Muuduko 45
45
Joosepol gami gadai'yago toorai gavnokweyolluno kuu'maiyo toru'no kuudoka tovinokwono
1 #
Krt. 7:13
Toruda'ai Joosepol kalo bwotonyo wino'no kumdo jo'mo kwinokaikono. Toro tool a'mwo amuugonodaiyajupo pworai aro amodapiyokaikono. “Kevu yiuwi'nokai Ijupda'ai toorekul kwa'mgu tomuuno dolokwilo.” Amodapiyokaikono. Toro modapino sumaiyokwe a'mwo gabovo pworo mamwalodopure tomuu Joosepol gami gadai'yago toorai gavnokweyolluno kuu'maiyo toru'no wuujo'mo kwinokaikono. 2Toro te a'mwo gabovo pworo me'no bolokwino sumaveyokwe Joosepol kumdato bwotonyo adokaikono. Toro doduke toollu a'mwo Ijupda'ai tooro kwa'mgu tomuu davo'mno kuu'noporogano. Toro wuu'nyuno sumaveyokwe pworo Joosepolluro kumdato soka tovino kuuguudo tov a'mwo aguto Feroo toolluro ago tomuuno mokavla'mno kuudoporogano.
3Joosepol kumdato me'no dopino sumaiyokwe gami gadai'yago toorai aro kuudokaikono. “Nuu Jooseponyugono. Mi nyunumiyago tool kuuno dukomwallo?” Toro kuudoka tovi gadai'yago tooro wuu'no'mno luko bwotonyo soporogano. Toro ino sumaveyokwe Joosepolluro kuudoganoka tovi kemoro yogalo puruv muudoporogano. 4Toro te Joosepol gami gadai'yago toorai kuudokaikono. “Kevu wobo akaru dobilo.” Toro doma'no sumaiyokwe wobo toru abodavopo toorai aro kuudokaikono. “Nuu Jooseponyugono. Toro toonyu aiyoga a'mwo pworo kemi nuugwiyo ikubiyo'mno mi amonuwapiyoponyugono. Toro te a'mwo su tooro Ijup akaru'no anumokaboponyugono. 5Toro te kevu mino nuugwiyo mallo'mo amonuuwapiyopo tovino aro kuudo nyaupiyo. Oo nevu kaiyako sugolowo tooldeyo, kuudo yauropi jul'nyo mibwosunpinono. Su tov aro tovinokwono. Yiuwi'nokai a'mwo abolo ton mujuko'mo nobolpiyokwe wiyo'mwojo'moneyokwe Gooti tool mi akawai'no amonuwopiyabokanyugono. Toro te akawai'no kemi sumdomgu abo toonyu nokwo ikullo'mwojumonyugono. 6Muju'wuulo tov kwako akavi kworomo pullal me'no uuwolo'nodowodo kuvi kuruv atobuul kworomo pubuuke'aro kuuno mujo'movla'mdowo'jure toga a'mwo abolo ton kemi womdo tonyuda'ai wosamujuko puru'monodo kuruv mamulanpinogano. 7Toro te Gooti tool kevu muju'wuulo tovi yiunokuudo nobolpiyokwe kwako akavi kuuno mujomwekovlaiyo'moneyokwe mi amonuwopiyabokanyugono. Kevu yere mwolabodopure toga mi sumdomgu akawai'no amonuwopiyabokanyugono. Toro toonyu ikullo'mwojodo'mure tovida'ai kemoro kwoloraiyo togai'aro tellukweyago toorogai'aro tooro aiyo nokwo mujomwekovla'mwalpinogano. 8Toro te nuu akawai'no abo tov kevu amonuwopiyaboponyumaiyo. Mi akawai'no amonuwopiyaboka kuunodo tool yiuno Gooti tookono. Aki toro tool a'mwo aguto amonyudapiyokanyugono. Toro toonyu a'mwo aguto Feroo toollu ganumiyago toolbusuko wimo'nodum kwollu yodubwasokwenyugono. Aki toro toonyu gamoro ago tovida'ai yiuwi'nokai tonyu mido mollomwalodumdonyugono. Aki yiuwi'nokai kwako Ijup tomuuda'ai a'mwo aguto sumo'numwakonyugono.” Kuudokaikono.
