Muuduko 44
44
Joosepolluro kapwo tov sumagwo'noka tovinokwono
1Toruda'ai wosamujuko me'no nopino sumaveyokwe Joosepol gamoro ago tovida'ai womdo tonyu a'mwo mollomwalokwe toollu aro kuudokaikono. “Wosamujuko ton a'mwo tooravuro kuto tonyu momullubweyo'bi kemi yowa'no mokavlapino toru'aro domomullubweyono. Aki kemi nuugwiyo abimapo ton kemi go'no go'no ku'mujumollo tonyu aiko te domullubweyono. 2Aki moro kapwo puuwa silva tokwe sakwollungiko su towa maro'bi muugunyo wuullako toolluro ku'mujumollo tovi gami nuugwiyo adukwopimoka tokwe'aro domullubweyono.” Joosepol toro kuudoka tovi womdokwe tool kuvinono sokaikono. 3Toro ino sumaiyokwe lomwo iru'mago sullourosoka toga a'mwo womdo tovi mollomwalokwe tool a'mwo todorotai kemi doonki toorogai amorapiyokarogano. 4Toro morapino sumaiyokwe a'mwo todoroto wagwolago tovi wuugollu'movo'mno wobo toru kuuno pla'mdopure toga Joosepol gamoro ago tovida'ai womdo tovi a'mwo mollomwalokwe toollu aro amodapiyokaikono. “Guu a'mwo toorai yere uumjuno'bi duuru'marono. Toro wuuru'maro'bi toga aro duudoganono. “Nevu ilaiyo to'no saikugolmawo kworekul kuruv kevu nemi buro'nyo'mo kaiya'no sanekugolmaporekuldeyo? Mi a'mwo aguto toolluro silva kapwo towa buro'nyo'mo kuuko ama'maporekuldeyo? 5Moro a'mwo aguto tool kapwo su towasi wonyo iranodowodekono. Aki kapwo su tovi'aro moro a'mwo aguto tool yiulo kupuu'na'dopure tonyu kuu'maiyo toru'no bomollolupto'nosodowodekono. Toro te kevu kuuko ama'mapo tov ma'no ma'no bwotonyo sumaporekikono.” Duudono.” Joosepol toro amodapiyokaikono.
6Toro modapino sumaiyokwe a'mwo womdo tovi mollomwalokwe tool a'mwo su todorotai buuru'maro'no yiuwi'nokai Joosepolluro kuudoka ton kuvinono kuudokaikono. 7Toro kuudoka tovi kuudoporogano. “Nemi agutoloo, guu yogalo su tov buro'nyo'mo donekudumwakuno? Nevu kemoro womdokwe tekwojonogano. Toro tovino tov nevu kaiyako ku'nono miyaikullugolanonogano. 8Guu kuudo nyau'mwakuno. Muudu'nodo togasuro nuugwiyo ton nemoro kuto tonyu amullosopo tonyu Kenanda'ai aikomgu amokwolabowonogano. Toro me'no sowo toonol gumoro a'mwo aguto toolluro ago tovida'ai silvadeyo goolodeyo ton kuuko nokwo mokavlawanonoldukono? Awiyo, ku'nono mamokavlawanonogano. 9Toro te guu kapwo su tovino nemi yanekuu'mgono'bi pwol amwora'bi toollu nokwo romiyosubinekono. Aki pwonollu guu a'mwo aguto tookujuro ki'nato womdo yo'mo nokwo kironekumwallubinonogano.” Kuudoporogano. 10Toro kuudopo tovi a'mwo womdokwe tool kuudokaikono. “Kemoro anyudumapo tov ilaiyokwono. Nuu aro ikullumonyugono. Kevudorotekulluda'ai pwol kapwo tov mwora'dowo'jure kwonmi toollu moro ki'nato womdo yo'mo kirumwallumekono. Toro kuvi kuruv pworekulluno'gwowi nokwo ikwonyapino imonyugono.” Kuudokaikono. 11Toro wuujuno sumaiyokwe a'mwo todoroto kemi go'no go'no kuto ton kwako tovi yere wolosuno sumaveyokwe ku'mujumollo ton sukwolapiyoporogano. 12Toro sukwolapiyopo tonyu a'mwo womdokwe tool muugunyo muudu'nodo toolluro kuto tovida'ai yo'mgonomworaro'no yiuwi'nokai tooravuro kuto tonyu sa'mgonokaikono. Toro ya'mgonyuno ya'mgonyuno sumaiyokwe aiyowo'mo wuullako Bejamenolluro kuto tovi kapwo tov muna'duke tovi so'mgonomarokaikono. 13Toro so'mgonomaroka tovi Bejamenollu gadai'yago tooro wonyuno sumaveyokwe kalo'mo tooro kemi youro ton aroju'noporogano. Toro roju'nyuno sumaveyokwe kemi wosamujukuto ton kemi doonki toorai muunyu toru ilomorosuno sumaveyokwe wagwolago tovino aikomgu aboporogano.
