Muuduko 42
42
Joosepollu gadai'yago tooro Ijup'no wola'mno wosamujuko kwolobiyomorapo tovinokwono
1To'no'gwowi Jekoopol aro kuu'nokaikono. “Nonyo'mo wit sulo ton Ijup toru nooso.” Toro tovino wuu'nyuno sumaiyokwe gami muugunyo toorai aro kuudokaikono. “Kevu buro'nyo'mo yasuwa'no domwakovo?” 2#Krt. 7:12Toro wuujuno sumaiyokwe aro amodapiyokaikono. “Nuu aro kuu'numonyugono. “Nonyo'mo wit sulo ton Ijup toru nooso.” Toro te nevu mujuko'mo nobola'jokweyo'mo tov kevu Ijup'no wolapi wosamujuko pun doolobiyomoroulo.” Amodapiyokaikono. 3Toro modapino sumaiyokwe Joosepollu gadai'yago atousal tooro wosamujuko pun wolobiyomollo'mo Ijup'no kwolaporogano. 4Jekoopol toro toorai amodapiyoka kuvi kuruv Joosepolluro gagwai'yago Bejamenolluno'gwowi kaiyako pun nomaro'jokweyo'mo mamodapiyokaikono.
5Toro te muju'wuulo bwotonyo su tov kwako Kenan kumuu kuruv kworokakwono. Toro tovino tov Kenanda'ai a'mwo pworo wosamujuko pun wolobiyomollo'mo Ijup'no kwolabiyajuporogano. Toro wolabodopure toga Jekoopolluro muugunyo tooro a'mwo su toorogai kwolaboporogano.
6To'no'gwowi Joosepol yiuwi'nokai Ijup tomuu mido mollomwalokwe sumo'nyajukekono. Toro te yiuwi'nokai go'no go'no tomuuda'ai tooro Joosepollomno bodupu wosamujuko ton abiyomorabiyajuporogano. Toro toollomno gami gadai'yago tooro wolabino sumaveyokwe gamoro sumdollu toru kemoro sumdomago ton kwako tovi kwolomuulo'naroporogano. 7Toro wolomuulo'na'dopure toorai Joosepol wonyuno sumaiyokwe aro kuudo suworovomarokaikono. Oo a'mwo akaro mi nyudai'yago toorodeyo. Kuudo suworovomarokaikono. Toro kwol kuruv a'mwo gabovo pumuuda'ai pwolbusuko soukuu'nuudokaikono. Toro tool yogalo guureji aro kuudoganokaikono. “Kevu gadomuuda'airekuldeyo?” Kuudoganokaikono. Toro kuudoganoka tooro aro kuudoporogano. “Nevu wosamujuko wolobiyomorabiyo'mo Kenanda'ai kwolamawonogano.” Kuudoporogano. 8Joosepol gami gadai'yago toorai me'no suworovomaroka kuvi kuruv gadai'yago toorono'gwowi Joosepolluno miworovomaroporogano. 9#Mdk. 37:5-10Toro te Joosepol gami gadai'yago tooro kwako tovi kuuno wolomuulo'na'dopure toorai wono'no gami aiyogasuro wojo suwo'noka tovino aki aiko te kuudo saurokaikono. Toro kuudo yau'no sumaiyokwe aro soukuu'nuudokaikono. “Kevu nemoro kantri akavi jurogudomaiyokwe pumuuno wonomollo'mo domokadokwe toorekul abadokwoporekikono.” Soukuu'nuudokaikono. 10Toro soukuu'nuudoka tovi wuu'nyuno sumaveyokwe kuudoporogano. “Awiyo, kuvimaiyo. Nevu wosamujuko pun mubiyo'mo kwolomwakuuwo tekwojonol guu aguto tookuji dolago tomuu amwakuuwono. 11Toro tekwonol a'mwo avalo pwolluronogano. Nevu yiuno nebal'no agudumwakuuwono. Toro todorotonol domokado'mo kwolamwakuuwonolmaiyo.” Kuudoporogano. 12Toro kuudopo tovi Joosepol muu'nyubusuko yo'no kuudokaikono. “Toro anyudumapo tov kuvimaiyo. Kevu nemoro kantri akavi jurogudomaiyo'mdukoneyokwe tovino wonomollo'mo domokadokwe abadokwopo toorekikono.” Kuudokaikono. 13Toro kuudoka tovi aro kuudoporogano. “Awiyo, kuvimaiyo. Nevu gumi dolago tomuu amwakuuwo tekwojonol a'mwo Kenanda'ai avalo pwolluro 12-pela muugunyo todorotonogano. Toro todorotonolluro aiyowo'mo wuullako tool nemi nellunumiyago tooke amwallo. Aki pwolno'gwowi me'no sovlavokaikono.” Kuudoporogano.
