Joon 17

Jisasol gami Ganumiyago toollu subusu'nyogalo kuudoka tovinokwono

1Jisasol gami uumjunyokwe toorai kuuguudo me'no wuujuno sumaiyokwe toga Gooti toolluro ago muunyu kai'muuno iloonyopiya'no aro kuudokaikono. “Nyunumiyagoloo, gumoro ajesodo toga me'no abai'mopso. Toro te nuu gumoro Kwolaiyo toonyu gumino yovo tovi ilomogwopiyodo'mure tovino tov guu gumoro Kwolaiyo toonyuno yovo tovi nokwo julomonuwopiyawono. 2Su tov aro tovinokwono. Guu gumoro Kwolaiyo toonyu me'no ajanubweyodekugono. Toro toonyu gumoro yiuwi'nokai a'mwo abolo tonyu mido mollomwalmwalmo'moneyokwe ajanubweyodekugono. Aki toro ajanubweyodo toonyu yiuwi'nokai a'mwo abolo nyabodumdo tonyu aiyo yiunokuudo mujomwekovlaiyo'mo tov wiyodumdonyugono. 3Aiyo yiunokuudo mujomwekovlaiyo'moneyokwe su tov aro tovinokwono. A'mwo abolo ton guu Gooti nebal'no pwolnodo tookuge'aro gumoro amonuwopiyabodo Jisas Kraisonyuge'aro toonalluno kuudo souronakumapi tov aiyo yiunokuudo mujomwekovla'mwalpinogano. Su toro tovinokwono.

4Nuu kwako akavi mwalodumdo toga gumoro womdo anyabodo tovi me'no sopiyonyugono. Toro yopiyodore tovi'aro guu yovo aguto ma'dumdekugono. 5Mi Nyunumiyagoloo, kwako akav yere mimo'noduke toga nuu gumi wobo toru mwalodum yovo agutokwe sumo'nyajonyugono. Toro te aga aki aiko te yovo agutokwe imo'numwalmo'moneyokwe mi gumiyomno donumokailawono.

6Guu a'mwo abolo kwako akavi mwalodupudo tonyuro anakuuto tomuuda'ai a'mwo abolo pubuurai bomokalokwono moro ato tovi anyabodogano. Toro tobuuro gumoro kuunodo gujumo'nodupudobuurogano. Aki toro tobuurai nuu gumoro yovo tovino kuu'maiyo toru me'no wuuduuwallodumdonyugono. Aki a'mwo abolo anyabodo su tobuuro gumoro yogalo tovi kuvinono uumjunodupudobuurogano. 7Aki gumoro yiuwi'nokai noonyumwonyu nyabodumdo ton yiuno gumida'aiyogano. Su toro tovino aga toga a'mwo abolo tobuuro kuudo me'no souroma'mwakopogano. 8Su tov aro tovinokwono. Nuvu gumoro yogalo anyabodo ton me'no kwiyonyugono. Yogalo kwiyo su tonyu me'no ma'dupu mino aro kuudo souronuma'mwakopogano. Oo su tool Gooti toolluda'ai nebal'no kwolabokaldeyo. Kuudo souronuma'mwakopogano. Aki toro ton mino tov aro kuudo kuubwemwakopogano. Oo Gooti toolluro amonekwopiyabokaldeyo. Kuudo kuubwemwakopogano.

9Nuu a'mwo abolo su tobuuraiyo'mo subusu'nyogalo agudumwakono. Nuu yiuwi'nokai a'mwo abolo kwako akavi mwalodupudo tonyuno magudadokwono. Toro kuvi kuruv guvnokwe tookujuro anyabodo su tobuuraino'gwowi neya wiyo'mwojubino'moneyokwe subusu'nyogalo agudadokwono. A'mwo abolo su tobuuraino subusu'nyogalo agudumwako tov aro tovinokwono. A'mwo abolo su tobuuro guvnokwekujuro kuunodo me'no gujumo'nodupudobuurogano. 10Moro yiuwi'nokai a'mwo abolo ton guvnokwekujuro kuunodo gujumo'nodupudogano. Aki gumoro a'mwo abolo kun kuruv nuvnokwenyuro kuunodo nyumo'nodupudogano. Toro te nuu a'mwo abolo su tobuurai'aro yovo aguto ma'dumdonyugono.

