Luuk 24

Jisasol aiyo aiko te adukavoka tovinokwono

(Matyuu 28:1-10; Mak 16:1-8; Joon 20:1-10)

1Toruda'ai iruko Sande tollugwojuro lomwo iru'mago toga abolo ton wobeya sudo kuunyokwe pauda me'no amollovrowosajupo tonyu momwora'no sumaveyokwe a'mwo buuso sulpuuto tomuuno amokavlavopogano. 2Toro mokavla'mno sumaveyokwe a'mwo buuso su toru ki'movo'mno sulo toollu me'no ausogunyugolowosungiko toollu kwonopogano. 3Toro wonyuno sumaveyokwe abolo su ton a'mwo buuso sulpuuto tomuuno aulapogano. Toro kun kuruv Aguto Jisasolluro kulako bwiyo tovi mwonopogano. 4Su toro mwonopo tovino kuudo kwolallo yourukwapiyo'mno abolo su ton a'mwo pworal wobo toru da'mdole toorallu kwonopogano. A'mwo su tooralluro youro tov bako bwotonyo pwopiyoduke tokwe yesodole toorallu kwonopogano.

5Toro toorallu wono'mno luko amollosopogano. Aki luko mollosuno sumaveyokwe kemoro sumdomago ton kwako tovi kwolomuulo'naropogano. Abolo su ton toro wolomuulo'na'dopure tonyu a'mwo tooral aro kuudolorakono. “Kevu a'mwo aiyo amwalluko toolluno a'mwo me'no abollungopo tooravuro anakuuto akamuu buro'nyo'mo jo'mgonadokwovo? 6#Mt. 16:21, 17:22,23, 20:18,19; Mk. 8:31, 9:31, 10:33,34; Lk. 9:22, 18:31-33Kevu su toolluno a'mgono sadokwopo kuvi kuruv akawai mamwallo. Su tool sumdomgu me'no aikudoka kuvinono uumjunodowo aiyo aiko te me'no adukapsukekono. Aki toro tool sumdomgu kwako Galili tomuu kuuno somollajuko toga gamoro yogalo me'no aikujajuko tovino kevu aki aiko te kuudo neya jaullulo. 7Yogalo su tov arokwono. “A'mwo pworo nuu A'mwo Kwolaiyo Kuunodo toonyu galonumworaropi a'mwo ma'no ma'nodokwe tooravuro ato tovi manubweyopi i'noguropte tovi nomovoromiyoguroptovanubwepinonyugono. Aki toro toonyu iruko pullapullu me'no abawo'ji toga aiyo aiko te noduka'monyugono.” Su toro aikujajuko tovino kevu kuudo neya jaullulo.” Kuudolorakono.

8Toro kuudolo toga abolo ton aiko te aro kuudo sauropogano. Oo Jisasolluro yogalo anekujajuko su tov kuvideyo. Kuudo sauropogano. 9Toro yau'no sumaveyokwe a'mwo buuso sulpuuto su tomuuda'ai wuugollu'movo'mno a'mwo 11-pela kuurotokwe tooraiyomno avlavopogano. Toro plaino sumaveyokwe ki'movo'mno yiuwi'nokai kwimo'noka tonyuno kuudopogano. 10Kuurotokwe tooraiyomno kuuguudo amokabopo su tonyuno yovo tov arogano. Makdalada'ai Mariyakwe'aro Joowanokwe'aro Jemsollu ganeyago Mariyakwe'aro aki abolo pugai'aro togano. 11Toro ton kuuguudo tokwe mokabino sumaveyokwe kuurotokwe toorai kuudopokwono. Toro kuvi kuruv kuurotokwe su tooro kuuguudo tovi wuu'nyuno sumaveyokwe aro kuudo sauroporogano. Oo yasuwa'yogalo to'no donekudadokwovo. Su toro kuudo yauro'mno kuuguudo su tovino, Nebalo'mdeyo, kuudo muubweyoporogano. 12Toro kuvi kuruv Pitalno'gwowi bolokwino sumaiyokwe a'mwo buuso sulpuuto tomuuno kano kano avlavokaikono. Plaino sumaiyokwe a'mwo buuso toru ki'movo'no suduko inuguto'na'no sumaiyokwe a'mwo buuso sulpuuto tomuu auloonyopiyokaikono. Toro auloonyopiyoka toga Jisasollu amoweyomgurosopo laplap to'no wo'duke tovi auloonyopiyokaikono. Toro kuuloonyopino sumaiyokwe a'mwo buuso sulpuuto su toru wuugollu'movo'no gami ago tomuuno aikomgu abokaikono. Toro tool puuto tomuu bino sumaiyokwe toga, buro'nyo sumo'numoka'mdukoneyokwe tovino kuudo kwolallo sou'movlavokaikono.

