Joon 3

Nikoodimasol Jisaseke kuuguudo adolo tovinokwono

1To'no'gwowi a'mwo Farasi pwolluno yovo tov Nikoodimasolekono. Su tool Juu tooravuro a'mwo aguto pwekono. 2Toro tool surakuuto pullugwoji Jisasollomno bino sumaiyokwe aro kuudokaikono. “Ibwasokweyoloo, Gooti toolluro amonekwopiyaboka tool, Guu kwekudeyo, kuudo yaguu'dowadekugono. Nemoro kuudo yaguu'dowado su tov aro tovinokwono. Gooti tool a'mwo yasuwa'nodo pweke mamwalowo'jujuko'mno'juki a'mwo yasuwa'nodo su tool gumoro duuwallo jurogudo yodumdo akanbusuko ton ku'nono miyowo'jujukekono.” Kuudokaikono.

3Toro kuudoka toollu Jisasol aro kuudokaikono. “Nuvu nebal'no kuunodo agudadokwono. Kevu aiyo aiko te neya jumo'nogaulo. A'mwo pwol aiyo aiko te mimo'no'ji su toolno'gwowi aguto kig Gooti toolluro mido mollomwalo tovi ku'nono mwononekono.” 4Toro kuudoka tovi Nikoodimasol aro kuudokaikono. “A'mwono me'no sumo'no'ji tool aiyo aiko te adadomgu'aro imo'nonoldeyo? A'mwo pwol gami ganeyago tovuro sumwoluko tovi kuulomna'dowo'jure toollu aiyo aiko te ku'nono miyomaronekono.” Kuudokaikono.

5Toro kuudoka toollu Jisasol aro kuudokaikono. “Nuvu nebal'no kuunodo agudadokwono. “A'mwo pwol wonyo tokwe'aro Gooti toolluro Kuullo tooke'aro tovalluda'ai aiyo aiko te mimo'no'ji su tool aguto kig Gooti toolluro mido mollomwalo tovi ku'nono maulomwalonekono. 6Abolo tonyuro aiyo yoma'dupudo tooro yiuno kulako tovino to'no yoma'dupudogano. Toro kuvi kuruv a'mwo pwol Gooti toolluro Kuullo toolluda'ai aiyo muuduko sumo'no'ji su toolno'gwowi a'mwo su toolluro kuullo tool aiyo muuduko imo'nonekono.

7Toro te moro aro agudumo tov, “Kevu aiyo aiko te neya jumo'nogaulo,” agudumo su tovino mollolokurosi mibinono. 8Kuudo neya jaurono. Dolo tov gami buro'nyo buro'nyomuudeyo tomuuno molobemokavlaiyo'mo kwino'ji tov kumuuno molobemokavla'mdowodokwono. Toro molobemokavla'mdowo'jure tovi wuu'no'bi kuvi kuruv, Oo toro tomuuda'ai dobadopiyo oo toro tomuuno dovla'mwallo, tov ku'nono miyouroma'binokwono. Su toro to'busuko kubalno yiuwi'nokai a'mwo abolo Gooti toolluro Kuullo toolluda'ai aiyo imo'nodopure tonyuno a'mwo pworo, adadomgu'aro jukimo'nadokwoveyokwe, tovino ku'nono miyouroma'mwalpinorogano.” Kuudokaikono.

