Kuurotokwe 10
10
Ensel pwol Kooniliyosollu kuuguudo abuudoka tovinokwono
1Toruda'ai wagwolago Sisariyada'ai a'mwo amwallajuko pwolluno yovo tov Kooniliyosolekono. Toro tool Roomda'ai 100 a'mwo mollurogudo toorai mollubworomokwanyokwe pwekono. A'mwo mollurogudo su tooraino, Kantri Italida'ai Mollurogudorogano, ajajuporogano. 2Toro toorai mido amollomwallajuko Kooniliyosol Gooti toollu dolago tomuu mwallo'mo tool gami julkwolaiyo togai'aro tonumdoto po'dogalo uumjunodupu Gooti toolluno sulomoropiyajupogano. Aki toro tool yiuwi'nokai toga Juu a'mwo abolo apoo'nyaiyo tobuurai kuto ivitodeyo oo nuugwiyodeyo ton yasuwa'no bwotonyago kwiyajukekono. Aki toro tool Gooti toollu yiuwi'nokai toga subusu'nyogalo kuujajukekono. 3Toro tool iruko pullugwoji 3-kilook sulato toga wojo to'busuko puruv kwonokaikono. Wojo su tov aro tovi kwonokaikono. Gooti toolluro ensel pwol gamoro ago tovi kuulno sumaiyokwe aro kuudokaikono. “Kooniliyosoloo.” Kuudokaikono. 4Toro wuudoduke toga Kooniliyosol ensel su toollu wonyuno sumaiyokwe luko bwotonyo yo'no aro kuudoganokaikono. “Agutoloo, buro'nyo'mekudeyo?”
Toro kuudoganoka tovi ensel tool aro kuudokaikono. “Gumoro subusu'nyogalo ilodopiyodore tonyu Gooti tool me'no guu'nodowodekono. Aki guu a'mwo abolo apoo'nyaiyo tonyu yasuwa'no wiyodumdo tovi me'no gwonodowodekono. Gumoro su toro yodumdo tonyuno Gooti tool kuudo miyallulo'gwonodowo me'no youroguma'dowodekono.” 5Ensel tool toro wuujuno sumaiyokwe aki aro kuudokaikono. “Guu a'mwo pworai wagwolago Joopa'no modapiyo'bi a'mwo pwolluno a'mgono ipinorogano. A'mwo su toolluno yovo tov Saimoonolekono. Aki toro toolluno yovo puruv Pitalekono. 6Toro tool gavuge avaiyovokwe pweke amwakulo. A'mwo gabovo su toolluno yovo kuruv Saimoonolekono. Toro tool ibesa'aiyo tooravuro kulako tonyu kuurailowimwojodowodekono. Aki gamoro ago tov soolwaravuro wolo tovi wobo toru wo'dowodokwono. Toro te Saimoon Pital a'mwo su toolluro ago tovi mwalodowo'jure toollomno guu a'mwo pworai modapiyo'bi yo'mgonomapinekono.” Kuudokaikono.
7Ensel tool toro wuujuno sumaiyokwe kuugollu'movokaikono. Toro wuugollu'mo'mno sumaiyokwe Kooniliyosol a'mwo pworapwol pworai aju'bworomarokaikono. A'mwo aju'bworomaroka su tooravuro pworal gamoro ki'nato womdokweyorakono. Aki pwol gavuge mwalodowodo a'mwo mollurogudo pwekono. A'mwo mollurogudo su tool Gooti toollu guureji uumjunodowodekono. Toro toorai Kooniliyosol mollu'bwo'no sumaiyokwe 8ensel toolluro yiuwi'nokai kuuguudo ton kuudokaikono. Toro wuujuno sumaiyokwe a'mwo su toorai wagwolago Joopa'no amodapiyokarogano.
