Kuurotokwe 5
5
Ananaiyaseke Safairakwe teyaul Gooti toollu youkuu'nuujo'mo solo tovinokwono
1To'no'gwowi su toro togasuro a'mwo kwakokwe pwolluno yovo tov Ananaiyasolekono. Aki gamoro abolo tovino yovo tov Safairavokwono. Toro teyaulluro kwako puruv a'mwo pwol abiyomarokakwono. 2Toro abiyomaroka tovi Ananaiyasol nuugwiyo tov momwora'no sumaiyokwe pun yiulo apuurosokaikono. Toro kupuurosoduke tovi gamoro abolo tov me'no souroonokakwono. Toro te Ananaiyasol nuugwiyo sugulloka ton a'mwo kuurotokwe toorai abuuwiyokaikono. 3Toro buuwino sumaiyokwe Pital Ananaiyasollu aro kuudokaikono. “Oo Ananaiyasoloo, guu Gooti toolluro Kuullo toollu kuunano youkuu'nuujo'moneyokwe Satanyolluro mollubworomokavla'mduke tovi kuumjunmado tov buro'nyo kavlo tovino'mdeyo? Guu gumi kwako tovida'ai nuugwiyo ton pun yiulo apuurosumadekugono. Toro tooku gumi poowokalago tovi ma'no ma'no yo'mo tekwogu nemi buro'nyo'mo kuunano joukuu'nanekudadokuuno? 4Kwako abiyogumaropo su tov muudu'nodo toga'no'gwowi guvnokwekujuro ato tovi aguuwollajukokwono. Aki lukomguda'ai nuugwiyo agubiyopo kun kuruv gumi ato tovi guuwo'duke tonyu buro'nyo buro'nyo imokwe kuudo sau'bi tov nokwo'mekugono. Gumoro kuudo tovida'ai su toro nokwo so'bujuko kweku kuruv nemi kuunano yogalo youkuu'nanekujo'mo agujunmokaikugonoo. Toro tooku gumi poowokalago tokwe ma'no ma'no yo'mo tovino buro'nyo'mo soukuu'nanekudumadekudeyo? Kuudo neya jaurono. Gumoro kuunano soukuu'nanekudumado su tov yiuno nemino manekudadokuuno. Toro kweku kuruv Gooti toolluno'gwowi kwolluda'ai soukuu'nuudadokuuno.” Pital toro kuudokaikono. 5-6Toro kuudoka tovi Ananaiyasol wuu'no'no kwako tovi woloo'no sumaiyokwe yiuno'no abolokaikono. Toro aboloka toolluno a'mwo muugunyo pworo ago tovi kuulno sumaveyokwe aulomoweyomguromaropekono. Toro kuulomoweyomguromaro'mno bomokalokwino sumaveyokwe buuso tovi amolsosopekono. Ananaiyasollu toro kwimo'noka tovino a'mwo abolo pun wuu'no'mno luko bwotonyo sopogano.
7Lukomgu kuujo sumdo pullapullu me'no avlavoka toga a'mwo bwiyo su toolluro abolo tov ago tovi aulokakwono. Abolo su tov gami kwolo toollu kwimo'noka tovino muu'nokakwono. 8Toro tov kuulno sumaiyokwe Pital abolo su tovi kuudoganokaikono. “Guuge'aro gumi kwolo tooke'aro teyaukul kemi kwako tovino nuugwiyo aikubimapo tov yiuwi'nokai ton dukomokabadokuulo?” Toro kuudoganoka tovi abolo tov kuudokakwono. “Tade, navu yiuwi'nokai nuugwiyo anakubimapo ton kuvi abomaikubwemwakuuwolo.” 9Toro kuudoka tovi Pital kuudokaikono. “Oo kevu yiuwi'nokai teyaukul kuudo yiuno avalo puru'mono wosodubul nemi soukuu'nanekudumalo tov kaiya'no sadokuulo. Kevu aro kuudo jukiyau'mwakulo? Navu Aguto toolluro Kuullo tool muugononakwo'dowo'jure toga kuunano yogalo soukuu'nadosi tov maironakumwallonekono. Su toro kuudo yau'dubul nemi kuunano yogalo me'no soukuu'nanekudumalo tov ilaiyo'maiyo. Guu doonono. Aga toga a'mwo pworo noullo su tovi bai'mopino'mo sadokwovo. A'mwo su tooro gumi kwolo tool abolmoka toollu bomokalokwodupu buuso tovi amolsosugoporogano. Toro te gumi kwolo toollu abomokalokuumapo to'busuko kubalno guu ku'guuji kuruv nobogumokalokuupinorogano.” Kuudokaikono. 10Pital toro wuujuno sumaiyokwe kuga'gwo kuuno abolo tov Pital da'mduke wobo toru woloo'no sumaiyokwe yiuno'no abolokakwono. Toro aboloka tovi a'mwo muugunyo tooro aki aiko te kuula'mno abomokalokwopokwono. Toro tovi bomokalokwino sumaveyokwe gami kwolo toollu amolsosopo wobo toru amolsosopokwono. 11Toro te a'mwo kwolabolo teyaullu kwimo'noka su tovino kuuguudo tov yiuwi'nokai Jisasolluro mollu'bwoto tobuurogai'aro a'mwo abolo gabovo pugai'aro ton wuu'nyuno sumaveyokwe luko bwotonyo sopogano.
