Joon 18

Juudasol Jisasollu ikomago tooravuro ato tovi amorubweyoka tovinokwono

(Matyuu 26:47-56; Mak 14:43-50; Luuk 22:47-53)

1Jisasol subusu'nyogalo me'no wuujuno sumaiyokwe toga gami uumjunyokwe toorogai alluraiyo Kidroonovi igo'mguuno suloga'mowopiyaporogano. Toro iloga'mowopino sumaveyokwe Jisasol gami uumjunyokwe toorogai ikulsul womdo puwai aulaporogano. 2Womdo su towai Juudasol Jisasollu ikomago tooravuro ato tovi morubweyono su tool kuudo me'no souromallajukekono. Kuudo me'no souromallajuko su tov aro tovinokwono. Jisasol gami uumjunyokwe toorogai womdo su towai iruko bwotonyago toga su'bwo'nomwallajuporogano. 3Toro te Juudasol a'mwo mollurogudo pworogai'aro a'mwo jumanyogudo pworogai'aro toorai adomarokaikono. A'mwo jumanyogudo su tooro pris mido mollomwalokwe toorogai'aro Farasi toorogai'aro tooravuro amoropiyaboporogano. Toro tooro lamwo togai'aro gworeko togai'aro iro'mwomido togai'aro togai momwora'no sumaveyokwe womdo su tomuuno aboporogano.

4Jisasol gavnokweyollu nuuwimo'nono tovino kuudo me'no souromarokaikono. Toro tool a'mwo su tooro nobai'mo'mdopure toorai aro abuudokaikono. “Kevu ala'mwolluno a'mgono jadokwovo?” 5Toro abuudoka tovi aro kuudoporogano. “Nevu Nasaretda'ai Jisasolluno a'mgono sumwakuuwono.” Toro kuudopo tovi Jisasol kuudokaikono. “Nuu kwonyugono.” Toro wuudoduke toga Juudasol Jisasollu ikomago tooravuro ato tovi morubweyono su tool a'mwo su to kworogai abodavokaikono. 6Toro boda'mno sumaiyokwe Jisasol, “Nuu kwonyugono,” kuudoka toga a'mwo su tooro duu'mgado pwekwo uuwo'mno kwako tovi kwoloraporogano.

7Toro yodopure toga Jisasol a'mwo su toorai aki aiko te aro kuudoganokaikono. “Kevu ala'mwolluno a'mgono jadokwovo?” Toro kuudoganoka tovi aki aiko te aro kuudoporogano. “Nevu Nasaretda'ai Jisasolluno a'mgono sumwakuuwono.” Kuudoporogano. 8Toro kuudopo tovi Jisasol aro kuudokaikono. “Nuu kwonyugono, me'no aikudumorekikono. Toro te kevu mino a'mgono jumwakuuwono adupi tov kevu moro a'mwo akarai nokwo avlapureyokwe kevu wonyapino to'no julo.” Kuudokaikono. 9Jisasolluro yogalo kuudoka su tov gamoro sumdomguda'ai yogalo me'no kuudoka tovi suuwiyo kuvinono imwojo'moneyokweyokwono. Yogalo me'no kuudoka su tov arokwono. “A'mwo anyabodo tooraida'ai yiuno pwolnodo kwol kuruv moro ato tovida'ai mimagwo'nokaikono.”

10Toruda'ai Saimoon Pital kwallu'mopto puul bwololobwokuromo'no sumaiyokwe pris aguto toolluro womdokwe pwolluro anatomguda'ai kaduko tovi amodovodokuurapiyokaikono. Pris aguto toolluro womdokwe su toolluno yovo tov Malkosolekono. 11#Mt. 26:39; Mk. 14:36; Lk. 22:42Toro te Jisasol Pitallu aro kuudokaikono. “Guu kwallu'mopto su toul gami wo'dowodo aiko tomuu neya domullosono. Nuu dado ibwosunyo'moneyokwe tov mi Nyunumiyago toolluro anyamoka tovi kuvinono neya uumjunmonyugono.” Kuudokaikono.

A'mwo tooro Jisasollu pris aguto Anasollomno amogaibworokavlavopo tovinokwono

12Toruda'ai a'mwo mollurogudo tooravuro aguto tooke'aro gami a'mwo mollurogudo toorogai'aro aki Juu tooravuro jumanyogudo toorogai'aro tooro Jisasollu galomworaro'mno wuulo tokwe agalairopekono. 13Jisasollu me'no galai'no sumaveyokwe a'mwo Anasollomno amogaibworomokavlavopekono. A'mwo su tool Kaiyafasolluro ganyalumiyagekono. Kaiyafasol kworomo su tovi pris aguto sumo'nyajukekono. 14#Jn. 11:49,50Aki sumdomgu Kaiyafasol Juu a'mwo aguto toorai aro me'no adumul'mwojokaikono. “Oo nemoro yiuwi'nokai kantri tov kaiyako nomollounapipiyokwe a'mwo abolo tonyuro aiko toru mallo'moneyokwe tov a'mwo yiuno pwolnodo toolno abolo'ji tov ilaiyo imo'nonokwono.” Su toro me'no kuudoka tool kwekono.

