Kuurotokwe 1
1
Jisasol, “Nuu Gooti toolluro Kuullo toollu nomekwopiyamonyugono,” subuu'yamju aduuwiyoka tovinokwono
1-2 #
Lk. 1:1-4
Oo Tiyafulosoloo, nuu sumdomgu buukiyo puruv me'no sokwollogujabonyugono. Buukiyo su tovi nuu aro tovino sakwollonyugono. Jisasolluro womdo mujumabino mujumabino sumaiyokwe yiuno Gooti tool kwollu muunyu kai'muuno amokailoka toga'no kwimo'nyajuko tonyuno sakwollonyugono. Aki Jisasolluro subwasajuko kugai'aro tonyuno sakwollonyugono. Moro pas me'no saguukwollo su tov toro tovinokwono. Toro te aga pugai'aro tonyuno yaguukwollumo'mokwono. Jisasol kwako akavi kuuno yomollo'no toga gamoro a'mwo kuurotokwe imo'numwalpino'moneyokwe a'mwo pworai ajesokaikono. Toro jesuno sumaiyokwe Gooti toolluro Kuullo tool Jisasollu jurogudo uubweyoduke tokwe Jisasol gami a'mwo kuurotokwe toorai sodubwasajukekono. 3Aki Jisasol yere maboloduke toga sumdomgu danyu'nyuwuulo ton ibwosuno'no abolokaikono. Toro tool aiyo aiko te dukavo'no gami a'mwo kuurotokwe toorai kwiyalo'nyajukekono. Toro wiyalo'nodowo aguto kig Gooti toolluro mido mollomwalo tovi dolago tomuu mwallo'mo tovino sodubwasajukekono. Toro wiyalo'nodowo yodubwasoduke toollu wonodupu kuudo noullo maullo miyaullajuporogano. Toro kworo kuruv aro kuudo saullajuporogano. Oo nebalo'mdeyo, aiyo aiko te aduka'moka tool domwallo. Kuudo saullajuporogano. Toro toorai wiyalo'nyuno wiyalo'nyuno sumaiyokwe iruko 40-pela tobuul kuuwolo'nokaikono. 4-5#Mt. 3:11; Mk. 1:8; Lk. 3:16, 24:49; Jn. 1:33Aki puga Jisasol gami a'mwo kuurotokwe toorogai wosamujuko i'bwo'nonomwalno sumaveyokwe aro kuudokaikono. “Kevu nemi Nellunumiyago toolluro subuu'yamju aikudo tovino kuudo nyallulo'gwonmwalpiyo. Subuu'yamju su tov arokwono. Joonol wonyo tokwe agalaikuvollajukekono. Toro kuvi kuruv Jisasolno'gwowi Gooti toolluro Kuullo tool ikullabodowo'jure su tomgu'aro mogalaikuvollumwalonekono. Subuu'yamju su tovino kuudo nyallulo'gwonmwalpiyo. Toro tovino tov kevu wagwolago Jeruusalemda'ai yere mabolokuupinorekikono. Toro kworekul kuruv iruko pubuul sogwollo mwalopi Gooti tool Kuullo toolluda'ai mogalaikuvollo'mo sogwollo neya kinpinorekikono.” Jisasol gami a'mwo kuurotokwe toorai toro kuudokaikono.
6Toro wuujuno sumaiyokwe kuuno i'bwo'nomwalo'mno toga a'mwo kuurotokwe tooro Jisasollu aro samuugojoporogano. “Nemi Agutoloo, nevu Isuraiyolda'ai toonol a'mwo Roomda'ai tooravuro mido mollomwallo tovi dolago tomuu mwalodowadonogano. Toro te guu aguto kig tooku aki aiko te nemi mido mollonekumwallo'mo tov a'mwo su toorai dolago tomuuda'ai adoga bomollurolovonekumokalokuubinekudeyo?” Samuugojoporogano. 7Toro samuugojopo tovi Jisasol kuudokaikono. “Mi Nyunumiyago tool buro'nyo buro'nyodeyo tonyu yo'mo tool iruko ton gavnokweyol me'no jesodowodekono. Toro jesodowodo tonyuno kuudo youromallo'mo tov kemoro'maiyo. 8#Mt. 28:19; Mk. 16:15; Lk. 24:47-48Toro kugaikul kuruv kemiyo'mo tov arokwono. Gooti tool gamoro Kuullo tool nekullabwonekono. Toro aikullabwo'ji toolluro jurogudo tokwe kevu mino kuuguudo tov kuu'maiyo toru'no dodoluwosumwalpinorekikono. Toro toorekul wagwolago Jeruusalem tokwe'aro proovins Juudiya tovuro yiuwi'nokai tomge'aro proovins Samariyake'aro tomuu dodoluwosomollogaulo. Aki kwako akavuro yiuwi'nokai do'gwapiyo kumuu kuruv kuu'maiyo toru'no dodoluwosomollogaulo.” Kuudokaikono.