Pital Gooti toolluro wojo to'busuko puruv suwo'noka tovinokwono
9Kooniliyosolluro a'mwo pworapwol amodapiyoka su tooro plaino plaino sumaveyokwe puuto tomuu kworoporogano. Toro wolluno sumaveyokwe iruko aikomguda'ai tollugwoji puuto tomuu kuuno plavo'mno kuujunapto toga Pital wagwolago kuulomwaloduke tovi wobo tomuu ai'movoporogano. Wagwolago su tovino yovo tov Joopavorukono. Toro ki'mo'mdopure toga Pital subusu'nyogalo jo'moneyokwe ago aulomwallajuko tovi bolokwo'no ajulmdo tovi muunyu tomuu sulokaikono. Su tomuu nyulomwallo'moneyokwe worato sokwollosungikorukono. Toro tomuuno ilno sumaiyokwe subusu'nyogalo sulodomwallajukekono. 10Subusu'nyogalo toro domwalo'no mujuko kwinokaikono. Toro te ago tovida'ai a'mwo pworo wosamujuko nonyo'mo pun kuuno yovrowosodopure toga Pital wojo to'busuko puruv iwo'no'no aro tovi kwonokaikono. 11Muunyu kai'muuda'ai sulugumdo tov kudo'aiko kuusoda'mduke tovi suloonyopiyokaikono. Toro tovi iloonyopino sumaiyokwe poragiyo bwotonyo to'busuko puul wolaboduke tovi kwonokaikono. Poragiyo su tov gamoro bullo aval aval tonyu'aro kwako akamuuno wolomollukwo'bworopiyabodopure tovi kwonokaikono. 12Toro wonyuno sumaiyokwe aki kwako akavuro judo'no judo'no ibesa'aiyo pworo suvlo aval avalokwe toorogai'aro noonyumwonyu gabakuto wagwollogudo toorogai'aro aki sulugumdo tovuro dokato kuulludaiyo toorogai'aro tooro poragiyo su tovi wolomno'dopure toorai kwonokaikono. 13Toro toorai muugona'duke toga yogaimaguurai puruv aro doduke tovi kuu'nokaikono. “Pitaloo, guu ilodavo'bi noonyumwonyu su toorai domovelanono.” Toro doduke tovi kuu'nokaikono. 14Toro kuu'noka kuvi kuruv Pital aro kuudokaikono. “Agutoloo, awiyo. Su toro tov ku'nono mimonyugono. Noonyumwonyu ibesa'aiyo su tooro gumoro sumdo te kaiyako mollugolamo'mdupudo tooraino tov nuu nonyo'mo kumako mwalodumdonyugono.” Kuudokaikono. 15Toro wuujuno sumaiyokwe yogaimaguurai tov aki aiko te lukomgu aro kuudokakwono. “Noonyumwonyu Gooti toonyuro sumdo tovi sugudo nyumo'nodupudo toorai nonyo'moneyokwe guu noduulluku'biyo. Aki toro tooku su toro tooraino, Kumakorogano, madubinono.” Kuudokakwono. 16Yogaimaguurai su toro kuudoka tov aki aiko te pugasalpuga tono tono kuudokakwono. Toro me'no wuujuno sumaiyokwe kuga'gwo kuuno poragiyo tokwe'aro noonyumwonyu aulomnallajupo toorogai'aro ton muunyu kai'muuno yiunokuudo amokailokakwono. Pital wojo to'busuko su toro tovi suwo'nokaikono.
