Kuurotokwe 2
2
Gooti toolluro Kuullo tool muudu'no abwolmwaloka tovinokwono
1Toruda'ai iruko pullugwoji yiuwi'nokai Jisasolluro a'mwo abolo ton lubullu doto puruv yanyo'moneyokwe ago avalo puusi aullu'bwo'nopogano. Lubullu doto su tovino yovo tov Pentikoosovokwono. 2Toro kuullu'bwo'nodopure toga muunyu kai'muuda'ai uuwiyago bwotonyo puruv guureji ai'nugobokakwono. Toro tov ki'nugobino sumaiyokwe yiuwi'nokai ago su tovi aullu'bwo'nomwallajupo su ton kuu'nopiyopokwono. 3Toro kuu'na'no sumaveyokwe aki widuko to'busuko pun yalo'noduke tonyu amuugonaropogano. Widuko to'busuko su ton yiuwi'nokai a'mwo abolo go'no go'nodo tonyu muunyu toru abwolmwalopogano. 4Toro bwolmwalno sumaveyokwe Gooti toolluro Kuullo toollu uumjunyo'moneyokwe kuudo ton kemoro poowokalago tovi aullo'mowopiyokakwono. Toro aullo'mowopiyoka ton Kuullo su toolluro jurogudo tokwe yogaljo go'no go'nodo pun abomjodumoulapogano.
5Sumdomgu Juu pworo yiuwi'nokai kwako akavida'ai kantri gomno gomno tomuu mujomwekwodupudo tooro wagwolago Jeruusalem'no bo'mno abomwaloporogano. Toro tooravuro pworo Gooti toolluno guureji sulomoropiyajuporogano. 6Toro tooro bomwalno sumaveyokwe uuwiyago bwotonyo ai'noka tovi wuu'no'mno Jisasolluro a'mwo abolo tobuurai wobo toru bo'mno abomwodovomaroporogano. Toro bomwodovoma'no sumaveyokwe mago to'no abomorowopiyoporogano. Su toro sopo tov aro tovinokwono. Jisasolluro a'mwo abolo tobuuravuro yogalo moruudodopure tov yiuwi'nokai go'no go'nodo tooro kevnokweravuro go'no go'no yogaljo tovida'ai kuu'noporogano. 7Toro kuu'nopo tovino kuudo kwolallo yourukwapiyo'mno mago to'no amorowopiyoporogano. Toro tooro aro adoporogano. “Galilida'ai a'mwo abolo su ton nemoro go'no go'no yogaljo tonyuno kuudo miyouroma'dupudogano. 8Toro kun kuruv nevu nemi go'no go'no kantri mujomwekwodowado tomuuda'ai yogaljo dodopure tonyu kuu'numwakuuwono. Su toro ton nemoro go'no go'no yogaljo tovida'ai adadomgu'aro kuvinono dukodadokwovo? 9Nevu akaru abumwakuuwo toonol kantri go'no go'no tomuuda'ai abumwakuuwono. Toro toonol kantri aro tomuuda'ai abumwakuuwono. Pwonol kantri Patiyada'aiyonogano. Pwonol kantri Midida'aiyonogano. Aki pwonol kantri Elamda'aiyonogano. Aki pwonol kwako Mesoopootemiyake Juudiyake tomuuda'aiyonogano. Aki pwonol proovins Kapadoosiyake proovins Poontoseke proovins Esiyake tomuuda'aiyonogano. 10Aki pwonol kwako Frijiyake kwako Pamfiliyake tomuuda'aiyonogano. Aki pwonol kantri Ijupda'aiyonogano. Pwonol kwako Libiya wagwolago Sairini wobo toruda'aiyonogano. Pwonol Roomda'ai bodowa akawai kwonomollumwakuuwono. 11Pwonol Juuwonogano. Pwonol Juu tooravuro miyanekuuwosunodupudo kwonol kuruv Juu toorogai me'no guro'mwonyodowadonogano. Aki pwonol aku'momdo Kritda'aiyonogano. Pwonol Arabiyada'aiyonogano. Su toro tomuuda'ai abumwakuuwo toonol nevnokwenolluro go'no go'no yogaljo tonyuda'ai dodopure tonyu kuu'numwakuuwono. Toro ton Gooti toolluro jurogudo sajuko tonyuno kuuguudo anekudadokwovo.” 12Toro yajuno'mno kuudo noullo maullo sourukwapiyoporogano. Toro tooro aro adoporogano. “Akaravuro sadokwopo su tov buro'nyo'mo'mdukono?” 13Toro sajunopo kworo kuruv pworo burekakwo me'nopiyo'mo tooro aro adoporogano. “Oo wain wonyo aiyo tov nodupu amomo ajadokwovo,” sajunoporogano.
