Muuduko 43
43
Joosepollu gadai'yago tooro Bejamenollu Ijup'no amokavlavopo tovinokwono
1To'no'gwowi muju'wuulo tov kwako Kenan toru bwotonyo kuuno amjo'movlaiyajukokwono. 2Toro te Jekoopeke'aro gami julkwolaiyo togai'aro ton wit sulo Ijupda'ai kwolobiyomorapo tonyu me'no nopiyo'mno Jekoopol gami muugunyo toorai kuudokaikono. “Kevu Ijup'no wolapi wosamujuko pun aki aiko te doolobiyomoroulo.” Kuudokaikono. 3Toro kuudoka tovi Juuda'wol aro kuudokaikono. “Nellunumiyagoloo, Ijupda'ai a'mwo aguto tool nemi duudapi yogalo aro me'no anekudokaikono. “Kemi tellugwai'yago toollu miyomno mamokwolabupi tov nuu kemi ilaiyo mamollekuma'monyugono.” Anekudokaikono. 4Toro te guu nemi nellugwai'yago wuullako toollu amonekwapubi tov nevu Ijup'no wolowa'ji wosamujuko pun nokwo wolobiyomorowanonogano. 5Toro kuvi kuruv guvu nellugwai'yago su toollu mamonekwapubi to'gwowi mwolowanonogano. Aro tovinokwono. Ijupda'ai a'mwo aguto tool anekudoka tov arokwono. “Kemi tellugwai'yago tooke mamokabupi tov kemi ilaiyo mamollekuma'monyugono.” Su toro me'no anekudoka tovinokwono.” Juuda'wol kemi kuunumiyago toollu toro kuudokaikono.
6Toro kuudoka tovi Jekoopol gami muugunyo toorai aro kuudokaikono. “Kevu Ijupda'ai a'mwo aguto toollu aro kuudoporekikono. Nemi nellugwai'yago wuullako pwol nomwallo. Kevu buro'nyo'mo su toro kuudoporekuldeyo? Kemoro kuudopo su tovida'ai mi kaiyako sugolanumo'maporekikono.” Kuudokaikono. 7Toro kuudoka tovi gamoro muugunyo tooro kuudoporogano. “Ijupda'ai a'mwo aguto su tool nemi po'dogalo yanekumgojo'no aki kevumdakulluno kurukwe'aro sanekumgojokaikono. Toro tool aro sanekumgojokaikono. “Kemi tellunumiyago tool kuuno dukomwallo? Aki kemi tellugwai'yagorodeyo pworo dukomwakovo?” Toro sanekumgojoka tovino tov kuuguudo kuudowonogano. Toro toonol nemi nellugwai'yago toollu, “Neya domokabilo,” nekudonoldeyo. Kuudo miyaurowono kuudowonogano.”
8Toro wuujuno sumaveyokwe Juuda'wol gami ganumiyago Jekoopollu aro kuudokaikono. “Guu muugunyo su toollu mi monuuwapiyo'bi neya avlawano. Guuge'aro nekwonogai'aro aki nemoro kwoloraiyo kubuurogai'aro ton mujuko'mo nobola'jokweyo'mo muugunyo su toollu neya domonuwapiyono. 9Toro toollu nuvnokwe toonyu po'dogalo nomollovi'mwojomokavla'monyugono. Nuu subuu'yamju toro adagujumono. Toro kwonyu kuruv muugunyo su toollu gumiyomno aikomgu ilaiyo to'no mamokami to'gwowi jul'nyo tov mi yiunokuudo mujonuwo'movla'mwalonokwono. 10Guu sumdomgu madanekuumjukuro'bujuko'mno'juki nevu wosamujuko mubiyo'mo tov pugasal nokwo sunodavowa'jujukonogano.” Juuda'wol toro kuudokaikono.
11Toro kuudoka tovi kemi kuunumiyago Jekoopol kuudokaikono. “Puuto puruv nonaguto'mdeyokwe nokwo mokavlapinekono. Aki Ijupda'ai a'mwo aguto toollu yasuwa'no wiyo'mo aro togai domokavlaiyulo. Kemoro womdo tonyuda'ai wosamujuko sugudo pun kemi kuto tonyu mullosopi domokavlaiyulo. Aki i'mujako marasin pugai'aro tamwallugwolamdo podopto pugai'aro wobeya sudo kuunyokwe i'mujako pugai'aro i'mujako Mur pugai'aro Pistasiyo iko tooke Almoon iko tooke tooralluro nonyo'mo sulo pugai'aro ton kugai domomullomokavlaiyulo. 12Aki sumdomguda'ai nuugwiyo abiyopo ton kemi ku'mujumollo tonyu aki aiko te amullaikubweyopo togai'aro neya domokavlaiyulo. Nuugwiyo su ton kuudo po'dogalo miyauro'mno amullaikubweyopo'mdukoneyokwe kugai'aro momworaropi aki wosamujuko ton mubiyo'mo nuugwiyo muuduko pugai'aro neya domokavlaiyulo. 13Aki kemi tellugwai'yago wuullako tool kweke momworaropi a'mwo aguto toollomno aikomgu yere dooloulo.” 14Jekoopol toro wuujuno sumaiyokwe aki aro amodapiyokaikono. “Gooti Jurogudo Kuunodo toolluro yodowo'jure tovida'ai Ijupda'ai a'mwo aguto tool kemino kalo maikumwonyowo'ji ilaiyo kuudo yaikuuronekono. Kemino ilaiyo saikuuro'ji tov kevudorotekulluro pwol wuulo killo'mo ago te aule'nasuko toollu irolowapiyowo'ji aki Bejamenol kweke'aro toorallu miyomno nokwo mokabupinorakono. Toro kuvi kuruv Gooti tool mino tov, Kwolaiyomaiyokwe amwalono, kuudo sanuuro'ji to'gwowi nuu kuvinono kwolaiyomaiyokwe nokwo mwalmonyugono.” Jekoopol gami muugunyo toorai toro amodapiyokaikono.