9Toro wuujuno sumaiyokwe Nikoodimasol aro kuudokaikono. “A'mwo pwol adadomgu'aro aiyo imo'nonoldukono?” Kuudokaikono. 10Toro kuudoka tovi Jisasol aro kuudokaikono. “Guu Isuraiyolda'ai a'mwo abolo tonyu ibwasokwe wimo'nodumdekugono. Toro kweku kuruv Gooti toolluro yogalo tovida'ai kavlo su tonyuno buro'nyo'mo kuudo miyouroma'dumdekudeyo? 11Nuvu nebal'no kuunodo aro gudumo'mokwono. Aga toga nevu kuudo me'no youroma'dowado tonyuno to'no jokwenogano. Aki yiuno sumdo muugona'dowado tonyuno to'no kuu'maiyo toru'no dodoluwosokwenogano. Toro kuvi kuruv nemoro dodoluwosodowa'jure su tonyuno kevu buulo to'no uugunyumopiyodupudorekikono. 12Nuvu noonyumwonyu kwako akavi imo'nodupudo su tonyuno ikudodo'mure tovi kuudo muubwepi tov Gooti toolluro ago muunyu kai'muuda'ai tonyuno aikudumi to'gwowi adadomgu'aro kuudo uubwepinorekuldukono? 13A'mwo pwol Gooti toolluro ago muunyu kai'muuno ilno sumaiyokwe aikomgu kwolaboka pwolnodo kwol kuruv nonagutomuugono. Toro kuvi kuruv yiuno A'mwo Kwolaiyo Kuunodo toonyu muunyu kai'muuda'ai wolabono bwolomwalodumdonyugono. Toro toonyuno tov noonyumwonyu muunyu akai'muuda'ai su tonyuno pi'mwono nokwo ikudumonyugono.” Kuudokaikono.

14 # Jag. 21:9 Aiyoga Moosesol kwako a'mwomaiyo kuu'maiyo toru aiyon sallukwa'jo gabakuto toollu iko tovi kuuruubidapiyoka to'busuko kubalno A'mwo Kwolaiyo Kuunodo toonyu aval'no nyopi iko tovi monyuruubidapipinonyugono. 15Su tov aro tovino'mokwono. Yiuwi'nokai a'mwo abolo ton toro toonyuno kuudo anubwepi su ton aiyo yiunokuudo mujomwekovlaiyo'moneyokwe tov nomapinogano.

16 # Jn. 6:47, 10:28; Rm. 5:8, 8:35-39; 1Jn. 4:9-10 Gooti tool yiuwi'nokai a'mwo abolo kwako akavi mwalodupudo tonyuno kalo buuropino winodowodekono. Toro tovino tov gami Kwolaiyo pwolnodo toonyu amonuwopiyabokanyugono. Toro amonuwopiyaboka su toonyuno yiuwi'nokai a'mwo abolo kuudo anubwepi ton yiunokuudo mabolopipinogano. Toro kun kuruv aiyo yiunokuudo mujomwekovlaiyo'moneyokwe tov nomapinogano. 17Gooti toolluro Kwolaiyo amonuwopiyaboka su toonyu yiuwi'nokai a'mwo abolo kwako akavi mwalodupudo tonyu kooti yogalo duuwiyo'mi kirumwallo'moneyokwe abonyumaiyo. Toro kuvi kuruv yiuwi'nokai a'mwo abolo kwako akavi mwalodupudo ton Kwolaiyo toonyu'aro wiyo'mwoju'nupino'moneyokwe abonyugono. 18Toro te a'mwo pwol Gooti toolluro Kwolaiyo toonyuno kuudo anubweyo'ji tool kooti yogalo tovida'ai kirumwallo tov mamaronekono. Toro kuvi kuruv yiuwi'nokai a'mwo abolo mino kuudo manubwepi tono'gwowi kooti yogalo tovida'ai kirumwallo tov me'no ma'dupudogano. Su tov aro tovinokwono. Gooti toolluro Kwolaiyo pwolnodo toonyuno yovo tovi kuudo muubweyodupudo tovinokwono.

