Kuurotokwe 9
9
Soolol gami poowokalago tokwe kuudo souragunyumo'noka tovinokwono
(Kuurotokwe 22:4-16, 26:9-18)
1Toro toga Soolol a'mwo abolo Jisasollu uumjunodopure tobuurai romiyoso'mo winodowo magu'nyogalo tov kuuno amjodumovlaiyajukekono. Toro tool pris aguto toollomno sulabokaikono. 2Toro ilabino sumaiyokwe pris aguto tool pas pun yonyakwolloneyokweyo'mo kuudoganokaikono. Pas su tonyu kwonpi toga aro tovino kuudo youromapinogano. “Oo Soolol a'mwo abolo pun Jisasolluro puuto tovi uumjunodopure tonyu so'mgonomaro'ji tov nokwo galomworaronekono. Yowo'ji wagwolago Jeruusalem'no nokwo meromokavlawonekono.” Pas su ton toro tovi youromapino'moneyokweyogano. Toro te Soolol pris aguto toolluro pas sokwolluwiyoka su togai momwora'no sumaiyokwe wagwolago Damaskosda'ai Juu tooravuro i'bwo'nyago tonyomno amokwolokaikono. 3Toro mokwolno sumaiyokwe wagwolago Damaskos su tovi kuullo'mo wobo toru yoduke toga muunyu kai'muuda'ai bako bwotonyo puruv Soolollu aiyowomno awopiyokakwono. 4Toro awopiyoka toga Soolol kwako tovi bwoloo'no sumaiyokwe yogaimaguurai puruv aro tovi kuu'nokaikono. “Soololoo, Soololoo, guu mi kaiyako sanyugolmwakudo tov buro'nyo'mekudeyo?” 5Toro tovi wuu'nyuno sumaiyokwe Soolol aro kuudokaikono. “Agutoloo, guu ala'mwekudeyo?” Toro samuugojoka tovi yogaimaguurai tov kuudokaikono. “Nuu Jisasonyugono. Gumoro kaiyako sugolamo'mwakudo su tov nuu kwonyuda'ai sugolanumo'mwakuno.” Yogaimaguurai su tov toro wuujuno sumaiyokwe aki aro kuudokaikono. 6“Guu ilodavo'bi wagwolago su tovi doulawono. Toro kuula'bi toga a'mwo pwol gumoro ibino tonyuno nyodogubwasonekono.” Kuudokaikono.
7Yogaimaguurai doduke su tovi a'mwo Sooleke avlavopo tooro kuu'noporogano. Toro tooro a'mwo pwolluro yogaimaguurai tovi kuu'nopo kuvi kuruv a'mwo pwollu ku'nono mwonoporogano. Yiuno yogaimaguurai to'no doduke tovi kuu'noporogano. Toro te a'mwo su tooro mollolokurosi yo'mno mago puru'monodo kuruv maravoporogano. 8Toro ino sumaveyokwe Soolol kwako tovida'ai ilodavo'no sumdo ainoka kwol kuruv noonyumwonyu tonyu ku'nono mwonokaikono. Toro yoduke toollu gavuge avlavopo a'mwo tooro Soololluro ato tovi'aro mogaibworomokavla'mno sumaveyokwe wagwolago Damaskos tovi amollubworomokaulaporogano. 9Toro mollubworomokaulno sumaveyokwe Soolol iruko pullapullu tobuullu sumnowojokwe amwalokaikono. Aki iruko su tobuullu wosamujuko togai wonyo togai manokaikono.
