Kuurotokwe 3
3
Pital a'mwo suvlo nomuullugollokwe toollu sukuloka tovinokwono
1Toruda'ai puga Pitaike Jooneke tooral subusu'nyogalo wuujo'moneyokwe Gooti toollu ilomoropiyo'moneyokwe ago tovino sulalorakono. Toro tooral sulato 3-kilook toga sulalorakono. Su toro toga subusu'nyogalo jo'moneyokweyogakono. 2Toro tooral ilno sumaleyokwe a'mwo pworo a'mwo suvlo nomuullugollokwe pwollu mollukwovomokabodopure kwonolorakono. A'mwo suvlo nomuullugollokwe su tekwo sumdomgu gami ganeyago tov su toro tekwoji somarokaikono. Toro tekwoji yiuwi'nokai toga mollukwovomokabodupu Gooti toollu ilomoropiyo'moneyokwe ago tovuro anoullo puvi wobo toru morumwallodupudekono. Anoullo su tovino yovo tov Sugumalukoveyokwono. Toro towai mwalodowo a'mwo abolo noullo tovi kuulodopure tonyu, “Nuugwiyo pwekwo donyabilo. Nuugwiyo pwekwo donyabilo.” Jugonodowodekono. 3Toro te Pitaike Jooneke tooral Gooti toollu ilomoropiyo'moneyokwe ago tovuro anoullo su tovi kuullo'mo yodole toga a'mwo su tekwo wonyuno sumaiyokwe ajugonokaikono. “E, kevu nuugwiyo pwekwo donyabiloo.” Ajugonokaikono. 4Toro ajugunoka tovi Pitaike Jooneke tooral wuu'nyuno sumaleyokwe a'mwo tekwoji kwonolorakono. Toro wonyuno sumaleyokwe Pital a'mwo tekwoji aro kuudokaikono. “Guu nami donakwonono.” 5Toro kuudoka tovi a'mwo tekwo kworallu iloonyopino sumaiyokwe kuudo saurokaikono. Oo nuugwiyo pun nyabulluno'mo tooraldeyo. 6Toro kuudo yau'duke kuvi kuruv Pital kuudokaikono. “Nuugwiyo gujabiyo'mo puruv nonagutonyugono. Toro kuvi kuruv gumi nogujabiyo'mo puruv kurukweyonyugono. Gumi gujabiyo'mo tov arokwono. Nasaretda'ai Jisas Kraisolluro yovo tovida'ai agudumono. “Guu ilodavo'bi kado jomollono.” Agudumono.” 7Pital toro wuujuno sumaiyokwe a'mwo tekwojuro anato tovi gaibworoma'no sumaiyokwe amogaibworapiyokaikono. Toro amogaibworapiyoka kuunodo toga a'mwo tekwojuro suvlo togai yogudo togai jurogudo imo'nyuno sumaveyokwe sulomudojurovodavokaikono. 8Toro tool kado yomolluno sumaiyokwe Pitaike Jooneke tooral Gooti toollu ilomoropiyo'moneyokwe ago tovi kuulodole toorallu kuumjungoulokaikono. Anakuuto tomuu ilodukwopiyodawo pla'mdowo amjumoullajukekono. Aki Gooti toolluno sulomoropimovlaiyajukekono. 9A'mwo Gooti toolluno su toro ilomoropiyoduke toollu a'mwo abolo ton me'no kwonopogano. Toro wonyuno sumaveyokwe 10kuudo suuworovomaropekono. Oo a'mwo su tool Gooti toollu ilomoropiyo'moneyokwe ago tovuro anoullo Sugumaluko toru mwalodowodo tookonoo. Nemi nuugwiyo'mo deko danekullugonodowodo tool kwekono. Kuudo suuworovomaropekono. Toro iworovoma'no sumaveyokwe a'mwo sukuloka su toollu kwonopo tovino mollolokurosi yo'mno adopogano. “Awi, a'mwo su toollu kwimo'numoka tov adadomgu'aro'mdukono?” Adopogano.
