Kuurotokwe 6
6
Kuurotokwe toorai womdo do'nuwimwalpino'moneyokwe a'mwo 7-pela pworai ajesopo tovinokwono
1Toruda'ai a'mwo abolo gabovo bwotonyago ton Jisasolluno kuudo uubweyodupu sumdomguda'ai Jisasolluro a'mwo abolo togai aguro'mwonyajupogano. Toro ton uumjunyokwe bwotonyago amjumo'nugovlaiyajupogano. Toro mujumo'nugovla'mno sumaveyokwe puga Jisasolluro a'mwo abolo Juu pun yogalo aulloullajunopogano. Juu su tonyuro pun Grik yogaljo dodupudogano. Aki pun kemi yogaljo kuunodo tovi dodupudogano. Toro tonyuro yogalo aullajunopo su tov aro tovinokwono. Jisasolluro a'mwo abolo ton a'mwo abolo supto yodopure tobuurai wosamujukodeyo oo kuto ivitodeyo ton yado uumwodeyodupudogano. Womdo su tov yiuno kemi yogaljo kuunodo tovi dodupudo ton sajupokwono. Toro ton kemi avaiyogaljo dodupudo abekanyo tonyu pi'mwono kwiyajupogano. Toro kun kuruv Grik yogaljo dodupudo tonyuro abekanyo tonyuno'gwowi kuudo neya miyaullajupogano. Toro yodopure tovida'ai Grik yogaljo dodupudo tonyuro abekanyo tobuuro mujuko kwinyajupogano. Toro tovino yogalo aullajunopogano. 2Yogalo toro kuullajunyuno sumaveyokwe 12-pela a'mwo kuurotokwe tooro yiuwi'nokai Jisasollu uumjunodupudo su tobuurai mollu'bworomwallo'mno aro kuudoporogano. “Nevu wosamujuko'mdeyo oo kuto ivito'mdeyo togai yado uumwodeyowa'ji Gooti toolluro yogalo tovi suu'dapiya'ji tov ilaiyo'maiyo. 3#1Tm. 3:13Toro te nevugebuuravoo, nevu aro neya yanokwono. Kevnokwe togaikulluda'ai a'mwo 7-pela yovo sugudokwe pworai dojesulo. A'mwo 7-pela ajesupi su tooro yasuwa'nodoraino nojesupiyo. Toro kugaikul kuruv aro tovino neya yenodokwopiyomapinogaikikono. Kemoro pi'mwo kuudo tokwe'aro aki Gooti toolluro Kuullo tool mollado'mo'mdowo'jure tovi uumjunodopudorodeyo adupi toorai nokwo jesupinorogano. Toro te a'mwo 7-pela ajesupi su tooro kuto ivitodeyo yado uumwodeyo'moneyokwe womdo akavi nokwo imwalpinorogano. 4Womdo su tovi toro uubweyowa'ji kuvi kuruv nevnokwe toonolno'gwowi womdo aro tovallu to'no imwalanonogano. Gooti toolluno subusu'nyogalo domwalowa'ji aki gamoro yogalo tokwe moruudomollumwalanonogano. Womdo su toro tovallu imovla'mwalanonogano.” Kuudoporogano.
5Kuurotokwe tooravuro toro kuudopo tovi yiuwi'nokai Jisasolluro a'mwo abolo ton ilaiyo sopogano. Toro tonyuro a'mwo ajesopo pwolluno yovo tov Stivenolekono. A'mwo su tool kuudo noullo maullo miyau'dowo Jisasolluno kuudo tov guureji agudupolallajukekono. Aki Gooti toolluro Kuullo tool mollado'mo'mduke tovi guureji kuumjunyajukekono. Toro toollu jesuno sumaveyokwe aki a'mwo pworogai'aro ajesopogano. A'mwo ajesopo su tooraino yovo tov Filipeke Prookooroseke Nikanooreke Timooneke Pamenaseke aki wagwolago Antiyookda'ai Nikoolaseke'aro toorai ajesoporogano. Muudu'nodo toga Nikoolasol Juu a'mwolmaiyo. Toro kwol kuruv lukomgu Juu tooravuro pasudo tomgu'aro uumjuno'no Juu a'mwo pwolbusuko sumo'nokaikono. Aki toro tool Jisasolluro a'mwo kuunodo me'no kwimo'nokaikono. 67-pela a'mwo su toorai me'no jesuno sumaveyokwe a'mwo kuurotokwe tooraiyomno mokaula'mno kworavuro sumdollu toru aulomolludapiyoporogano. Toro kuulomolludapino sumaveyokwe toga a'mwo kuurotokwe tooro 7-pela a'mwo ajesopo su tooravuro mido tonyu kemi ato tokwe uubogai'no'mno subusu'nyogalo amadoporogano. Kemoro womdo ilaiyo imovla'mwalpino'moneyokwe a'mwo 7-pela su toorai toro ajesoporogano.