10Toruda'ai wagwolago Damaskos su tovida'ai a'mwo amwallajuko pwolluno yovo tov Ananaiyasolekono. A'mwo su tool Jisasolluro uumjunyokwe pwekono. Toro tool wojo to'busuko puruv iwo'noduke toga Aguto tool bino sumaiyokwe aro kuudokaikono. “Ananaiyasoloo.” Toro kuudoka tovi Ananaiyasol kuudokaikono. “Agutoloo, anyugeyo.” 11Toro kuudoka tovi Aguto tool kuudokaikono. “Guu ilodavo'bi wagwolago akavi akuuto tomuu puuto agudumi tovi'aro dovlavono. Puuto su tovino yovo tov Ido'nyunodoveyokwono. Toro tovi'aro plavo'bi Juudasolluro ago tovi ki'mo'binekugono. Toro ki'movo'bi toga a'mwo Tasosda'ai pwolluno a'mgono ibinekugono. A'mwo su toolluno yovo tov Soololekono. Toro tool aga toga sumnowojokwe mwalodowo subusu'nyogalo adomwallo. 12A'mwo su tool wojo to'busuko suwo'numwa'juko tovida'ai gumino aro kuudo me'no souroguma'mokaikono. Oo a'mwo pwol miyomno noolabwonoldeyo. A'mwo su toolluno yovo tov Ananaiyasolekono. Toro tool kuulabowo'ji moro sumnowojo tovi anubogai'no'ji toga moro sumdo tov ilaiyo aiko te nokwo kinmonyudeyo. Wojo to'busuko suwo'numwa'juko tovida'ai gumino su toro kuudo me'no souroguma'mokaikono. Toro te guu a'mwo su toollu wuuru'mallo'moneyokwe dovlavono.” Aguto tool Ananaiyasollu toro kuudokaikono.
13Toro kuudoka kuvi kuruv Ananaiyasol aro kuudokaikono. “Agutoloo, a'mwo su toolluno a'mwo bwotonyago tooro dodopure tovi nuu me'no wuu'nodumdekono. A'mwo su tool gumoro a'mwo abolo Jeruusalemda'ai tonyu kaiyako bwotonyo igolodowodekono. 14Toro tool pris mido mollomwalo tooravuro jurogudo tokwe wagwolago akavino wolabodowo yiuwi'nokai gumino yovo tovi ilomogwopiyodowado tonollu wuulo bwologaleronekumallo'mo kwolabadopiyo.” Kuudokaikono. 15#Rm. 1:1Toro kuudoka tovi Aguto tool Ananaiyasollu kuudokaikono. “Guu luko mibinono. Soolollomno nokwo dovlavono. A'mwo su tool moro womdo tovi nyumwalono'moneyokwe me'no ajesekono. Toro ajeso su tool a'mwo abolo Juu tooravuro miyawosunodupudo togai'aro kemoro a'mwo aguto kig toorogai'aro Isuraiyolda'ai a'mwo abolo togai'aro tonyu moro kuuguudo tov yodubwasumwalonekono. Toro sodubwaso'ji tovida'ai mino yovo tovino nyouroma'mwalpinogano. 16Aki a'mwo su toollu nuvnokwe toonyu kuuguudo aro madumekono. “Guu mi numjunodumdo tookujuno tov danyu'nyuwuulo ton nyubwosunmwalbinekugono.” Madumekono.” Aguto tool Ananaiyasollu toro Kuudokaikono.
17Toro kuudoka tovi Ananaiyasol kaduko wino sumaiyokwe avlavokaikono. Plavo'no ago Soolol kuulomwaloduke tovi ai'movokaikono. Toro ki'mo'mno sumaiyokwe anakuuto tomuu kuula'no Soolollu ato tokwe uubogai'nyuno sumaiyokwe aro kuudokaikono. “Mi nyugwai'yago Soololoo, guu puuto tomuu bodore toga Aguto Jisasol abiyagulo'numwa'jukekono. Toro tool aro gubweyo'moneyokwe mi gumiyomno amonuwopiyamokanyugono. Guu sumdo ilaiyo aki aiko te kinbinekugono. Aki gumoro poowokalago tovi Gooti toolluro Kuullo toollu uumjunyo'moneyokwe kuudo ton kuullo'mowopiyonokwono.” Kuudokaikono. 18Toro kuudoka kuga'gwo kuuno Soololluro sumdo tovida'ai yodo pun bwoloo'no sumaiyokwe Soolol sumdo tov ilaiyo aiko te senomollokaikono. Toro yenomolluno sumaiyokwe Soolol ilodavo'no wonyo tovino plaino sumaiyokwe kuuvollunokaikono. 19Aki toro tool wosamujuko pun no'no gamoro jurogudo tov aki aiko te abuuwi'movokaikono.
