Joon 15

Jisasol iko wain kuunodo toolbusuko imo'nodowodo tovinokwono

1Aki Jisasol gami uumjunyokwe toorai aro kuudokaikono. “Nuu iko wain kuunodo toonyugono. Aki moro Nyunumiyago tool wain womdo tovi mollomwalokwe tookono. 2Toro tool moro ipilo pun ikulsulo mai'nodopudo tonyu modovodukwopiyodowodekono. Aki ipilo pun ikulsulo ki'nodupudo su tonyuno'gwowi guureji pugai'aro ki'nugovlapino'moneyokwe ku'mowopiyodowodekono. 3#Jn. 13:4-10; Ef. 5:26Kevu ipilo toorekullubusuko Gooti tool me'no ku'movaikwopiyodowodekono. Aki moro yogalo togai yodekubwasodumdo tovino tov kevu wonyo me'no sal'mo'nyungopo toorekulbusuko imo'nodupudorekikono. 4Nuu kemi ikuguro'mwonyumwalmonyugono. Toro toonyuge kevu kworekul kuruv neya donuguro'mwonyumwalogaulo. Kuudo neya jaullulo. Ipilo pwol ikavlo toollu muumgu'mo'no'ji tov ikulsulo ku'nono mai'nonekono. Su toro to'busuko kubalno kevu numi manumgu'mo'nupi tov ikulsulo ku'nono mai'numwalpinorekikono.

5Nuu iko wain kuunodo toonyugono. Aki kevu iko wain toonyuro ipilo toorekikono. Toro te a'mwo pwol numi nuguro'mwonyugovlavowo'ji aki nuu kuuguro'mwonyugovla'mi tov a'mwo su tool ikulsulo bwotonyago ki'nugovla'mwalonekono. Su tov aro tovinokwono. Kevu numi manuguro'mwonyugovlapi to'gwowi ikulsulo ki'nyo'moneyokwe womdo puru'monodo kuruv ku'nono mipinorekikono. 6A'mwo pwol numi manuguro'mwonyugovlawo'ji tool ipilo modovodukwopiyodupudo to'busuko imo'nonekono. Ipilo buukuropiyodupudo su tooro yiuno duko tovi iroudapiyo'moneyokwerogano.

7Kevu mi nuguro'mwonyugovlavopi aki moro yogalo ton kemi aulaikworo'ji tov kevu moro Nyunumiyago toollu buro'nyo buro'nyo tonyuno kuudoganpi tov kuvino nekullumo'nonokwono. 8Kevu ikulsulo bwotonyago ai'nugovlapi tovi'aro moro Nyunumiyago tool yovo aguto maronekono. Aki ikulsulo bwotonyago ai'nugovlapi su toorekul aro tovino kuu'maiyo wuuduuwallumwalpinorekikono. Kevu moro nuumjunyokwe kuunodorekikono. Toro tovino wuuduuwallumwalpinorekikono. 9Moro Nyunumiyago su tool numino kalo buuropino winodowodo to'busuko kubalno nuu kwonyu kuruv kemino kalo buuropino aval'no nyunodowodonyugono. Toro te kevu mi nuguro'mwonyopi moro kalo buuropino nyunodowodo su tovi anakuuto tomuu neya doulomwalogaulo.

10Kuudo neya jaullulo. Nuu mi Nyunumiyago toolluro loowo tonyu uumjunodumdo toonyu kwollu me'no uuguro'mwonyodumdonyugono. Toro toonyu gamoro kalo buuropino tovi anakuuto tomuu mujomwekovla'mdumdonyugono. Toro to'busuko kubalno kevu moro loowo daikullodumdo tonyu kuumjunpi toga mi kuvinono nonuguro'mwonyumwalpinorekikono. Toro toorekul moro kalo buuropino tovi anakuuto tomuu nomjomwekovla'mwalpinorekikono.