14Juuda'weke'aro gami gagwai'yago toorogai'aro todoroto Joosepolluro ago tovino aikomgu bino sumaveyokwe Joosepol kuuno mwaloduke abuuru'maroporogano. Toro toollu buuru'ma'no sumaveyokwe sumdollu toru kwolomuulo'naroporogano. 15Toro wolomuulo'na'dopure toga Joosepol kuudokaikono. “Kevu buro'nyo'mo toro sumaporekuldeyo? Nuu noonyumwonyu pun yiulo kupuu'na'dopure tonyu yo'mgonomallokwe toonyugono. Toro toonyuno kuudo miyanuu'dupudorekuldeyo?” Kuudokaikono. 16Toro wuujuno sumaiyokwe Juuda'wol aro kuudokaikono. “Agutoloo, nevu ma'no ma'no mimawonogano. Toro tovino gujo'moneyokwe kuuguudo puruv nonagutonogano. Nemoro ma'no ma'nodo tov Gooti tool kuu'maiyo toru'no me'no abomollolupto'nosumokaikono. Toro tovino tov yiuwi'nokai todorotonollu gumoro ki'nato womdo yo'mo meronekumwallubinonogano. Muugunyo kapwo tovi so'mgonoma'mapo tooke'aro nev kwonogai'aro todorotonollu meronekumwallubinonogano.” Kuudokaikono.
17Toro kuudoka tovi Joosepol aro kuudokaikono. “Awiyo, nuu kemi su toro maikullumonyugono. Yiuno kapwo tovi so'mgonoma'mapo toolno moro ki'nato womdo yo'mo kirumwallumekono. Toro kuvi kuruv pworekulno'gwowi kemi tellunumiyago toollomno kavo nokwo plapinorekikono.” Kuudokaikono.
Juuda'wol Bejamenolluro aiko toru mallo'mo kwinoka tovinokwono
18Toruda'ai Juuda'wol Joosepollu wobo toru bo'no aro abuudokaikono. “Oo mi agutoloo, guu a'mwo aguto Feroo toolbusuko anyumo'nadokuuno. Toro tookuji moro yogalo pwekwo agudumi tovino guu surodo'mo nonyubiyo.” Kuudokaikono. 19Toro wuujuno sumaiyokwe aki aro kuudokaikono. “Guu aguto tooku muudu'nodo toga aro anekudoganodekugono. “Kemi tellunumiyago tooke'aro tellugwai'yagorodeyo pworogai'aro dukomwakovo?” Anekudoganodekugono. 20Toro anekudoganodo tookuji nevu agudowonogano. “Agutoloo, nemi nellunumiyago yadaiyo kuunodo tekwo nomwallo. Aki kwolaiyo wuullako pwol nemi nellunumiyago tekwo yago mwalo'no aiyowo'mo sawosunoka tool nomwallo. Kwolaiyo su toollu ganeyago tov kwolaiyo pworal somaroka kuvi kuruv sumdomguda'ai tool me'no sovlavokaikono. Toro te yiuno wuullako judo toolno amwallo. Toro toollu gami ganumiyago tool kalo buuropino mollodowodekono.” Agudowonogano. 21Toro agudowo tovi guu aro anekudodekugono. “Kemi tellugwai'yago wuullako toollu nuu sumdo wonmo'mo neya domokwolabilo.” Anekudodekugono. 22Toro anekudodo tovi nevu guu a'mwo aguto tookuji aro agudowonogano. “Nellugwai'yago wuullako su tool ganumiyago toollu kuugollu'mowo'ji tov ganumiyago tekwo yiuno'no bolno yonekwogano.” Agudowonogano. 23Nevu toro agudowo kuvi kuruv guu aro anekudodekugono. “Kemi tellugwai'yago toollu miyomno mamokwolabupi tov nuu kemi ilaiyo mamollekuma'monyugono.” Anekudodekugono.
