Luuk 23

A'mwo aguto Pailatolluro sumdo tovi Jisasollu kooti yogalo aduuwiyopo tovinokwono

(Matyuu 27:1-2, 27:11-14; Mak 15:1-5; Joon 18:28-38)

1Toruda'ai yiuwi'nokai su tooro iloda'mno sumaveyokwe Jisasollu a'mwo aguto Pailatollomno amokavlavoporogano. 2Toro mokavla'mno sumaveyokwe aro amojokuu'nosoporogano. “A'mwo akalluro womdo yoduke tovida'ai a'mwo tooro nemoro kantri akavi kisuvolo yo'mo winodupudorogano. Aki a'mwo su tool aro duumjuku'dowodekono. “Kevu takis nuugwiyo ton a'mwo aguto Sisa toollu mwipinono.” Aki toro tool gavnokweyolluno dodowodekono. “Nuu Gooti toolluro amonuwopiyaboka Krais toonyu a'mwo aguto kig imo'nodumdonyugono.” Dodowodekono.” 3Su toro kuudopo toga a'mwo aguto Pailatol Jisasollu aro kuudoganokaikono. “Juu tooravuro a'mwo aguto kig tool guu kwekudukono?” Toro kuudoganoka toollu Jisasol kuudokaikono. “Guvnokwekujuro su toro adumado tov kuvigono.” Kuudokaikono. 4Toro wuujuno sumaiyokwe a'mwo aguto Pailatol pris mido mollomwalokwe toorogai'aro a'mwo abolo kwolallo togai'aro tonyu aro kuudokaikono. “Nuu a'mwo akallu kamwoga sainyubwo'mo kuvi kuruv ma'no ma'no nonaguto toolluno to'no so'mgonoma'mekono.” Kuudokaikono. 5Toro kuudoka kuvi kuruv kwolallo ton guureji dumuuroleyo'moneyokwe aro kuudopogano. “A'mwo akal kwako Galili tomuuda'ai yiuno nemoro kwako akawai'no kuuguudo yodubwosumelabodowodekono. Toro tool yiuwi'nokai kwako Juudiyada'ai a'mwo abolo tonyu yiuno surodo to'no ju'gwolodowodekono.” Kuudopogano.

A'mwo aguto kig Herootolluro sumdo tovi Jisasollu kooti yogalo aduuwiyopo tovinokwono

6Toro kuudopo tovi a'mwo aguto Pailatol wuu'nyuno sumaiyokwe aro kuudoganokaikono. “A'mwo su tool kwako Galilida'ai pwoldukono?” Kuudoganokaikono. 7Toro kuudoganoka tovida'ai a'mwo aguto Pailatol aro tovino kuudo souromarokaikono. “Oo Jisasol a'mwo aguto kig Herootolluro kwako mido mollomwalodowodo su tomuuda'aiyoldeyo.” Toro kuudo youroma'no sumaiyokwe Jisasollu maro'no Herootollomno amorapiyokaikono. Su toro toga a'mwo aguto kig Herootol wagwolago Jeruusalem tovi yagwoto abomwalokaikono.

8Toro mwaloduke toollomno morapino sumaiyokwe a'mwo aguto kig Herootol Jisasollu wono'no ilaiyo bwotonyo sokaikono. Su tov aro tovinokwono. Jisasolluro womdo yodowodo tovino me'no kuu'nyajukekono. Toro wuu'nodowodo tool Jisasolluro duuwallo jurogudo puruvi wonyo'mo kwinyajukekono. Toro tovino tov manyu toga Herootol Jisasollu wonyo'mo kwinyajukekono. 9Toro tool Jisasollu yamuugojo bwotonyago ton kuudoganoka kuvi kuruv Jisasolno'gwowi yogalo puru'monodo kuruv muudokaikono. 10Aki pris mido mollomwalokwe toorogai'aro loowo tovino pi'mwo kuudokwe toorogai'aro tooro wobo toru boda'mno sumaveyokwe Jisasollu mojokuu'noso'moneyokwe yogalo tov kaveno kuudoporomaiyo. Toro kworo kuruv guureji kuunodo amojokuu'nosoporogano. 11Aki Herooteke'aro gamoro a'mwo mollurogudo pworogai'aro tooro Jisasollu kaiyako igolo'mno aki burolpakuto amollovakuroporogano. Toro mollovaku'no sumaveyokwe Jisasollu youro sugumaluko togai mollubweyo'mno Pailatollomno aikomgu amorapiyoporogano. 12Muudu'nodo toga Herooteke'aro Pailateke'aro tooral ikomago sunyajulorakono. Toro kworal kuruv iruko su tollugwojuno'gwowi a'mwo aguto su tooral ibwoto'nyo sumo'nugovlavolorakono.

