Joon 4

Jisaseke'aro Samariyada'ai abolo purukwe'aro toval kuuguudo adolo tovinokwono

1-3Toruda'ai Farasi tooro aro tovi kuu'noporogano. Joonol a'mwo pwolno pwolnodo tooraino to'no wonyo galuvollodowodekono. Toro kuvi kuruv Jisasolno'gwowi bwotonyago toorai galuvollodowodekono. Aki me'no galuvollodowodo su tooro gamoro uumjunyokwe wimo'nodupudorogano. Su toro tovi kuu'noporogano. Toro kuvi kuruv Jisasol gavnokwe tool wonyo mamogaluvollajukekono. Yiuno gamoro uumjunyokwe toorono to'no a'mwo abolo tonyu wonyo agaluvollajuporogano. Toro te Farasi tooravuro kuu'nopo su tovino Jisasol kuudo me'no youroma'no sumaiyokwe toga kwako Juudiya tomuu wuugollu'movo'no kwako Galili tomuuno aki aiko te avlavokaikono. 4Toro tool kwako su tomuu ki'meyo'moneyokwe kwako Samariya tomuu'aro kado avlavokaikono.

5Toro plaino sumaiyokwe kwako Samariya tomuuda'ai wagwolago puvi ai'movokaikono. Wagwolago su tovino yovo tov Sikarovokwono. Wagwolago su tov aiyoga Jekoopolluro kwako puruv gami muugunyo Joosepollu kwiyoka tovi wobo toru wo'dowodokwono. 6Aki Jekoopolluro wonyo buugo alsovomwollosungiko tov wagwolago su tovi wo'dowodokwono. Toro te Jisasol plaino sumaiyokwe wagwolago su tovi ai'movokaikono. Toro ki'mo'mno sumaiyokwe puu'kumi'yago avlaiyajuko tovino tov burawo wino'no wonyo buugo alsovomwollosungiko tovi wobo toru abomwalokaikono. Su toro abomwaloka tov kuujunapto togakono.

7Jisasol toro bomwaloduke toga Samariyada'ai abolo puruv wonyo luviromallo'moneyokwe buugo alsovomwollosungiko su toollomno abokakwono. Toro aboka tovi Jisasol aro kuudokaikono. “Nuu wonyo nonyo'moneyokwe pun luviromaro'bi donyabono.” Kuudokaikono. 8Kuudo neya jaullulo. Su toro toga gamoro uumjunyokwe tooro wosamujuko pun biyomallo'moneyokwe wagwolago tovino me'no aulaporogano. 9Toro te Jisasolluro kuudoka tovi Samariyada'ai abolo tov luko morumoukuropiyo'no aro kuudokakwono. “Guvu Juu tookugono. Nuvno'gwowi Samariyada'ai abolo tobuunyugono. Toro te gumoro aro anyudumado tov, “Nuu wonyo nonyo'moneyokwe pun luviromaro'bi donyabono,” su tov buro'nyo'mo anyudoganmodekudeyo?” Kuudokakwono. Abolo tovuro su toro kuudoka tov aro tovinokwono. Juu tooro Samariyada'ai a'mwo abolo togai yomwallunyo'moneyokwe pun nonagutorogano.

10 # Rm. 6:23; Ef. 2:8-9; 2Krn. 9:15 Toro te abolo tovuro yogalo kuudoka su tovi Jisasol aro kuudokaikono. “Guu Gooti toolluro yasuwa'wino gumi gujabiyo'moneyokwe tovino kuudo miyouroma'dumdo'guugono. Aki nuvu wonyo'mo agudoganmwako toonyuno kuudo kuruv miyouronuma'mwakuno. Guu su toro tovalluno kuudo souromaro'bujuko'mno'juki moro wonyo tovino guu nokwo anyudogano'bujuko'guugono. Guu kuvinono anyudogano'bujuko'mno'juki nuvu aiyo yiunokuudo mujomwekovlaiyo'moneyokwe wonyo tov nokwo agujabo'mujukonyugono.” Kuudokaikono.

11Toro wuujuno sumaiyokwe abolo tov aro kuudokakwono. “A'mwo agutoloo, guu wonyo luviromallo'moneyokwe baketo tov nonagutekugono. Aki wonyo buugo alsovomwollosungiko akalluro i'numdo tov bwotonyokwono. Toro te aiyo mujomwekovlaiyo'moneyokwe wonyo su tov gadomuuda'ai ma'binekudeyo? 12Aiyoga nemi nellukweyago Jekoopol wonyo buugo alsovomwollosungiko akallu ilsuno sumaiyokwe gavnokwe tool wonyo luviroma'dowo anyajukekono. Aki gamoro kwolaiyo toorogai'aro noonyumwonyu ibesa'aiyo wuulo ai'duvollajuko toorogai'aro tooro wonyo buugo akalluda'ai anyajuporogano. Wonyo buugo akal nemi nellukweyago Jekoopol gavnokwe toolluro anekullabokakwono. Toro te guu nemi nellukweyago Jekoopollu adadomgu'aro dukuuwolo'mwakuno?” Kuudokakwono.