14Toro kuudopo kuvi kuruv Joosepol kuudokaikono. “Awiyo, moro me'no aikudumo tov kuvi kuunogano. Kevu domokado'mo abadokwoporekikono.” Kuudokaikono. 15Toro wuujuno sumaiyokwe aki aro kuudokaikono. “Kemoro kuuguudo anyudumapo tov nebalo'mdukoneyokweyo'mo yamju puruv ikulloganmonyugono. Nuu Feroo toolluro jurogudo tokwe aro ikulloganmorekikono. Kemoro tellugwai'yago wuullako toollu nuu sumdo wonmo'mo neya wolabwonekono. Tellugwai'yago su tool akawai'no mwolabwo'ji to'gwowi kevu kemi ago tomuuno aikomgu mavlapinorekikono. 16Toro te kevudorotekulluda'ai pwol tellugwai'yago wuullako su toollu neya ilomorawono. Toro pla'mdowo'jure toga pworekul wuulo killo'mo ago tovi kuule'na'dupinorekikono. Toro kuule'na'dopure toga kemoro tellugwai'yago wuullako toollu kwonmi tov kuudo yaikuu'monyugono. Oo kemoro kuuguudo tov nebalo'mdeyo. Toro kuvi kuruv nuu tellugwai'yago su toollu mwonmi to'gwowi kemino tov, Domokadokwerodeyo, kuudo yekuu'movla'monyugono. Ijup tooravuro Feroo toolluno yovo tovida'ai toro aikudumono.” Kuudokaikono. 17Joosepol toro wuujuno sumaiyokwe toga yiuwi'nokai todorotai wuulo killo'mo ago tovi aulomerosokaikono. Toro kuulomerosuno sumaiyokwe iruko pullapullu kuuwolo'nokarogano.
18Iruko pullapullu abai'movoka tollugwoji Joosepol a'mwo todorotai aro abuudokaikono. “Nuvu Gooti toollu dolago tomuu mwalodumdonyugono. Toro toonyuro aikudumi tovi kevu po'dogalo kuumjunpi tov nuu maromiyaikubwemonyugono. 19Toro te kemoro kuuguudo anyudumwa'jupo tov nebalo'mdeyokwe aro neya ipinorekikono. Kevudorotekulluda'ai yiuno pwolno wuulo killo'mo ago ai'nakopo akavi kuuno ki'na'dowo'jure toga kevu pudorotekul kemi julkwolaiyo ton mujuko'mo sadokwopo tonyuno wosamujuko pugai nokwo mokavlapinorekikono. 20Toro mokavlavopi toga lukomgu kemi tellugwai'yago wuullako toollu miyomno neya domokabilo. Toro supi tov kuudo yaikuu'monyugono. Oo nebalo anyudoporodeyo. Kuudo yaikuuro'mi maromiyaikubwemonyugono.” Kuudokaikono. Joosepol toro kuudoka todoroto wuu'no'mno kuvinono uumjunyo'mo kwinoporogano.
