Joon 19

1Toruda'ai a'mwo aguto Pailatol Jisasollu galogunyukuurumollupino'moneyokwe aduuwiyokaikono. Toro aduuwiyoka toga a'mwo mollurogudo pworo wuulo tokwe Jisasollu agunyukuurumollopekono. 2Toro gunyukuurumolluno sumaveyokwe aki mollurogudo su tooro amodu'mago agabaiku'nyungiko tov Jisasolluro mido tovi kig pwolluro miguto to'busuko ibweyo'mno aki youro kwallujo tokwe'aro subweyoporogano. 3Toro ibweno sumaveyokwe toga Jisasollu wobo toru bo'mno burolyogalo aro abuudoporogano. “Tarevono, Juu tooravuro a'mwo aguto kigoloo!” Wuudo'mno aki kemoro akwoka togai gamoro suuwado tovi iwago aromiyoporogano.

4Toro yodopure toga a'mwo aguto Pailatol a'mwo abolo kwa'mgu tomuu i'bwo'nodopure tonyomno aki aiko te bolokwino sumaiyokwe aro kuudokaikono. “Neya duu'nyulo. Nuu a'mwo toollu kamwoga senyubwo'mo kuvi kuruv a'mwo su tool ma'no ma'no puru'monodo kuruv miyo'mgonoma'mekono. Su toro tovino kevu kuudo neya youromapino'moneyokwe nuu a'mwo toollu kwa'mgu akamuuno aiko te nomogaibworomokalomonyugono.” Kuudokaikono. 5Pailatol toro me'no wuujuno sumaiyokwe toga Jisasol amodu'mago agabaiku'nyungiko tokwe'aro youro kwallujo tokwe'aro tovake kuuno yeso'no kwa'mgu tomuuno alokabokaikono. Toro alokaboka toga Pailatol a'mwo abolo tonyu kuudokaikono. “Kevu juloonyopiyabilo! A'mwo akal kwekono.”

6Toro wuujuno sumaiyokwe pris mido mollomwalokwe toorogai'aro Jeruusalemda'ai Gooti toollu ilomoropiyo'moneyokwe ago tovuro a'mwo jumanyogudo toorogai'aro tooro Jisasollu wonyuno sumaveyokwe toga deko aro adelowo'naroporogano. “A'mwo su toollu i'noguropte tovi domovoromiyoguroptowosonoo!” Adelowo'naroporogano. Toro delowo'na'dopure toga Pailatol aro kuudokaikono. “A'mwo su tool neya bolono'moneyokwe pasudo puru'monodo kuruv miyodowodo toollu so'mgonoma'monyugono. Toro tovino tov kevnokwe toorekul a'mwo su toollu mokavlavopi i'noguropte tovi domovoromiyoguroptowosulo.” Kuudokaikono. 7Toro kuudoka tovi Juu tooro aro kuudoporogano. “Nemoro loowo puruv nooso. Nevu loowo su tovi kuumjuna'ji tov a'mwo su tool neya bolonekono. Su tov aro tovinokwono. A'mwo su tool gavnokweyolluno aro me'no dodowodekono. “Nuu Gooti toolluro Kwolaiyo toonyugono.” Su toro dodowodo tovino tov neya bolonekono.”

8Toro kuudopo tovi Pailatol wuu'nyuno sumaiyokwe luko bwotonyo sokaikono. Luko su tov sumdomguda'ai luko yodowodo punyu kuuwolovokakwono. 9Pailatol luko yo'no gami gavman womdokwe ago tovino aikomgu kuulno sumaiyokwe Jisasollu aro kuudoganokaikono. “Guu gadomuuda'aiyekudeyo?” Toro kuudoganoka kuvi kuruv Jisasol yogalo puruv muudokaikono. 10Toro te Pailatol kuudokaikono. “Ai, guu moro agudoganmwako tovi ku'nono manyudubinekudeyo? Guu mino aro kuudo miyanuu'dumdekudeyo? Nuu gavman womdo aguto tovi yo'moneyokwe me'no ajanubweyoponyugono. Toro tovino tov gumi nokwo irolovogwapiyo'moneyokwe jurogudo tov mi anuwoso. Aki gumi movoromiyoguroptovagubweyo'moneyokwe jurogudo kuruv mi anuwoso.” Kuudokaikono.