11Nuu aga toga gumiyomno ilabiyo'mo sumwakono. Toro te nuu kwako akavi yiunokuudo mamwalmonyugono. Toro kuvi kuruv gumoro a'mwo abolo nyabodumdo su tobuurono'gwowi kwako akavi kuuno mwalmwalpinobuurogano. Mi Nyunumiyagoloo, guu judo tooku yiuno sugudo to'nodekugono. Toro te guvnokwekujuro yovo jurogudokwe su tovi'aro a'mwo abolo akabuurai po'dogalo domollovi'mwojomwalogawono. Gumoro yovo jurogudo su tov mi me'no anyabodekugono. Aki navu puru'mono imo'nodowolo to'busuko kubalno a'mwo abolo judo'no judo'nodo su to kubuuro kuruv puru'mono imo'numwalpino'moneyokwe guu pi'mwono domollomwalogawono.

12 # Da'bk. 41:9; Jn. 13:18 Nuu a'mwo abolo su tobuurogai mwalodumdo toga gumoro yovo anyabodo tovuro jurogudo tokwe po'dogalo mollovi'mwojomwalodumdogano. Toro mollovi'mwojomwalodore toga a'mwo abolo su tobuuravuro puru'monodo kuruv moro ato tovida'ai mimagwo'nodupudogano. Toro kuvi kuruv Gooti tookujuro yogalo tovi suuwiyo kuvinono imwojo'moneyokwe a'mwo yiuno pwolnodo toolno sumagwo'nokaikono. A'mwo su toollu kaiyako mollounapiyo'moneyokwekono. 13Nuu kwako akavi kuuno mwalodum yogalo agudumwako akavi a'mwo abolo su tobuuro me'no wuu'nodupudogano. Su tov aro tovinokwono. Moro ilaiyo tov kemoro poowokalago tonyu noullo'mowopimwalonokwono. Toro toonyu aga toga gumiyomno ilabiyo'mo sumwakono.

14Nuu a'mwo abolo su tobuurai gumoro yogalo tov me'no kwiyonyugono. Toro te nuu kwako akavida'ai mimo'nodumdo to'busuko kubalno a'mwo abolo su to kubuuro kuruv kwako akavida'ai mimo'nodupudobuurogano. Toro tovino tov kwako akavida'ai a'mwo toorono'gwowi surodo wuunodupudorogano. 15Toro te nuu aro magudadokwono. “Oo guu moro a'mwo abolo su tobuurai kwako akavida'ai bomollurolovomokalokwo'bi pumuuno domokavlavono,” magudadokwono. Toro kuvi kuruv aro agudumwakono. “Kirovanyuvanyu tool kaiyako nyugolmwalo'jokwe tovino guu moro a'mwo abolo su tobuurai po'dogalo domollovi'mwojomwalogawono,” agudadokwono.

16Nuu kwako akavida'ai mimo'nodumdo to'busuko kubalno a'mwo abolo su to kubuuro kuruv kwako akavida'ai mimo'nodupudogano. 17Gumoro yogalo tov nebal'nodokwono. Toro te yogalo nebal'nodo su tovi'aro guvnokwekujuro a'mwo abolo kuunodo gujumo'numwalpino'moneyokwe a'mwo abolo su tobuurai domoju'bworumwallogawono. 18Guu a'mwo abolo kwako akavi mwalodupudo tonyomno mi amonuwopiyabodo to'busuko kubalno nuu kwonyu kuruv moro a'mwo abolo su tobuurai buro'nyo buro'nyo a'mwo abolo kwako akavi mwalodupudo tonyomno me'no amorapiyogano. 19Aki moro yiuwi'nokai yomjomwekovla'mdumdo tov gumoro ato tovi agubwemono. Su toro agubwemo tov a'mwo abolo tobuurai wiyo'mwojo'mokwono. Aki toro tobuuro gumoro nebal'no yogalo tovi'aro guvnokwekujuro kuunodo gujumo'numwalpino'mokwono.”