Pailatol Jisasollu movoromiyoguroptowosupino'moneyokwe adomdukuurosoka tovinokwono

(Matyuu 27:15-26; Mak 15:6-15; Joon 18:38—19:16)

13Toro te a'mwo aguto Pailatol pris mido mollomwalokwe toorogai'aro a'mwo aguto toorogai'aro a'mwo abolo togai'aro ton abi'bwo'nupureyokwe adomarokaikono. 14Toro doma'no sumaiyokwe a'mwo toorai aro kuudokaikono. “Kevu a'mwo akallu miyomno amokamwa'juporekikono. Toro amokamwa'jupo su toolluno nyudodupudorekikono. “Oo su tool kemoro kantri tovi kisuvolo ikullupino'moneyokwe a'mwo pworai puuto kaiya'nodo tomuu'aro mollubworomokavla'mdowodekono.” Kevu su toro nyudodupudorekikono. Toro kuvi kuruv neya duu'nyulo. Kevu a'mwo akalluno ma'no ma'no pasudo pworaino mojokuu'nosodopure kuvi kuruv nuvno'gwowi kemoro sumdo tovi kuu'maiyo toru me'no agallainyubwo'mwa'jekono. Toro agallainyubwo'mwa'jo toga a'mwo akal ma'no ma'no nonaguto toollu so'mgonoma'mwa'jekono. 15Aki a'mwo aguto Heroot kwol kuruv a'mwo akalluno, “Oo ma'no ma'no nonagutoldeyo,” dodowo nemiyomno aki aiko te amonekuwopiyamokaikono. Toro te neya duu'nyulo. A'mwo su tool neya bolono'moneyokwe pasudo puru'monodo kuruv miyodowodekono. 16-17Toro te nuvu a'mwo su toollu movagu'mwojo'mi nomollurolowapimekono.” Kuudokaikono.

18Pailatol toro kuudoka kuvi kuruv yiuwi'nokai kwolallo ton guureji aro adelowo'nugoulapogano. “Guu a'mwo su toollu neya yoromiyoso'bi kuruv Barabasolluno'gwowi julomollurolovonekwopiyabono.” Adelowo'nugoulapogano. 19Barabasol Roomda'ai tooro mido mollomwalo biyodopure toorai molo kwiyajukekono. Toro toollu kavlo puruval tovalluda'ai wuulo killo'mo ago tovi aulomerosopekono. Kavlo puruv a'mwo su tool Roomda'ai toorai wagwolago Jeruusalem akuuto toru molo kwiyajukekono. Aki puruv a'mwo pwollu me'no aromiyosoka tovino aulomerosopekono. 20Kwolallo ton Barabasollu ilomollurolowopiyabiyo'mo wuudodopure kuvi kuruv Pailatolno'gwowi Jisasollu irolowapiyo'moneyokwe kwinokaikono. Toro tool kwolallo tonyu aki aiko te kuudoganokaikono. 21Toro kuudoganoka toga kwolallo ton deko kuuno adelowo'naropogano. “A'mwo su toollu i'noguropte tovi domovoromiyoguroptowosono!” Adelowo'naropogano.

22Toro delowo'na'dopure toga Pailatol aki aiko te pugasalpuga aro kuudokaikono. “A'mwo akal burowo'nyo ma'no ma'no pasudo tov sokaldeyo? Aki a'mwo akal neya bolono'moneyokwe pasudo puru'monodo kuruv miyodowodo toollu so'mgonoma'mwakono. Toro tovino tov nuvu a'mwo su toollu movagu'mwojo'mi nomollurolowapimekono.” Kuudokaikono. 23Pailatol toro kuudoka kuvi kuruv kwolallo ton deko bwotonyo aro adelowo'nugoulapogano. “A'mwo su toollu i'noguropte tovi domovoromiyoguroptowosono!” Aki kwolallo su tonyuro yogaimaguurai tov Pailatolluro yogalo doduke tovi abu'duvolomarokakwono.