A'mwo pworal wagwolago Emeyos'no puuto tovi'aro plavolno Jisasollu kwonolo tovinokwono

(Mak 16:12-13)

13Iruko su tollugwoji Jisasolluro uumjunyokwe tooraida'ai pworal wagwolago Emeyos'no puuto tovi'aro kwokado avlavolorakono. Wagwolago Emeyos su tovi ki'meyo'mo tov wagwolago Jeruusalemda'ai 11 kiloomita kwokado plavo'bullu ki'movabullunorakono. 14Toro tooral kado plaino sumaleyokwe yiuwi'nokai me'no sumo'nugelabumwa'jupo tonyuno kuuguudo amjodumovlavolorakono. 15Toro mujodumovlavolno yiuwi'nokai sumo'noka tonyuno ajainyubworolorakono. Toro tooral puuto tomuu kuuno dumovla'mdole toga Jisas gavnokwe tool wobo toru bino sumaiyokwe a'mwo su toorake avlavokaikono. 16Toro kuvi kuruv a'mwo su tooralluro kuudo tov mausoda'mduke tovino tov a'mwo su tooral Jisasolluno miworovomarolorakono.

17Toruda'ai Jisasol a'mwo su toorallu aro samuugojokaikono. “Kevu puuto tovi pla'mdubulo toga buro'nyo kuuguudo tovino domjodumovla'mwakulo?” Samuugojokaikono. Toro kuudoka tovi wuu'nyuno sumaleyokwe kuulodavolno kumjujo kulako amoropiyolorakono. 18A'mwo su tooralluda'ai pwolluno yovo tov, Kliyoopasolekono. Toro tool Jisasolluro yamuugojo kwiyoka su tovi aro kuudokaikono. “A'mwo abolo bwotonyago ton go'no go'nodo tomuuda'ai bodupu wagwolago Jeruusalem tovi iru'mato abomwakovo. Toro ton yiuwi'nokai sumo'nugelamwa'juko su tonyuno kuudo me'no souroma'mwakopogano. Toro kuvi kuruv yiuwi'nokai wagwolago Jeruusalem su tovi sumo'nugelamwa'juko tonyuno yiuno guu judo tookuno kuudo miyouroma'mwakudo tov adadomgu'aro'mdukono?” Kuudokaikono.

19Kliyoopasol toro kuudoka tovi Jisasol aro kuudokaikono. “Guu su toro sumo'numwa'juko tonyuno donyudono.” Kuudokaikono. Toro kuudoka tovi aro kuudolorakono. “Navu Nasaretda'ai Jisasollu kwimo'numwa'juko tonyuno amjodumovla'mwakuuwolo. A'mwo su tool proofet pwekono. Toro toolluro womdo tov yiuno jurogudo to'no sajukekono. Aki gamoro yogalo kuruv guureji to'no amoruujajukekono. A'mwo su tool Gooti tooke'aro yiuwi'nokai a'mwo abolo togai'aro tonyuro sumdo tovi tono tono sajukekono. 20Toro toollu nemoro pris mido mollomwalokwe tooro noromiyoso'moneyokwe Roomda'ai tooravuro ato tovi amorubwemwa'jupekono. Toro morubweno sumaveyokwe a'mwo su toollu i'noguropte tovi amovoromiyoguroptowosumwa'jupekono.