Soolol wagwolago Damaskosda'ai tonyu kuuguudo sugudo tov amoruudoka tovinokwono
Toro te Soolol wagwolago Damaskos towai a'mwo abolo Jisasollu uumjunodupudo togai iruko pubuul amwalokaikono. 20Toro mwalodowo wagwolago su tovida'ai Juu tooravuro i'bwo'nyago tonyu yere kuulodawo aro amoruujajukekono. “Gooti Toolluro Kwolaiyo kuunodo tool Jisasol kwekono.” 21Toro moruudoduke tovi yiuwi'nokai a'mwo abolo wuu'nodupudo ton kuudo kwolallo sourukwapiyajupogano. Toro ton aro sajunopogano. “Awi, a'mwo sodonekubwasadopiko su tool sumdomgu wagwolago Jeruusalem toru a'mwo abolo Jisasolluno ilomoropiyodapudo tonyu kaiyako sugollajuko tookono. Toro tool akawai'no wolabodowo Jisasolluro a'mwo abolo tobuurai wuulo galeromworarowo'ji pris mido mollomwalokwe tooraiyomno meromokavlawono'mo tooldeyo.” Sajunopogano.
22Toro yajunodopure kuvi kuruv Soololno'gwowi kuuguudo sugudo tokwe yodubwasuno yodubwasuno yodowo jurogudo sumo'nyajukekono. Toro tool wagwolago Damaskosda'ai a'mwo abolo Juu tonyu aro sodubwasajukekono. “Oo Gooti toolluro nekullo'mwojo'moneyokwe amonekwopiyaboka Krais tool Jisasol kwekono.” Toro tovino kuuguudo ton yiuno pi'mwono yodubwasoduke toga kavlo tov kuu'maiyo toru'no sumo'nyajukokwono. Toro tovino tov Juu tooro Soololluro kuuguudo yodubwasoduke su tovi ku'nono mabwolomorumwogapiyajuporogano.
Soolol Juu tooro nonyuromipiyokweyo'mo lukado avlavoka tovinokwono
23 #
2Krn. 11:32,33 Toruda'ai iruko bwotonyago pubuul me'no avlavoka toga Juu tooro Soolollu romiyoso'mo winodopure tooro i'bwo'nyuno sumaveyokwe yogalo adomdukuurosoporogano. 24Toro adomdukuurosopo kuvi kuruv a'mwo pworo Soolollu kuu'maiyo toru'no kuudoporogano. Toro te Juu su tooro Soolollu romiyoso'moneyokwe iruko togake'aro surakuuto togake'aro toga wagwolago su tovuro noullo tonyu aduuwallajuporogano. 25Toro duuwa'dopure kuvi kuruv Soololluro kuumjunyajupo pworo surakuuto pullugwoji Soolollu momwora'no sumaveyokwe wagwolago su tovuro sulkuurupto tovi muunyu tomuuno amokailaporogano. Toro mokailno sumaveyokwe Soolol basket bwotonyo tovi wolomno'duke toollu sulkuurupto tovi kwa'mgu tomuuno kwolomollukwo'bworopiyaporogano. Toro kwolomollukwo'bworopiyapo tool lukado avlavokaikono.