13Toro kuudoka tovi Jisasol kuudokaikono. “Yiuwi'nokai a'mwo abolo wonyo akavida'ai anupi ton aki aiko te wonyo'mo kuuleyaluko nuuwinumwalpinogano. 14Toro kuvi kuruv a'mwo pwol moro wonyo kwimi tovida'ai ano'ji su toolno'gwowi wonyo'mo kuuleyaluko yiunokuudo mwinmwalonekono. Wonyo kwimi su tov gamoro poowokalago tovi anakuuto tomuu wonyo sumdo to'busuko ilowilovabodowo'jure tovida'ai aiyo yiunokuudo mujomwekovla'mwalonekono.” Kuudokaikono. 15Jisasol toro wuujuno sumaiyokwe abolo tov aro kuudokakwono. “A'mwo agutoloo, wonyo su tov donyabono. Guu anyabi tov nuvu wonyo'mo aki aiko te kuuleyaluko mimwalme'gono. Aki wonyo buugo alsovomwollosungiko akalluda'ai wonyo luviromorabiyo'moneyokwe supto mimwalme'gono.” Kuudokakwono.

16Toro kuudoka tovi Jisasol aro kuudokaikono. “Guu plavo'bi gumi kwolo toollu domora'bi domokabono.” Kuudokaikono. 17Toro kuudoka tovi abolo tov kuudokakwono. “Nuu kwolo maiye'gono.” Toro kuudoka tovi Jisasol aro kuudokaikono. “Guu, kwolo maiye'gono, anyudumodo tov nebalokwono. 18Su tov aro tovinokwono. Guu kwolo atobuul toorai me'no uuma'nodumdo'guugono. Toro te aga toga guu a'mwo pweke mwalodubulo su tool gumi kwolo kuunodo magujumo'nodowodo tooke amwakuno. Toro te guu, kwolo maiye'gono, anyudumodo su tov nebal'no kuunodokwono.” Kuudokaikono.

19Toro kuudoka tovi abolo tov kuudokakwono. “A'mwo agutoloo, guu proofet pwekugono, kuudo saguu'mwakono. 20Toro te guu aro tovino nokwo nyudubinekudukono? Kevu Juu toorekul dodupudorekikono. “A'mwo abolo ton Gooti toollu po'dogalo ilomodomoropiyo'moneyokwe tov yiuno wagwolago Jeruusalem'no neya plavopi ilomodomoropimwolapinogano.” Toro dodupudo kuvi kuruv nevu Samariyada'ai tonolno'gwowi aro dodowadonogano. “Aiyoga nemi nellukweyago ton muumuudo akallu muunyu toru Gooti toollu sulomodomoropiyajupogano. Toro te a'mwo abolo pun Gooti toollu po'dogalo ilomodomoropiyo'moneyokwe tov yiuno muumuudo akallu muunyu toru'no nokwo ilomodomoropimwolapinogano.” Dodowadonogano. Toro te guu kuudo go'no go'nodo su tovalluno nokwo nyudubinekudukono?” Kuudoganokakwono.

21Toro kuudoganoka tovi Jisasol kuudokaikono. “Abolo tobuuku aro tovino kuudo neya donubweyono. Lukomguno'gwowi aro nobai'mowonokwono. Nemi Nellunumiyago toollu ilomodomoropiyo'moneyokwe tov kevu a'mwo abolo togaikul muumuudo akamuudeyo oo wagwolago Jeruusalem'deyo tomuu milomodomoropimwolapinogaikikono. Toro kugaikul kuruv yiuwi'nokai tomuuno'gwowi nyulomodomoropimwolapinogaikikono. 22Kevu Samariyada'ai a'mwo abolo togaikul Gooti toolluno kuudo neya miyouroma'dupudo kugaikul kuruv ilomodomoropiyodapudogaikikono. Toro kuvi kuruv nevu Juu toonolno'gwowi Gooti kuudo me'no youroma'dowado su toolluno ilomodomoropiyodowadonogano. Su tov aro tovinokwono. Gooti tool a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe tov nevu Juu toonollu'aro bwonekono.