Kuurotokwe tooro duuwallo jurogudo judo'no judo'nodo tonyu kuuduuwallajupo tovinokwono
12Toruda'ai a'mwo kuurotokwe tooro a'mwo abolo tonyuro sumdo tovi duuwallo jurogudo judo'no judo'nodo ton kuuduuwallajuporogano. Toro wuuduuwallodupu Jisasolluro a'mwo abolo ton Gooti toollu ilomoropiyo'moneyokwe ago tovuro agwapto tovi kuulodapu roukuuropi ago tovi aullu'bwo'nyajupogano. Roukuuropi ago su tovino yovo tov Sooloomonolluro Roukuuropi Agoveyokwono. 13Toro towai kuullu'bwo'nodopure tonyuno a'mwo abolo Jisasolluno kuudo muubweyodupudo ton wobo toru biyo'mo luko sajupogano. Luko toro yodupudo kuvi kuruv kuudo muubweyodupudo su ton a'mwo abolo i'bwo'nodopure su tonyuno aro ajajupogano. “Oo su ton a'mwo abolo ilaiyo kuunodogano.” Ajajupogano. 14Toro kuvi kuruv a'mwo abolo gabovo bwotonyago puno'gwowi Aguto Jisasolluno kuudo kuubweyajupogano. Toro ton sumdomguda'ai Jisasolluro a'mwo abolo togai guro'mwonyodupu kwolallo bwotonyago sumo'nyajupogano.
15Aki a'mwo kuurotokwe tooravuro ikulmovla'mdopure tovino tov a'mwo abolo ton wuu'nodupu kemi nobollokwe toorai i'buronyuko tonyu'aro amollukwovomokabiyajuporogano. Toro mollokwovomokabodupu nobollokwe su toorai puuto tovi wobo toru kwako tovi kwolmwollajuporogano. Su toro sajupo tov aro tovinokwono. Pital puuto tovi'aro pla'mdowo'jure toga gamoro wakuunonabolo tov a'mwo nobollokwe toorai kuubogai'no'ji tov ikulono'moneyokwe kuumwallajuporogano. 16Aki kwolallo bwotonyago pun wagwolago Jeruusalem tovi kwa'mguda'ai ajumiyo go'no go'nodo tomuu mwalodupudo ton bodupu a'mwo kuurotokwe toorai abuuru'mallajupogano. Toro ton kemi nobollokwe togai'aro kuullo ma'no ma'nodo tooro kuulomwalodupudo toorogai'aro tobuurai amokabiyajupogano. Yiuwi'nokai toro mokabodopure tobuurai a'mwo kuurotokwe tooro sukullajuporogano.