21Toro todoroto aro sajunoporogano. “Nevu aiyoga nemi nellugwai'yago toollu kaiyako sugolowo tovino tov aga jul'nyo akav aboneki'mo'maiyo. Toro tekwo tabunyu ma'dowo, “Donyo'mwojulo,” nekudoduke kwekwojo kuruv muu'nyubusuko to'no sowo tovino tov tabunyu akav ama'mawonogano.” Sajunoporogano. 22#Mdk. 37:21,22Toro yajunyuno sumaveyokwe Ruubenol aro kuudokaikono. “Nuu muudu'nodo toga me'no aikudonyugono. “Kwolaiyo toollu kaiyako mwipinono.” Toro aikudo kworekul kuruv muu'nyubusuko soporekikono. Toro sopo tovino tov aga kwolaiyo su toolluro aboloka tovino mido anekuma'maiyo.” Kuudokaikono. 23Toro todoroto kemi yogalo tovida'ai yajuno'mno aro kuudo sauroporogano. Aguto tool nemoro yogalo tovi muu'nonoldeyo. Kuudo yauro'mno kuu'maiyo toru'no nokwo yajunyuno soporogano. Toro yajunodopure kuvi kuruv Joosepol kavo au'nallajukekono. Aro tovinokwono. Sumdomgu Joosepol gami gadai'yago su toorai kuuguudo wuujo'mo tool Ijupda'ai tooravuro yogalo tovida'ai wuudoduke toga a'mwo pwol amollovodo'mwojuujajukekono. 24Toro te Joosepol gadai'yago tooro kuuguudo yajunodopure tovi wuu'no'no pumuu wuugollu'mo'mno sumaiyokwe kumdo adokaikono. Toro tool kumdo me'no dopiyogalno sumaiyokwe aikomgu bo'no abuuru'marokaikono. Toro buuru'ma'no sumaiyokwe gamoro womdokwe pworai Simiyoonollu galamworapino'moneyokwe amodapiyokaikono. Toro amodapiyoka tooro yiuwi'nokai Joosepolluro gadai'yago gabovo tooro muugona'dopure toga Simiyoonollu wuulo amerosopekono.
Joosepollu gadai'yago pworo Kenan'no aikomgu avlavopo tovinokwono
25Toruda'ai Joosepol gamoro womdokwe pworai yiulo tomuu aro kuudokaikono. “Kevu a'mwo akaravuro kuto ton maropi nonyo'mo wit sulo togai mullubweyopi aki kemi nuugwiyo anekubimwa'jupo ton kemi kuto tonyu aki aiko te domullubweyulo. Yopi kemi puuto tomuu nugovlaiyo'mo wosamujuko pugai neya duuwapiyulo.” Kuudokaikono. Toro kuudoka tovi Joosepolluro womdokwe tooro kuvinono kuumjunoporogano. 26Toro te Joosepolluro gadai'yago tooro kemi nonyo'mo wit kuto ton kemi doonki toorai muunyu toru ilomorosuno sumaveyokwe amokavlavoporogano. 27Toro plaino sumaveyokwe sa wollo'moneyokwe towai ai'movoporogano. Toro ki'mo'mno sumaveyokwe a'mwo su todorotaida'ai pwol gami doonki toollu wit sulo pun wuudaluviyo'moneyokwe gami kuto tovida'ai kuudaluviyokaikono. Toro wuudaluvino sumaiyokwe gami nuugwiyo adukwopiyoka ton kuto tovi aiko te muna'duke kwonokaikono. 28Toro wonyuno sumaiyokwe gavuge todorotai yere kuudokaikono. “Awi, moro nuugwiyo adukwopimwa'jo tov aikomgu amullanubwemapokwono. Toro tov moro kuto te amunasuko akavi kevu bwonyulo.” Toro kuudoka tovi wuu'nyuno sumaveyokwe kemoro kalo ton mouguurotowosi soporogano. Toro tooro bu'buto ino sumaveyokwe sajunoporogano. “Awi, Gooti tool akaro anekubweyadopiko akav adado yanekullogolono'mo'mdukono?” Sajunoporogano.