Pitalluro kuuguudo kuudoka tovinokwono
14Toro yajunodopure kuvi kuruv Pital 11-pela a'mwo kuurotokwe pworogai adaiyajupo su tool a'mwo abolo tonyuro sumdollu toru iloda'mno sumaiyokwe guureji aro amoruudokaikono. “Kevu Juu toorekike'aro yiuwi'nokai Jeruusalemda'ai amwakopo toorekike'aro toorekul kuuguudo akavino molla'mopto kuudo nyau'mwalpiyokweyo'mo kemoro kaduko ton donubweyabilo. 15Pworekul aro adakwovo. “A'mwo abolo su tobuuro wain wonyo ton nodupu amomo ajadokwovo.” Su toro adadokwopo tov kuvimaiyo. A'mwo pworo surakuuto toga wain tov nopi amomo yodupudorogano. Toro kuvi kuruv aga'no'gwowi lomwo 9-kilook togakono. Toro te a'mwo abolo su tobuuro wain wonyo tov manadokwopo tovino tov amomo miyadokwovo. 16Toro kuvi kuruv a'mwo abolo su tobuuravuro sadokwopo tovino aiyoga proofet pwolluro me'no sakwolloka tovi aga kuvinono sadokwovo. Proofet su toolluno yovo tov Joowelolekono. Toro tool aro ajakwollokaikono.
17“Gooti tool aro adokaikono. Aiyowo'mo iruko tov nobai'meyo'mo yodowo'jure toga aro ton imo'nonokwono. Moro Kuullo tool kemi poowokalago anakuuto kuulekumwallo'moneyokwe yiuwi'nokai togaikullu nekullamonyugono. Toro aikullami toga kemoro muugunyo toorogai'aro sujuraiyo togai'aro ton proofet tooravuro yogalo moruudodupudo to'busuko kubalno moro kuuguudo ton moruudupinogano. Aki kemoro muugunyo tooro wojo sumdo to'busuko pun noonpinorogano. Aki kemoro yadaiyo kworo kuruv wojo pun nyuwo'nupinorogano. 18Su toro toga moro yiuwi'nokai ki'nato womdokwe a'mworodeyo oo abolodeyo tobuurai moro Kuullo tool uubwemogano. Toro kuubwemi tool kemi poowokalago anakuuto tomuu kuulomwalonekono. Su toro kwimi toga proofet tooravuro moruudodupudo to'busuko kubalno moro kuuguudo ton moruudupinogano. 19Aki nuu duuwallo jurogudo pun wuuduuwallodo'mure tonyu noonpinogano. Duuwallo jurogudo su ton pun muunyu kai'muu imo'nonogano. Pun kwako tomuuda'ai imo'nonogano. Toro imo'nodowo'jure tonyu wonpinogano. Aki molo inodopure tonyuda'ai mujako tokwe du'wiyo tokwe juto bwotonyo tokwe tonyu noonpinogano. 20Nuu Aguto toonyu yere mwolabodo'mure toga moro jurogudo kuunodo pun ikuduuwallo'moneyokwe kuujo tool dugumdo kimwonyonekono. Aki lobako tool muja'jo imo'nonekono. 21Aki su toro toga yiuwi'nokai a'mwo abolo pwolno puru'monodo ton, “Agutoloo nemi ma'no ma'nodo tovuro kirumwallo tovida'ai domollurolovonekwapiyonoo,” subusu'nyogalo anyudoganpi tonyu kuvinono nomollurolowapimonyugono.”
Gooti toolluro yogalo tovi toro sakwollungikokwono.” Pital a'mwo abolo tonyu toro kuudokaikono.