Ensel pwol a'mwo kuurotokwe toorai wuulo killo'mo ago tovida'ai abomollurolovomokalokwoka tovinokwono
17Toruda'ai pris aguto tooke'aro gami uumjunodupudo toorogai'aro tooro a'mwo kuurotokwe tooraino kwekuullu kuudo bwotonyo sauroporogano. Pris aguto toollu uumjunodupudo su tooro Sajuusiyorogano. 18Toro tooro a'mwo kuurotokwe tekwojai wuulo galerosuno sumaveyokwe wuulo killo'mo ago tovi aulomerosoporogano. Wuulo killo'mo ago su tov a'mwo yasuwa'nodo toorai kuulomeroso'moneyokweyokwono. 19Toro tovi aulomerosopo kuvi kuruv surakuuto toga Gooti Aguto toolluro ensel pwol bino sumaiyokwe wuulo killo'mo ago tovida'ai kudo'aiko tov ausubweyokaikono. Toro kuusubweno sumaiyokwe a'mwo kuurotokwe tekwojai kwa'mgu tomuuno abomollurolovomokalokwokaikono. Toro bomollurolovomokalokwino sumaiyokwe aro kuudokaikono. 20“Kevu Gooti toollu ilomoropiyo'moneyokwe ago tovuro agwapto toru'no plavopi a'mwo abolo tonyu aiyo yiunokuudo mujomwekovlaiyo'moneyokwe tovino kuuguudo tov yiuno kuu'maiyo toru'no jodubwasulo.” Kuudokaikono. 21Toro kuudoka tovi a'mwo kuurotokwe tooro kaduko wino sumaveyokwe lomwo iru'mago sullourosoka toga dukavo'mno Gooti toollu ilomoropiyo'moneyokwe ago tovuro agwapto toru'no avlavoporogano. Toro tooro a'mwo abolo tonyu sodubwasajuporogano.
Toro yodubwasodopure toga a'mwo pris aguto toollu uumjunodupudo toorogai'aro yiuwi'nokai Isuraiyolda'ai a'mwono moduvomwallokwe toorogai'aro tooro ago puvi aullu'bwo'noporogano. Toro kuullu'bwo'nyuno sumaveyokwe kaunsel toorai domaro'mno su'bwo'noporogano. Toro i'bwo'nyuno sumaveyokwe a'mwo kuurotokwe toorai wuulo killo'mo ago tovida'ai amokabupureyokweyo'mo a'mwo mollurogudo pworai amodapiyoporogano. 22A'mwo mollurogudo su tooro plaino sumaveyokwe wuulo killo'mo ago toru ai'movoporogano. Toro ki'movo'mno a'mgono sopo kworo kuruv a'mwo kuurotokwe su toorai miyo'mgonomaroporogano. Toro tooro kaunsel tooraiyomno aikomgu bino sumaveyokwe aro kuudoporogano. 23“Nevu wuulo killo'mo ago toru'no pla'mdowa ai'mo'mawonogano. Toro toonol wuulo killo'mo ago tovida'ai kudo'aiko ton jurogudo guureji jugu'na'dopure kwonmawokwono. Aki duuwato womdokwe tooro su towai nomwalodopure kwonmawonogano. Toro kuvi kuruv anakuuto tomuu kuulodowa a'mwo pwolnodo kwol kuruv maulomwaloduke kwonmawonogano.” Kuudoporogano.
24Toro kuudopo tovi Gooti toollu ilomoropiyo'moneyokwe ago tovida'ai duuwatokwe a'mwo aguto tooke'aro pris mido mollomwalokwe toorogai'aro tooro wuu'no'mno kuudo kwolallo sourukwapiyoporogano. Toro tooro sajunoporogano. “Awi, a'mwo su tooro nebal'no sounopimaporodukono?” 25Toro yajunodopure toga a'mwo pwol ago tovi kuulno sumaiyokwe aro auluudokaikono. “E, kevu duu'nyulo. Kemoro a'mwo amerosumwa'jupo su tooro aga toga Gooti toollu ilomoropiyo'moneyokwe ago tovuro agwapto towai a'mwo abolo tonyuro akuuto toru kuuloda'mdupu kuuguudo sodubwasadokwovo.” 26Toro kuudoka tovi Gooti toollu ilomoropiyo'moneyokwe ago tovida'ai duuwatokwe aguto tool gami a'mwo mollurogudo toorai momwora'no sumaiyokwe a'mwo kuurotokwe tooraiyomno avlavoporogano. Toro tooro wino sumaveyokwe a'mwo kuurotokwe su toorai movagu'mwojo'mo sopo kworo kuruv aro sajunoporogano. “A'mwo abolo su'bwo'nadokwopo su ton a'mwo kuurotokwe tooravuro yodubwasodopure tovino ilaiyo sadokwovo. Toro tovino tov nevu a'mwo kuurotokwe toorai agalomworara'ji tov a'mwo abolo su ton sulo togai noluvoromiyanekubwepiyo.” Su toro yajunyuno sumaveyokwe luko soporogano. Toro tooro a'mwo kuurotokwe su toorai mamovagu'mwojopo kworo kuruv kaveno aulogaibworomaroporogano.
