Kuurotokwe 4
4
Pitaike Jooneke toorallu wuulo amerosopo tovinokwono
1Toruda'ai Pitaike Jooneke tooral a'mwo abolo tonyu kuuguudo kuuno yodubwasodole toga pris toorogai'aro Sajuusi toorogai'aro a'mwo Gooti toollu ilomoropiyo'moneyokwe ago tovida'ai duuwatokwe aguto tooke'aro tooro abai'movoporogano. 2Toro bai'mo'mdopure toga Pitaike Jooneke tooral a'mwo abolo tonyu aro sodubwasajulorakono. “Jisasol bolo'no aiyo aiko te me'no adukavokaikono. Toro tovino tov a'mwo abolo me'no bolodupudo ton aiyo aiko te nodukapinogano.” Toro yodubwasodole tovi a'mwo abai'movopo su tooro wuu'nyuno sumaveyokwe surodo kuunoporogano. 3Toro tooro a'mwo kuurotokwe su tekwojallu wuulo tokwe agalairoporogano. Toro galai'no sumaveyokwe surakuuto junyo'mo yoduke tovino tov wuulo killo'mo ago tovi meroso'mno surakuuto su tollugwoji aule'narolorakono. 4Toro kuvi kuruv a'mwo kuurotokwe su toorallu yere mamerosodopure toga a'mwo abolo tono'gwowi kuuguudo sugudo tovi me'no kuu'nopogano. Toro kuu'nopo tonyuro bwotonyago pun, “Oo nebaloldeyo,” do'mno kuudo kuubweyopogano. Su toro togasuro Jisasolluro a'mwo abolo ton 5,000 kwolallo tomgu'aro sumo'nopogano.
Pitaike Jooneke toorallu kaunsel tooravuro sumdollu toru kooti yogalo aduuwiyopo tovinokwono
5Toruda'ai iruko aikomguda'ai tollugwoji a'mwo aguto toorogai'aro Juu tooravuro mido mollomwalokwe toorogai'aro a'mwo loowo tovino pi'mwo kuudokwe toorogai'aro tooro wagwolago Jeruusalem tovi bo'mno abi'bwo'noporogano. 6Aki pris aguto Anaseke'aro Kaiyafaseke'aro Jooneke'aro Aleksadaike'aro aki yiuwi'nokai pris aguto toolluro iko tovasuda'ai kworogai'aro tooro abi'bwo'noporogano. 7Toro bi'bwo'nyuno sumaveyokwe Pitaike Jooneke toorallu kemoro sumdollu toru molludapiyo'mno aro samuugojoporogano. “Kevu a'mwo suvlo nomuullugollokwe su toollu burowo'nyo jurogudo'mdeyo oo yovo'mdeyo tokwe sukulmwa'julorakuldeyo?” Samuugojoporogano.
8Toro yamuugojodopure toga Gooti toolluro Kuullo toollu uumjunyo'moneyokwe kuudo tov Pitalluro poowokalago tovi aullo'mowopiyokakwono. Toro kuullo'mowopiyoduke toga Pital a'mwo aguto toorogai'aro Juu tooravuro mido mollomwalokwe toorogai'aro abi'bwo'nopo su toorai aro kuudokaikono. “Isuraiyolda'ai mido mollomwalokwe akarekul 9a'mwo suvlo nomuullugollokwe su toollu ilaiyo amollumwa'juuwolo tovino kooti yogalo dukonakullakwovo? Oo a'mwo su toollu sukulmwa'juuwolo tovino adadomgu'aro sukulmwa'juloraldukoneyokwe tovino jukiyonakumgojadokwovo? 10Kemoro toro sonakumgojumapo tovino kevuge'aro Isuraiyolda'ai a'mwo abolo kugai'aro togaikul kuudo youromapino'moneyokwe yogalo akavi neya duu'nyulo. A'mwo sukulmwa'juuwolo akallu Nasaretda'ai Jisas Kraisolluro yovo jurogudo tokwe sukulnumwa'jukekono. Toro sukulmwa'juko tool kemoro sumdo tovi da'mduke toollu kwonmwakovo. A'mwo Jisas su toollu kevu i'noguropte tovi amovoguroptowosopekono. Toro amovoguroptowosopo kwollu kuruv Gooti tool aiyo aiko te amodukavokaikono. 11#Mt. 21:42; Mk. 12:10; Lk. 20:17; Ef. 2:20; 1Pt. 2:4-7Toro toolluno puukwollo puruv aro sakwollungikokwono.