24Toro bu'duvoloma'duke tovino tov Pailatol aro adomdukuurosokaikono. “A'mwo abolo ton guureji anyudoganmapo tovi neya uumjuno'mi a'mwo akal neya bolonekono.” Adomdukuurosokaikono. 25Toro domdukuurosuno sumaiyokwe a'mwo wuulo killo'mo ago tovi aule'nallajuko toollu amollurolowapiyokaikono. A'mwo su tool kavlo puruval tovalluda'ai wuulo killo'mo ago tovi aulomerosopekono. Puruv a'mwo su tool Roomda'ai toorai wagwolago Jeruusalem akuuto toru molo kwiyajukekono. Aki puruv a'mwo pwollu me'no aromiyosoka tovino amerosopekono. Toro te a'mwo, “Julomollurolovonekwopiyabono,” kuudopo su toollu sulomollurolowopiyabokaikono. Toro kuvi kuruv Jisasolluno'gwowi a'mwo mollurogudo tooravuro ato tovi amorubweyokaikono.

Jisasollu i'noguropte tovi amovoromiyoguroptowosopo tovinokwono

(Matyuu 27:32-44; Mak 15:21-32; Joon 19:17-27)

26Toruda'ai a'mwo mollurogudo pworo Jisasollu bomokalokwino sumaveyokwe toga a'mwo wagwolago Sairinida'ai pwol womnago tomuuda'ai bo'no wagwolago Jeruusalem'no kuullo'mo yoduke toollu abilluru'maroporogano. A'mwo su toolluno yovo tov Saimoonolekono. Toro toollu a'mwo mollurogudo tooro Jisasollu movoromiyoguroptowoso'moneyokwe i'noguropte tov amokwanoneyokwe kuubweyoporogano. Toro kuubweyopo tool mollukwo'mno sumaiyokwe Jisasollu kuumjunokaikono.

27Toro uumjunoduke toga a'mwo abolo kwolallo bwotonyago togai'aro kuumjunopogano. Aki abolo bwotonyago pun Jisasolluno kalo wino'mno kumdaillo aduumjunopogano. 28Toro duumjunodopure kuvi kuruv Jisasol abolo su tonyu gunyubworoonyuno sumaiyokwe aro kuudokaikono. “Wagwolago Jeruusalemda'ai taiyobuuravoo, kevu numino kumdo nodumwalpiyo. Toro kuvi kuruv kevnokwe togaikike'aro kemi kwoloraiyo togai'aro togaikulluno kumdo neya dodogaulo. 29Neya duu'nyulo. Lukomgu tabunyuwuulo pun abai'mopi toga aro dupinokwono. “Abolo kwolluko ton kemi kwolaikuto tonyu kwoloraiyo maulomna'dupudo su ton ilaiyo ipuro. Aki abolo amdokwe ton kwoloraiyo tonyu miyausodupudo kun kuruv ilaiyo ipuro.” Dupinokwono.

30 # Ado. 6:16 Aki su toro toga a'mwo abolo ton muumuudo toorai aro wuudupinogano. “Oo muumuudo toorekul nemi bwolobu'duvolonekumallulo.” Dopi aki muumuudo kula'nyo toorai, “dobwosonekumallulo.” Wuudupinogano. 31Kevu kuudo neya jaullulo. Nuu ma'no ma'no maiyo toonyu iko aiyo pwol duko manodowodo toolbusuko imo'nodumdonyugono. Toro imo'nodumdo kwonyu kuruv mi kaiyako sanyugolmwakovo. Kevu ma'no ma'nodokwe togaikulno'gwowi iko yalukullo pworo duko yere nosodowodo toorobusuko imo'nodupudogaikikono. Toro togaikullu kaiyako saikullugolpi toga mi sanyugolmwakopo tovi nuuwolowonokwono.” Kuudokaikono.