Kuurotokwe tooro jurogudo yopiyo'mno kaunsel toorogai kuuguudo sajunopo tovinokwono
27Kuurotokwe toorai toro mogaibworomokabino sumaveyokwe kaunsel tooro kuulomwalodopure ago tovino mokaula'mno kworavuro sumdollu toru aulomolludapiyoporogano. Toro kuulomolludapino sumaveyokwe pris aguto tool a'mwo kuurotokwe toorai kuudokaikono. 28#Mt. 27:25“Nevu aro me'no adaikumjukuroworekikono. “Kevu Jisasolluno miyodubwasumwalpinorekikono. Aki kwolluno yovo kuruv madumwalpinorekikono.” Toro me'no adaikumjukuruwo kworekul kuruv nemi manekuu'nyubusuko yodupu a'mwo abolo tonyu kuuno sodubwasadokwoporekikono. Aki toro toorekul Jisasolluro aboloka tovino nemino tov, Kworavuro tovasuda'ai aromiyosopekono. Sodubwasadokwoporekikono. Kuuguudo su toro sodubwasadokwopo tov bomje'nugoulno bomje'nugoulno yodawo yiuwi'nokai wagwolago Jeruusalemda'ai ton me'no kuu'nopiyadokwopokwono.” Kuudokaikono.
29Pris aguto tool toro kuudoka tovi Pitaike'aro a'mwo kuurotokwe toorogai'aro tooro aro kuudoporogano. “Nevu a'mwo yasuwa'nodo pworavuro yogalo tovino to'no muumjunanonogano. Toro kwonol kuruv yiuno Gooti toolluro yogalo to'gwowi kuvinono neya uumjunmwalanonogano. 30Toro te kevu neya duu'nyulo. Kevu Jisasollu romiyoso'moneyokwe i'noguropte tovi amovoguroptowosopo tool abolokaikono. Toro aboloka kwollu kuruv Gooti tool aiyo aiko te me'no amodukavokaikono. Toro amodukavoka Gooti su tool nemi nellukweyago tooravuro Gooti tookono. 31Toro moduka'mno sumaiyokwe muunyu kai'muuno mokaila'no gamoro anato toru amorumwallokaikono. Toro tool nemi a'mwo aguto nonekullumo'nodowodekono. Aki nemi ma'no ma'nodo tovida'ai bomollurolovonekumokalokwiyo'mo nekullumo'nodowodekono. Nevu Isuraiyolda'ai tonol Gooti toollomno kuudo souragunyumo'na'ji tov Gooti tool nemoro ma'no ma'nodo su tovuro kirumwallo tovi nomodukwopiyonekono. Su toro nekullo'mwojo'mo winyokwekono. 32Toro te nevnokwe toonol Gooti toolluro su toro yoduke tonyu nemi sumdo tokwe me'no kwonowonogano. Toro toonol a'mwo abolo punyu kuu'maiyo toru'no dodolubweyodowado toga nevu judo toonol madodolubweyokwenogano. Toro kuvi kuruv nevu Gooti toolluno kuudo kuubwemwakuuwo toonollu gamoro Kuullo tool nekullabodowodonogano. Toro nekullabodowodo su tool nekullo'mwojoduke tovida'ai nevu kuu'maiyo toru'no dodolubweyokwenogano.” Kuudoporogano.