11Moro yogalo aikudumwako akav aro tovinokwono. Moro poowokalago tokwe ilaiyo ibwosunodumdo tov kemoro poowokalago kunyu kuruv aval'no aulaikworoneyokweyo'mo tovinokwono. Aki ilaiyo ibwosunyo'mo su tov kemoro poowokalago tonyu yiunokuudo kuullo'movaikwopimwalonokwono. 12#Jn. 13:34, 15:17; 1Jn. 3:23; 2Jn. 1:5Moro loowo aikullamo tov arokwono. Nuu kemino kalo buuropino nyunodowodo to'busuko kubalno kev kworekul kuruv kemida'ai yiuwi'nokai pwolno pwolnodo toorekulluno kalo buuropino neya domollogaulo.

13A'mwo pwol gami ibwoto'nyo tobuuraino kalo buuropino winowo'ji su tobuuravuro aiko toru mallo'moneyokwe nokwo bolonekono. Toro abolo'ji su toolluro pasudo tov yiuwi'nokai kalo buuropino pasudo punyu nuuwolowonokwono. 14Toro te kevu moro yogalo daikullodumdo tonyu kuumjunpi tov moro ibwoto'nyo kuvinono nonyumo'numwalpinorekikono. 15Nuvu mi Nyunumiyago toolluro yiuwi'nokai yogalo adanyoka ton kemi me'no ikudodumdonyugono. Toro tovino tov aga'no'gwowi kemino, “Oo moro ibwoto'nyoravoo,” to'no ikudumwalmonyugono. Aki nuu kemino tov aki aiko te aro maikudumwalmonyugono. “Oo ki'nato womdokweravo,” maikudumwalmonyugono. Su tov aro tovinokwono. A'mwo ki'nato womdokwe pwekwo gami a'mwo aguto toolluro yodowo'jure tovino kuudo miyaullokwekono. Toro kuvi kuruv kemino'gwowi mi Nyunumiyago toolluro yiuwi'nokai yogalo adanyoka ton me'no ikudodumdonyugono.

16Kevu mi miyenyubworonumaroporekikono. Toro kuvi kuruv nuvno'gwowi kemi yenyubworekumarono me'no ajaikubweyorekikono. Toro ajaikubweyo su tov kevu plavopi moro womdo tovi imwalpino'moneyokweyokwono. Aki moro womdo su tovi amjumovlapi tovi'aro ikulsulo yiunokuudo mujo'movlaiyo'moneyokwe tollovo neya de'nogaulo. Su tov aro tovinokwono. Kevu moro Nyunumiyago toollu mino yovo tovida'ai buro'nyo buro'nyo tonyuno kuudoganpi tov kuvinono nomollumo'nekubweyabwonekono. 17Kevu kemida'ai pwolno pwolnodo toolluno kalo buuropino neya winmwalpino'moneyokwe loowo su tov adaikullumono.” Kuudokaikono.

A'mwo abolo kwako akavi mwalodupudo ton Jisasolluro uumjunyokwe tooraino surodo wuunodupudo tovinokwono

18Aki Jisasol aro kuudokaikono. “A'mwo abolo kwako akavi mwalodupudo ton kemino surodo kuunpi tov kevu aro kuudo jaurogaulo. Su tov kemi muuduko ikullumo'nonorekulmaiyo. Toro kuvi kuruv sumdomgu toga a'mwo abolo kwako akavi mwalodupudo su ton mino surodo me'no kuunyajupogano. Toro ton kev kworekulluno kuruv surodo aval'no wuunpinogano. 19A'mwo abolo kwako akavi mwalodupudo ton kevnokwenyuro a'mwo abolo punyuno kalo buuropino winodupudogano. Kevno'gwowi kwako akavida'aiyorekulmaiyo. Toro toorekulluno tov a'mwo abolo kwako akavi mwalodupudo su ton kemino kalo buuropino mwinmwalpinogano. Nuu a'mwo abolo kwako akavi mwalodupudo su tonyuro anakuuto tomuuda'ai bolokwiyo'moneyokwe kemi me'no ajaikubweyorekikono. Toro toorekulluno tov kwako akavi mwalodupudo su ton kemino surodo wuunodupudogano.