32Toruda'ai a'mwo mollurogudo tooro a'mwo kirovanyuvanyokwe pworallu Jisaseke avalo toga romiyoso'moneyokwe amogaibworomokavlavoporogano. 33Toro mogaibworomokavla'mno sumaveyokwe kwako puvi ai'movoporogano. Kwako su tovino yovo tov Mibodoptovo dodupudorukono. Toro towai ai'movopo toga Jisasollu amovoromiyoguroptowosoporogano. Aki kirovanyuvanyokwe su toorake'aro amovoromiyoguroptowosoporogano. Toro tooralluro pwollu Jisasolluro anatomgu pwollu kwonamomgu amovoromiyoguroptowosoporogano. 34#Da'bk. 22:18Jisasollu i'noguropte tovi toro movoromiyoguroptowosodopure toga Jisasol Gooti toollu aro kuudokaikono. “Mi Nyunumiyagoloo, a'mwo su tooro mi kaiyako sanyugolmwakopo tovino kuudo nonagutorogano. Toro tovino tov guu kemoro ma'no ma'nodo tovuro kirumwallo tovi yiunokuudo modukwopibinekugono.” Kuudokaikono. Toro wuujuno sumaiyokwe toga a'mwo mollurogudo tooro gamoro youro ton mojuru'bworoso'mno gadool gadool marono'mdukoneyokwe tovino sumwonyo puruv soporogano.

35 # Da'bk. 22:7 Aki a'mwo abolo ton wobo toru bodavo'mno amuugonallajupogano. Toro kuvi kuruv Juu tooravuro mido mollomwalokwe toorono'gwowi Jisasolluno burolpakuto mollovakuro'mno aro kuudoporogano. “A'mwo akal a'mwo abolo punyuno'gwowi kwiyo'mwojajukekono. Toro tool Gooti toolluro wiyo'mwojo'moneyokwe ajesoka Krais kuunodo toolno'juki gavnokwe tekwo neya wiyo'mwoju'nono.” Adomuugonallajuporogano. 36Aki a'mwo mollurogudo kworo kuruv Jisasolluno burolpakuto amollovakuroporogano. Toro mollovaku'no sumaveyokwe wobo toru bo'mno wain wonyo puruv wuullomaiyo tov Jisasol anoneyokwe kwiyoporogano. 37Aki toro tooro burolpakuto aro amollovakuroporogano. “Guu Juu tooravuro a'mwo aguto kig kuunodo tookuno'juki guvnokwe tooku duuwiyo'mwoju'nono.” Amollovakuroporogano. 38Aki toro tooro ipaiyo puusi aro sakwolloporogano. “A'mwo akal Juu tooravuro a'mwo aguto kig tookono.” Su toro yakwolluno sumaveyokwe ipaiyo su toul Jisasolluro mido tovi muunyu toru aromiyoguro'mwojosopokwono.

39Toro ino sumaveyokwe a'mwo kirovanyuvanyu tooralluro pwol i'noguropte puvi kworoka su tool Jisasollu burolyogalo aro kuudokaikono. “Guu Gooti toolluro kwolomonekwopiyaboka Krais tookuno'juki guvnokwe tooku duuwiyo'mwoju'nono. Aki na kwonallu kuruv donakullo'mwojono.” Kuudokaikono. 40Burolyogalo toro kuudoka kuvi kuruv i'noguropte puvida'ai a'mwo gabovo pwolno'gwowi aro aduullukurokaikono. “A'mwo akallu jul'nyo kuubwemwakopo tov guu kwekuji kuruv aval'no agubwemwakovo. Toro te guu nobollo'mo sadokuudo tooku Gooti toolluno luko neya jono. 41Namoro kirumwallo ama'mwakuuwolo to'gwowi nami ma'no ma'nodo tovida'ai kuvi kuuno ama'mwakuuwolo. Toro kuvi kuruv a'mwo akalno'gwowi ma'no ma'no puru'monodo kuruv miyodowodekono.” Kuudokaikono. 42Toro wuujuno sumaiyokwe aki Jisasollu aro kuudokaikono. “Oo guu aguto kig tookujuro mido mollomwalo toru'no sulai'mo'bi toga mino kuudo nyallulo'gwonbiyo.” 43Toro kuudoka toollu Jisasol kuudokaikono. “Nebal'no gudumo'mokwono. Anuugwo toga guvu ago sugumaluko kuunodo toru nuuge nomwalosunekugono.” Kuudokaikono.

Jisasol yiuno'no aboloka tovinokwono

(Matyuu 27:45-56; Mak 15:33-41; Joon 19:28-30)

44Toruda'ai kuujunapto kuunodo toga yiuwi'nokai kwako tomuu dugumdo kimwonyopiyo'no kuujo sumdo pullapullu kuuwolo'nokakwono. 45Kuujo toolluro bako tov dugumdo kimwonyopiyoduke toga Jeruusalemda'ai Gooti toollu ilomoropiyo'moneyokwe ago tovi anakuuto tomuu Gooti toolluro pwekwapto kuunodo toru'no youro kudo'aiko allukurosungiko tov akuuto toru'aro rojomokwolabo'no imgu amgu kworokakwono.#Moll. 26:31-33 46Toro imo'nyuno sumaiyokwe toga Jisasol deko guureji aro adokaikono. “Mi Nyunumiyagoloo, moro kuullo tool gumoro ato tovi agubwemono.” Toro juno sumaiyokwe toga yiuno'no abolokaikono.