9 #
Krt. 7:14
Toro wuujuno sumaiyokwe aro amodapiyokaikono. “Kevu nemi nellunumiyago toollomno aikomgu yere plavopi aro duujulo. “Gumoro muugunyo Joosepol aro agudumokaikono. Gooti tool mi yiuwi'nokai Ijupda'ai a'mwo aguto amonyudapiyokanyugono. Toro te kevu sogwollo mainyo'mo togaikul miyomno yere doolabilo. 10Toro wolabopi kwako Goosen toru nokwo bwolomwalpinogaikikono. Toro togaikul kwolabupi toga kemi kwoloraiyo togai'aro tellukweyago toorogai'aro aki kemoro sipsip memeyorodeyo toorogai'aro buulmokau wuulo toorogai'aro yiuwi'nokai su toorai mokwolabopi nuuge wobo toru mwalmwalpinogaikikono. 11Toro togaikul kwako Goosen toru abwolomwalpi tov nuu nokwo mollekumwalmonyugono. Muju'wuulo akav kworomo atobuul kuuno mujo'movla'mdowo'jure toga kevuge'aro kemi julkwolaiyo togai'aro aki kemi sipsip meme buulmokauworodeyo toorogai'aro togaikul mujuko'mo abolpureyokwe manyunadopiyo.” Nemi nellunumiyago toollu toro duujulo.” Joosepol kuudokaikono.
12Joosepol toro wuujuno sumaiyokwe aki aro kuudokaikono. “Nuu nemi yogaljo tovida'ai ikudodore tovi nonuu'nadokwovo. Aki mi nyudai'yago toorekike'aro nyugwai'yago Bejameneke'aro toorekul nuu nekudodore toonyu me'no anuwonmaporekikono. 13Toro toorekul plavopi mi nyunumiyago toollu kantri Ijup akaru mino yovo tov muunyu toru'aro ilomonuwopiyodapudo tovino jodubwasulo. Aki yiuwi'nokai kwonmapo tonyuno yodubwasopi mi nyunumiyago toollu akawai'no yere domokwolabilo.” Joosepol gami gadai'yago toorai toro kuudokaikono.
14Toro wuujuno sumaiyokwe gami gagwai'yago Bejamenollu mogudupolopiyo'no yiuwi'nokai todoral kumdo adolorakono. 15Toro juno sumaleyokwe Joosepol gami gadai'yago tooravuro suwado tonyu molluduuduulo mollo'no kumdo amadokaikono. Toro majuno sumaiyokwe gadai'yago tooro Joosepeke kuuguudo adoporogano.
16To'no'gwowi a'mwo aguto Feroo tooke'aro gamoro a'mwo womdokwe pworogai'aro tooro kuuguudo aro tov kuu'noporogano. “Joosepollu gadai'yago tooro me'no abai'mo'maporogano.” Kuuguudo su tovi wuu'no'mno ilaiyo soporogano. 17Toro ino sumaveyokwe a'mwo aguto Feroo tool Joosepollu aro kuudokaikono. “Guu gumi judai'yago jugwai'yago toorai aro duudono. “Kemi kuto ivito ton kemi doonki toorai muunyu toru ilomorosopi kwako Kenan'no aikomgu plapinorekikono. 18Toro plavopi kemi kuunumiyago tooke'aro kemi julkwolaiyo togai'aro tonyu aikomgu miyomno domokwolabilo. Toro amokwolabupi tonyu nuu Ijup akaruda'ai kwako sugudo kuunodo puruvi nuuwimonyugono. Toro kwimi toga wosamujuko tonyuno supto miyopi kwako kwimi tovida'ai wosamujuko bwotonyago ton nokwo mujonumwekovla'mwalpinogano.” 19Gumi judai'yago toorai toro wuudo'bi aki aro duudono. “Kevu kemi tellunumiyago tooke'aro kemi julkwolaiyo togai'aro tonyu mokwolabiyo'mo Ijupda'ai karis pugai domokavlaiyulo. Toro amokavlapi tonyu kemi kuunumiyago tooke'aro julkwolaiyo tobuurogai'aro tonyu ilomorumwallopi akawai'no aikomgu domokwolabilo. 20Toro ton nuugollu'meyo'mo toga kemi yiuwi'nokai kuto ivito tonyuno kuudo miyourukwapipinono. Nokwo dukwopino yopi Ijupda'ai sugudo kwokopo tonyuro pun kemiyo'mo nokwo bwolomapinokwono.” Gumi judai'yago toorai toro duudono.” Feroo tool Joosepollu toro kuudokaikono.