Pital Jisasolluno tov, “Nuu gamoro uumjunyokwe pwonyumaiyo,” adoka tovinokwono

(Matyuu 26:69-70; Mak 14:66-68; Luuk 22:55-57)

15Jisasollu mogaibworomokavla'mdopure toga Saimoon Pitaike'aro nuu Jisasolluro uumjunyokwe pwonyuge'aro toonal kuumjunowolonakono. Pris aguto tool nuu uumjunodore toonyuno kuudo me'no souronumallajukekono. Toro tovino tov a'mwo tooro Jisasollu pris aguto toolluro agwapto tovi anakuuto tomuuno amogaibworomokaulapo toga nuu kwonyu kuruv uumjunono pris aguto toolluro agwapto toru'no aulanyugono. 16Pris aguto tool nuu Jisasolluro uumjunyokwe toonyuno kuudo me'no souronumallajukekono. Toro toonyu agwapto tovi kuulodore toga nokwo nuwonyapino sopogano. Toro kuvi kuruv Pitalno'gwowi noullo tovi kwa'mgu tomuu adaiyajukekono. Toro te nuu bolokwino sumoneyokwe ki'nato womdokwe sujuraiyo puvi kuudonyugono. Ki'nato womdokwe sujuraiyo su tov noullo toru duuwato amoduvomwallajukokwono. Sujuraiyo su tovi wuujuno sumoneyokwe Pitallu anakuuto tomuuno amollubworomokaulokakwono. 17Toro mollubworomokaulno sumaiyokwe noullo tovida'ai duuwato womdokwe sujuraiyo su tov Pitallu aro kuudokakwono. “Guu kweku kuruv Jisasolluro uumjunyokwe pwekudukono?” Toro kuudoka tovi Pital soukuu'nuudokaikono. “Awiyo, nuu a'mwo su toolluro uumjunyokwe pwonyumaiyo.” Soukuu'nuudokaikono. 18Su toro toga lukuuto bwotonyo imo'noduke tovino tov ki'nato womdokwe toorogai'aro a'mwo jumanyogudo toorogai'aro tooro duko tov me'no yomjuroudapino sumaveyokwe sumwonyallajuporogano. Toro imwonya'dopure toorogai Pital kwol kuruv bodavo'no duko tovi sumwonyallajukekono.

Pris aguto tool Jisasollu kooti yogalo tovida'ai yamuugojo kuudoganoka tovinokwono

(Matyuu 26:59-66; Mak 14:55-64; Luuk 22:66-71)

19Toruda'ai pris aguto tool Jisasollu gami uumjunyokwe tooraino yamuugojo kuudoganokaikono. Aki gamoro kuuguudo sodubwasajuko kuvino kuruv kuudoganokaikono. 20Toro kuudoganoka toollu Jisasol aro kuudokaikono. “Nuu yiuwi'nokai a'mwo abolo tonyu yiuno kuu'maiyo toru'no moruudomollodumdonyugono. Aki yiuwi'nokai toga Juu tooravuro i'bwo'nyago togai'aro Jeruusalemda'ai Gooti toollu ilomoropiyo'moneyokwe ago tokwe'aro Juu a'mwo abolo ton i'bwo'nodupudo toru yodubwasodumdonyugono. Aki yiulo tomuu miyodubwasodumdonyugono. 21Toro te gumoro yamuugojo anyudumwakudo tov buro'nyo'mo'mdukono? Guu a'mwo abolo moro kuuguudo yodubwasodumdo tovi me'no wuu'nodupudo tonyu nokwo wuudoganbinekugono. A'mwo abolo su ton moro kuuguudo sodubwasajo tonyuno kuudo me'no youroma'dupudogano. Toro tonyu guu nokwo duudoganono.” Kuudokaikono.

22Jisasol toro wuujuno sumaiyokwe toga a'mwo jumanyogudo pwol gami akwoka tokwe Jisasolluro suuwado tovi iwago romiyo'no aro amojurugolokaikono. “Guu pris aguto toolluro yamuugojo agudoganmoka su tovi gumoro su toro tomgu'aro aki aiko te kuudadokuudo tov ilaiyo'maiyo.” Kuudokaikono. 23Toro kuudoka toollu Jisasol kuudokaikono. “Nuu kaiya'no yogalo ado'mujuko'mno'juki guu moro kaiya'no yogalo su tovino kuu'maiyo toru nokwo dodoluwosubinekugono. Toro kuvi kuruv moro yogalo kuudumo su tov ilaiyo'mno'juki guu mi buro'nyo'mo iwago donyuromiyadokuuno?” Kuudokaikono.