Soolol wagwolago Jeruusalem toru amwaloka tovinokwono
26Soolol lukado toro plaino sumaiyokwe wagwolago Jeruusalem'no aikomgu ila'no sulai'movokaikono. Toro ilai'mo'mno sumaiyokwe Jisasolluro uumjunyokwe toorai uuguro'mwonyo'mo winoduke kwollu kuruv yiuwi'nokai tooro Soolollu wonyuno sumaveyokwe luko soporogano. Toro tooro aro kuudo sauroporogano. A'mwo su tool Jisasolluro uumjunyokwe kuunodolmaiyo. Toro tool kuunano'mno'juki jukiyoukuu'nanekudadopiyo. Kuudo sauroporogano. 27Toro kuudo yau'dopure kuvi kuruv Banabasolno'gwowi Soolollu wiyo'mwojo'moneyokwe momwora'no sumaiyokwe a'mwo kuurotokwe tooraiyomno amollubworomokavlavokaikono. Toro mollubworomokavla'mno sumaiyokwe Banabasol a'mwo kuurotokwe toorai aro kuudokaikono. “Soolol puuto tomuu pla'mduke toga Aguto tool abwiyalo'noka toollu kwonokaikono. Toro wonyuno sumaiyokwe Aguto tooke kuuguudo adolorakono. Aki Soolol luko miyo'no wagwolago Damaskosda'ai mwalodupudo tonyu Jisasolluno kuuguudo tov guureji sodubwasokaikono.” Banabasol a'mwo kuurotokwe toorai Soololluno toro kuudokaikono. 28Toro wuujuno sumaiyokwe wagwolago Jeruusalem toru Soolol a'mwo kuurotokwe toorogai ibwoto'nyo yodowo kworai tomuu kuulno lokabino sajukekono. Aki toro tool Aguto toolluro yovo tovida'ai guureji amoruujajukekono. 29Toro moruudodowo aki Soolol Juu pworo Grik yogaljo dodupudo toorogai yogalo sajunyajupekono. Toro yajunodopure kuvi kuruv a'mwo su tooro kaduko mwiyodupu Soolollu romiyoso'mo to'no kwinyajuporogano. Toro winodupudo tooro Soolollu adadomgu'aro yoromiyosanoldukoneyokwe tovino a'mgono sajuporogano. 30Toro yodopure tovino Jisasolluro a'mwo tooro wuu'no'mno Soolollu amoraboporogano. Toro morabino sumaveyokwe Sisariya towai ai'movopo toga Soolollu wagwolago Tasos'no amorapiyopekono.
31Toro te yiuwi'nokai kwako Juudiyake'aro Galilike'aro Samariyake'aro tomuuda'ai Jisasolluro mollu'bwoto ton sumdomgu jul'nyo tonyu amjomwekelabiyajupogano. Toro kun kuruv su toro toga'no'gwowi jul'nyo wuulo pun mamaropogano. Yiuno paiko to'no ibwosunodupu ilaiyo amwallajupogano. Toro ton Aguto toollu dolago tomuu uumjunodopure tonyu Gooti toolluro Kuullo tool wiyo'mwojoduke tovida'ai jurogudo sumo'nyajupogano. Toro imo'nodupu aki a'mwo abolo muuduko pugai'aro abuuguro'mwonyajupogano. Toro buuguro'mwonyodopure toga kwolallo bwotonyo sumo'nyajupogano.
Pital Ainiyasollu sukuloka tovinokwono
32Toruda'ai Pital yiuwi'nokai tomuu yomollodowo iru'mato sajukekono. Toro tool yomolluno yomolluno sumaiyokwe wagwolago Lida towai kwole'movokaikono. Toro wole'mo'mno sumaiyokwe wagwolago su tovida'ai Gooti toolluro a'mwo abolo togai iru'mato amwalokaikono. 33Toro mwalno sumaiyokwe Pital a'mwo suvlo abolopingikokwe pwollu kwonokaikono. A'mwo su toolluno yovo tov Ainiyasolekono. Toro tekwo gamoro suvlo me'no abolopingikokwe toolluno tov yiuno gami noluuleyo tovi muunyu toru'no wo'dowodekono. Toro wo'duke tov 8-pela kworomo tobuul kuuwolo'nokaikono. 34Toro tekwoji Pital wonyuno sumaiyokwe aro kuudokaikono. “Ainiyasoloo, Jisas Kraisol agujukulmokaikugono. Toro te guu ilodavo'bi gumi noluuleyo tovi bomokailawono.” Kuudokaikono. Toro kuudoka kuga'gwo kuuno a'mwo su tekwojuro suvlo tov aki aiko te sugudo imo'nyuno sumaiyokwe sulodavokaikono. 35A'mwo su tekwoji toro wimo'noduke tovi wagwolago Lidada'ai mwalodupudo togai'aro kwako Saroonda'ai mwalodupudo togai'aro ton kwonopekono. Yiuwi'nokai toro kwonopo su ton kuudo youragunyumo'nyuno sumaveyokwe Aguto toolluno kuudo kuubweyopogano.
