Joon 16

1“Moro yiuwi'nokai kuuguudo me'no aikudumwako su ton kevu mino kuudo nubweyodupudo tovida'ai nobwolorapiyokwe tovino'mokwono. 2Aki kwako akavida'ai a'mwo tooro Juu tooravuro i'bwo'nyago tonyuda'ai kemi kwa'mgu tomuu nobilomovomjaikwopipinorogano. Aki lukomgu kemi noromiyaikubweyo'moneyokwe tov nobai'mowonokwono. Su toro toga a'mwo pwol kemi aromiyaikubweyo'ji tool kuudo yauronekono. Oo moro womdo sadokwo tovino Gooti tool ilaiyo duuwinadopiyo. Kuudo yauronekono.

3Aki a'mwo su toro yodupudo tooro moro Nyunumiyago tooke'aro nuvnokwe toonyuge'aro toonalluno kuudo miyau'dupudo tovino tov kaiya'no pasudo su ton kemi nyaikullugolpinorogano. 4Toro te moro kuuguudo me'no aikudumwako su ton aro tovino'mogano. Lukomgu kemi kaiyako kuvinono yaikullugollo'moneyokwe tov me'no abai'mowo'ji toga kevu moro kuuguudo aikudumwako su tonyuno aki aiko te kuudo yauropi aro dupinorekikono. Oo Jisasol su toro tovino me'no anekudokaldeyo, dupinorekikono.”

Jisasol Gooti toolluro Kuullo toolluno sodubwasoka tovinokwono

Jisasol toro wuujuno sumaiyokwe aki aro kuudokaikono. “Muudu'nodo toga nuu kevuge kuuno mwalodumdo tovino tov yogalo su ton yere maikujajonyugono. 5Toro kuvi kuruv aga'no'gwowi nuu mi amonuwopiyaboka toollomno aki aiko te pla'monyugono. Moro su toro pla'mo tovino kemida'ai pwolnodo kworekul kuruv aro manyudoganodupudorekikono. “Guu gadomuuno pla'binekudukono?” Manyudoganodupudorekikono. 6Toro kuvi kuruv aga toga me'no aikudumo tovino tov kemoro poowokalago tonyu kalo bwotonyo tov aullo'movaikwopiyadopiyo. 7Toro kuvi kuruv nuu nebal'no ikudumo'mokwono. Moro avla'mi su tov kemi ilaiyo yaikullugollo'mokwono. Su tov aro tovinokwono. Nuu mavla'mi tov kemi ikullo'mwojo'moneyokwe tool ku'nono mabwonekono. Toro kwonyu kuruv nuu avla'mi to'gwowi kemi ikullo'mwojo'moneyokwe su toollu nomekwopiyamonyugono.

8Moro Kuullo su tool abwo'ji toga yiuwi'nokai a'mwo abolo kwako akavi mwalodupudo tonyuro ma'no ma'nodo tooraino kuu'maiyo toru wuuduuwallonekono. Aki Gooti toolluro sugupasudo tovino kuu'maiyo toru wuuduuwallonekono. Aki Gooti toolluro kooti yogalo duuwiyono tovino kuu'maiyo toru wuuduuwallonekono. 9Aki su tool a'mwo abolo tonyu kemi ma'no ma'no pasudo tooraino kuu'maiyo toru wuuduuwallumwalonekono. Kemoro ma'no ma'no pasudo su tooro aro tovida'aiyorogano. A'mwo abolo ton mino kuudo manubweyodupudo tovida'aiyorogano.

10Aki nuu mi Nyunumiyago toollomno sulami togada'ai kevu mi aki aiko te manuwonmwalpinonyugono. Toro tovino tov Kuullo su tool sugupasudo tovino kuu'maiyo toru wuuduuwallumwalonekono. 11Aki Kuullo su tool Gooti toolluro kooti yogalo duuwiyono tovino kuu'maiyo toru wuuduuwallumwalonekono. Su tov aro tovinokwono. Kwako akavi mido mollomwalokwe Satanyol Gooti toolluro kooti yogalo tovi me'no abwolorokaikono. Toro tool Gooti toolluro kirumwallo tovi nomaronekono.