24Toro nekujuno sumoneyokwe nemi nellunumiyago toollomno aikomgu wuuru'marowono guu a'mwo aguto tookujuro anekudodo tov kuvinono kuudowonogano. 25Toro kuudowo tovi lukomgu nemi nellunumiyago tool aro amodonekwopiyabokanogano. “Kevu Ijup'no aiko te wolapi wosamujuko pugai'aro doolobiyomoroulo.” 26Toro amodonekwapiyoka toonol kuudowonogano. “Awiyo, nemi nellugwai'yago wuullako tooke mamokavlawa'ji tov mwolowanonogano. Su tov aro tovinokwono. Nellugwai'yago wuullako su tool nevuge mwolowa'ji tov a'mwo aguto toollu ku'nono muuru'maranonogano. Toro kuvi kuruv yiuno kwolaiyo wuullako su tooke kwolowa'ji to'gwowi a'mwo aguto toollu nokwo wuuru'maranonogano.” Kuudowonogano. 27Toro kuudowo tovi nemi nellunumiyago tool aro anekudokaikono. “Moro muugunyo su toollu ganeyago tov kwolaiyo yiuno pworalno somaroka tovino kevu kuudo nyau'mwakovo. 28Toro tooralluro gadai'yago tool me'no sovlavokaikono. Toro toollu yiunokuudo mwonodum aro kuudo yau'dumdekono. Oo kuullujulukorodeyo tooro me'no adovanopoldeyo. Kuudo yau'dumdekono. 29Toro te aga kevu moro kwolaiyo wuullako akallu mokavlavopi kaiyako somaro'ji tov nuu yadaiyo kuunodo tekwonyu kalo kalo'mo yo'mi a'mwo me'no bolodupudo tooravuro tomuu yiuno'no pla'monyugono.” Su toro me'no anekudokaikono.” Juuda'wol Joosepollu toro kuudokaikono.
30-31Toro wuujuno sumaiyokwe aki aro kuudokaikono. “Agutoloo, muugunyo akal nemi nellunumiyago toolluro poowoguro'mwoga kuunodekono. Toro toolluno tov nevu muugunyo akallu mamokavlawa'ji tov nemi nellunumiyago tekwojomno mavlawanonogano. Su tov aro tovinokwono. Nemi nellunumiyago tekwo muugunyo akallu mwono'ji tov nobolonekono. Toro tekwo abolo'ji toga a'mwo bolodupudo tooravuro tomuu yiuno'no plawonekono. 32Aki puruv mi nyunumiyago toollu subuu'yamju aro me'no kwiyonyugono. “Nuu muugunyo akallu gumiyomno aikomgu ilaiyo to'no mamokami tov jul'nyo tov mi yiunokuudo mujonuwo'movla'mwalonokwono.” Subuu'yamju toro kwiyonyugono. 33Subuu'yamju toro me'no aduuwiyo tekwonyu gumi aro gudoganumo'mokwono. Agutoloo, nuu muugunyo akalluro aiko toru maro'mi gumi ki'nato womdokwe gujumo'numwalmekwonyugono. Muugunyo su tool gami gadai'yago toorogai aikomgu neya plawonekono. 34Toro kuvi kuruv muugunyo akal akawai mwalodowo'jure nuu judo tekwonyu plavo'mi mi nyunumiyago toollu kuuru'ma'mi to'gwowi kaiyako bwotonyo i'nonekono. Toro su'no'ji toollu wonyo'mo manyunadopiyo. Toro tovino tov muugunyo su tool nonagutonyudeyokwe to'gwowi mi nyunumiyago tool kaiyako nyu'no'jokweyo'mo nuu ku'nono mavla'monyugono.” Juuda'wol Joosepollu toro kuudokaikono.
Currently Selected:
Muuduko 44: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