29Toro tooro kwako Kenan'no aikomgu plaino sumaveyokwe kemi kuunumiyago Jekoopollu kuuru'maroporogano. Toro wuuru'ma'no sumaveyokwe yiuwi'nokai kwimo'noka tonyuno kemi kuunumiyago toollu aro kuudoporogano. 30“Ijupda'ai a'mwo aguto tool yogalo bwotonyo nekudo'no nemino tov, domokadokwerodeyo, kuudo sanekuurokanogano. 31Yogalo toro anekudoka kuvi kuruv nevu aro kuudowonogano. “Nevu domokadokwenolmaiyo. Toro toonol yiuno nebal'no agudumwakuuwono. 32Aki nevu yiuwi'nokai toonol a'mwo pwolnodo toolluro 12-pela muugunyonogano. Toro todorotonolluro aiyowo'mo wuullako tool nemi nellunumiyago tooke kwako Kenan towai amwallo. Aki pwolno'gwowi me'no sovlavokaikono.” Kuudowonogano. 33Toro kuudowo tovi Ijupda'ai a'mwo aguto tool aro anekudokaikono. “Kemoro kuuguudo anyudumwa'jupo tov nebalo'mdeyokwe aro neya ipinorekikono. Kevudorotekulluda'ai pwol nuuge mwalodowo'jure toga kevu pudorotekul kemi julkwolaiyo ton mujuko'mo sadokwopo tonyuno wosamujuko pugai mokavlapinorekikono. 34Lukomgu kemi tellugwai'yago wuullako toollu miyomno neya domokabilo. Toro supi tov kuudo yaikuu'monyugono. Oo nebalo anyudoporodeyo. Kuudo yaikuuro'mi nuuge mwalodowo'jure toollu aikomgu nokwo irolowapimekono. Toro surolowapimi toga kevu kantri akavi nokwo yomollomwalpinorekikono.” Anekudokaikono.” Kemi kuunumiyago toollu toro kuudoporogano.
35Toro wuujuno sumaveyokwe kemoro wit kuto ton luptowoso'mno go'no go'nodo todorotavuro nuugwipweyo ton kemi kuto tonyu muna'dopure kwonoporogano. Toro te kevnokwe toorogai'aro kemi kuunumiyago tooke'aro tonumdoto kemoro nuugwiyo me'no adukwopiyopo su ton aiko te muna'dopure tonyu wono'mno luko soporogano. 36Toro ino sumaveyokwe kemi kuunumiyago Jekoopol kuudokaikono. “Kevu moro muugunyo pworallu me'no amanyudukwopiyoporekikono. Moro muugunyo Joosepeke Simiyooneke tooral me'no sovlavolorakono. Aki aga Bejamenollu manyudukwopipino'morekikono. Kemoro yiuwi'nokai toro sadokwopo tov mi jul'nyo bwotonyo anubwemwakovo.” Jekoopol kuudokaikono. 37Toro kuudoka tovi Ruubenol gami ganumiyago Jekoopollu aro kuudokaikono. “Nuu Bejamenollu gumiyomno aikomgu mamokami tool kaiyako amaro'ji to'gwowi guu moro kwolaiyo toorallu nokwo romiyosubinekugono. Toro te guu Bejamenollu neya donyabono. Nuu kwollu po'dogalo mollomwalo'mi aikomgu kuvinono nogumokamonyugono.” Kuudokaikono. 38Toro kuudoka kuvi kuruv Jekoopol aro kuudokaikono. “Awiyo, moro muugunyo akal kevuge mwolawonekono. Gami gadai'yago tool me'no abolokaikono. Aki muugunyo akal gami ganeyago tovuro aiyowo'mo wuullako tookono. Toro tool kevuge puuto tomuu plawo'ji kaiyako somaro'ji tov nuu yadaiyo kuunodo tekwonyu kalo kalo'mo yo'mi a'mwo bolodupudo tooravuro tomuu yiuno'no pla'monyugono.” Kuudokaikono.
Currently Selected:
Muuduko 42: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