19Kooti yogalo su tovuro kirumwallo tov aro tovinokwono. Gooti toolluro bako toonyu kwako akavi kwolabonyugono. Toro kuvi kuruv a'mwo abolo ton ma'no ma'no yodupudo tovino tov bako toonyuno ilaiyo mwinodupudogano. Kemi dugumdo tomuuda'ai noonyumwonyu pasudo tooraino to'no kalo buuropino winodupudogano. 20Neya duu'nyulo. Yiuwi'nokai a'mwo abolo ma'no ma'no yodupudo ton bako toonyuno ilaiyo mwinyokweyogano. Su tov kemi ma'no ma'no yodupudo tonyuno kuu'maiyo toru nonekuduuwallo'jokweyo'mo ton bako toonyuno mabodupudogano. 21Toro kuvi kuruv a'mwo abolo pun pasudo nebal'nodo tovi supi su tono'gwowi bako toonyomno nobupinogano. Su tov aro tovino'mokwono. A'mwo abolo miyomno abupi su tonyu a'mwo abolo pun kuu'maiyo aro wonomapinogano. Oo su ton Gooti toolluro ilaiyo winodowodo kuudo tonyu duumjunmwakovo. Wonomapinogano. Su toro tovino'mo bako toonyomno nobupinogano.”

Wonyo Galuvollokwe Joonol Jisasolluno muunyu toru'aro sulomodomoropiyoka tovinokwono

22Toruda'ai Jisaseke'aro gami uumjunyokwe toorogai'aro tooro wagwolago Jeruusalem tovi wuugollu'mo'mno sumaveyokwe kwako Juudiya tomuuno avlavoporogano. Toro plaino sumaveyokwe kwako su tomuu iruko pubuul amwaloporogano. Su toro amwalopo toga Jisasol a'mwo abolo tonyu wonyo agaluvollajukekono. 23Aki avalo toga Wonyo Galuvollokwe Joonol wagwolago Ainoon tomuuda'ai a'mwo abolo tonyu wonyo agaluvollajukekono. Wagwolago Ainoon su tov kwako Salim tovi wobo toru wo'dowodokwono. Toro te su tomuu wonyo bwotonyago ton wo'dupudo tovino tov Joonol a'mwo abolo bodopure tonyu wonyo agaluvollajukekono. 24#Mt. 14:3; Mk. 6:17; Lk. 3:19,20Su tov Herootol Joonollu wuulo killo'mo ago tovi yere mamerosoduke toga sumo'nokakwono.

25Toro te su toga Joonolluro uumjunyokwe toorogai'aro Juu a'mwo pweke'aro toorai akuuto toru yogalo puruv aullajunoporogano. Su tov Gooti toolluro sumdo tovi yovraimwonyo'moneyokwe wonyo yal'mo'nodupudo pasudo tovino yogalo aullajunoporogano. 26Toro kuullajunyuno sumaveyokwe Joonolluro uumjunyokwe tooro bo'mno Joonollu aro abuudoporogano. “Ibwasokweyoloo, guu wonyo Joodanovi igo'mgu tomuu a'mwo kuuru'marodo su tool a'mwo abolo tonyu wonyo agaluvolladopiyo. Toro toolluno guu, “Oo Gooti toolluro nekullo'mwojo'moneyokwe ajesoka Krais tookono,” amoruujajudo su tool kwekono. Toro te aga a'mwo abolo su ton nemiyomno mabadokwopogano. Toro kuvi kuruv yiuwi'nokai a'mwo abolo ton a'mwo su toollomno avla'mwakovo.” Kuudoporogano.

27Toro kuudopo tovi Joonol aro kuudokaikono. “Muunyu kai'muuda'ai mwalodowodo Gooti tool a'mwo toollu mwiyowo'jujuko'mno'juki a'mwo su tool yiuno puru'monodo kuruv ku'nono mamarowo'jujukekono. Toro kuvi kuruv Gooti tool a'mwo su toolluno'gwowi kuvinono kwiyokaikono. 28#Jn. 1:20Kevnokwe toorekul moro dodore tovino me'no nuu'nodupudorekikono. “Nuvu Krais toonyumaiyo. Toro kwonyu kuruv Krais toollu sumdomgu wanono'moneyokwe Gooti tool mi amonuwopiyabokanyugono.” Kevu su toro nuu'nodupudo tovino a'mwo abolo tonyu kuu'maiyo toru'no dodoluwosodupudorekikono.” Kuudokaikono.