“A'mwo sulago mojokwe tooro sulo pwolluno biyolsumdo yo'mno amodukwopiyopekono. Toro amodukwopiyopo kwollu kuruv Gooti tool ma'dowo ago tov sulo su to kwollu muunyu toru amodumwallo. Toro te aga'no'gwowi sulo su tool yiuwi'nokai ago mojo'mo sulo toorai kuuwolo'mwallo.”
Toro sakwollungikokwono. Toro te sulo su tool Jisasol kwol kuunogano. 12Nemi ma'no ma'nodo tovuro kirumwallo tovida'ai bomollurolovonekumokalokwiyo'moneyokwe a'mwo yasuwa'nodo pwol ku'nono mabomollurolovonekumokalokwononogano. Yiuwi'nokai kwako akavida'ai a'mwo pwolnodo kwol kuruv nekullo'mwojo'moneyokwe jurogudo nonagutorogano. Toro kuvi kuruv nemi nonekullo'mwojo'mo toolno'gwowi nomwallo. Su toolluno yovo tov Jisasolekono.” Pital toro kuudokaikono.
13Toruda'ai a'mwo Pitaike Jooneke tooralluro kuuguudo wuudodole tovi au'nallajupo su tooro wuu'nyuno sumaveyokwe morumoukuropi soporogano. Toro tooro aro adoporogano. “A'mwo su tooral a'mwo yasuwa'nodo pworakono. Aki toro tooral skuul miyajulo kworal kuruv jurogudo da'mdubul pi'mwono sodonekubwasadokuulo.” Adoporogano. Toro juno sumaveyokwe aro ainodokwopiyomaroporogano. “Oo a'mwo su tooral Jisaseke subwoto'nomollajupo pworakono.” Ainodokwopiyomaroporogano. 14Toro juno sumaveyokwe Pitaike Jooneke toorallu yogalo mojurugollo'mo kwinopo kworo kuruv a'mwo sukulolo tool kworake wobo toru da'mduke toollu kwonopo tovino tov yogalo puru'monodo kuruv muuravoporogano.
15Toruda'ai a'mwo mido mollomwalokwe tooro a'mwo kuurotokwe su toorallu kaunsel tooravuro ago tovi kwa'mgu tomuuno alokuubuleyokwe amodapiyoporogano. Toro me'no modapino sumaveyokwe a'mwo aguto kevnokwe tooro kuuguudo aulodomwaloporogano. 16Toro tooro aro sajunoporogano. “Nevu a'mwo su toorallu adado wiyanoraldukono?” Toro yanjunyuno sumaveyokwe aki aro adoporogano. “Nevu a'mwo su tooralluro sumwa'julo tovino kuunano yogalo soukuu'nuuda'ji kuvi kuruv yiuwi'nokai Jeruusalemda'ai a'mwo abolo ton a'mwo kuurotokwe su tooralluro duuwallo jurogudo sumwa'julo tovino me'no kuu'nopimapogano. Toro tovino tov nevu yiulo ku'nono miyoukuu'nuudanonogano.” 17Toro yajunyuno sumaveyokwe kuuguudo tov guureji nobomje'nugoulawo'jokweyo'mo aro adomduukuurosoporogano. “Nevu a'mwo su toorallu duudapi aro duuwiyanorakono. “Kevu Jisasolluno miyodubwasumwalbullunorakikono. Aki kwolluno yovo kuruv madumwalbullunorakikono.” Duuwiyanokwono.” 18Toro domduukuurosuno sumaveyokwe a'mwo kuurotokwe toorallu domaro'mno aro aduullukuroporogano. “Kevu a'mwo abolo tonyu Jisasolluno yovo tovino aki aiko te miyodubwasumwalbullunorakikono. Aki gamoro yovo kuvino kuruv madumwalbullunorakikono.” Aduullukuroporogano.