21Feroo toolluro toro kuudoka tovi Jekoopolluro muugunyo tooro kuvinono kuumjunoporogano. Toro tooro novlaiyo'mo toga Joosepol a'mwo aguto Feroo toolluro kuudoka kuvinono karis pworo maro'no gami gadai'yago toorai kuumallokaikono. Aki puuto tovi mujonugovlaiyo'mo wosamujuko pugai kuumallokaikono. 22Aki gami gadai'yago go'no go'nodo toorai youro kumi'yago touso kuumallokaikono. Toro uumalluno sumaiyokwe gagwai'yago Bejamenolluno'gwowi atobuul youro kumi'yago tousogai'aro 300 silva nuugwiyo tobuuke'aro kwiyokaikono. 23Toro wino sumaiyokwe Joosepol gami ganumiyago toollu wiyo'moneyokwe aro ton amorapiyokaikono. Atousal doonki kwolo pworai maro'no Ijupda'ai tooravuro kuto ivito sugudo yakwollodupudo pun muunyu toru ilomoroso'no kuumallokaikono. Aki atousal doonki abolo punyu maro'no nonyo'mo wit sulo togai'aro bret pugai'aro puuto tovi nugovlaiyo'moneyokwe wosamujuko pugai'aro ton ilomoroso'no kuumallokaikono. Joosepollu ganumiyago tool Ijup'no mujonugobiyo'moneyokwe toro ton amorapiyokaikono. 24Toro morapino sumaiyokwe Joosepollu gadai'yago gagwai'yago tooro novlaiyo'mo yodopure toga aro amodapiyokaikono. “Kevu puuto tomuu plavopi yogalo noullajunpiyo. Kemoro sumwoluko ton kavo wosopi dovlaiyulo.” Joosepol toro amodapiyokaikono.
25Toro amodapiyoka tooro Ijupda'ai wuugollu'mo'mno sumaveyokwe Kenan'no plavo'mno kemi kuunumiyago Jekoopollu kuuru'maroporogano. 26Toro wuuru'ma'no sumaveyokwe kemi kuunumiyago toollu kuudoporogano. “Joosepol mabolokaikono. Toro kwol kuruv aiyo kuuno amwallo. Aki toro tool yiuwi'nokai kantri Ijup tomuuda'ai a'mwo aguto imo'nyokwekono.” Toro kuudopo tovi Jekoopol wuu'no'no kuudo saurokaikono. Oo kuunano tov joukuu'nanyudadokwovo. Kuudo yauro'no gamoro poowokalago tov lumdo aulopiyokaikono. 27Toro kuulopiyoduke kwollu kuruv gamoro muugunyo tooro Joosepolluro yiuwi'nokai kuudoka tonyuno kuudoporogano. Toro wuudodopure tovi kemi kuunumiyago Jekoopol kuu'nokaikono. Toro wuu'nyuno sumaiyokwe gavnokweyollu Ijup'no mokwollo'mo karis Joosepolluro amorapiyoka toorai wono'no gamoro kuudo tov iroto kuumwogapiyokaikono. 28Toro uumwogapino sumaiyokwe Jekoopol adokaikono. “Oo aga nuu kuudo me'no souromakono. Moro kwolaiyo Joosepol mabolo'no aiyo kuuno amwallo. Toro te nuu yere mabolodo'mure akaga Ijup'no yere wola'mi kwollu wonmonyugono.” Adokaikono.
Currently Selected:
Muuduko 45: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