17Wojo toro suwo'noka tovino kavlo tov Pital kuudo kwolallo sourukwapiyokaikono. Toro yourukwapiyoduke toga Kooniliyosolluro a'mwo amorapiyaboka tooro wagwolago tovi abai'movoporogano. Toro bai'mo'mno sumaveyokwe Saimoonolluno tov ago gadovi dukomwallokwe tovino aja'mgonoporogano. Toro tooro ago tovi me'no jo'mgono'ma'no sumaveyokwe agwapto tovuro noullo toru abodavoporogano. 18Toro boda'mno sumaveyokwe ago tovi aro auloduuwopiyaporogano. “A'mwo pwol Saimoon Pitalo wuudodupudo tool ago su tovi dukomwallo?” Auloduuwopiyaporogano. 19Toro kuuloduuwopiyodopure toga Pital gami wojo suwo'noka tovino kuudo kuuno yourukwapiyoduke toollu Gooti toolluro Kuullo tool aro kuudokaikono. “Pitaloo, neya duu'nono. A'mwo pworapwol tooro gumino a'mgono'mo abadokwopo tooro akawai me'no abai'mo'maporogano. 20A'mwo su tooro nuvnokwe toonyuro amogwopiyamorogano. Toro toorai wuuru'maro'bi kworogai pla'binekugono. A'mwo su tooro nuvnokwenyuro amogwopiyamo tooraino tov guu kuudo kwolallo miyourukwapibinono. Toro kweku kuruv a'mwo su to kworogai nokwo pla'binekugono.” Kuudokaikono.
21Toro kuudoka tovi Pital wuu'nyuno sumaiyokwe a'mwo su toorai abwolluru'marokaikono. Toro bwolluru'ma'no sumaiyokwe aro kuudokaikono. “Kevu a'mwo pwolluno a'mgono sadokwopo tool nuu kwonyugono.” Toro wuujuno sumaiyokwe aki aro kuudoganokaikono. “Kevu buro'nyo kavlo tovino abadokwoporekuldeyo?” 22Toro kuudoganoka tooro aro kuudoporogano. “A'mwo 100 mollurogudo toorai mollubworomokwanyokwe pwolluno yovo tov Kooniliyosolekono. A'mwo sugudo su tool Gooti toollu uumjunodowodo toolluno tov yiuwi'nokai Juu tooro ilaiyo to'no winodupudekono. Toro toollu Gooti toolluro ensel tool aro abuudumwa'jukekono. “Guu Pitalluro kuuguudo yodogubwasodowo'jure tovi wuu'nubino'moneyokwe a'mwo pworai modapiyo'bi Pital gumiyomno neya ilabwono.” Toro abuudumwa'juko tovino tov Kooniliyosol nemi amonekwopiyamwa'jukekono.” Kuudoporogano. 23Toro wuujuno sumaveyokwe Pital a'mwo su toorai kuudokaikono. “Kevu ago akavi nokwo wopinorekikono.” Toro tooro su towai wolluno sumaveyokwe iruko aikomguda'ai tollugwoji Pital yovraimwonyo'no a'mwo su toorogai avlavokaikono. Toro pla'mduke toga aki wagwolago Joopada'ai Jisasolluro a'mwo gabovo pworogai'aro tooro avlavoporogano.
Pital Kooniliyosolluro ago tomuuno avlavoka tovinokwono
24Toro tooro plaino plaino sumaveyokwe puuto tomuu kworoporogano. Toro wolluno sumaveyokwe iruko aikomguda'ai tollugwoji plavo'mno wagwolago Sisariya towai ai'movoporogano. Pitaike'aro su tooro wagwolago tovi yere mai'mo'mdopure toga Kooniliyosol gavuge avalo togai'aro gami ibwoto'nyo toorogai'aro tonyu gamoro ago tovi me'no amoju'bworumwallajukekono. Toro amoju'bworumwallajuko ton mwalo'mno Pitalluno sogwollo kwinyajupogano. 25Toro winodopure toga Pital ki'movo'no ago tovi kuullo'mo yoduke toga Kooniliyosol ilaiyo mollomallo'moneyokwe lokabo'no Pitallu abilluru'marokaikono. Toro billuru'ma'no sumaiyokwe Pitalluro suvlo dolago tovi bwolomuulo'naro'no kwolluno sulomoropiyokaikono. 26Toro yoduke kuvi kuruv Pital aro aduullukurokaikono. “Oo Kooniliyosoloo, guu mino milomonuwopiyabinono. Nuu guu kwekubusuko a'mwo yasuwa'nodo pwonyugono. Toro toonyuno tov guu mi dolago tomuu mamuulo'naro'bi neya julodavono.” Aduullukurokaikono. Toro duulluku'no sumaiyokwe amoduko'bwolludapiyokaikono. 27Toro moduko'bwolludapino sumaiyokwe Pitaike Kooniliyoseke tooral kuuguudo juda'nyuno sumaleyokwe ago tovino aulalorakono. Toro kuulno sumaleyokwe Pital a'mwo abolo bwotonyago kuullu'bwo'nomwalodopure tonyu souromuugonarokaikono.