19Toro aduuwiyopo kuvi kuruv Pitaike Jooneke tooral aro kuudolorakono. “Navu kemi kaduko ikullosunonaldukono oo Gooti toollu kaduko wiyosunonaldukono? Su toro tovalluda'ai puruv Gooti toolluro sumdo tovi navu sugudo yo'mo tov gado'mdeyo? Kevnokwe toorekul jagilopi kuudo jouromallulo. 20Toro kuvi kuruv navno'gwowi nami sumdo tokwe me'no kwonyajuuwolo tokwe'aro kuu'nyajuuwolo tokwe'aro tonyuno a'mwo abolo punyu moruudomollo'mo tov ku'nono mimwogapiyosunonakono.” Kuudolorakono.
21Toro kuudolo tovi kaunsel tooro wuu'no'mno a'mwo kuurotokwe su toorallu kuudo muuteyoporogano. Su tov aro tovinokwono. A'mwo su tooralluro ikulodole tovino a'mwo abolo ton wono'mno Gooti toolluno sulomoropiyapogano. Toro tovino tov a'mwo kuurotokwe su toorallu kuudo ku'nono muuteyo'mno yiuno luko juro'gwollo'mo yogalo to'no aduuwiyoporogano. Toro duuwino sumaveyokwe a'mwo kuurotokwe tooral avla'buleyokwe surolowapiyoporogano. 22A'mwo suvlo nomuullugollokwe sukulolo su tekwo 40-pela kworomo kuuwolo'nyungiko toollu duuwallo jurogudo su tov kwimo'nokaikono.
Jisasolluro a'mwo abolo ton jurogudo mallo'moneyokwe subusu'nyogalo adopo tovinokwono
23Toruda'ai pris aguto toorogai'aro Juu tooravuro mido mollomwalokwe toorogai'aro tooro Pitaike Jooneke toorallu amodapiyoporogano. Toro amodapiyopo tooral bolokwino sumaleyokwe kevuge avalo Jisasolluro a'mwo abolo tonyomno abolorakono. Toro tooral bino sumaleyokwe pris mido mollomwalokwe toorogai'aro Juu tooravuro mido mollomwalokwe toorogai'aro tooravuro kuuguudo kuujajupo tonyuno abiyodubwasolorakono. 24#Moll. 20:11Toro biyodubwasodole tovi kevuge avalo ton wuu'nyuno sumaveyokwe kemoro poowokalago ton aval'no subwosungoulapobuurogano. Toro ibwosunyuno sumaveyokwe Gooti toollu subusu'nyogalo aro kuudoporogano. “Nemi Agutoloo, guu sulugumdo tokwe'aro kwako tokwe'aro soolwara tokwe'aro aki yiuwi'nokai noonyumwonyu gomno gomno amjomwekwingopo togai'aro ton sokwollonekubweyodekugono. 25Aiyoga guvnokwekujuro Kuullo tool gumoro womdokwe Devitolluro kuudo tovi uubweyoduke toga Devitol puukwollo puruv aro ajakwollokaikono.
“A'mwo Juu tooravuro miyawosunodupudo tooro i'bwo'nopi kavlo nonaguto tovida'ai surodo'mo kuullopi paweyogalo kuullajunpinorogano.
26Aki kwako akavida'ai a'mwo aguto kig toorogai'aro a'mwo mido mollomwalokwe toorogai'aro tooro gumoro wiyo'mwojo'moneyokwe ajesodo Krais toollu kaiyako wiyo'moneyokwe yovraimwonyopi kwollu kisuvolo wipinorogano.”
Ajakwollungikokwono.