11Toro kuudoka tovi Jisasol aro kuudokaikono. “Gooti muunyu kai'muuda'ai tool gumi gavman womdo yo'moneyokwe jurogudo tov magujabowo'jujuko'mno'juki guu mi kaiyako puru'monodo kuruv miyanyugolo'bujukekugono. Toro tovino tov a'mwo mi me'no amagubwemoka toolluro ma'no ma'nodo tov bwotonyokwono. Aki gamoro ma'no ma'nodo tov gumoro ma'no ma'nodo tovi kuuwolo'mwallo.” Kuudokaikono. 12Su toro kuudoka togada'ai Pailatol Jisasollu mollurolowapiyo'moneyokwe puuto puvino a'mgono sajukekono. Toro yoduke kuvi kuruv Juu tooro guureji aro kuujajuporogano. “Guu a'mwo su toollu amollurolowapibi tov guu Roomda'ai a'mwo aguto Sisa toolluro ibwoto'nyo mwimo'numwalbinekugono. A'mwo pwol, “Oo nuu a'mwo aguto kig toonyugono,” dodowodo su tool a'mwo aguto Sisa toollu kisuvolo wiyokwekono.” Kuujajuporogano.

13Toro kuujajupo tovi Pailatol wuu'nyuno sumaiyokwe Jisasollu kwa'mgu tomuuno aiko te abomokalokwokaikono. Toro bomokalokwino sumaiyokwe Pailatol kooti yogalo duuwiyo'moneyokwe sia puvi kwolomwalokaikono. Sia su tov kwako kwosuko pumuuno yovo tov, Sulo Aluvolobiyopingikovo, dodupudokwono. Aki kwako su tov Hibruu yogaljo tovida'ai, Gabatavo, dodupudorukono. 14Su toro toga Juu tooravuro iruko aguto tov Muunyu Toru'aro Surukuruwolovoka lubullu doto tovi yovrowoso'mo iruko togakono. Aki su toro toga 12 kilook kuujunapto togakono. Toro te Pailatol Juu toorai aro kuudokaikono. “Kevu doonyulo, a'mwo akal kemi a'mwo aguto kig tookono.” 15Toro kuudoka tovi Juu tooro guureji aro kuudoporogano. “Domollounomokavlavono! Guu nokwo mokavla'mno jono! Su toollu i'noguropte tovi neya domovoromiyoguroptowosonoo!” Kuudoporogano. Toro kuudopo tovi Pailatol kuudokaikono. “Nuu kemi a'mwo aguto kig su toollu nokwo movoromiyoguroptowosumonyudukono?” Toro kuudoka tovi pris mido mollomwalokwe tooro aro kuudoporogano. “Nemida'ai a'mwo aguto kig pwol nonagutonogano. Yiuno a'mwo aguto Sisa toolno nemi kig nonekullumo'nodowodekono.” Kuudoporogano. 16Toro wuujuno sumaveyokwe Pailatol Jisasollu i'noguropte tovi movoromiyoguroptowosupino'moneyokwe a'mwo mollurogudo tooravuro ato tovi amorubweyokaikono.