Pital Gooti toollu ilomoropiyo'moneyokwe ago tovuro agwapto toru kuuguudo sodubwasoka tovinokwono
11To'no'gwowi Pitaike'aro Jooneke'aro a'mwo sukuloka tooke'aro tooro Gooti toollu ilomoropiyo'moneyokwe ago tovuro agwapto tovi kuulno sumaveyokwe roukuuropi ago puvi aulodavoporogano. Roukuuropi ago su tovino yovo tov, Sooloomonollurokwono, dodupudokwono. Toro towai kuuloda'mno sumaveyokwe a'mwo sukuloka su tool Pitaike Jooneke toorallu mogudupolopiyo'no adaiyajukekono. Toro da'mduke toollu a'mwo abolo aulapo pun wonyuno sumaveyokwe kwollomno kano kano kuuwopogano. Toro ton a'mwo toollu wonyuno sumaveyokwe kuudo kwolallo sourukwapiyopogano. 12Toro yourukwapiyodopure tonyu Pital wonyuno sumaiyokwe kuudokaikono. “E, Isuraiyolda'ai a'mwo abolo akagaikul kevu kuudo kwolallo yourukwapiyodupu nemi buro'nyo'mo jomuugonanekwokovo? Kevu namino tov aro kuudo nyonakuu'mwalpiyo, Oo kevnokweralluro jurogudo'mdeyo oo sugupasudo'mdeyo tovida'ai sukulmalo tool somolladopiyo. Kuudo nyonakuu'mwalpiyo. Kevu su toro kuudo sonakuupi tov kuvimaiyo. 13#Moll. 3:15Toro kuvi kuruv Gooti tool gami womdokwe Jisasolluno ilaiyo wino'no a'mwo aguto yovokwe imo'nyo'mo amorumwallokaikono. Gooti su tool aiyoga nemi nellunumiyago Eburaiyameke Aisakeke Jekoopeke tooravuro tookono. Toro toolluro amorumwalloka su toollu kevu kemi mido mollekumwallokwe tooravuro ato tovi amorubweyopogaikikono. Toro morubweno sumaveyokwe kevnokwe togaikul nomuugona'dopure toga Pailatol kooti yogalo duuwiyo'no nokwo surolowapiyowo'jujukekono. Toro kuvi kuruv kev togaikulno'gwowi Jisasolluno buulo uugunyumopiyo'mno Pailatol nyurolowapiyo'jokwe aduullukuropogaikikono. 14#Mt. 27:15-23; Mk. 15:6-14; Lk. 23:13-23; Jn. 19:12-15Kevu buulo toro kuugunyumopiyopo su tool a'mwo yasuwa'nodolmaiyo. Toro kwol kuruv Gooti toollu dolago tomuu ilaiyo to'no somjomwekovlaiyajukekono. Aki toro tool Gooti toolluro sumdo tovi yiuno idopto'nodo to'no sumo'nyajukekono. Toro toollu Pailatol nyurolowapiyo'mo yoduke toga kevu uumjukuro'mno aro kuudopogaikikono. “Oo a'mwo su toollu mirolowapibinono. Toro kuvi kuruv a'mwo romiyosodowodo pwolluno'gwowi jullurolovonekwopiyabono.” Kuudopogaikikono. 15Kevu toro wuudo'mno aromiyosopekono. Toro aromiyosopo su tool nemi aiyo nekullabodowodo Jisasol kwekono. Toro tool me'no aboloka kwollu kuruv Gooti tool aiyo aiko te amodukavokaikono. Toro te navu yiuwi'nokai Jisasollu kwimo'nyajuko su ton me'no kwonowolonakono. Toro me'no kwonowolo toonal kuu'maiyo toru'no adodoluwosumwakuuwolo.” Kuudolorakono. 16Toro wuujuno sumaleyokwe aki aro kuudolorakono. “Kevu a'mwo suvlo nomuullugollokwe kaikwojuro kaiya'no yomjomwekelaboduke tonyu me'no wonodupudogaikikono. Toro toollu navnokwenalluro jurogudo tokwe mikulmawolekono. Toro kuvi kuruv Jisasolluro jurogudo tokwe to'no sukulmawolekono. Nav toonal Jisas su to kwolluno kuudo uubweyodowolonakono. Toro uubweyodowolo su toolluro yovo tovida'ai a'mwo akaikwo ilaiyo aiko te imo'noduke toollu kevu kwonmwakovo.”
17Pital toro wuujuno sumaiyokwe aki aro kuudokaikono. “Miyobuuravoo, aga kuudo me'no sourekumakono. Kevuge'aro kemi mido mollekumwallokwe toorogai'aro togaikul kemi ikullo'mwojo'moneyokwe Krais tool Jisasol kwoldeyo, kuudo miyouromaro'mno kwollu kaiyako sugolopogaikikono. 18Kevu kuudo miyouromaropo kuvi kuruv Gooti toolno'gwowi Krais toolluro danyu'nyuwuulo ibwosunyo'mo tonyuno sumdomgu me'no souromarokaikono. Sumdomgu toro me'no youroma'dowodo tool lukomgu imo'nyo'mo tovino gamoro yiuwi'nokai proofet toorai uubweyoduke tooro amoruujajuporogano. Toro te lukomgu Krais toollu kwimo'noka su ton yiuno Gooti toolluro me'no ajajuko tomgu'aro to'no kwimo'nokaikono.