29Joonol toro wuujuno sumaiyokwe aki yovekurajo puruv aro kuudokaikono. “A'mwo pwol abolo tovi mallo'mo su toolluno, A'mwo nuumaso'mekono, dodowadekono. A'mwo nuumaso'mo su toolluro ibwoto'nyo pwol wobo toru davowo'ji gami ibwoto'nyo su toolluro yogalo tovino kadu'molo yonekono. Toro yodowo'jure toga a'mwo nuumaso'mo su toolluro yogaimaguurai tovi kuu'no'ji tov ilaiyo bwotonyo yonekono. Su toro to'busuko kubalno nuvu Krais toolluno ilaiyo yodumdo tov maluko'nyo'maiyo. Bwotonyo kuunodokwono. Aki moro ilaiyo yodumdo su tov mi poowokalago tovi kuullo'movanuwopiyodowodokwono. 30Toro te aga nuvu yovo agutokwe toonyu a'mwo abolo tonyuro sumdo tovi mino yovo tov piyarupto wolabowo'ji a'mwo yovomaiyokwe pwolbusuko neya wimo'numwalmonyugono. Toro kuvi kuruv Krais su toolluno'gwowi a'mwo abolo tonyuro sumdo tovi mi muunyu toru'aro ilonuwolovawo'ji yovo aguto neya ma'mwalonekono.

31Gooti toolluro muunyu kai'muuda'ai abwolomwaloka tool yiuwi'nokai tonyu uuwolo'mdowodekono. Toro kuvi kuruv kwako akavida'ai a'mwo pwolno'gwowi kwako akavida'ai pasudo toorono mujumovla'mdowodekono. Aki kwako akavida'ai su tool noonyumwonyu kwako akavida'ai yogalo tooraino to'no dodowodekono. Toro kuvi kuruv Gooti toolluro muunyu kai'muuda'ai abwolomwaloka toolno'gwowi yiuwi'nokai su tonyu uuwolo'mdowodekono. 32Aki muunyu kai'muuda'ai abwolomwaloka su tool gavnokweyol noonyumwonyu muunyu kai'muuda'ai wonodowodo togai'aro wuu'nodowodo togai'aro tonyuno to'no dodoluwosokwekono. Toro kuvi kuruv gamoro yogalo dodoluwosodowo'jure su tovi a'mwo abolo ilaiyo molloma'dupudo ton nonagutomuugono. 33Toro kuvi kuruv a'mwo pwol muunyu kai'muuda'ai su toolluro yogalo dodoluwosodowo'jure tovi ilaiyo amollomaro'ji to'gwowi a'mwo abolo tonyuro sumdo tovi aro tovino kuu'maiyo wuuduuwallonekono. Oo Gooti tool nebal'no yogalo to'no jokwekono. Wuuduuwallonekono.

34Kuudo neya jaullulo. Gooti tool gamoro amoropiyaboka su toollu gamoro Kuullo tool yiuno pwekwono to'no mwiyodowodekono. Toro kuvi kuruv aiyowomno kuullo'mowopiyo'moneyokwe yiunokuudo wiyopiyodowodekono. Toro tovino tov Gooti toolluro amoropiyaboka su tool Gooti toolluro yogalo tonyuno to'no jokwekono. 35#Mt. 11:27; Lk. 10:22Aki Gooti Ganumiyago tool gami Kwolaiyo toolluno kalo buuropino winodowodekono. Ganumiyago su tool gami Kwolaiyo toolluro ato tovi yiuwi'nokai ton me'no kuubweyokaikono.

36Toro te a'mwo pwol Gooti toolluro Kwolaiyo su toolluno kuudo kuubweyo'ji tov aiyo yiunokuudo mujomwekovla'mwalonekono. Toro kuvi kuruv a'mwo pwol Kwolaiyo su toolluro yogalo tovi kisuvolo so'ji toolno'gwowi aiyo yiunokuudo mujomwekovlaiyo'moneyokwe tov mamaronekono. Yiuno Gooti toolluro suroulo to'no maronekono.”

Currently Selected:

Joon 3: SMB

Highlight

Copy