Jisasollu i'noguropte tovi amovoromiyoguroptowosopo tovinokwono

(Matyuu 27:32-44; Mak 15:21-32; Luuk 23:26-43)

17Toruda'ai a'mwo mollurogudo tooro Jisasollu amogaibworomokavlopekono. Toro mogaibworomokavlo'mno sumaveyokwe Jisasol gavnokweyolluro i'noguropte tovi amollukwovomokavlavokaikono. Toro tooro plaino sumaveyokwe kwako puwai ai'movoporogano. Kwako su towai'no yovo tov Mibodopto To'busuko Kwakoveyorukono. Aki Hibruu yogaljo tovida'ai kwako su toru'no yovo tov Goolgootavo dodupudorukono. 18Kwako su toru Jisasollu amovoromiyoguroptowosopekono. Toro movoromiyoguroptowosuno sumaveyokwe a'mwo pworake'aro amovoromiyoguroptowosoporogano. A'mwo su tooralluro pwollu Jisasolluro anatomgu pwollu kwonamomgu amovoromiyoguroptowosoporakono. Toro movoromiyoguroptowosuno sumaveyokwe Jisasollu akuuto toru amovoromiyoguroptowosopekono.

19Aki Pailatolluro aduuwiyoka tovida'ai a'mwo mollurogudo pworo puukwollo pun ipaiyo puusi yakwolluno sumaveyokwe i'noguropte tovi aromiyomgutowosoporogano. Puukwollo sokwollosungiko su tov arokwono. “Nasaretda'ai Jisasol Juu tooravuro a'mwo aguto kig tookono.” 20Puukwollo su tov Hibruu yogaljo tokwe'aro Room yogaljo tokwe'aro Grik yogaljo tokwe'aro tonyuda'ai sakwollungikokwono. Aki Jisasollu i'noguropte tovi amovoromiyoguroptowosopo kwako su toru wagwolago Jeruusalem tovi wobo toru wo'dowodokwono. Toro tovino tov Juu bwotonyago tooro puukwollo su tovi amojagillajuporogano. 21Toro te Juu tooravuro pris mido mollomwalokwe tooro a'mwo aguto Pailatollu aro kuudoporogano. “Guu, Juu tooravuro a'mwo aguto kig tookono, puukwollo miyokwollusubinokwono. Toro kuvi kuruv aro to'gwowi neya yokwollusubinokwono. A'mwo gavnokwe tool, Nuu Juu tooravuro a'mwo aguto kig toonyugono, dodowodo tookono. Su toro neya yokwollosubinokwono.” Kuudoporogano. 22Toro kuudopo kuvi kuruv a'mwo aguto Pailatol aro kuudokaikono. “Moro puukwollo me'no sokwollopimo su to'mono neya woronokwono.” Kuudokaikono.

23A'mwo mollurogudo tooro Jisasollu i'noguropte tovi me'no movoromiyoguroptowosuno sumaveyokwe toga gamoro kwa'mguda'ai youro ton aval aval adovorojosoporogano. A'mwo mollurogudo aral aral tooro youro su tonyu go'no go'no mallo'moneyokwe aval aval amomuudeyosoporogano. Aki gamoro anakuu'youro kuruv amaroporogano. Anakuu'youro su tovi go'no go'nodo togai magiwollungikokwono. Toro kuvi kuruv youro yiuno puru'monodo tovida'ai agiwollungikokwono. 24#Da'bk. 22:18Toro tovino tov mollurogudo tooro aro sajunoporogano. “Nevu anakuu'youro akavi aval aval nodovaroja'jo. Toro kuvi kuruv ala'mwol marono'mdukoneyokwe tovino nevu satuu sumwonyo puruv neya yanokwono.” Sajunoporogano. Su tov Gooti toolluro yogalo sakwollungiko puvi suuwiyo imwojoneyokweyo'mokwono. Gooti toolluro yogalo sakwollungiko su tov arokwono. “Moro kwa'mguda'ai youro tonyu momuudeyoso'mno go'no go'nodo tooro amaroporogano. Aki moro anakuu'youro tov ala'mwol marono'mdukoneyokwe tovino satuu sumwonyo yo'mno amaropokwono.” Gooti toolluro yogalo sakwollungiko tov su torokwono. Toro te a'mwo mollurogudo tooro satuu sumwonyo tovi kuvinono soporogano.