23Su tov wobo toga nyumo'nono'mokwono. Aki aga kuvinono abai'mo'mwallo. Toro te nemi Nellunumiyago toollu ilomodomoropiyo'moneyokwe kuunodo su ton Gooti toolluro Kuullo tool jurogudo wiyodowo'jure tokwe'aro aki nebaikuuguudo tokwe'aro tovallu uumjunopi ilomodomoropimwolapinogano. A'mwo abolo su toro tomgu'aro ilomodomoropimwolapino'moneyokwe tovino nemi Nellunumiyago tool ilaiyo winodowodekono. 24Gooti su tool kuullekono. Toro te a'mwo abolo ton puruval tomgu'aro Gooti toollu ilomodomoropimwolapinogano. Su toval arovakono. Gamoro Kuullo tool jurogudo wiyodowo'jure tokwe'aro nebaikuuguudo tokwe'aro tovallu neya uumjunopi ilomodomoropimwolapinogano.” Kuudokaikono.

25Jisasol toro wuujuno sumaiyokwe abolo tov kuudokakwono. “Nuu aro kuudo nyau'mwakono. Gooti tool gamoro Mesaiya ajesoka pwollu nomonekwopiyabwonekono. Su toolluno Kraisolo dodupudekono. Toro tool abwo'ji toga yiuwi'nokai kavlo tonyuno kuu'maiyo nobomollolupto'nanekubweyonekono.” Kuudokakwono. 26Toro kuudoka tovi Jisasol aro kuudokaikono. “Gooti toolluro ikullo'mwojo'moneyokwe ajesoka Krais su tool nuvnokwe agudumwako toonyu kwonyugono.” Kuudokaikono.

27Toro wuudoduke kuga'gwo kuuno gamoro uumjunyokwe tooro wagwolago tovida'ai aikomgu alokaboporogano. Toro tooro Jisasol abolo tovi kuuguudo wuudoduke tovi wono'mno mollolokurosi soporogano. Toro kworo kuruv yiuwi'nokai pwolno pwolnodo tooro Jisasollu aro tovino muudoganoporogano. “Guu abolo su tovi burowo'nyo tovino kuudoganmodekudeyo, oo Guu abolo su tokwe buro'nyo'mo kuuguudo adumalekudeyo?” Su toro tovino gamoro uumjunyokwe tooro Jisasollu muudoganoporogano.

28Toruda'ai abolo tov gami wonyo illo'moneyokwe kwa'bootool tov wonyo buugo alsovomwollosungiko toollu wobo toru wuudapino sumaiyokwe gami ajumiyo tovino aikomgu kano kano avlavokakwono. Ajumiyo su tovi ki'mo'mno sumaiyokwe a'mwo abolo tonyu aro kuudokakwono. 29“A'mwo pwol moro yiuwi'nokai yomjomwekovla'mdumdo tonyuno kuu'maiyo toru'no adodowiyoku'bworanubwemokaikono. A'mwo su tool Gooti toolluro nekullo'mwojo'moneyokwe ajesoka Krais tooldukono? Toro toollu kevu wonpino'moneyokwe dobiloo.” Kuudokakwono. 30Toro wuujuno sumaiyokwe ajumiyo su tovida'ai a'mwo abolo ton Jisasollomno aikolokabopogano.

31Abolo tokwe'aro ajumiyo tovida'ai a'mwo abolo togai'aro ton su toro kikolokabodopure toga Jisasolluro uumjunyokwe tooro Jisasollu guureji aro kuudoporogano. “Ibwasokweyoloo, guu wosamujuko pun neya donono.” Kuudoporogano. 32Toro kuudopo kuvi kuruv Jisasol aro kuudokaikono. “Nuvu wosamujuko nonyo'moneyokwe ton kurukwenyugono. Wosamujuko su tonyuno kevu kuudo miyau'mwakovo.” Kuudokaikono. 33Toro wuujuno sumaiyokwe gamoro uumjunyokwe tooro aro sajunoporogano. “Oo nevu mamwalodowore toga a'mwo pwol wosamujuko pun me'no abwimokaldeyo?” Kevnokwe tooro toro sajunoporogano. 34Toro yajunodopure toorai Jisasol aro sovo'dogaluudokaikono. “Mi amonuwopiyaboka Gooti toolluro ilaiyo winodowo'jure tovi uumjunyo'moneyokwe tov moro wosamujuko to'busuko nyumo'nodowodokwono. Aki gamoro womdo tovi yopiyo'mo kuruv moro wosamujuko to'busuko nyumo'nodowodokwono.