15Toro te Jekoopolluro muugunyo tooro Ijup'no kwolaporogano. Toro tooro Ijupda'ai a'mwo aguto toollu yasuwa'no wiyo'mo togai'aro sumdomguda'ai nuugwiyo aikomgu amokailabopo togai'aro aki wosamujuko mubiyo'mo nuugwiyo muuduko togai'aro aki Bejameneke'aro tonyu momwora'no sumaveyokwe Ijup'no kwolaporogano. Toro tooro wolno sumaveyokwe Joosepollu woloono'mno gamoro sumdollu toru kwolodavoporogano. 16Toro woloda'mdopure toga Joosepol gami gadai'yago toorogai kwolabopo Bejamenollu wono'no gami ago tovi mido mollomwalodowodo toollu aro kuudokaikono. “Guu a'mwo akarai momworaro'bi moro ago tovino domollubworomokwono. Toro tooro kuujunapto toga nuuge nomwalano'moneyokwe guu memeyorodeyo pwollu romiyo'bi dodovailono.” Kuudokaikono. 17Joosepol toro kuudoka tovi gamoro womdokwe tool kuvinono uumjuno'no Joosepollu gadai'yago toorai ago tovino amollubworomokwokaikono.
18Joosepolluro ago tovino toro mollubworomokwoduke toga Joosepollu gadai'yago tooro luko yo'mno aro sajunoporogano. “Awi, sumdomguda'ai nuugwiyo ton nemoro kuto tonyu aki aiko te muna'duke kwonowo tonyuno tov dobaneki'mo'maiyo. Toro toonollu galonekumworaropi ki'nato womdo wiyo'mo meronekubwepino'mo tooro ago akavi donekumokaulmwolavo. Aki nemoro doonki kworogai'aro kemiyo'mo mapinorodeyo.” Sajunoporogano. 19Toro yajunyuno sumaveyokwe anoullo toru'no ila'mno Joosepolluro agwapto toruda'ai womdo tovi mollomwalokwe toollu aro kuudoporogano. 20“Nemi agutoloo, aiyoga muudu'nodo toga nevu wosamujuko pun mubiyo'mo toonol akawai'no me'no kwolabowonogano. 21-22Toro toonol wosamujuko ton me'no mubiyomworarowono aikomgu mokavlavowono puuto tomuu kworowonogano. Toro kworowo towai nemi kuto tonyu ikwolapiyowono yiuwi'nokai go'no go'nodo toonolluro yiuwi'nokai nuugwiyo adukwopiyowo ton nemi kuto tonyu muna'duke kwonowonogano. Nuugwiyo su ton a'mwo toolluro amullonekubwemoka'mdeyo tov kuudo maiyonogano. Toro te nuugwiyo su ton aikomgu ikullabiyo'mo amokamawonogano. Aki wosamujuko pugai'aro mubiyo'mo nuugwiyo muuduko pugai'aro togai amokamawonogano.” Kuudoporogano.
23Toro kuudopo toorai a'mwo womdo tovi mollomwalokwe tool kuudokaikono. “Kevu luko mipinono. Aki kemoro sumwoluko ton duka'bwo'nyu mipinono. Kevuge'aro kemi tellunumiyago tooke'aro tonumdotekullu Gooti tool nuugwiyo su ton kemi kuto tonyu amullaikubweyokakwono. Toro aikudumo tov aro tovinokwono. Kemoro sumdomguda'ai nuugwiyo abiyopo tov nuu me'no amarokwono.” Kuudokaikono. Toro wuujuno sumaiyokwe Simiyoonollu wuulo killo'mo ago tovida'ai irolovomo'no sumaiyokwe amokabokaikono.