28Toro youromuugona'no sumaiyokwe aro kuudokaikono. “Kevnokwe togaikul nevu Juu toonolluro loowo tonyuno kuudo nyau'mwakovo. Nevu Juu toonol a'mwo abolo nemoro miyaikuuwosunodowado togaikike iru'mato maikullowa'ji aki kevuge miyomjomwekovlaiyo'moneyokwe loowo tov nooso. Toro kuvi kuruv Gooti tool su toro tovino kuu'maiyo toru'no aro me'no anyuduuwallumwa'jukekono. A'mwo abolo Juu toorekulluro miyawosunodupudo ton Gooti toolluro sumdo tovi kaiyako mamollugolamo'mdupudogano. Su toro tovino me'no anyuduuwallumwa'jukekono. 29Gooti tool su toro tovino manyuduuwallowo'jujuko'mno'juki kevu mino kwolodopimwo'dapo tovi kaduko maikullo'mujukonyugono. Toro kwonyu kuruv kaduko ikullodum kemiyomno sulamonyugono. Toro te ago aro yaikumgojumo'monyugono. Kevu buro'nyo kavlo tovino kwolodonumo'mwo'daponyudeyo?” Kuudoganokaikono.
30Pital toro kuudoganoka tovi Kooniliyosol aro kuudokaikono. “Nuu iruko allal allal me'no avla'mwa'juko togasuro sulato 3-kilook toga mi ago tovi subusu'nyogalo kuulodomwalodore toonyu a'mwo pwol yere abiyanyulo'numwa'jukonyugono. A'mwo abiyanyulo'numwa'juko su toolluro youro tov bako bwotonyo pwopiyo'no moro sumdollu toru aboda'mwa'jukekono. 31Toro boda'mno sumaiyokwe aro anyudumwa'jukekono. “Kooniliyosoloo, gumoro subusu'nyogalo ilodopiyodamdo tonyu Gooti tool me'no guu'nodowodekono. Aki a'mwo abolo apoo'nyaiyo tobuurai yasuwa'no wiyodumdo tovino me'no gwonodowodekono. Gumoro su toro yodumdo tonyuno Gooti tool kuudo miyallulo'gwonodowo me'no youroguma'dowodekono.” Anyudumwa'jukekono. 32Toro nyujuno sumaiyokwe aki aro anyudumwa'jukekono. “Guu a'mwo pworai wagwolago Joopa'no yere doolomoropiyawono. A'mwo su tooro a'mwo pwolluno wollo'mgonomorapinorogano. A'mwo su toolluno yovo tov Saimoonolekono. Aki toro toolluno yovo puruv Pitalekono. Toro tool gavuge avaiyovokwe pwolluro ago tovi kwo'mwallo. Ago su tov soolwaravuro wolo tomuu wo'dowodokwono. A'mwo gabovo su toolluno yovo kuruv Saimoonolekono. A'mwo su tool ibesa'aiyo tooravuro kulako tonyu kuurailowimwojodowodekono. Toro toolluro ago tovi Pital kuulomwalodowo'jure toollu wollo'mgonomorapinekono.” Anyudumwa'jukekono. 33Toro anyudumwa'juko tovino nuu a'mwo pworai yere yo'mgonomarono gumiyomno kwolomogwopiyamwa'jonyugono. Toro kwolomogwopiyamwa'jo toorai guu kisuvolo mwimadekugono. Toro kweku kuruv nemiyomno yere sulamado tov ilaiyo bwotonyokwono. Toro te aga nevu yiuwi'nokai tonol Gooti toolluro sumdo tovi akawai i'bwo'nomwalodowa gumino sogwollo ainmwakuuwono. Toro te guu Aguto toolluro kuuguudo me'no agubweyungiko tokwe yodonekubwasubinekugono. Toro tovino wuu'nyo'moneyokwe su'bwo'numwakuuwono.” Kooniliyosol Pitallu toro kuudokaikono.