7Toro te Gooti toolluro kuuguudo tov yiuwi'nokai tomuu guureji bomje'nugoulno bomje'nugoulno sajukokwono. Toro bomje'nugouloduke tovida'ai a'mwo abolo gabovo pun wuu'nodupu bwotonyago ton kuudo kuubweyajupogano. Toro tovino tov wagwolago Jeruusalem towai a'mwo abolo Jisasollu uumjunyokwe ton bwotonyago sumo'nyajupogano. Aki pris kworo kuruv bwotonyago pworo Jisasolluno kuudo uubweyo'mno kwollu uumjunyokwe sumo'noporogano.
Juu tooro Stivenollu galomworaro'mno kooti yogalo aduuwiyopo tovinokwono
8Toruda'ai a'mwo 7-pela ajesopo su tooraida'ai pwolluno yovo tov Stivenolekono. A'mwo su toollu Gooti tool gamoro jurogudo tokwe sugudo tokwe toval uubweyoduke tovida'ai Stivenol a'mwo jurogudokwe sumo'nyajukekono. Toro tool a'mwo abolo ton muugona'dopure toru duuwallo jurogudo kuunodo pun kuuduuwallajukekono. 9Toro wuuduuwalloduke kuvi kuruv a'mwo pworo Stivenolluro yogalo tovi bwolomorumwogapiyo'mo kuudo saullajuporogano. Toro kuudo saullajupo su tooraida'ai pworo Juu tooravuro i'bwo'nyago puvi su'bwo'nyajuporogano. I'bwo'nyago su tovino yovo tov, A'mwo Surolowapingiko tooravuro i'bwo'nyagoveyokwono. Toro tovida'ai i'bwo'nodupudo pworogai'aro aki wagwolago Sairinida'ai pworogai'aro aki wagwolago Aleksadriyada'ai pworogai'aro aki proovins Silisiyake Esiyake tovalluda'ai pworogai'aro tooro bi'bwo'no'mno Stivenollu yogalo abuudoporogano. 10Toro abuudopo kworai kuruv Stivenol Gooti toolluro Kuullo toolluro pi'mwo kuudo uubweyoduke tovida'ai a'mwo su toorai yiuno pi'mwono kuujajukekono. Toro wuudoduke toga a'mwo su tooro kevnokweravuro kuudo tovida'ai Stivenolluro yogalo wuudoduke tovi ku'nono mabwolomorumwogapiyajuporogano. 11Toro te a'mwo su tooro Stivenolluno kuunano yogalo youkuu'nuudupino'moneyokwe a'mwo pworai yiulo tomuu doma'no sumaveyokwe aro kuudoporogano. “Kevu a'mwo su toolluno kuunano yogalo aro youkuu'nuudupinorekikono. “Stivenol Mooseseke'aro Gooti tooke'aro tooralluno kaiya'no yogalo doduke toollu kuu'nowekono.” Joukuu'nuujulo.” Kuudoporogano. 12Toro wuujuno sumaveyokwe a'mwo su tooro a'mwo abolo tonyu kuvinono soukuu'nuudoporogano. Toro youkuu'nuudodopure tovida'ai a'mwo abolo au'nallajupo tonyu surodo to'no aju'gwoloporogano. Aki Juu tooravuro mido mollomwalokwe toorogai'aro loowo tovino pi'mwo kuudokwe toorogai'aro kworai kuruv surodo aju'gwoloporogano. Surodo toro aju'gwolopo tooro Stivenollu galomworaro'mno kaunsel tooraiyomno amokaulaporogano. 13Toro mokaulno sumaveyokwe aki a'mwo kuunano youkuu'nuujo'mo pworogai'aro amokaulaporogano. A'mwo amokaulapo su tooro Stivenolluno kuunano yogalo aro soukuu'nuudoporogano. “E, a'mwo akal Gooti toollu ilomoropiyo'moneyokwe ago sugudo akakwe'aro loowo tov Moosesol anekullaboka tokwe'aro tovalluno bwolomodomoropiyodawodekono. 14Toro tool aro doduke tovi kuu'nowekono. “Nasaretda'ai Jisasol Gooti toollu ilomoropiyo'moneyokwe ago tov mouropiyowo'ji kemoro pasudo Moosesolluro aikullaboka tov neya dodukwopiyulo. Yopi pasudo muuduko pumgu'aro tonyuno'gwowi neya jogaulo.” Doduke toollu kuu'nowekono.” Soukuu'nuudoporogano. 15Toro soukuu'nuudopo tovi yiuwi'nokai kaunsel tooro Stivenollu kamwoga po'dogalo somuugonaroporogano. Toro yomuugona'no sumaveyokwe Stivenolluro sumdomago tov ensel pwolluro sumdomago pwopiyodowodo to'busuko yalo'noduke toollu kwonopekono.
Currently Selected:
Kuurotokwe 6: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