24Toruda'ai Anasol Jisasollu pris aguto Kaiyafasollomno amorapiyokaikono. Toro morapino sumaiyokwe Jisasolluro wuulo amerosopo tov yere mikwolapiyodopure toga Anasolluro a'mwo pworo Jisasollu Kaiyafasollomno amogaibworomokavlavopekono.

Pital Jisasolluno tov, “Nuu gamoro uumjunyokwe pwonyumaiyo,” aiko te adoka tovinokwono

(Matyuu 26:71-75; Mak 14:69-72; Luuk 22:58-62)

25Toruda'ai Saimoon Pital duko tovi wobo toru davo'no sumwonyallajukekono. Toro imwonya'duke toga a'mwo abolo kweke wobo toru adaiyajupo pun wonyuno sumaveyokwe aro kuudoganopogano. “Guu kweku kuruv Jisasollu kuumjunyajupo tooravuro pwekudukono?” Kuudoganopogano. Toro kuudoganopo kuvi kuruv Pital aki aiko te soukuu'nuudokaikono. “Awiyo, nuu a'mwo su toolluro uumjunyokwe pwonyumaiyo.” Soukuu'nuudokaikono. 26Aki pris aguto toolluro a'mwo womdokwe pwol Pitallu aro kuudoganokaikono. “Oo Jisasol ikulsul womdo tomuu mwaloduke toga guu tookuji me'no agwonmo tov kwekudukono?” Kuudoganokaikono. Toro kuudoganoka su tool sumdomgu Pital a'mwo kaduko amodovodokuurapiyoka toolluro iko tovasuda'ai avalo pwekono. 27Toro tool kuudoganoka tovi Pital aki aiko te, “Awiyo, nuu a'mwo su toollu muumjunyokwenyugono,” soukuu'nuudokaikono. Toro soukuu'nuudoka kuga'gwo kuuno kuukuuro kwolo pwol deko adokaikono.

Jisasollu kooti yogalo duuwiyo'moneyokwe Pailatollomno amogaibworomokavlavopo tovinokwono

(Matyuu 27:1-2, 27:11-14; Mak 15:1-5; Luuk 23:1-5)

28Toruda'ai lomwo iru'mago toga Jisasollu Kaiyafasolluro ago towaida'ai Roomda'ai a'mwo aguto gavona toolluro ago towai'no amogaibworomokavlavopekono. A'mwo amogaibworomokavlavopo kevnokwe su tooro Roomda'ai a'mwo aguto toolluro ago toru'no maulaporogano. Su tov aro tovinokwono. A'mwo su tooro lubullu doto puvi yanyo'morogano. Lubullu doto su tov Muunyu Toru'aro Surukuruwolovoka tokwono. Toro tovi yanyo'mo tooro aro kuudo sauroporogano. Oo nevu Roomda'ai tooravuro ago tovi aulowa'ji tov Gooti toolluro sumdo tovi kaiyako wimo'nowa'ji lubullu doto tovi ku'nono miyananonogano. Su toro kuudo yauro'mno Roomda'ai gavman toolluro ago tovi maulaporogano. 29Toro tovino tov Roomda'ai a'mwo aguto tool kwa'mgu toru'no alokabokaikono. A'mwo su toolluno yovo tov Pailatolekono. Toro tool lokabino sumaiyokwe aro kuudokaikono. “A'mwo amokamapo akallu kooti yogalo duuwiyo'moneyokwe tov burowo'nyo ma'no ma'no soka tovino duuwipinoldeyo?” 30Toro kuudoka tovi aro kuudoporogano. “A'mwo akal kirovanyuvanyu mamjeroungovla'mdowodolluno'juki nevu a'mwo su toollu gumoro ato tovi mabomagubweyowa'jujukonogano.” Kuudoporogano.

31Toro kuudopo toorai Pailatol aro kuudokaikono. “Kevu a'mwo su toollu mokavlavopi kevnokwerekulluro loowo tovi'aro kooti yogalo doduuwiyulo.” Kuudokaikono. Toro kuudoka tovi Juu tooro Pailatollu kuudoporogano. “Awiyo, nemoro loowo tovi'aro uumjunowa'ji a'mwo pwollu aromiyosa'ji tov Room toorekulluro loowo tovi kisuvolo nuuwiya'jo.” Kuudoporogano. 32#Jn. 3:14, 12:32Juu tooravuro yogalo kuudopo su tov aro tovinokwono. Sumdomgu Jisasol gamoro nyabollo'moneyokwe tovino me'no kuujajukekono. Toro kuujajuko su tovi suuwiyo kuvinono imwojo'moneyokwe tov Juu tooro Pailatollu yogalo su tov kuudoporogano.