12Nuvu kemi ikujo'moneyokwe kuuguudo bwotonyago ton kurukweyo kwonyu kuruv aga toga kevu ku'nono miyouromapinorekikono. 13Toro kuvi kuruv Gooti toolluro yiuno nebal'no yogalo to'no jokweyo Kuullo su tool abwo'ji toga'no'gwowi moro yiuwi'nokai kuuguudo aikudadokwo su tonyuno kavlo ton kuu'maiyo toru nobomollolupto'naikubweyonekono. Aki Kuullo su tool lukomgu imo'nono tonyuno nekudonekono. Kuullo su tool gavnokweyolluro kuudo tovida'ai maikudonekono. Toro kwol kuruv yiuno moro Nyunumiyago toolluda'ai marowo'ji ikudumwalonekono. 14Aki Gooti toolluro Kuullo su tool moro wiyodo'mure tonyu marowo'ji kemi ikullamwalonekono. Toro aikullabwo'ji tovi'aro mino yovo tov muunyu toru'aro ilomonuwopiyawonekono. 15Moro Nyunumiyago toolluro yiuwi'nokai ton numiyogano. Toro tovino tov nuvu aro aikudadokwono. “Gooti toolluro Kuullo su tool moro ton marowo'ji kemi kuu'maiyo toru'no ikuduuwallumwalonekono.” Aikudadokwono.”

Jul'nyo subwosunpi kuvi kuruv lukomgu kemi poowokalago ton ilaiyo ibwosunpino tovinokwono

16Aki Jisasol aro kuudokaikono. “Kevu kula'nyo toga'gwo mwalopi mi manuwonpinonyugono. Aki kevu kula'nyo pwekwogai'aro mwalopi mi aiko te nonuwonpinonyugono.” Kuudokaikono. 17Jisasol toro kuudoka toga gamoro uumjunyokwe pworo sajunoporogano. “Gamoro yogalo aro anekudumoka su tov buro'nyo kavlo tovino'mdukono? “Kevu kula'nyo toga'gwo mwalopi mi manuwonpinonyugono. Aki kevu kula'nyo pwekwogai'aro mwalopi mi aiko te nonuwonpinonyugono.” Aki gamoro yogalo puruv aro anekudumokaikono. “Nuu mi Nyunumiyago toollomno sulami tovino tov kevu aiko te manuwonmwalpinorekikono.” Yogalo su toro anekudumoka ton buro'nyo kavlo tovino'mdukono?” 18Toro yajunyuno sumaveyokwe aki aro tovino sajunoporogano. “Kula'nyo toga'gwono, anekudumoka su tovino kavlo tov buro'nyo'mo'mdukono? Gamoro yogalo anekudumoka su tovino nevu kuudo miyau'mwakuuwono.” Sajunoporogano.

19Su toro yajunyuno sumaveyokwe Jisasollu wuudoganyo'mo winodopure tovino Jisasol kuudo me'no souromarokaikono. Toro te Jisasol aro kuudokaikono. “Kevu moro yogalo aikudumo tovuro kavlo tovino jukiyajunmwakovo? Nuu aro aikudumonyugono. “Kevu kula'nyo toga'gwo mwalopi mi manuwonpinonyugono. Toro kuvi kuruv kevu kula'nyo pwekwogai'aro mwalopi mi aiko te nonuwonpinonyugono.” Su toro aikudumo tovuro kavlo tovino jukiyajunmwakovo? 20Nuu nebal'no kuunodo aro ikudumo'mokwono. Kevu mi nonyumo'nodowo'jure tovino kumdato dopi aki kumdaillo mujodumovlapinorekikono. Toro kuvi kuruv kwako akavida'ai a'mwo abolo tono'gwowi mi kaiyako sanyugolpi tovino ilaiyo bwotonyo ipinogano. Su toro yanyugolodopure toga kev toorekulluro poowokalago ton jul'nyo ibwosunpinorekikono. Toro kuvi kuruv kemoro jul'nyo subwosunpi su tovi lukomgu toga'no'gwowi kemi poowokalago togai ilaiyo bwotonyo nyubwosunpinorekikono.

21Su tov yovekurajo aka'busukokwono. Abolo puruv kwolaiyo yomallo'mo guno so'ji toga dado wuunodowo'jure tovida'ai jul'nyo ibwosunonokwono. Toro kuvi kuruv kwolaiyo muudoga tool me'no somaro'ji toga jul'nyo subwosuno'ji su tovino kuudo yere yallulo'gwononokwono. Toro te abolo su tov kwolaiyo muudoga tekwoji kwako akavi mujomwekovlaiyo'moneyokwe amulomworaro'ji tovino ilaiyo bwotonyo yonokwono. 22Yovekurajo su to'busuko kubalno kevu aga toga kalo aikullunadopiko kuvi kuruv lukomguno'gwowi nuu kemi aiko te nekwonmonyugono. Su toro toga kemoro poowokalago ton ilaiyo bwotonyo ipinorekikono. Aki kemoro ilaiyo ipino su tovi a'mwo pwolnodo kwol kuruv ku'nono mamaikudukwopiyonokwono.