20 # Mt. 10:24; Lk. 6:40; Jn. 13:16 Kevu moro yogalo aikudumo tovino kuudo nyallulo'gwonmwalpiyo. Yogalo su tov arokwono. A'mwo ki'nato womdokwe pwol gami a'mwo aguto toollu muunyu toru'aro muuwolo'mdowodekono. Aikudumonyugono. Toro te a'mwo abolo ton numi kaiyako yanyugolodupudo tovino tov kev kworekullu kuruv kaiyako aval'no nyaikullugolmwalpinogano. Aki a'mwo abolo su ton moro yogalo tovi muumjunodupudogano. Toro to'busuko kubalno kev togaikulluro yogalo kunyu kuruv aval'no muumjunpinogano. 21Aki a'mwo abolo kwako akavi mwalodupudo su ton moro Nyunumiyago amonuwopiyaboka toolluno kuudo miyau'dupudogano. Toro ton kevu mi numjunodupudo toorekulluno tov yiuwi'nokai kaiya'no pasudo su ton nyaikullugolmwalpinogano.

22Nuu a'mwo su toorai moro kuuguudo tokwe mabuudo'mujuko'mno'juki a'mwo su tooro kemi ma'no ma'nodo tovuro jul'nyo tov mamaropujukorogano. Toro kuvi kuruv nuu nebaikuuguudo tokwe me'no buudodumdonyugono. Toro tovino tov a'mwo su tooro kemoro ma'no ma'nodo tovino kworado jumwonyo'moneyokwe yogalo puru'monodo kuruv madupinorogano. 23Toro te a'mwo pwol numino surodo kuuno'ji su tool moro Nyunumiyago kwolluno kuruv surodo wuunonekono. 24Nuu kwako akavida'ai a'mwo su tooravuro akuuto toru womdo jurogudo ton sajonyugono. Womdo jurogudo su ton a'mwo yasuwa'nodo pwol ku'nono miyodowodogano. Nuvu womdo jurogudo su ton muuduuwallo'mujuko'mno'juki a'mwo su tooro kemi ma'no ma'nodo tovuro jul'nyo tov mamaropujukorogano. Toro kuvi kuruv aga'no'gwowi a'mwo su tooro moro duuwallo jurogudo tonyu me'no wonodupudorogano. Toro wonodupudo kworo kuruv nuuge'aro mi Nyunumiyago tooke'aro toonalluno surodo to'no wuunodupudorogano. 25#Da'bk. 69:4Su toro yodupudo tov kevnokweravuro loowo tovida'ai yogalo sakwollungiko puruvi suuwiyo imwojo'mokwono. Yogalo su tov arokwono. A'mwo pworo nuu ma'no ma'no miyodumdo toonyuno surodo yasuwa'no wuunpinorogano. Yogalo su tovi suuwiyo imwojo'moneyokwe yodupudorogano.

26Toro kuvi kuruv nuu moro Nyunumiyago toolluda'ai kemi ikullo'mwojo'moneyokwe tool nomekwopiyamonyugono. Toro amekwopiyami su tool Gooti toolluro Kuullo yiuno nebal'no yogalo to'no jokwe tookono. Moro Nyunumiyago toolluda'ai amekwopiyami su tool bowo'ji numino kuu'maiyo toru'no nododoluwosonekono.

27Aki kev kworekul kuruv mino kuu'maiyo toru dodoluwosumwalpinorekikono. Su tov aro tovinokwono. Kevu moro womdo muudu'no somworaro togada'ai nuuge me'no mujomwekelabodupudorekikono.”

Currently Selected:

Joon 15: SMB

Highlight

Copy