Jisasol muunyu i'muuno suloka tovinokwono
(Mak 16:19-20; Luuk 24:50-53)
9 #
Mk. 16:19; Lk. 24:51 Jisasol toro wuujuno sumaiyokwe kuga'gwo kuuno gamoro a'mwo kuurotokwe tooro muugona'dopure toga Gooti tool Jisasollu muunyu i'muuno amokailokaikono. Toro mokailno sumaiyokwe Jisasol sulu'wo tovi akuuto tomuu auloopuuropiyokaikono. Toro auloopuuropiyoka toollu a'mwo kuurotokwe tooro aki aiko te mwonopekono. 10Sulugumdo tovi kuuno yomuugona'dopure toga a'mwo pworal youro kumi'yago kunaikwoljo tousogai yesuno sumaleyokwe a'mwo kuurotokwe toorai wobo toru abodavolorakono. 11Toro boda'mno sumaleyokwe aro kuudolorakono. “E, Galilida'ai a'mwo akarekul, kevu akawai yasuwa'no da'mdupu muunyu kai'muu buro'nyo'mo jomuugonakovo? Jisasol kemi ikugollu'mo'mdowo muunyu kai'muuno sulmoka su tool aikomgu noolabwonekono. Sulugumdo tovi iloduke kwonmapo to'busuko kubalno aki aiko te sulugumdo tomuuda'ai noolabwonekono.” Kuudolorakono.
Juudasolluro aiko toru mallo'moneyokwe a'mwo pwollu ajesoka tovinokwono
12Toruda'ai kuurotokwe tooro muumuudo Oolipolo dodupudo toollu kuugollu'movoporogano. Toro wuugollu'mo'mno sumaveyokwe wagwolago Jeruusalem'no aikomgu avlavoporogano. Toro tooro wan kiloomita toru'aro plavo'mno ai'movoporogano. 13#Mt. 10:2-4; Mk. 3:16-19; Lk. 6:14-16Me'no ki'mo'mno sumaveyokwe wagwolago tovi kuula'mno kemi ago tovi aulomwaloporogano. Ago su tov amodumunyuto'mellungiko tovi muunyu tomuu sulomwaloporogano. Kuurotokwe su tooraino yovo tov arorogano. Pitaike, Jooneke, Jemseke, Adruu'weke, Filipeke, Toomaseke, Batalamiyuuweke, Matyuu'weke, Alfiyasolluro muugunyo Jemseke, Saimooneke toorogano. Saimoonol gavman toorai kisuvolo kwiyajupo tooravuro pwekono. Toro tooke'aro Jemsolluro muugunyo Juudaseke'aro toorogano. 14Toro tooro kuulomwalno sumaveyokwe subusu'nyogalo aulodomwallajuporogano. Aki Jisasolluro gagwai'yago toorogai'aro gamoro ganeyago Mariyakwe'aro abolo pugai'aro ton bodupu kworogai subusu'nyogalo adomwallajupogano.
15Su toro toga Jisasolluro a'mwo abolo ton 120 tomgu'arogano. Toro ton iruko pullugwoji i'bwo'nyuno sumaveyokwe Pital akuuto toru'aro ilodavo'no aro kuudokaikono. 16“Mi nuugebuuravoo, akaro tov pumgu'aro mimo'nowo'jujukokwono. Toro kuvi kuruv kuvinono imo'nyo'moneyokwe Juudasol Jisasollu a'mwo galomworallo'mo toorai mollubworomokavlavo'no kuuduuwallokaikono. Su toro tov aiyoga a'mwo aguto kig Devitol Gooti toolluro Kuullo tool jurogudo uubweyoduke tovida'ai puukwollukwiyo tovi me'no ajakwollokaikono. Toro tov kuvinono sumo'nokakwono. 17Juudasol nevu a'mwo kuurotokwe toonolluda'ai pwekono. Toro tool nevuge avaiwomdo sajukekono.