33Toro wuujuno sumaveyokwe a'mwo aguto Pailatol gami womdo kuullodowodo ago su tovino aikomgu kuulno sumaiyokwe Jisasollu domaro'no aro kuudoganokaikono. “Juu tooravuro a'mwo aguto kig tool guu kwekudukono?” Kuudoganokaikono. 34Toro kuudoganoka tovi Jisasol aro samuugojokaikono. “Yogalo su tov guvnokwekujuro kuudo tovida'ai dukonyudadokuuno oo a'mwo pworo mino su toro agudumaporodukono?” 35Toro samuugojoka tovi Pailatol kuudokaikono. “Nuu Juu a'mwonyumaiyo. Guvnokwekujuro Juu a'mwo abolo togai'aro pris aguto toorogai'aro ton gumi galogumwora'dupu moro ato tovi abomanubwemapogano.” Kuudokaikono. Toro wuujuno sumaiyokwe aro kuudoganokaikono. “Guu burowo'nyo pasudo tooro yodumdekudeyo?” Kuudoganokaikono.

36Toro kuudoganoka tovi Jisasol aro kuudokaikono. “Nuu aguto kig toonyuro mido mollomwalo tov kwako akavida'aiyo'maiyo. Nuu aguto kig toonyuro mido mollomwalo su tov kwako akavida'ai sumo'nowo'jujuko'mno'juki mi Juu tooravuro ato tovi nomanubwepiyokwe moro womdokwe pworo molo nokwo kwiyopujukorogano. Toro kuvi kuruv nuu aguto kig toonyuro mido mollomwalo to'gwowi kwako akavida'aiyo'maiyo.” Kuudokaikono. 37Jisasol toro wuujuno sumaiyokwe toga Pailatol aro kuudokaikono. “Guu a'mwo aguto kig pwekudukono?” Toro kuudoka tovi Jisasol aro kuudokaikono. “Mino tov, a'mwo aguto kig pwekono, anyudadokuudo su tov guvnokwe tooku kuvi anyudadokuuno. Nuvno'gwowi kwako akavi sonumaropo tov womdo yiuno puru'mono yo'moneyokwe tovino kwolabonyugono. Womdo su tov arokwono. Nuu nebaikuuguudo tokwe kuu'maiyo toru'no moruudomollo'moneyokwe kwako akavi kwolabonyugono. Toro te yiuwi'nokai a'mwo abolo nebaikuuguudo tokwe molluulnoda'mdupudo ton mi kaduko nyabodupudogano.” Kuudokaikono. 38Jisasol toro kuudoka tovi Pailatol aro samuugojokaikono. “Nebaikuuguudo adadokuudo su tov burowo'nyo yogalo tovino'mdeyo?” Samuugojokaikono.

Pailatol Jisasollu i'noguropte tovi movoromiyoguroptowosupino'moneyokwe amorubweyoka tovinokwono

(Matyuu 27:15-31; Mak 15:6-20; Luuk 23:13-25)

A'mwo aguto Pailatol toro yamuugojuno sumaiyokwe gami womdo kuullodowodo ago tovida'ai Juu tooraino aiko tomuuno kwa'mgu abolokwokaikono. Toro bolokwino sumaiyokwe aro kuudokaikono. “Nuu a'mwo akallu ma'no ma'no puru'monodo kuruv nonaguto toollu kwonoma'mekono. 39Toro kuvi kuruv kemoro pasudo puruv arokwono. Kevu Muunyu Toru'aro Surukuruwolovoka lubullu doto yanyo'mo toga a'mwo wuulo killo'mo ago tovi kuule'na'dowo'jure pwolluno, “Guu nokwo illurolovonekwopiyabinekudeyo,” nyudoganodopure toga nuu su toro toollu illurolovekwopiyabodumdonyugono. Toro te kemoro pasudo su tovi nokwo uumjuno'mi kevu Juu toorekul nemi A'mwo Aguto Kigolo, dodupudo Jisasollu mollurolowapiyo'mo dukekullunadopiyo?” Kuudokaikono. 40Toro kuudoka toga Juu tooro aiko te guureji aro adelowo'naroporogano. “Awiyo, guu a'mwo su toollu millurolowopiyabinono. Toro kweku kuruv Barabasolluno'gwowi julomollurolovonekwopiyabono.” Adelowo'naroporogano. A'mwo Barabasol kuuko povipoloma'dowodekono.

Currently Selected:

Joon 18: SMB

Highlight

Copy