22Pital toro wuujuno sumaiyokwe aki aro kuudokaikono. “Kevu Isuraiyolda'ai toorekul moro yogalo akavi neya duu'nyulo. Kevu Nasaretda'ai Jisasolluno tov, Oo Gooti toolluro amonekwopiyabokaldeyo, kuudo youromapino'moneyokwe Gooti tool me'no aikuduuwallokaikono. Toro te Gooti tool Jisasollu'aro gamoro duuwallo jurogudo judo'no judo'nodo ton aikuduuwallajukekono. Toro ikuduuwalloduke tonyu kevnokwe toorekul amuugonallajuporekikono. 23#Mt. 27:35; Mk. 15:24; Lk. 23:33; Jn. 19:18Toro amuugonallajupo kworekul kuruv mwonyubusuko soporekikono. Toro toorekul a'mwo kirovanyuvanyokwe toorai kuumjukuropujuko kworekul kuruv nokwo wonyapino soporekikono. Toro wonyapiyodopure toga Jisasollu galomworaro'mno i'noguropte tovi amovoguroptowosopekono. Toro te kevu kwolluro romiyosokwe wimo'nodupudorekikono. Kevu toro sopo kuvi kuruv Gooti toolno'gwowi Jisasollu romiyoso'mo su tovino sumdomgu kuudo me'no souromarokaikono. 24#Mt. 28:6; Mk. 16:6; Lk. 24:6Kevu toro aromiyosopo kwollu kuruv bolnodo su tov Jisasollu wuulo muugullokakwono. Aki bolnodo tovuro jurogudo tovi dolago tomuu yiunokuudo mamwalokaikono. Gooti gavnokwe tool aiyo aiko te modukavo'no bolnodo tovuro jurogudo tovida'ai kwollu amollurolowapiyokaikono. 25Aki aiyoga a'mwo aguto kig Devitol Jisasolluro kuuguudo dono puruv aro sakwollokaikono. Jisasol gami Ganumiyago toolluno aro donekono.
“Mi Aguto tool yiuwi'nokai toga nuuge mwalodowodekono. Toro tool moro anato wobo toru bomollonyuda'mdowodekono. Toro te nuu luko bu'buto mimwalmonyugono.”
Aki kuuguudo puruv arokwono.
26“Mi Aguto su tookujuno moro poowokalago tokwe ilaiyo bwotonyo yodum moro yogaimaguurai tokwe ilomogwopi yodamdonyugono. Aki numoro kulako tov yiunokuudo abolo'mujuko kwonyu kuruv kavo mwalo'mi gumoro sugudo nubweyo'moneyokwe subuu'yamju sodo tovino sogwollo kinmwalmonyugono. 27Su toro tov aro tovinokwono. Nuu abolmi tekwonyu a'mwo me'no bolodupudo tooravuro tomuu yiunokuudo avlawoneyokwe nokwo nuwonyapino mibinekugono. Aki gumoro womdo tovi yo'moneyokwe ajanubweyodo tekwonyu yiuno pi'mwono uumjungovla'mdumdonyugono. Toro tekwonyuro kulako tov yiunokuudo nobuuropiyo'jokweyo'mo ilaiyo to'no mollonumwalbinekugono. 28Aki toro tekwonyu aiyo yiunokuudo mujomwekovlaiyo'moneyokwe tovino yo'mgonomallo'mo puuto tov guu me'no anyuduuwallodekugono. Toro tekwonyu guu nuuge mujomwekovla'mdowosure tovino ilaiyo bwotonyo imwalmonyugono.”
A'mwo aguto kig Devitol Jisasolluro dono tovino toro sakwollokaikono.”