25Su toro toga Jisasolluro ganeyago tokwe'aro gami ganabwiyago tokwe'aro aki Kloopasolluro abolo Mariyakwe'aro aki wagwolago Makdalada'ai Mariyakwe'aro ton Jisasollu i'noguropte amovoromiyoguroptowosopo tovi wobo toru adaiyajupogano. 26Aki su toro toga Jisasol gami ganeyago tokwe'aro gami uumjunyokwe kalo buuropino kwinyajuko toonyuge'aro to'mallu wobo toru da'mdowole anakwonokaikono. Toro nakwonyuno sumaiyokwe toga gami ganeyago tovi aro kuudokaikono. “Abolovoo, a'mwo akaigwol gumi kwolaiyo agujumo'nadopiko toollu doonono.” 27Toro wuujuno sumaiyokwe aki gami uumjunyokwe toonyu aro anyudokaikono. “Oo gumi juneyago agujumo'nadopiko tovi doonono!” Anyudokaikono. Su toro togada'ai nuvu Jisasolluro ganeyago tovi moro ago tomuuno mokavla'mno sumoneyokwe amollomwekelabiyajonyugono.

Jisasol yiuno'no aboloka tovinokwono

(Matyuu 27:45-56; Mak 15:33-41; Luuk 23:44-49)

28Toruda'ai lukomgu Jisasol gamoro womdo me'no sopiyoka tovino kuudo yau'no sumaiyokwe aro adokaikono. “Nuu kuuleyaluko anyunadopiyo.” Jisasolluro yogalo adoka su tov Gooti toolluro yogalo sakwollungiko puruvi suuwiyo imwojo'mokwono. 29Toro doduke toga kwa'bootool puruv wain wuullomaiyo tokwe surosungiko puuwa su towai kwollajukokwono. Toro wo'duke tovi a'mwo pworo wonoweyo julo to'busuko puruv maro'mno wain wuullomaiyo su tovi juulovoma'no sumaveyokwe mekwapilo hisoop tovi'aro ikollutowoso'mno Jisasol amwojanoneyokwe suluwopiyaporogano. 30Toro iluwopiyodopure tovi Jisasol wain wuullomaiyo su tovi nyuno sumaiyokwe toga aro adokaikono. “Me'noganoo.” Adokaikono. Toro juno sumaiyokwe gamoro mido tov lugulo'na'no yiuno'no abolokaikono.

A'mwo mollurogudo pwol Jisasolluro suumdo tovi takubwopto tokwe ajuulowosoka tovinokwono

31Bi'ai iruko Sabat tollugwo yere mabai'mo'mdowo'jure toga Juu tooro noonyumwonyu ton yovrowosodupudogano. Toro yovrowoso'moneyokwe iruko su tollugwo abai'movokakwono. Toro te a'mwo bwiyo pworo i'noguropte tonyu kuuno noopiyokwe tovino Juu tooro Pailatollu aro samuugojoporogano. “A'mwo i'noguropte tovida'ai wo'dopure su tooro yere bolpino'moneyokwe kemoro suvlo tonyu neya arubuutopuro. Toro rubuutovopi me'no abolpi toorai i'noguropte tovida'ai nokwo mokwolabupinorodeyo?” Kuudoganoporogano. 32Toro wuudoganyuno sumaveyokwe Pailatol a'mwo mollurogudo toorai amorapiyokaikono. Toro morapino sumaiyokwe a'mwo mollurogudo su tooro Jisaseke avalo toruda'ai a'mwo amovoromiyoguroptowosopo tooralluro pwollu sumdomgu gamoro suvlo tovallu arubuutovoporogano. Toro rubuuteno sumaveyokwe aki pwolluro suvlo tovallu arubuutovoporogano. 33Toro kuvi kuruv Jisasollu kwonopo to'gwowi me'no aboloka toollu kwonopekono. Toro wonyuno sumaveyokwe gamoro suvlo tovallu marubuutovoporogano.