18 #
Mt. 27:3-8
Toro kwol kuruv gami kirovanyuvanyu womdo soka tovida'ai nuugwiyo tokwe kwako puruv amobibweyopekono. Toro te Juudasol kwako su tovi malluno sumaiyokwe kuvi wolowiye'naro'no yiuno'no abolokaikono. Toro aboloka toolluro sumwoluko tov pwikuropino sumaiyokwe gamoro yiuwi'nokai lu'dewuulo ton kwako tovi abwolovullujopiyapogano. 19Juudasollu toro wimo'noduke tovino wagwolago Jeruusalemda'ai yiuwi'nokai a'mwo abolo ton kuu'nopogano. Toro wuu'nyuno sumaveyokwe kwako su tovino yovo tov Akeldemavo sowaroporukono. Yovo su tovuro kavlo tov kemoro yogalo tovida'ai tov, Muja'womdoverukoneyo'mokwono. Juudasollu toro kwimo'noka tovino kwako su toru'no yovo tov toro sowaroporukono.” Pital Juudasolluno toro kuudokaikono.
20Aki a'mwo su to kwolluno Pital aro kuudokaikono. “Da'buukiyo tovida'ai kuuguudo puruv aro sakwollungikokwono.
“Gamoro agwapto toru a'mwo tooro mamwalodupudo toru'busuko neya worowo'ji a'mwo abolo ton kwako su toru noulomwalpiyo.”
Aki buukiyo avalo tovida'ai kuuguudo puruv aro sakwollungikokwono.
“A'mwo su toolluro womdo sajuko tovi aiko toru mallo'moneyokwe a'mwo muuduko pwol neya maronokwono.
Buukiyo tovida'ai toro sakwollungikokwono.”
21Toro tovino tov aga nevu Juudasolluro aiko toru mallo'moneyokwe a'mwo pwollu neya jesanokwono. Yasuwa'nodo pwollu nojesa'jo. Toro kuvi kuruv nevu yiuwi'nokai toga Aguto Jisaseke somollajuuwo toonolluda'ai pwollu neya jesanokwono. 22Toro te nevu pwonol muudu'nodo toga Joonol Jisasollu wonyo amogaluvolloka togada'ai yiuno Jisasol muunyu kai'muuno iloduke toga'no me'no kwonyajuwonogano. Yiuwi'nokai kwimo'nugelabiyajuko tonyu me'no kwonyajuko pwollu jesanokwono. Toro ajesa'ji su tool Jisasolluno tov, Aiyo aiko te me'no adukavokaikono, kuu'maiyo dodoluwosumwalono'moneyokwe imo'nonekono.” Kuudokaikono.
23Pital toro wuujuno sumaiyokwe nojeso'mo tooro a'mwo pworallu amolludapiyoporogano. A'mwo su tooralluno yovo tov pwol Matiyasolekono. Pwol Joosepolekono. Joosepolluno yovo puruv Basabasolekono. Aki avalo toolluno yovo puruv Jostosolo wuudodupudekono. 24Toro toorallu molludapino sumaveyokwe subusu'nyogalo aro adoporogano. “Nemi Agutoloo, nevu a'mwo akaralluda'ai pwollu jesano'monogano. Toro te guu yiuwi'nokai a'mwo tooravuro poowokalago tonyu me'no youroonodumdekugono. Toro te guvnokwe tooku anekuduuwallubi tovi wonowa'ji kuudo yauranonogano. Oo akal nemi Aguto toolluro me'no ajesumokaldeyo, dowa'ji jesanonogano. 25Toro ajesa'ji tool Juudasolluro aiko toru maronekono. Juudasol sumdomgu nevuge kuurotokwe womdo sajukekono. Toro kwol kuruv buulo uugunyumopiyo'no gami ago kuunodo tomuuno me'no sovlavokaikono. Toro te muuduko ajesa'ji su tool gamoro aiko toru marowo'ji womdo imovla'mwalonekono.” Subusu'nyogalo toro adoporogano. 26Subusu'nyogalo toro juno sumaveyokwe a'mwo amolludapiyopo su tooralluno yovo tov sulo pullallu yokwolluroso'mno awollubworosoporogano. Toro awollubworosopo toga Matiyasolluno yovokwe sulo tollugwo amaroporogano. Toro te Matiyasol 11-pela a'mwo kuurotokwe toorai uuguro'mwonyo'no aki aiko te 12-pela a'mwo kuurotokwe sumo'noporogano.
Currently Selected:
Kuurotokwe 1: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