29Pital toro wuujuno sumaiyokwe aki aro kuudokaikono. “Nuugeravoo, moro yogalo aikudadokwo akavi neya duu'nyulo. Devitol me'no aboloka toollu a'mwo buuso tovi amolsosopekono. Aga kuga kuruv gamoro a'mwo buuso su tov wobo akaru wo'dowodo tovi mwalodowadonogano. Toro tovino tov nemi nellunumiyago a'mwo aguto kig Devitolluro kuuguudo adoka su tov gavnokweyolluno adokalmaiyo. 30#2Sam. 7:12,13Toro adoka su tool Gooti toolluro proofet pwekono. Toro toollu Gooti tool subuu'yamju aro kwiyokaikono. “Gumoro jukweyago kwolaiyo pwol imo'nowo'ji a'mwo aguto kig imo'nonekono. Toro tool gumoro aiko toru ma'dowo'jure toolluro mido mollomwalo tov yiunokuudo mujo'movla'mwalonokwono.” Toro tovino adokaikono. Toro te Devitol subuu'yamju su tov, Kuvinono imo'nono'mdeyo, kuudo saullajukekono. 31Aki Gooti tool Krais toollu yere mamonekwopiyaboduke toga a'mwo aguto kig Devitol aro kuudo me'no souromallajukekono. Gooti toolluro wiyo'mwojo'moneyokwe ajesoka Krais tool bolowo'ji aiyo aiko te nodukawonoldeyo, kuudo souromallajukekono. Toro souromaroka tovino aro ajakwollokaikono. “Gamoro kulako tov a'mwo me'no bolodupudo tooravuro tomuu avlawoneyokwe Gooti tool nokwo wonyapino miyonekono. Aki toro toolluro kulako tov yiunokuudo nobuuropiyo'jokweyo'mo pi'mwono mollomwalonekono.” Ajakwollokaikono. 32Toro te Gooti toolluro a'mwo amodukavoka su tool Jisasol kwekono. Toro amodukavoka toollu nevnokwenolluro sumdo tokwe me'no kwonowekono. Toro kwonowo toonol kuu'maiyo toru'no dodoluwosodowadonogano. 33Toruda'ai Gooti tool Jisasollu moduka'mno sumaiyokwe muunyu kai'muuno amokailokaikono. Toro mokailno sumaiyokwe Gooti tool noonyumwonyu pworai muunyu toru'aro uuwoleyo'moneyokwe Jisasollu gamoro anato toru amorumwallokaikono. Toro mwalodowodo toollu gami Ganumiyago tool gamoro subuu'yamju me'no soka kuvinono Kuullo tool kwiyokaikono. Toro wiyoduke tovi Jisasol ma'dowo aga toga nemi anekubweyadopiyo. Toro nekubweyoduke tovida'ai a'mwo abolo su tobuuravuro go'no go'no yogaljo adadokwopo tov kuvi kuunogano. Toro dodopure tonyu muugona'dupu kuu'numwakopo tov kuvigono. 34Aki puruv kevu neya duu'nyulo. A'mwo aguto kig Devitol muunyu kai'muuno miloka kwol kuruv Jisasolno'gwowi muunyu kai'muuno sulokaikono. Toro suloka toolluno Devitol aro ajakwollokaikono.
“Gooti Aguto tool mi Aguto toollu aro kuudokaikono. Guu moro anato toru bilomwalbinekugono. 35Toro bilomwalodo'bure toga nuu gumi ikomago toorai molo wiyo'mi uuwolo'monyugono. Toro uuwolovo'mi toga ikomago su toorai ipolomokabo'mi gumi dolago tomuu bomagubwemonyugono.”
Gooti toolluro kuudoka su tovino Devitol toro ajakwollokaikono.
36Toro te kevu yiuwi'nokai Isuraiyolda'ai a'mwo abolo togaikul kuuguudo nebal'no ikudodo'mure akavi wuu'nopi kuudo po'dogalo jouromallulo. Kevu i'noguropte tovi a'mwo amovoguroptowosopo su tool Gooti toolluro Krais amonekwopiyaboka tookono. Aki toro toollu Gooti tool a'mwo Aguto nekullumo'nyo'moneyokwe amolludapiyokaikono. Toro te kemoro amovoguroptowosopo su tool Jisasol kwekono.” Pital kuudokaikono.
A'mwo abolo muuduko ton kuudo souragunyumo'nopo tovinokwono
37Toruda'ai a'mwo abolo Pitalluro kuuguudo wuudoduke tovi au'nallajupo su ton kemoro poowokalago tonyu kuuguudo tov ajuulowosokagano. Toro ton Pitaike'aro a'mwo kuurotokwe pworogai'aro toorai samuugojopogano. “Wei, nevugeravoo, nevu adado yanonoldukono?” 38Toro samuugojopo tovi Pital kuudokaikono. “Kevu yiuwi'nokai togaikul kemi ma'no ma'nodo tonyuno buulo uugunyumopiyopi Gooti toollomno neya jouragunyumo'nyulo. Toro souragunyumo'nupi togaikul bopi Jisas Kraisolluno yovo tovida'ai wonyo buuvollunyulo. Kevu kuudo muuduko souragunyumo'nupi togaikullu Gooti tool kemoro ma'no ma'nodo tovuro kirumwallo tovi nomodukwopiyonekono. Aki Gooti tool kemi yasuwa'no ikullabiyo'moneyokwe gamoro Kuullo tool nekullabwonekono. 39Aiyoga Gooti tool gamoro Kuullo tool ikullabiyo'mo subuu'yamju me'no sokaikono. Subuu'yamju su tov kevuge'aro kemi kwolaiyo taiyo lukomgu sawosunpi kugai'aro togaikullo'mokwono. Aki yiuwi'nokai a'mwo abolo Juu tooravuro miyawosunodupudo kunyuda'aiyo'mokwono. Toro te kemi Gooti Aguto toolluro deko ikudodowo'jure tovi kaduko wiyopi kuudo souragunyumo'nupi tov gamoro subuu'yamju me'no aikulloka kuvinono Kuullo tool nekullabwonekono.” Pital toro kuudokaikono.