Tabitav me'no aboloka tovi Pital aiyo aiko te amodukavoka tovinokwono
36To'no'gwowi wagwolago Joopada'ai abolo puruv Jisasolluro uumjunyokwe su tovino yovo tov Tabitaveyokwono. Yovo su tov Grik yogaljo tovida'ai Dookasoveyokwono. Toro tov sugudo to'no yomjomwekovla'mdowo a'mwo abolo apoo'nyaiyo pubuurai kwiyo'mwojajukokwono. 37Toro wiyo'mwojoduke toga abolo su tov nobollo puruv malluno sumaiyokwe abolokakwono. Toro aboloka tovuro kulako tovi wonyo tokwe mollal'mo'mno sumaveyokwe ago amodumunyuto'mellungiko puvi muunyu tomuu mokaila'mno anakuuto tomuu sulomoga'bworosopokwono. 38Toro ilomoga'bworosuno sumaveyokwe a'mwo Jisasolluro uumjunyokwe pworo Pitalluno tov, “Wagwolago Lida toru amwallo,” me'no kuu'noporogano. Wagwolago su tov wagwolago Joopa tovi wobo toru wo'dowodokwono. Toro te a'mwo Jisasolluro uumjunyokwe su tooro kemida'ai pworallu modapino sumaveyokwe Pitallu wuuduvo'nyo'mo avlavolorakono. Toro tooral plaino sumaleyokwe Pitallu wuuru'marolno aro kuudoganolorakono. “Guu sogwollo maino'bi namiyomno yere nokwo ilabinekudeyo?” Kuudoganolorakono. 39Toro kuudoganolo tovi Pital wuu'nyuno sumaiyokwe yovraimwonyo'no a'mwo su toorake avlavokaikono. Toro tooro plaino sumaveyokwe wagwolago Joopa toru ai'movoporogano. Toro ki'mo'mno sumaveyokwe Pitallu abebwiyo sulomorosopo ago amodumunyuto'mellungiko muunyu su tomuuno mokaila'mno sulai'movoporogano. Toro ilai'mo'mdopure toga abolo kanyu pubuuro ago su tovi aulomwallajupo ton Pitallu wobo toru'no bino sumaveyokwe kumdo adopogano. Aki toro ton youro pugai mokabo'mno Pitallu kuuduuwallopogano. Youro su ton sumdomgu Dookasov yere maboloduke toga abolo kanyu su tobuuraiyo'mo agiwolbweyajukogano. Toro te youro su tonyu abuuduuwallopogano. 40Toro wuuduuwalluno sumaveyokwe Pital abolo kanyu su tonyu kwa'mgu tomuuno abilomodopiyokaikono. Toro bilomodopino sumaiyokwe suduko inuguto'no'no subusu'nyogalo adokaikono. Subusu'nyogalo toro juno sumaiyokwe abebwiyo wo'duke toviyomno yadu'mwonyo'no sumdo amuugonarokaikono. Toro yomuugona'no sumaiyokwe aro kuudokaikono. “Tabitavoo, guu dukavo'bi julodavono.” Kuudokaikono. Toro kuudoka tovi abolo su tov sumdo kino'no Pitallu yomuugona'no sumaiyokwe adukovomwalokakwono. 41Toro adukovomwaloka tovi Pital gamoro ato tovi'aro amoduko'bworapiyokakwono. Toro moduko'bworapino sumaiyokwe Pital Gooti toolluro a'mwo abolo togai'aro abolo kanyu togai'aro ton anakuuto tomuu aulabupureyokwe adomarokaikono. Toro doma'no sumaiyokwe abebwiyo tov aiyo aiko te me'no adukavoka tovi kuuduuwallokaikono. 42Toro sumo'noka tovino yiuwi'nokai wagwolago Joopada'ai a'mwo abolo bwotonyago ton wuu'no'mno, Oo nebalo'mdeyo, kuudo yau'no sumaveyokwe kemoro kuudo tov yiuno Aguto toolluno kuubweyopogano. 43Toro te Pital wagwolago Joopa towai a'mwo pweke iruko pubuul amwalokaikono. A'mwo su toolluno yovo tov Saimoonolekono. Toro tool sa'aiyo tooravuro kulako tonyu kuurailowimwojodowodo pwekono. Pital a'mwo su tooke iruko pubuul amwalokaikono.
Currently Selected:
Kuurotokwe 9: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