24Toro mokabino sumaiyokwe a'mwo womdo tovi mollomwalokwe su tool yiuwi'nokai todorotai Joosepolluro ago tovino amollubworomokaulokaikono. Toro mollubworomokaulno sumaiyokwe kemi suvlo ton yal'mo'nyo'mo wonyo ton willo'no kemoro doonki toorai wosamujuko pun kuudaluviyokaikono. 25Toro mollubworomokaulno sumaiyokwe Joosepollu gadai'yago tooro kuu'noporogano. “A'mwo aguto tool kuujunapto toga nevuge nomwalanekono.” Toro tovi wuu'no'mno yiuwi'nokai yasuwa'wino me'no amokwolabopo ton Joosepollu wiyo'moneyokwe sovrowosoporogano. 26Toro yovrowosuno sumaveyokwe Joosepol gami ago tovino aboka toga kevudorotavuro yasuwa'wino me'no sovrowosopo ton amokaulaporogano. Toro mokaulno sumaveyokwe kwako tomuu'aro wolomuulo'naro'mno Joosepollu kwiyoporogano. 27Toro wino sumaveyokwe Joosepol kuudokaikono. “Kuujunaptokwono.” Toro wuujuno sumaiyokwe aro samuugojokaikono. “Muudu'nodo toga kemi tellunumiyago yadaiyo tekwojuno anyudopo tekwo nobollo pun maro'no me'no abolokaldukono oo ilaiyo kuuno dukomwallo?” Samuugojokaikono. 28Toro samuugojoka tovi aro kuudoporogano. “Gumi dolago tomuu mwallokwe nemi nellunumiyago tekwo ilaiyo kuuno mwalodowo yere maboladopiyo.” Toro wuujuno sumaveyokwe a'mwo aguto toolluro sumdollu toru kwako tovi kwolomuulo'naroporogano.
29Toro wolomuulo'na'dopure toga Joosepol gami gagwai'yago tool gami ganeyago avalo tovuro muugunyo Bejamenollu kwonokaikono. Toro wonyuno sumaiyokwe aro adokaikono. “Oo muugunyo akal kemi tellugwai'yago anyudopo tooldeyo?” Juno sumaiyokwe Bejamenollu aro kuudokaikono. “Mi muugunyoloo, Gooti tool gamoro yasuwa'wino sugumaluko tov nokwo agujabogawono.” Kuudokaikono. 30Joosepol toro wuujuno sumaiyokwe gami gagwai'yago toolluno kalo bwotonyo wino'no kumdo jo'mo sokaikono. Toro tool kwa'mgu tomuu yere bolokwino sumaiyokwe ago adovarojungiko puusi kuula'no yiulo tomuu kumdo adokaikono. 31Kumdo me'no dopino sumaiyokwe gami sumdomago tovi wonyo yal'mo'no'no gadai'yago tooraiyomno aikomgu aulokaikono. Toro tool kalo buuropino toro winoduke kwol kuruv jurogudo imwojunyuno sumaiyokwe gami womdokwe toorai kuudokaikono. “Wosamujuko ton domokabilo.” Kuudokaikono. 32Toro te womdokwe tooro wosamujuko ton mokabino sumaveyokwe toga kevudorotaiyo'mo tov go'nodo puwai kuubweyoporogano. Aki Joosepollo'mo tov go'nodo puwai kuubweyoporogano. Aki Ijupda'ai tooraiyo'mo tov go'nodo puwai kuubweyoporogano. Toro amomuudeyosopo tov aro tovinokwono. Ijupda'ai a'mwo abolo ton Hibruuda'ai tonyuno, kaiya'nodorodeyo, kuudo yau'dupudo tovino tov kworogai avalo toru nomwallo'mo tov kumako kwimo'nyajukokwono. 33Toro te Bejameneke todoroto wosamujuko ton yasuwa'no mwolonomwaloporogano. Muudu'nodo toga Joosepol gamoro womdokwe toorai amodapiyoka tovida'ai kevudorotai aro tomgu'aro amollobimoomwalloporogano. Kuudai'yago muudu'nodo toollu sumdomgu morumwallo'mno aki kwolluroda'ai toollu morumwalluno sumaveyokwe yiuwi'nokai todorotai tono tono morumwallo'mno wuullako toollu aiyowo'mo tomuu amorumwallopekono. Toro amollubimoomwallopo tooro yainyuno'mno sajunoporogano. “Awi, nemino tov ala'mwol sodubwasokarodukono?” Toro yajuno'mno kuudo kwolallo sourukwapiyoporogano. 34Toro yourukwapiyodopure toga Joosepol gami womdokwe toorai amodapiyokaikono. Toro amodapiyoka tooro wosamujuko ton Joosepolluro noluuleyo tovi wo'duke tonyu maro'mno yado kuumwodeyoporogano. Toro uumwodeyo'mno yiuwi'nokai kuudai'yago toorai aval'no kwiyoporogano. Toro kuvi kuruv wuullako Bejamenolluno'gwowi bwotonyago kuubweyoporogano. Kuudai'yago tooro pwolno pwolno amaropo kuvi kuruv Bejamenolluno'gwowi atobuul amarokaikono. Toro todoroto nyuno sumaveyokwe aki wain wonyo togai'aro anomwaloporogano. Joosepeke toro nobwokunomwalno sumaveyokwe kemoro kulako ton ilaiyo subwosunoporogano.
Currently Selected:
Muuduko 43: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