47Yiuwi'nokai su toro wimo'noduke tonyu a'mwo mollurogudo toorai mollubworomokwanyokwe pwol wobo toru amuugonodaiyajukekono. Toro tool Gooti toollu ilomodomoropiya'no aro adokaikono. “Oo a'mwo akal ma'no ma'no puru'monodo kuruv miyodowodekono.” Adokaikono.

48Toro juno sumaiyokwe yiuwi'nokai kwolallo bwotonyago su'bwo'nyajupo ton judo pumgu'aro imo'noduke su tovi amuugonallajupogano. Me'no muugona'no sumaveyokwe kemi ago tomuuno aikomgu avlavopogano. Toro ton kalo bwotonyo winodopure ton kevnokwenyuro kupolmdo tovi iwago aromi'nugovlavopogano. 49#Lk. 8:2,3Aki su toro toga Jisasolluro ibwoto'nyo toorogai'aro abolo pugai'aro ton manyu toruda'ai amuugonallajupogano. Abolo su ton sumdomgu Jisasol Galili toru yomolloduke togada'ai kuumjunyajupogano.

Jisasol me'no aboloka toga gamoro kulako bwiyo tov a'mwo buuso puvi aulomorosopo tovinokwono

(Matyuu 27:57-61; Mak 15:42-47; Joon 19:38-42)

50Toruda'ai Jisasol me'no aboloka toga a'mwo pwol Pailatollomno abokaikono. A'mwo su toolluno yovo tov Joosepolekono. Toro tool Juu tooravuro wagwolago Arimatiyada'aiyekono. Aki a'mwo su tool kaunsel pwekono. Aki a'mwo sugudo su tool pasudo idopto'nodo tollovai kuumjunyajukekono. 51Toro kwol kuruv kaunsel su tooravuro Jisasollu kaiyako wiyo'mo yogalo jaunodopure tovino ilaiyo mwinyajukekono. Aki toro tool aguto kig Gooti toolluro mido mollomwalodowodo tov abai'mowo'ji tovino sogwollo ainyajukekono. 52Toro tool Pailatollomno kuuloda'mno sumaiyokwe aro auluudoganokaikono. “Jisasolluro kulako bwiyo tov nokwo nyabinekudukono?” Auluudoganokaikono. 53Joosepol me'no wuudoganyuno sumaiyokwe a'mwo bwiyo tool i'noguropte tovi wo'duke toollu molovomwogapiyo'no laplap wiya'jo abiyoka tokwe amoweyomgurosokaikono. Toro moweyomgurosuno sumaiyokwe a'mwo buuso puvi aulomorosokaikono. A'mwo buuso su tov a'mwo tooro sulo toollu adovoloumjosungiko tovi aulomorosokaikono. Aki a'mwo buuso aiyo su tovi a'mwo bwiyo pwolnodo kwollu kuruv yere maulomorosodopure su tovi aulomorosokaikono. 54Toro aulomorosoka iruko su tollugwo Juu tooro Sabat wobo toga nobai'mowono tovino'mo wosamujuko sovrowosajupollugwogano.

55Toro kuulomorosoduke toga abolo pun sumdomgu Jisasol Galili toru yomolloduke togada'ai kuumjunyajupo ton Joosepollu uumjuno'mno amuugonallajupogano. Toro ton a'mwo buuso su tovi wono'mno aki Joosepol Jisasolluro kulako bwiyo tov adado dukoulomorosadopiyokwe amuugonallajupogano. 56#Moll. 20:10Toro te abolo su ton kemi ago tomuuno aiko te plaino sumaveyokwe wobeya sudo kuunyokwe pauda tokwe'aro munollo tokwe'aro toval biyomaro'mno sovrowosopogano. Toro yovrowosuno sumaveyokwe iruko Sabat abai'movoka toga abolo ton Moosesolluro loowo tovi uumjuno'mno iruko to'no amwalopogano.

Currently Selected:

Luuk 23: SMB

Highlight

Copy