheik o. An hue nogola nagai hasu legi ai ʼgelaʼge, neʼbiregat nonogola nenagai hul en, ʼgwi suk o, oluk moʼgulesi. 24Asogo moʼgulentesirik oruakma, ap mesik uang emas aʼge 1 juta ʼgelaʼge wesi aʼge ano eʼbek wagarik e,
Nue. Hat e, hebabut modok wiakma oluk e, is pema en owi peligisa aʼgeat de, eʼgen heʼgik abusak ʼbalhwerlasulat, is muon en owi yerigisa aʼgeat de, eʼgen heʼbik abusagat hwerlasulat, taga legen ebano re, an hebabut nalugat o. 25Asogo taga legen ai re, an nogorlok en e, uang hat en aʼge 1 juta ʼgelaʼge ano ʼgwiang palogo hisasi legi o. Woknigen aʼge ano ebe yu o! Hwerlemen o, oluk moʼgulesimu, 26at ue ano en e,
Hat hebabut modok wiak hosorli ogo wiak aʼge yu re! An en e, is muon pelogwi aʼge eʼgen ʼbalhwerlasulat, is pema yerogwi aʼge eʼgen hwerlasulat, tiso aʼge nebabut ai hat halugat ani o. 27Asogo haluk welat holuk e, an no uang ai is aphwami muon uang tenak welat sabusogo, mesik emin ebam louksogo pogwi aʼge eneʼgigem pelenma re, an pobuk weiktik e, no uang ebe emin, ebam louksogo mangno togwi aʼge emin, hwerlaimagoluk wogonto aʼge tigen, oluk moʼgulesirik e, 28-29at osi pema disogo moʼgulentesi,
Is aphwami pema enaʼge oruak aʼge ai, pobuk logon eminat ebam louksogo wogontogwiam enaʼge aʼbigat ema o. Ye, is pema enaʼge erlak aʼge ai wei nak welema aʼge ano eneʼgikmu aʼge delogo horlouwa ai en e, ap ai asogo tegeimu ai re, uang 1 juta ʼgelaʼge ai eʼgikmu aʼge delogo ap agaikhe 10 juta ʼgelaʼge wesi aʼge ai wogomis o. 30Holuk e, at ebe an neragam welema erlak aʼge yu re, leget oʼborlma o modok hiktakma eniak ʼgerlit marogulat, loʼgu marogulat, tugumu eba lebikpemit o, oluk moʼgulentesi,” oluk Yesus en moʼgulentesi.
Aphwami enaʼgul onuk loʼbok wene enebam pasulat, noʼgorliselat, tua wene
31At Yesus en asogo moʼgulentesirik e, wene mesik disogo moʼgulentesi,
“An abat daklau wegi ano, aphwami en erliknobugukhwe, is malaikat Allah ʼbogorl pam en yoʼgo peragonobou wago aʼge ebano ʼberlegat nemin womultik e, an erliknobugukhwe ʼgain Nonuk Logo aʼge welagoma welat, 32ap mesik uam eiye aʼge en, domba wam holuk momu degelogo pasulat, kambing wam holuk momu degelogo pasulat, degelenebiso ai ʼgelaʼge, is malaikat ai en aphwami enaʼgul onuk loʼbok an nil pam odoksogo onobou agaihwe, an en asogoat degelenebik o. 33Degelenebiselat e, is aphwami domba wam ʼgelaʼge holuk e, neʼgik ʼbekhit akhit enebasulat, ye, kambing wam ʼgelaʼge holuk e, neʼgik hware akhit enebasulat, tik o. 34-36Asogo degelogo onoboluk e, an nebe ʼgain Nonuk Logo atma re, is neʼgik ʼbekhit akhit enebaik aʼge ai, wene disogo moʼgulentaik o,
An naik en obaphenebegeimu welegep. Holuk, manis o. An soʼboru nele oruakma his en woknogulat, ik nele oruakma his en nangnogulat, an ap ʼbok ʼgelaʼge oruakma his en woknobugulat, nosum ʼbuktak erlak oruakma his en ʼbuktak nobugulat, ou werak oruakma his en ʼgwelakniau wagalat, herle werak oruakma niau wagalat, tigep ano en e, an naik en ʼbogorl ʼgwiang owan walho erlak welat, his ʼgain hononuk logo aʼgeat welemagoluk, polikhenebesi aʼge yu hwerlau manis o, oluk moʼgulentasuam, 37is Allah iak hologo togu lema aʼge ai en e,
Eige, nue o! Nis en hat soʼboru nele oruakma wokhogulat, ik nele oruakma nanghogulat, tige ai re, metne erlige tige no. 38Ye, hat ap ʼbok ʼgelaʼge oruakma wokhobugulat, hosum ʼbuktak erlak oruakma ʼbuktak hobugulat, tige ai, metne erlige tige no. 39Ye, hat ou werak oruakma, hiai lagalat, herle werak oruakma, hiai lagalat, tige ai re, metne erlige tige no, oluk moʼgulnogwiam, 40an ap ʼgain Nonuk Logo aʼgeatma re, is aphwami ebano disogo moʼgulentaik,
His en an nosi ononuk erlak aʼge logon oruakma asogo tagonobogu legep ai, anat taknobogu legep o, oluk, demat moʼgulhentegis, oluk moʼgulentaik o.
41-43Ye, is neʼgik hware akhit enebaik aʼge ai disogo moʼgulentaik,
An naik en his heman henebesi aʼge yu re! An soʼboru nele oruakma, his en woknom erlak, ik nele oruakma, his en nangnum erlak, ap ʼbok ʼgelaʼge oruakma his en woknobu erlak, sum ʼbuktak erlak oruakma his en mesik ʼbuktak nobo erlak, ou werak oruakma emin, neʼgik herle hettak oruakma emin, ʼgwelaknio erlak togu legep o. Holuk e, an naik en, at Iblis osi enebe aʼbik enemin, odouk orloukmu welemagoluk enebale heliʼgogo enebesimu eba lit o, oluk moʼgulentaik. 44Asogo moʼgulentasuam, is en e,
Eige! Nue! Hat soʼboru nele oruakma, ik nele oruakma, ap ʼbok ʼgelaʼge oruakma, hosum ʼbuktak erlak oruakma, ou werak oruakma, heʼgik herle hettak oruakma, o metne erlige en lethio erlakma en mo ogu lege no, oluk, moʼgulnogukhwe, 45an en e,
His en aphwami pema ononuk erlak aʼge yekherak onobogu legep ano re, anat yekherak nobogu legep o, oluk moʼgulontoluk e, 46is aphwami ai di obotut yu obotut hogulomma eba modok welemagoluk peragenebaik o. Aʼgeat de, is Allah iak hologo togu lema aʼge ai enelaluk modok wolomma eba enebaik o,” oluk moʼgulentesi.
Currently Selected:
Matius 25: WUL
Highlight
Share
Copy
Want to have your highlights saved across all your devices? Sign up or sign in