21A'mwo su toolluno nevu aro kuudo saullajuwonogano. Oo a'mwo akal nevu Isuraiyol tonol Roomda'ai tooravuro mido mollomwalo tovi dolago tomuu mwalodowado tonollu nobomollurolovonekumokalokwonoldeyo. Kuudo saullajuwonogano. Aki puruv arokwono. A'mwo su toollu me'no aromiyosumwa'jupo togada'ai anuugwo iruko naba 3 tollugwo me'no abai'mopso. 22Toro te nevuge avalo tonolluda'ai abolo punyuro yogalo abanekudumapo tovino nevu luko morumoukuropi sumawonogano. Abolo su ton lomwo iru'mago toga a'mwo buuso sulpuuto tomuuno avla'mapogano. 23Toro pla'mdupu gamoro kulako bwiyo tov a'mwo buuso tovi mwo'duke tovi kwonmapogano. Toro ton aikomgu bodupu aro anekudumapogano. “Ensel pworal nemi biyanekulo'nodubul aro anekudumalorakono. “Oo Jisasol aiyo amwallo,” anekudumalorakono.” Abolo ton toro anekudumapogano. 24Aki nemida'ai a'mwo pworo a'mwo buuso sulpuuto su toru'no pla'mdupu abolo tonyuro anekudumapo su tov kuvinono kwonmaporogano. Toro kuvi kuruv Jisasolluno'gwowi ku'nono mwonmapekono.” Kuudolorakono.

25Toro wuujuno sumaleyokwe Jisasol a'mwo su toorallu aro kuudokaikono. “Kevu proofet tooravuro yiuwi'nokai yogalo ajakwollajupo tonyuno kemi poowokalago togai kuudo muubweyodubulorakikono. Oo kev toorakul a'mwo kuudo maiyokwe toorakulbusuko imo'nodubulorakikono. 26Kevu aro tovino kuudo miyouroma'mwakulorakuldukono. Gooti toolluro wiyo'mwojo'moneyokwe ajesoka Krais tool danyu'nyuwuulo ton me'no subwosuno'ji toga'no gami bako bwotonyo tomuu kuulomwalonekono. Su toro tovino kevu kuudo miyouroma'mwakulorakuldukono.” Kuudokaikono. 27Toro wuujuno sumaiyokwe aki Jisasol Gooti toolluro yogalo tov Mooseseke'aro proofet toorogai'aro tooravuro ajakwollajupo tonyuda'ai sodubwosumelabokaikono. Toro yodubwosumelabino sumaiyokwe yiuwi'nokai gavnokweyolluno kavlo go'no go'nodo ton kuu'maiyo toru'no abomollolupto'nubweyokaikono.

28Toro tooro puuto tomuu kuuno plaino sumaveyokwe a'mwo su tooral wagwolago au'nugovlaiyajulo su tovi wobo toru ai'movolorakono. Toro ai'movolo kuvi kuruv Jisasolno'gwowi puuto tovi kuuno plaiyo'mo kwinokaikono. 29Toro toollu a'mwo su tooral guureji aro kuudolorakono. “Iruko akallugwo nobawiyo'mo sadopiyo. Aki aga sula'dugumdo togakono. Toro te guu navuge neya mwalbinekugono.” Toro kuudolo tovi Jisasol a'mwo su toorake mwallo'moneyokwe ago tovi aulokaikono.

30Toro kuulno sumaiyokwe wosamujuko nonyo'mo toga Jisasol bret tov malluno sumaiyokwe Gooti toollu, “Nenyoo,” subusu'nyogalo wuudo'no abuudovokaikono. Buudeno sumaiyokwe a'mwo toorallu yado kuumwodeyokaikono. 31Jisasol toro yoduke toga a'mwo su tooralluro kuudo tov kuusoda'mno sumaiyokwe Jisasollu yiuno kuu'maiyo toru'no suworovomarolorakono. Toro suworovomarolo toga Jisasol yere sumagwo'nokaikono. 32Jisasol me'no imagwo'nyuno sumaiyokwe toga a'mwo su tooral sajunolorakono. “Oo nebalokwono. Navu puuto tomuu bodowole toonallu Gooti toolluro yogalo tovino nakudumovla'mdowo kavlo ton kuu'maiyo toru'no abomollolupto'nonakubwemokakwono. Kavlo su tov namoro poowokalago tovi ajuulovonakubwemokakwono.” Sajunolorakono.