20“Nuvu moro subusu'nyogalo agudumwako akav yiuno a'mwo akaraiyo'mo to'no magudadokwono. Toro kuvi kuruv lukomgu moro a'mwo akaravuro yogalo moruudodopure tovida'ai a'mwo abolo pun wuu'nopi kuudo nuubwepinogano. Su toro kuudo kuubwepi kunyu kuruv guu neya wiyo'mwojumwalbino'moneyokwe subusu'nyogalo agudumwakono. 21Aki su toro agudumwako tov aro tovino'mokwono. Guu Nyunumiyago tooku mi me'no nuguro'mwonyodumdekugono. Aki nuu kwonyu kuruv gumi me'no guguro'mwonyodumdonyugono. Toro te navu puru'mono imo'nodowolo to'busuko kubalno yiuwi'nokai a'mwo abolo judo'no judo'no kuudo kuubwepi su to kubuuro kuruv yiuno puru'mono neya imo'numwalpino'moneyokwe tovino agudumwakono. Aki a'mwo abolo su ton nami nokwo nakuguro'mwonyumwalpinogano. Su tov aro tovinokwono. Yiuwi'nokai a'mwo abolo kwako akavi mwalodupudo ton aro kuudo neya uubwepino'moneyokweyokwono. Oo guu Gooti tooku mi amonuwopiyabodekugono. Su toro tovino kuudo neya uubwepino'moneyokweyokwono.

22Toro te guu guvnokwekujuro jurogudo bwotonyo tov mi me'no anyabodokwono. Su toro to'busuko kubalno nuvu a'mwo abolo kuudo kuubwepi kubuurai kuruv guvnokwe tookujuro jurogudo bwotonyo su tov me'no uubweyodumdonyugono. Su tov aro tovino'mokwono. Navu puru'mono imo'nodowolo to'busuko kubalno a'mwo abolo su to kubuuro kuruv puru'mono neya imo'numwalpino'moneyokwe tovinokwono. 23Nuu a'mwo abolo su tonyu uuguro'mwonyugovlavo'mi aki guu kweku kuruv numi nuguro'mwonyugovla'binekugono. Su tov aro tovino'mokwono. Yiuwi'nokai a'mwo abolo kuudo kuubwepi su ton yiuno puru'monodo to'no pi'mwono neya imo'nugovla'mwalpinogano. Toro imo'nugovla'mdopure tonyu yiuwi'nokai kwako akavida'ai a'mwo abolo ton wonopi mino aro kuudo youronumapinogano. Oo akal Gooti toolluro amonekwopiyabokaldeyo. Su toro tovino kuudo youronumapinogano. Aki guvu mino kalo buuropino gujunodowodo to'busuko kubalno guu a'mwo abolo su to kunyuno kuruv kalo buuropino aval'no gujunodowodekugono. Su to kuvino kuruv kuudo nokwo youromapinogano.

24Mi Nyunumiyagoloo, guvnokwekujuro a'mwo abolo anyabodo ton moro amwalmi tomuu nuuge neya kuulomwalpino'moneyokwe nyunodowodonyugono. Moro su toro nyunodowodo tov aro tovinokwono. Guu kwako akavi yere miyokwollosodore kugada'ai mino kalo buuropino me'no agujunyajukekugono. Toro tovino tov guvnokwekujuro bako bwotonyo tov mi me'no nyabodumdekugono. Toro te gumoro a'mwo abolo anyabodo su tobuuro guvnokwekujuro bako bwotonyo nyabodumdo tovi neya wonpuro. Su toro wonpino'moneyokwe nyunodowodonyugono.

25Oo mi Nyunumiyago idopto'nodoloo, kwako akavida'ai a'mwo abolo ton gumino kuudo miyouroguma'dupudogano. Toro kuvi kuruv nuvno'gwowi gumino kuudo me'no yaguu'dumdonyugono. Aki moro a'mwo abolo aka kubuuro kuruv mino tov aro kuudo youronuma'dupudogano. Oo su tool Gooti toolluro amonekwopiyabokaldeyo. Kuudo youronuma'dupudogano. 26Nuu a'mwo abolo su tobuurai gumino yovo tovino kuu'maiyo toru me'no amoruujajonyugono. Aki nuu gumino yovo su tovino kuuno nomoruudumwalmonyugono. Su tov aro tovinokwono. Guu mino kalo buuropino gujunodowodo to'busuko kubalno kalo buuropino pasudo su tov moro a'mwo abolo akabuurai nokwo kuuluuwo'mwalonokwono. Aki nuvnokwe toonyu moro a'mwo abolo su tobuurai noulomwalmwalmonyugono.” Jisasol subusu'nyogalo toro kuudokaikono.

Currently Selected:

Joon 17: SMB

Highlight

Copy