Gamaliyol a'mwo kuurotokwe tooraino, “Kaiyako migolpinono,” aduumjukuroka tovinokwono
33Kaunsel tooro toro kuudopo tovi wuu'nyuno sumaveyokwe surodo bwotonyo yo'mno a'mwo kuurotokwe toorai romiyoso'mo kwinoporogano. 34Toro kwinopo kuvi kuruv kaunsel su tooraida'ai Farasi pwol iloda'mno sumaiyokwe aduumjukurokaikono. A'mwo su toolluno yovo tov Gamaliyolekono. A'mwo su tool loowo tovino ibwasokwekono. Toro toolluno yiuwi'nokai a'mwo abolo ton ilaiyo bwotonyo amollajupekono. Toro te a'mwo su tool iloda'mno sumaiyokwe yiuno kaunsel tooraino kuuguudo wuujo'mo tool a'mwo kuurotokwe toorai kwa'mgu tomuuno ilomwalpureyokwe abilomodopiyokaikono. 35Toro bilomodopino sumaiyokwe kaunsel toorai aro kuudokaikono. “Nuuge avalo Isuraiyoloravoo, kevu a'mwo kuurotokwe su toorai kaiyako igollo'mo sadokwopo kworekul kuruv po'dogalo tomgu'aro neya jugologaulo. 36Su toro aikudumo tov aro tovinokwono. Aiyoga a'mwo pwolluno yovo tov Teyuudasolekono. A'mwo su tool aro ajajukekono. Oo nuu aguto kuunodo toonyugonoo. Toro doduke toollu a'mwo 400 tomgu'aro tooro kuumjunyajupekono. Toro kwollu kuruv a'mwo pworo aromiyosopekono. Toro me'no aromiyosopo toga'no'gwowi gami kuumjunyajupo su tooro gomno gomno younopiyo'mno aga toga pwolnodo kwol kuruv mamwallo. 37Aki lukomgu su toro to'busuko sumo'noka puruv arokwono. Aiyoga gavman womdokwe tooro a'mwo abolo tonyu jagillo'moneyokwe abi'bwo'noporogano. Toro bi'bwo'nodopure toga a'mwo Galilida'ai pwol abokaikono. A'mwo su toolluno yovo tov Juudasolekono. Toro tool gavman tovi kisuvolo wiyo'mo winodowodo tool a'mwo pworai ki'noma'duke tooro kwollu kuumjunoporogano. A'mwo su toro soka kwol kuruv me'no abolokaikono. Aki yiuwi'nokai gami kuumjunyajupo kworo kuruv gomno gomno lukado me'no sounopiyoporogano.” Kuudokaikono. 38-39Gamaliyol toro wuujuno sumaiyokwe aki aro kuudokaikono. “Agasuro sumo'nadopiko su tovino aro ikudumo'mokwono. Kuurotokwe su tooravuro kuuguudo sodubwasumwakopo tov kwako akavida'ai a'mwo pworavuro tovida'ai sumo'nowo'jujuko'mno'juki kevnokwe tooro nokwo uumjukupinokwono. Toro kuvi kuruv Gooti toolluro tovida'ai sumo'nowo'jujuko'mno'juki kevu ku'nono muuwolopinorekikono. Aki toro toorekul Gooti toollu molo nuuwimwalpiyo. Toro tovino tov kevu a'mwo kuurotokwe su toorai kaiyako migolopi nokwo wonyapino to'no neya jogaulo.” Kuudokaikono.
Gamaliyol toro wuujuno sumaiyokwe kaunsel tooro kuvinono kuumjunoporogano. 40Toro tooro a'mwo kuurotokwe toorai doma'no sumaveyokwe a'mwo mollurogudo pworai aro aduuwiyoporogano. “Kevu a'mwo kuurotokwe toorai wuulo togai dogalogunyukuurumollulo.” Toro duuwino sumaveyokwe a'mwo mollurogudo tooro kuvinono agalogunyukuurumolloporogano. Toro galogunyukuurumolluno sumaveyokwe kaunsel tooro kuurotokwe toorai aro aduuwiyoporogano. “Aga kevu Jisasolluno kuuguudo tov miyodubwasumwalpinorekikono. Aki kwolluno yovo kuvino kuruv milomoropimwolapinorekikono.” Toro duuwino sumaveyokwe surolowapiyoporogano. 41Toro surolowapiyopo tekwojo bolokwino sumaveyokwe aro adoporogano. “Oo ilaiyo bwotonyokwono. Nemi danyu'nyuwuulo anekubwemapo su toorai Gooti tool nokwo kuumjukurowo'jujukekono. Toro kuvi kuruv Gooti tool nemino ilaiyo bwotonyo winoduke tool nokwo wonyapino to'no sumokaikono. Toro te nevu Jisasolluno yovo tovida'ai danyu'nyuwuulo ama'mawo tov ilaiyo bwotonyokwono.” Kuurotokwe tooro toro amjodumovlavoporogano. 42Toro tooro moruudomollo'moneyokwe yiuwi'nokai iruko tobuullu su'bwo'nyajuporogano. Puga Gooti toollu ilomoropiyo'moneyokwe ago toru su'bwo'nyajupogano. Aki puga a'mwo abolo tonyuro ago go'no go'nodo tomuu su'bwo'nyajupogano. Toro i'bwo'nodupu kuuguudo sugudo tov aro sodubwasajuporogano. “Gooti toolluro nekullo'mwojo'moneyokwe amonekwopiyaboka Krais tool Jisasol kwekono.” Sodubwasajuporogano.
Currently Selected:
Kuurotokwe 5: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