35Kevu aro dodupudorekikono. “Wit womdo tovi kuudosowa'ji lobako aral aral me'no abawo'ji toga mulomaranokwono.” Dodupudorekikono. Toro kuvi kuruv nuvno'gwowi yovekurajo aro ikudumo'mokwono. Mekono, kevu plavopi wit womdo ton suuwiyo jukimwakoveyokwe tovino doonomollulo. Suuwiyo me'no supi tonyu nomulomallo'moneyokwe tov aga me'no abai'mopso. Toro to'busuko kubalno a'mwo abolo bwotonyago ton Gooti toolluro yogalo tovi mallo'moneyokwe me'no yovrowosunodupudogano. 36Toro te wit sulo su tonyu muloma'dupudo ton kemi womnuugwiyo tov mollu'bworosodupudogano. Toro to'busuko kubalno a'mwo abolo aiyo yiunokuudo mujomwekovlaiyo'moneyokwe tovi ma'dopure tonyu aval'no mollu'bworosodupudogano. Toro te a'mwo wosamuju'womdo kuudosodowodo tooke'aro aki wosamujukuto muloma'dowodo tooke'aro yiuwi'nokai su tooral ilaiyo bwotonyo aval'no nokwo ibullunorakono.

37Toro tovino a'mwo abolo pun aro dodupudogano. “A'mwo pwol wit sulo kuudosodowodekono. Toro audoso'ji tovi a'mwo gabovo pwol muloma'dowodekono.” Su toro dodupudo tov nebal'nodokwono. 38Nuvu kevnokwe toorekulluro wosamuju'womdo maudosodupudo tomuuno me'no amekwapiyonyugono. Su toro tomuu kevu womdo miyosopo kuvi kuruv pworono'gwowi womdo me'no sosopokwono. Kevnokwe toorekul womdo miyosodupudo su tomuu wosamujukuto muloma'dupudo to'busuko kubalno kevu a'mwo abolo tobuurai nokwo mollu'bworosumwalpinorekikono.” Jisasol toro kuudokaikono.

39Toruda'ai Samariyada'ai abolo tov ajumiyo su tovida'ai a'mwo abolo tonyu kuu'maiyo toru aro me'no adodolubweyokakwono. “A'mwo pwol moro yiuwi'nokai yomjomwekovla'mdumdo tonyuno kuu'maiyo toru abomollolupto'nanubwemokaikono.” Su toro adodolubweyoka tovino tov ajumiyo su tovida'ai a'mwo abolo Samariyada'ai bwotonyago ton Jisasolluno kuudo kuubweyopogano. 40Samariyada'ai a'mwo abolo su ton Jisasolluro mwaloduke toru'no bino sumaveyokwe aro kuudoganopogano. “Oo guu nevuge nemoro ajumiyo tovi nokwo mwalbinekudukono?” Toro kuudoganopo tovino tov Jisasol Samariyada'ai a'mwo abolo su togai kemoro ajumiyo tovi iruko pullal amwalokaikono. 41Aki Jisasol ajumiyo su tovi mwalno sumaiyokwe gamoro yogalo tokwe amoruudokaikono. Toro moruudoduke tovi a'mwo abolo bwotonyago pugai'aro ton wuu'nyuno sumaveyokwe Jisasolluno kuudo kuubweyopogano. 42Toro te a'mwo abolo su ton Samariyada'ai abolo tovi aro kuudopogano. “Nevu Jisasolluno kuudo kuubwemwakuuwo tov yiuno gumoro anekudumwa'judo tovida'aiyo'maiyo. Toro kuvi kuruv nevnokwe tonol gamoro yogalo tovi kuu'numwa'juuwo tovino aro kuudo kuubwemwakuuwono. Oo nebalo'mdeyo. Su tool yiuwi'nokai kwako akavi mwalodowado tonollu ma'no ma'nodo tovuro kirumwallo tovida'ai nobomollurolovonekumokalokwonoldeyo, kuudo kuubwemwakuuwono.” Kuudopogano.