33Toro yajunyuno sumaleyokwe kuga'gwo kuuno ilodavolno wagwolago Jeruusalem'no aikomgu avlavolorakono. Toro tooral plaino sumaleyokwe wagwolago su tovi ai'movolorakono. Toro ki'mo'mno sumaleyokwe toga 11-pela kuurotokwe toorogai'aro aki kuurotokwe toorogai a'mwo abolo su'bwo'nomwallajupo togai'aro tonyu yo'mgonomarolno kuuru'marolorakono. 34Toro kuuru'marolo toorallu aro kuudoporogano. “Aguto tool aiyo aiko te kuvinono me'no aduka'mokaikono. Aki me'no duka'mdowo Saimoonollu me'no kwiyalo'numokaikono.” Kuudoporogano. 35Toro wuujuno sumaveyokwe a'mwo su tooral kevnokwerallu puuto tomuu kwimo'noka tovino kuudolorakono. Aki Jisasol bret tov abuudovoka toga gamino kuu'maiyo toru suworovomarolo kuvino kuruv kuudolorakono.

Jisasol gami uumjunyokwe toorai kwiyalo'noka tovinokwono

(Matyuu 28:16-20; Mak 16:14-18; Joon 20:19-23)

36Toro tooral kuuguudo kuuno wuudodole toga Jisasol a'mwo su toorai bwiyalo'no'no kemoro akuuto toru aulodavokaikono Toro kuuloda'mno sumaiyokwe aro kuudokaikono. “Oo Gooti tool kemi sumwoluko kavo wosunyo'mo tov nekubwemwalonekono.” 37Toro kuudoka kuvi kuruv a'mwo su tooro morumoukuropiyo'mno luko bwotonyo soporogano. Aki toro tooro Jisasollu wonyuno sumaveyokwe aro kuudo sauroporogano. Nevu kumamdo pwollu doonmwakuuwono. Kuudo sauroporogano. 38Su toro kuudo yau'dopure toorai Jisasol aro kuudokaikono. “Kevu buro'nyo'mo luko jadokwovo? Aki kemoro poowokalago togai kuudo noullo maullo sau'mwakopo tov buro'nyo'mo'mdukono? 39Kevu moro ato tovake'aro suvlo tovake'aro tonyu doonyulo. Nuu kwonyugono. Kevu moro kulako tovi nubogai'nopi donuwonyulo. Kevu moro kulako tovuro muugupto togai'aro yogudo togai'aro tonyu kuu'maiyo toru nuwonodupudo kuvi kuruv kuullo toorono'gwowi muugupto togai yogudo togai nonagutorogano.” Kuudokaikono.

40Jisasol toro wuujuno sumaiyokwe gami ato tovake'aro suvlo tovake'aro tonyu kuuduuwallokaikono. 41Toro wuuduuwalloduke tovi wono'mno ilaiyo bwotonyo soporogano. Toro kworo kuruv mollolokurosi bwotonyo sopo tovino tov kuudo yere muubweyoporogano. Toro yodopure toorai Jisasol aro kuudokaikono. “Akawai kevu wosamujuko pun dukomworakovo?” Kuudokaikono. 42Toro kuudoka tooro domwoga pwekwo duko tovi me'no aillungiko tov kwiyoporogano. 43Toro kwiyopo tovi malluno sumaiyokwe amanokaikono. Toro noduke toollu amuugonaroporogano.