27 #
Lk. 23:7-11;
Mt. 27:1,2; Mk. 15:1; Lk. 23:1; Jn. 18:28,29 Devitolluro toro ajakwolloka su tov nebalokwono. Kuvinono aro me'no sumo'nokakwono. Herooteke'aro Poontiyos Pailateke'aro a'mwo Juu tooravuro miyawosunodupudo pworogai'aro Isuraiyolda'ai a'mwo abolo togai'aro ton wagwolago akavi i'bwo'no'mno guvnokwekujuro womdokwe sugudo ajesodo toollu kaiyako igollo'mo su'bwo'nopogano. A'mwo ajesodo su tool Jisasol kwekono. 28Toro ton i'bwo'no'mno Jisasollu kaiyako sugolopekono. Toro sugolopo tov kevnokwenyuro kuudo tovida'ai migolopekono. Toro kun kuruv guvnokwekujuro me'no ajesungiko tomgu'aro to'gwowi kuvinono kwiyopekono. 29Oo nemi Agutoloo, aga a'mwo su tooravuro nemi luko danekuro'gwollo'mo yogalo nekudodopure tovi guu me'no kuu'numadekugonoo. Toro te nevu gumoro womdokwe tobuuronol a'mwo abolo tonyu yogalo tokwe moruujo'mo tovino luko nya'jokweyo'mo guu jurogudo donekubweyogawono. 30Aki guvnokwekujuro womdo sugudokwe Jisasolluno yovo tovida'ai a'mwo abolo nobollokwe tobuurai ikulo'bi duuwallo go'no go'nodo ton nokwo wuuduuwallubinekugono.” Subusu'nyogalo toro kuudopogano.
31Subusu'nyogalo toro me'no dopino sumaveyokwe toga wunyu wunyu to'busuko puruv yo'no ago aulomwallajupo tov yaudo yaudo bwotonyo sokakwono. Toro yoduke toga Gooti toolluro Kuullo toollu uumjunyo'moneyokwe kuudo ton kemoro poowokalago tovi aullo'mowopiyokakwono. Toro kuullo'mowopiyoduke toga a'mwo abolo su ton Gooti toolluro yogalo tokwe moruudomollo'mo tovino luko miyajupogano. Toro kun kuruv yiuno kuu'maiyo toru'no guureji amoruujajupogano.
Jisasolluro a'mwo abolo ton kevuge avalo pubuurai yasuwa'no yado kwiyajupo tovinokwono
32 #
Krt. 2:44,45 Yiuwi'nokai Jisasolluno kuudo uubweyodupudo ton kemoro poowokalago togai'aro kuudo togai'aro ton yiuno avalou'no kwosunyajupokwono. Toro ton aro ajajupogano. “Oo nemi buro'nyo buro'nyo kuto ivitodeyo ton yiuno nevnokwenollo'mo'maiyo.” Toro dodupu kevuge avalo pubuurai abuuwingoullajupogano. 33Aki su toro toga a'mwo kuurotokwe tooro jurogudo kuunodo imo'nodupu aro adodoluwosunyajuporogano. “Aguto Jisasol aboloka kwol kuruv aiyo aiko te me'no adukavokaikono.” Kuu'maiyo toru'no adodoluwosunyajuporogano. Aki Gooti tool yiuwi'nokai Jisasolluro a'mwo abolo su tonyu wiyo'mwojo'moneyokwe gamoro yasuwa'wino sugumaluko bwotonyago tollovo kuubweyajukekono. 34Toro uubweyoduke tovida'ai a'mwo abolo su ton noonyumwonyu punyuno supto miyajupogano. Su tov aro tovinokwono. Jisasolluro a'mwo abolo su tonyuda'ai pun kemi kwakodeyo oo agodeyo tonyuda'ai nuugwiyo ton mokabodupu a'mwo kuurotokwe toorai abuuwiyajupogano. 35Toro buuwiyodopure tonyu a'mwo kuurotokwe tooro ma'dupu a'mwo abolo supto yodopure punyu yado kuumwodeyajuporogano.
36Su togasuro aku'momdo Saiprosda'ai a'mwo pwolluno yovo tov Joosepolekono. Toro tool Livaiyolluro iko tovasuda'aiyekono. Aki a'mwo su toolluno yovo puruv Banabasolekono. Kuurotokwe tooro yovo su tovi toro wuudodupudekono. Yovo su tovino kavlo tov “Poowokalago tonyu jurogudo duuwimwojo'moneyokweyolekono.” 37Toro te a'mwo su tool gami kwako puvino nuugwiyo kuubiyopo tov mworaro'no sumaiyokwe a'mwo kuurotokwe toorai abuuwiyokaikono.
Currently Selected:
Kuurotokwe 4: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