Pital Kooniliyoseke su'bwo'nomwallajupo tonyu kuuguudo sugudo tov sodubwasoka tovinokwono
34Toruda'ai Pital nyodubwaso'moneyokwe aro amoruudokaikono. “Oo nebalo'mdeyo. Aga nuu kuu'maiyo toru'no kuudo me'no souromakono. Gooti tool yiuno Juu tonolluno to'no ilaiyo mwinyokwekono. Toro kwol kuruv yiuwi'nokai a'mwo abolo Juu toonolluro miyawosunodowado kunyuno kuruv ilaiyo aval'no winyokwekono. 35Toro tool yiuwi'nokai a'mwo abolo buro'nyo buro'nyomuuda'aiyodeyo ton kwollu dolago tomuu mwalodupu sugudo mujumovla'mdopure tonyu Gooti su tool aval'no mollomallokweyoldeyo, kuudo me'no souroma'mono.” 36Pital toro wuujuno sumaiyokwe aki aro kuudokaikono. “Kevu aro tovino kuudo nyau'mwakovo. Gooti tool nevu Isuraiyolda'ai tonollu Jisas Kraisolluno kuuguudo sugudo tov me'no anekwopiyabokaikono. Toro toolluro womdo sopiyoka tovida'ai Gooti toolluro sumwoluko tov kavo wosodowo nevuge ibwoto'nyo nokwo yonekono. Aki yiuwi'nokai kwako akavida'ai tonolluro Aguto kuunodo tool Jisas Kraisol kwekono. Kuuguudo sugudo anekwopiyaboka tov torokwono. 37Kuuguudo sugudo su tov muudu'no bomje'nugoullo'mo yoduke toga sumdomgu Joonol a'mwo abolo ton wonyo abuuvollunpureyokwe amoruujajukekono. Toruda'ai lukomgu kuuguudo sugudo tov Galili tomuuda'ai yiuwi'nokai kwako Juudiya tovi aiyowomno aro abomje'nugoullajukokwono. 38Gooti tool Nasaretda'ai Jisasollu jeso'moneyokwe gamoro Kuullo tool uubweyo'no gamoro jurogudo tokwe'aro kuubweyokaikono. Toro kuubweyoka tokwe Jisasol a'mwo abolo tonyu ilaiyo to'no sugollajukekono. Aki Gooti tool kweke yomollodowo a'mwo abolo Satanyolluro kaiyako igolodowodo tobuurai sukullajukekono. 39Jisasol kwako Juudiyake wagwolago Jeruusalemke tomuu toro sukulomollajukekono. Toro ikulomolloduke toollu nevu me'no kwonyajuuwekono. Toro kwonyajuuwo toonol gamoro yogalo tokwe kuu'maiyo toru'no dodoluwosodowadonogano. Jisasol toro yomolloduke kwollu kuruv a'mwo pworo romiyoso'moneyokwe i'noguropte tovi amovoguroptowosopekono. 40Toro aromiyosopo kwollu kuruv iruko pullapullu me'no uuwolo'no'no Gooti tool aiyo aiko te amodukavokaikono. Toro moduka'mno sumaiyokwe Gooti gavnokwe toolluro yoduke tovida'ai Jisasol a'mwo abolo tonyu yiuno kuu'maiyo toru'no kwiyalo'nyajukekono. 41Toro kwol kuruv yiuwi'nokai a'mwo abolo tonyu mwiyalo'nokaikono. Yiuno nevu kuu'maiyo toru'no dodoluwoso'moneyokwe Gooti toolluro me'no ajonekubweyoka toonolluno sanekulo'nokaikono. Toro tool aiyo aiko te me'no dukaino sumaiyokwe nevu kweke wosamujuko pugai'aro wonyo togai'aro anomwalowekono. 