19Toro te aga kevu kemi ma'no ma'nodo tonyuno kuudo youragunyumo'nupi Gooti toollomno neya jodu'mwonyugobilo. Kevu Gooti toollomno toro sodu'mwonyugobupi togaikul Gooti tool kemoro ma'no ma'nodo tonyu nomollol'movaikudukwopiyonekono. 20Yowo'ji Aguto su tool kemoro poowokalago tonyu anakuuto tomuu kuulekumwalowo'ji jurogudo ikullumovla'mwalonekono. Aki toro togaikullu ikullo'mwojo'moneyokwe Gooti tool Krais toollu nomekwopiyabwonekono. Kemi ikullo'mwojo'mo Krais ajesungiko su tool Jisasol kwekono. 21Toro tool Gooti toolluro ago muunyu kai'muu mwalodowodo tool kuwai neya mujomwekovla'mwalonekono. Toro mujomwekovlavowo'ji yiuno Gooti toolluro me'no ajesoka toga'no aikomgu wolabwonekono. Su toro wolabwono toga'no aiyoga gamoro proofet tooro aro me'no amodomollajuporogano. Lukomgu Gooti tool yiuwi'nokai noonyumwonyu uumdo wo'dupudo tonyu aiyo aiko te nyokwollosonekono. Amodomollajuporogano. Toro amodomollajupo su tov kuvinono imo'nyo'mo kuunodo toga Jisasol aikomgu noolabwonekono.”
22Pital toro wuujuno sumaiyokwe aki aro kuudokaikono. “Aiyoga Moosesol kemi tellukweyago toorai aro me'no kuudokaikono. Kemi Gooti Aguto kuunodo tool proofet nuvubusuko pwollu kemi ikullo'mwojo'mo nomekwopiyabwonekono. Proofet su tool kevnokwe togaikulluda'ai pwollu mekwopiyabwonekono. Toro toolluro yogalo ikudodowo'jure tovi kevu kaduko neya duuwiyogaulo. 23Toro kuvi kuruv yiuwi'nokai a'mwo abolo pun proofet su toolluro yogalo dodowo'jure tovi muu'nyubusuko supi tonyuno'gwowi Gooti tool molleru'mdeyomwallowo'ji yiunokuudo romiyebuuropiyonekono. Aiyoga Moosesol toro kuudokaikono.” 24Pital toro wuujuno sumaiyokwe aki aro kuudokaikono. “Gooti toolluro proofet tooro agasuro sumo'nadopiko tonyuno aiyoga kuu'maiyo toru'no me'no ajakwollajuporogano. Proofet su tooro proofet Samweleke'aro kwolluda'ai yiuwi'nokai proofet sumo'nugelabopo toorogai'aro tooro kuvinono amoruujajuporogano.
25 #
Mdk. 22:18
Toro te kevu aiyogasuro proofet amoruujajupo su tooravuro kwoloraiyo kuunodogaikikono. Aki kemi tellukweyago toorai aiyoga Gooti tool subuu'yamju adubweyajuko tooravuro kwikweyago kuunodogaikikono. Gooti tool aiyoga Eburaiyamollu subuu'yamju aro adubweyokaikono. “Gumoro jukweyago kwolaiyo pwollu moro sugudo tov uubwemovla'mwalmonyugono. Toro uubwemovla'mdo'mure toollu'aro yiuwi'nokai a'mwo abolo kwako akavi mwalodupudo kun kuruv nomapinokwono.” Adubweyokaikono. 26Gooti tool gamoro womdokwe Jisasollu sumdomgu kevu Juu toorekulluda'ai amekwopiyaboka tov aro tovinokwono. Kevu puuto ma'no ma'nodo tovi uumjungovla'mdupudo togaikul kuudo muuduko tov yauropi neya jodu'mwonyugobilo. Toro supi togaikullu gamoro sugudo tov nekubweyonogaikikono. Toro tovino amekwopiyabokaikono.” Pital toro kuudokaikono.
Currently Selected:
Kuurotokwe 3: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