23Aki su toro toga kevu noonyumwonyu punyuno mallo'moneyokwe mi aiko te manyudoganmwalpinorekikono. Toro te nuvu nebal'no kuunodo ikudumo'mokwono. Kevu moro Nyunumiyago toollu mino yovo tovida'ai buro'nyo buro'nyodeyo tonyuno kuudoganpi tov kuvinono nomollumo'naikubweyonekono. 24Sumdomgu kevu mino yovo tovida'ai moro Nyunumiyago toollu muudoganyajuporekikono. Toro kuvi kuruv aga'no'gwowi kevu mino yovo tovida'ai moro Nyunumiyago toollu kuudoganpi tov kuvinono nekullabwonekono. Su toro aikullabwo'ji tov ilaiyo bwotonyo yo'movaikwopiyo'moneyokweyokwono.

Jisasol yiuwi'nokai kwako akavida'ai jurogudo tonyu me'no kuuwolovoka tovinokwono

25Yogalo su ton yovekurajo tovi'aro aikudumonyugono. Toro kuvi kuruv wobo toga nuu yovekurajo tovi'aro miyodekubwasumwalmonyugono. Su toro toga nuvu moro Nyunumiyago toolluno yiuno kuu'maiyo toru yodekubwasumonyugono. 26Aki su toro toga kevu mino yovo tovi'aro moro Nyunumiyago toollu wuudoganmwalpinorekikono. Moro su toro aikudumo tovino kevu aro kuudo nyaupiyo. Oo Jisasol nemoro mago tovida'ai mollodavowo'ji Ganumiyago toollu nemiyo'mo wuudoganmwalonoldeyo. Su toro kuudo nyaupiyo. Toro kuvi kuruv kevnokwe toorekul mino yovo tovi'aro moro Nyunumiyago toollu nokwo wuudoganmwalpinorekikono.

27Su tov aro tovinokwono. Kevu mino kalo buuropino ikullunodowodo toorekul mino tov, Oo gami Ganumiyago Gooti toolluda'ai kwolabokaldeyo, kuudo nubweyodupudorekikono. Toro toorekulluno tov mi Nyunumiyago gavnokwe tool kemino kalo buuropino winodowodekono. 28Nuu mi Nyunumiyago su toolluda'ai kuvinono wolabino sumoneyokwe kwako akavi mwalodumdonyugono. Aki toro toonyu kwako akavi wobo toga wuugollu'movo'mi mi Nyunumiyago su toollomno aikomgu nyulamonyugono.” Kuudokaikono.

29Jisasol toro kuudoka toga gamoro uumjunyokwe tooro kuudoporogano. “Mekono, aga'no'gwowi guu yovekurajo tovi'aro anekudumwakudekumaiyo. Toro kweku kuruv yiuno kuu'maiyo toru'no anekudumwakudekugono. 30Toro te aga'no'gwowi gumino aro tovino kuudo me'no youraguma'dowadonogano. “Oo su tool yiuwi'nokai tonyuno kuudo me'no youromallokwekono. Aki a'mwo pwolluro yamuugojo tovino supto miyokwekono. Yere muudoganodowo'jure kuga kuruv kuudo me'no youromallokwekono.” Gumino su toro tovino kuudo me'no youraguma'dowadonogano. Toro tovino tov nevu gumino tov, Gooti toolluda'ai kwolabokaldeyo, kuudo agubwemwakuuwono.” Kuudoporogano.

31Toro kuudopo tovi Jisasol kuudoganokaikono. “Aga'no'gwowi kevu mino kuudo dukonubwemwakovo? 32Neya duu'nyulo. Lukomgu kevu gomno gomno nyounopipinorekikono. Kevu mi nonyugollu'movopi lukado sounopipi toga nuu judo toonyu mwalmonyugono. Toro kuvi kuruv mi Nyunumiyago tool nuuge mwalodowolo tovino tov judo toonyu ku'nono mamwalmonyugono. Su tov wobo toga nyumo'nonokwono. Aki mekono, aga me'no abai'mopso. 33Toro te moro yogalo aikudumo su tov aro tovino'mokwono. Kevu mi nuguro'mwonyodupudo toorekul sumwoluko kavo to'no nokwo wosunmwalpinorekikono. Toro kworekul kuruv kwako akavi kuuno amwalpi toga jul'nyo tagunyo bwotonyago ton noma'mwalpinorekikono. Toro amapi kuvi kuruv nuvno'gwowi yiuwi'nokai kwako akavida'ai jurogudo tonyu me'no kuuwolovonyugono. Toro tovino tov kemi poowokalago ton jurogudo nokwo jumo'nogaulo.” Kuudokaikono.

Currently Selected:

Joon 16: SMB

Highlight

Copy