Jisasol gavman womdokwe a'mwo aguto pwolluro kwolaiyo toollu sukuloka tovinokwono

43Jisasol Samariyada'ai a'mwo abolo togai iruko pullal me'no mwalno sumaiyokwe su towai wuugollu'movo'no kwako Galili'no avlavokaikono. 44#Mt. 13:57; Mk. 6:4; Lk. 4:24Jisasol gavnokwe tool aro me'no adokaikono. “Proofet toollu yiuwi'nokai tomuu yovo aguto wiyodupudekono. Toro kuvi kuruv gami wagwolago kuunodo tovino'gwowi yovo aguto mwiyodupudekono.” Su toro me'no adokaikono. 45#Jn. 2:23Toro te Jisasol kwako Galili tomuu ki'mo'mno sumaiyokwe Galilida'ai a'mwo abolo ton Jisasollu ilaiyo amollomaropogano. Su tov aro tovinokwono. Sumdomgu Galilda'ai a'mwo abolo su ton Juu tooravuro lubullu doto yanyo'mo toga wagwolago Jeruusalem toru me'no somollajupogano. Toro somollajupo toga Jisasolluro yiuwi'nokai womdo yoduke tonyu me'no amuugonallajupogano. Toro me'no muugona'no sumaveyokwe Galili'no aikomgu abopogano. Toro te Jisasol Galili su toru ki'mo'mduke toollu ilaiyo amollomaropogano.

46 # Jn. 2:1-11 Jisasol kwako Galili tovi akuuto tomuu'aro kado plaino sumaiyokwe wagwolago Kana toru aiko te ai'movokaikono. Sumdomgu wagwolago su tovi Jisasolluro yoduke tovida'ai wonyo tov wain sumo'nokakwono. Toro te wagwolago su tovi wobo toru wagwolago puruv kwollajukokwono. Wagwolago su tovino yovo tov Kapurniyamovokwono. Aki wagwolago su tovida'ai gavman womdokwe a'mwo aguto pwolluro kwolaiyo tool nobollo bwotonyo sajukekono. 47Toro te Jisasol kwako Juudiya tomuu wuugollu'movo'no kwako Galili toru bai'mo'mduke toolluno gavman womdokwe a'mwo aguto su tool me'no kuu'nokaikono. Toro wuu'nyuno sumaiyokwe toga Jisasollomno bo'no aro kuudoganokaikono. “Guu wagwolago Kapurniyam'no wola'bi moro kwolaiyo nobollo'mo sadopiko toollu nokwo ikulbinekudukono?” Kuudoganokaikono. 48Toro kuudoganoka toollu Jisasol aro kuudokaikono. “Tarevono, yiuno duuwallo jurogudo judo'no judo'nodo ton aikuduuwallumi toga'no kevu mino kuudo nubweyodupudorekikono.” Kuudokaikono. 49Toro kuudoka tovi gavman womdokwe a'mwo aguto su tool aro ajugonokaikono. “Agutoloo, aga moro kwolaiyo tekwo mabolodowo'jure toga guu yere nokwo wolabinekudukono?” Ajugonokaikono. 50Toro ajugonoka toollu Jisasol kuudokaikono. “Guu aikomgu doolawono. Gumoro kwolaiyo tool aiyo nomwalonekono.” Kuudokaikono. Jisasolluro yogalo kuudoka su tovi a'mwo tool kuudo kuubweyokaikono. Toro uubweno sumaiyokwe gami ago tomuuno aikomgu kwolokaikono.

51A'mwo su tool wolno sumaiyokwe wagwolago Kapurniyam toru yere mai'mo'mduke toga gamoro ki'nato womdokwe pworo puuto tomuu abuuru'maroporogano. Toro buuru'ma'no sumaveyokwe gavman womdokwe a'mwo aguto su toollu aro kuudoporogano. “Oo gumoro kwolaiyo tool aiyo amwallo.” Kuudoporogano. 52Toro kuudopo tovi a'mwo aguto su tool kuudoganokaikono. “Moro kwolaiyo tool adoga ilaiyo sumo'numwa'jukoldukono?” Toro kuudoganoka tovi ki'nato womdokwe tooro kuudoporogano. “Suro wan kilook suboto toga gamoro kula'du'nobollo tov kuugollu'mo'mwa'jukokwono.” Kuudoporogano. 53Toro wuujuno sumaveyokwe toga kwolaiyo toollu ganumiyago su tool aro kuudo souromarokaikono. Oo Jisasol aro anyudumwa'jukekono. “Gumi kwolaiyo tool aiyo nomwalonekono.” Su toro anyudumwa'juko kuga'gwo kuuno sukulnumwa'jukoldeyo. Kuudo souromarokaikono. Toro te a'mwo su tooke'aro yiuwi'nokai a'mwo abolo gamoro ago tovi mwalodupudo kugai'aro ton Jisasolluno kuudo kuubweyopogano. 54Toro te Jisasol kwako Juudiyada'ai bino sumaiyokwe kwako Galili toru me'no abai'movoka toga duuwallo jurogudo lukomguda'ai su tov toro kuuduuwallokaikono. Toro te duuwallo su tov kwako Galilida'ai naba 2 sumo'nokakwono.

Currently Selected:

Joon 4: SMB

Highlight

Copy