40Toro wuujuno sumaiyokwe aki kuuguudo go'no go'nodo pugai'aro kuudokaikono. Toro tool guureji aro amoruudokaikono. “Gooti tool agasuro a'mwo kirovanyuvanyu kuumwiyo toorai kirumwallono tov bwotonyokwono. Kirumwallo su tov kev kugaikul kuruv nomapiyokwe a'mwo kirovanyuvanyu kuumwiyo su tooraida'ai neya birolo'nugolokwilo.” 41Pital toro moruudoduke tovida'ai a'mwo abolo pun wuu'nodupu, “Oo nebalo'mdeyo” kuudo yau'dopure ton wonyo kuuvollunopogano. Toro te a'mwo abolo iruko avalo su tollugwojuda'ai kuudo kuubweyopo ton 3,000 a'mwo abologano. Toro ton sumdomguda'ai Jisasolluro a'mwo abolo tonyu uuguro'mwonyo'mno yiuno puru'mono sumo'nopogano.
Jisasollu kuudo kuubweyajupo tonyuro somjomwekovlaiyajupo tovinokwono
42Toro guro'mwonyuno sumaveyokwe a'mwo kuurotokwe tooravuro yodubwasodopure tovi wuu'nodupu kuumjunyajupogano. Toro ton ibwoto'nyo'mo i'bwo'nodupu wosamujuko pun anomwekovlaiyajupogano. Wosamujuko su tov Aguto toolluno aki aiko te kuudo yaullo'moneyokwe anomwekovlaiyajupogano. Aki toro ton Gooti toolluno subusu'nyogalo kuujajupogano. 43Toro imovla'mdupu a'mwo kuurotokwe tooravuro duuwallo jurogudo go'no go'nodo ton wuuduuwallodopure tonyu wonodupu mago to'no morowopiyodupu luko amorumoukuropiyajupogano. 44#Krt. 4:32-35Yiuwi'nokai a'mwo abolo Jisasolluno kuudo uubweyodupudo su ton gomno gomno miyomuudeyapinodupu yiuwi'nokai toga abi'bwo'numwallajupogano. Toro ton aro sajupogano. A'mwo pwol buro'nyo buro'nyodeyo tonyuno supto yodowo'jure toollu wonodupu a'mwo abolo kurukwe ton yasuwa'no kwiyajupogano. 45Aki kemi kuto ivitodeyo oo kwakodeyo tonyu a'mwo pworo abiyomallajupogano. Toro biyoma'dopure tovida'ai nuugwiyo ton mokabodupu a'mwo abolo supto yodopure tobuurai yado abuumwodeyajupogano. 46Toro yodupu yiuwi'nokai iruko toga Gooti toollu ilomoropiyo'moneyokwe ago tovuro agwapto toru'no kuulodapu aullu'bwo'nyajupogano. Aki toro ton kemi ago go'no go'nodo tonyu i'bwo'nodupu wosamujuko ton anomwallajupogano. Toro sajupo su ton kemoro poowokalago togai yanyagokwe sumo'nyajupogano. Toro imo'nodupu 47aki Gooti toolluno sulomoropiyajupogano. Toro ton a'mwo abolo gabovo punyuro sumdo tovi ilaiyo to'no kwimo'nyajupogano. A'mwo abolo gabovo su tonyuro punyu Gooti tool kemi ma'no ma'nodo tovuro kirumwallo tovida'ai abomollurolovomokalokwokaikono. Toro tonyu Aguto tool sumdomguda'ai Jisasolluro a'mwo abolo togai amaguro'mwojajukekono. Toro maguro'mwojoduke toga yiuwi'nokai iruko tollugwoji kwolallo bwotonyo amjumo'nugovlaiyajupogano.
Currently Selected:
Kuurotokwe 2: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