34Toro kuvi kuruv a'mwo mollurogudo pwol takubwopto tokwe Jisasolluro suumdo tovi ajuulowosokaikono. Toro ajuulowosoka toga mujako tokwe wonyo tokwe toval kwolabolovakono. 35Su toro wimo'noduke toollu nuvnokwe toonyu me'no amuugonallajonyugono. Toro amuugonallajo tovino aga kuu'maiyo toru adodoluwosumwakono. Nuvnokwe toonyu me'no amuugonallajo tovino tov aro kuudo youroma'dumdonyugono, Oo nebal'nodo'mdeyo, kuudo youroma'dumdonyugono. Toro te kevu Jisasolluno kuudo neya uubwepureyokweyo'mo gamino nebal'no yogalo su tov adodoluwosumwakono. 36#Moll. 12:46Jisasolluro suvlo tovallu marubuutovopo su tov Gooti toolluro yogalo ajakwollungiko puruvi suuwiyo imwojo'moneyokwe sumo'nokakwono. Yogalo su tov aro sakwollungikokwono. “Gamoro yogudo puru'monodo kuruv marubuutopinokwono.” Sakwollungikokwono. 37#Ado. 1:7Aki Gooti toolluro yogalo sakwollungiko puruv arokwono. “A'mwo takubwopto tokwe ajuulowosupi tooro a'mwo ajuulowosungiko toollu noonpinekono.” Sakwollungikokwono.

Jisasol me'no aboloka toga gamoro kulako bwiyo tov a'mwo buuso puvi aulomorosopo tovinokwono

(Matyuu 27:57-61; Mak 15:42-47; Luuk 23:50-56)

38Toruda'ai lukomgu Arimatiyada'ai a'mwo pwolluno yovo tov Joosepolekono. A'mwo su tool Jisasollu uumjunyokwe pwekono. Aki a'mwo su tool Juu tooraino luko sajuko tovino tov yiulo tomuu'aro Jisasollu uumjunyokwe kwimo'nyajukekono. Toro tool a'mwo aguto Pailatollomno bo'no Jisasolluro kulako bwiyo tov mallo'moneyokwe abuudoganokaikono. Toro abuudoganoka tovi Pailatol, “Yowa'nogano,” kuudokaikono. Toro te Joosepol bino sumaiyokwe Jisasolluro kulako bwiyo tov i'noguropte tovida'ai amokwolabokaikono. 39#Jn. 3:1,2Toro yoduke toga Nikoodimasol kweke abokaikono. A'mwo su tool sumdomgu Jisasollomno surakuuto toga abuuru'maroka tool kwekono. Toro te Nikoodimasol wobeya sudo kuunyokwe munollo pun amokabokaikono. Munollo su ton mekwako mur tokwe'aro aloo tokwe'aro tovake amolla'mo'nyungikokwono. Wobeya sudo kuunyokwe munollo su tonyuro tago tov 30 kiloo tomgu'aro amokabokaikono.

40Toro tooral Jisasolluro kulako bwiyo tov mokavla'mno sumaleyokwe Juu tooravuro a'mwo bwiyo toorai molsosodupudo pasudo tomgu'aro kuumjunolorakono. Toro tooral Jisasolluro kulako bwiyo tovi wobeya sudo kuunyokwe munollo su tokwe luviyourosolno youro wiya'jo tousogai pweyo amoweyomgurosolorakono. 41Jisasollu i'noguropte tovi amovoromiyoguroptowosopo wobo su toru kwako ikulsul womdokwe puruv kwollajukokwono. Kwako su tovi anakuuto tomuu a'mwo buuso puruv sulo tovida'ai adovoloumjosungiko tov kwollajukokwono. A'mwo buuso su tov aiyokwono. Aki a'mwo bwiyo pwolnodo kwol kuruv yere maulomorosajupokwono. 42Toro te su toro toga iruko Sabat tollugwo yere mabai'mo'mduke tovino tov Juu tooro noonyumwonyu ton sovrowosajupogakono. Aki sulo tovida'ai adovoloumjosungiko a'mwo buuso kuruv wobo toru kwollajukokwono. Toro tovino tov Jisasolluro kulako bwiyo tovi yere marolno aulomorosolorakono.

Currently Selected:

Joon 19: SMB

Highlight

Copy