44Jisasol toro nyuno sumaiyokwe aki aro kuudokaikono. “Sumdomgu nuvu kevuge amwallajo toga aro me'no aikujajonyugono. “Yiuwi'nokai mino yogalo tov Moosesolluro loowo tokwe'aro proofet toorogai'aro Da'buukiyo tokwe'aro tonyuro ajakwollajupo su ton suuwiyo neya imwojupinogano,” aikujajonyugono.” 45Jisasol toro wuujuno sumaiyokwe Gooti toolluro yogalo tonyuno kavlo tov kuu'maiyo toru'no youromapino'moneyokwe a'mwo su tooravuro kuudo ton ausubweyokaikono. 46Toro kuusubweno sumaiyokwe aro kuudokaikono. “Aiyoga Gooti toolluro yogalo puruv aro sakwollungikokwono. “Gooti toolluro wiyo'mwojo'moneyokwe ajesoka Krais tool danyu'nyuwuulo ibwosunowo'ji bolonekono. Toro abolo'ji su tool iruko pullapullu me'no abawo'ji toga aiyo aiko te nodukawonekono.” Sakwollungikokwono.

47Aki yogalo puruv aro sakwollungikokwono. “Yiuwi'nokai a'mwo abolo Gooti toollomno kuudo souragunyumo'nupi su ton Gooti tool kemoro ma'no ma'nodo tovuro kirumwallo tov nomodukwopiyonekono. Yogalo su tov Krais toolluno yovo tovida'ai jurogudo tokwe nomodomollupinokwono. Muudu'no wagwolago Jeruusalemda'ai modomworaropi yiuwi'nokai kantri tonyu nomodomollupinokwono.” Su toro sakwollungikokwono. 48Toro te kevu yiuwi'nokai su tonyuno kuu'maiyo toru bomollolupto'nubweyo'moneyokwe neya domoruudomollogaulo.#Mt. 28:19; Mk. 16:15; Krt. 1:8

49Neya duu'nyulo. Moro Nyunumiyago tool gamoro Kuullo toollu kemi wolomekwopiyabiyo'mo tovino subuu'yamju me'no aikullajukekono. Toro te nuu gamoro Kuullo su toollu kemi noolomekwopiyamonyugono. Gooti toolluro Kuullo su tool wolabowo'ji muunyu kai'muuda'ai jurogudo aikubweyo'ji su tov kemoro poowokalago tonyu noullo'movaikwopiyonokwono. Toro kuvi kuruv Gooti toolluro Kuullo su tool yere mwolabodowo'jure akaga kevu wagwolago akavi sogwollo neya denomwalogaulo.” Kuudokaikono.#Krt. 1:4-5

Jisasol muunyu i'muuno suloka tovinokwono

(Mak 16:19-20; Kuurotokwe 1:9-12)

50Jisasol toro wuujuno sumaiyokwe gami uumjunyokwe toorai wagwolago Jeruusalem kwa'mgu tomuuno bomollubworomokalokwo'no wagwolago Betani tovi wobo toru'no amollubworomokavlavokaikono. Toro mollubworomokavla'mno sumaiyokwe gami ato tov muunyu kai'muuno bomokaila'no yogalo sugudo tov aro aduubweyokaikono. “Gooti tool ilaiyo nyaikullugolmwalonekonoo.” Aduubweyokaikono. 51Toro me'no duubweno sumaiyokwe Jisasol gami uumjunyokwe su toorai wuugollu'movo'no muunyu kai'muuno sulokaikono. Toro iloduke toollu Gooti tool gami ago muunyu i'muuno amokailokaikono.#Krt. 1:9

52Toro mokailno sumaiyokwe gamoro uumjunyokwe tooro Jisasolluno ilomodomoropiya'mno wagwolago Jeruusalem tovino aikomgu avlavoporogano. Toro plaino sumaveyokwe ilaiyo bwotonyo tokwe ai'movoporogano. 53Me'no ki'mo'mno sumaveyokwe yiuwi'nokai iruko toga Jeruusalemda'ai Gooti toollu ilomoropiyo'moneyokwe ago tovuro agwapto tovi kuulodapu Gooti toolluno yovo tov ilomodomoropino ilomodomoropino sumovlaiyajuporogano.

Currently Selected:

Luuk 24: SMB

Highlight

Copy