42Toro nomwalno sumawoneyokwe a'mwo abolo tonyu kuuguudo sugudo moruudomollo'moneyokwe Jisasol aro tovino adanekullokaikono. Kevu a'mwo abolo tonyu aro domoruudomollogaulo. “Gooti tool Jisasollu me'no ajesokaikono. Toro ajesoka tool a'mwo abolo aiyo mwalodupudo togai'aro me'no bolodupudo togai'aro tonyu kooti yogalo duuwiyo'moneyokwe Gooti tool ajesokaikono.” A'mwo abolo tonyu toro domoruudomollogaulo. Adanekullokaikono.” 43Pital toro wuujuno sumaiyokwe aki aro kuudokaikono. “Jisasol kwako akavi yere mwolaboduke toga aiyoga yiuwi'nokai proofet tooro kwolluno kuuguudo puruv aro ajakwollajuporogano. Yiuwi'nokai a'mwo abolo pwolno puru'monodo ton Gooti toolluro wiyo'mwojo'moneyokwe ajesoka toolluno kuudo neya uubwepinogano. Toro kuubwepi tonyu kwolluno yovo tovida'ai Gooti tool kemoro ma'no ma'nodo tovuro kirumwallo tovi nomodukwopiyonekono. Ajakwollajuporogano.” Pital toro kuudokaikono.
Gooti toolluro Kuullo tool a'mwo abolo Juu tooravuro miyawosunodupudo tonyuro poowokalago te aulomwaloka tovinokwono
44Pital kuuno yodubwasoduke toga Gooti toolluro Kuullo tool wolabino sumaiyokwe a'mwo abolo kuuguudo tovi au'nallajupo su tobuuravuro poowokalago tonyu aulomwalokaikono. 45-46Toro aulomwaloka toga a'mwo abolo su ton judo'no judo'no yogaljo tonyuda'ai do'mno Gooti toollu sulomoropiyapogano. Toro ilomoropiyodopure tonyu a'mwo Pitaike sulabopo tooro mwalo'mno amuugonallajuporogano. A'mwo su tooro wagwolago Joopada'ai Juu pworogano. Toro tooro Jisasolluro a'mworogano. Toro tooro muugona'no sumaveyokwe mollolokurosi yo'mno adoporogano. “Awi, a'mwo abolo Juu toonolluro miyawosunodowado kunyu kuruv Gooti tool gamoro Kuullo tool kwimokagano.” Adoporogano. Toro juno sumaveyokwe Pital aro kuudokaikono. 47“Gooti toolluro Kuullo tool nemi kuulonekumwalodowodo to'busuko kubalno a'mwo abolo su to kubuurai kuruv aval'no aulomwalmokaikono. Toro te a'mwo abolo su tobuuro wonyo uuvollunyo'mo kwinpi tonyu nevu muumjukurowa'ji nokwo uuvollunpinogano.” Kuudokaikono. 48Pital toro wuujuno sumaiyokwe a'mwo abolo su tobuurai aro aduuwiyokaikono. “Kevu Jisas Kraisolluno yovo tovida'ai wonyo buuvollunyulo.” Aduuwiyokaikono. Toro aduuwiyoka tovi a'mwo abolo tobuuro wonyo uuvolluno'mno Pitallu aro kuudoganopogano. “Guu nevuge iruko pubuul nokwo mwalanekudeyo?” Toro kuudoganopo tovi Pital a'mwo abolo su togai kuvinono amwalokaikono.
Currently Selected:
Kuurotokwe 10: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
