Luuk 7
7
Jisasol a'mwo aguto pwolluro ki'nato womdokwe pwekwoji sukuloka tovinokwono
(Matyuu 8:5-13)
1Toruda'ai Jisasol a'mwo abolo ton kadu'molo yodopure tonyu kuuguudo tokwe kuu'maiyo toru sodubwosopiyokaikono. Toro me'no yodubwosopino sumaiyokwe wagwolago Kapurniyam'no avlavokaikono. 2Wagwolago su tovi Roomda'ai a'mwo mollurogudo pworai mollubworomokwanyokwe pwol amwallajukekono. A'mwo mollubworomokwanyokwe su toolluro ki'nato womdokwe pwekwo suvlato amuullugolopingikekono. Toro amuullugolopingiko su tekwo nobollo'mo sokaikono. Aki ki'nato womdokwe su tekwo a'mwo aguto mollubworomokwanyokwe toolluro poowokallumdo kwimo'nyajukekono. 3Toro te a'mwo mollubworomokwanyokwe su tool Jisasol noboduke toolluno me'no wuu'nyuno sumaiyokwe toga gami ki'nato womdokwe tekwoji Jisasol neya ikulono'moneyokwe kwinokaikono. Toro tool Juu tooravuro mido mollomwalokwe pworo Jisasollu neya wuudoganpino'moneyokwe amorapiyokaikono. 4Toro amorapiyoka su tooro Jisasollu ki'mo'mno sumaveyokwe guureji aro ajugonoporogano. “A'mwo mollubworomokwanyokwe su tool sugudekono. Toro toolluno tov guu wiyo'mwojo'mo tov ilaiyokwono. 5Aki a'mwo aguto su tool nemoro kantri akavida'ai Juu a'mwo abolo tonolluno kalo buuropino winodowodekono. Aki toro tool wagwolago akavida'ai nevu Juu toonolluro i'bwo'nyago tovi a'mwo su tool amodokakwono.” Ajugonoporogano.
6Toro ajugonopo tovi Jisasol a'mwo su toorogai avlavokaikono. Toro plaino sumaveyokwe ago tovi wobo toru ki'mo'mdopure toga a'mwo mollubworomokwanyokwe su toolluro ibwoto'nyo amoropiyaboka pworo puuto toru abuuru'maroporogano. Toro tooro buuru'ma'no sumaveyokwe a'mwo aguto toolluro mago tovida'ai mollodavo'mno Jisasollu aro kuudoporogano. “Agutoloo, nuu tekwonyu nyo'mwojo'moneyokwe guu womdo bwotonyo nyumo'na'biyo. Nuu ilaiyekwonyumaiyo. Toro tekwonyuno tov guu Aguto tooku moro ajulmdo tovi dolago tomuu kuulomwallo'mo tov nuu ilaiyekwonyumaiyo. 7Toro tekwonyuno tov nuvnokwe toonyu gumiyomno mabumekwonyugono. Toro kuvi kuruv guu yiuno yogalo to'no adubwebi tov moro ki'nato womdokwe tool nokwo ikulnonekono. 8Moro yogalo agudumo su tov aro tovinokwono. Nuu kwonyu kuruv a'mwo aguto pwollu dolago tomuu mwalodumdonyugono. Aki a'mwo mollurogudo pworo mi dolago tomuu mwalodupudorogano. Toro tooraida'ai pwollu nuu, “Dovlavono,” kuudumi tov kuvinono novlawonekono. Aki pwollu, “Dobono,” kuudumi tov kuvinono nobwonekono. Aki moro ki'nato womdokwe pwollu, “Guu su toro neya jono,” kuudumi tov kuvinono yonekono. Toro te guu yiuno yogalo to'no adubwebi tov moro ki'nato womdokwe tool nokwo ikulnonekono.” A'mwo aguto toolluro mago tovida'ai mollodavo'mno su toro kuudoporogano.
9Toro kuudopo tovi Jisasol a'mwo su toolluro yogalo tovi wuu'nyuno sumaiyokwe morumoukuropi sokaikono. Toro tool kwolallo uumjunodopure tonyu gunyubworoonyuno sumaiyokwe kuudokaikono. “Aro ikudumo'mokwono. Nuu yiuwi'nokai kwako Isuraiyol tomuu yomollodumdo kuvi kuruv a'mwo kuudo pi'mwono nubweyodowodo akalbusuko pwollu miyo'mgonoma'dumdonyugono.” Kuudokaikono. 10Toro wuujuno sumaiyokwe a'mwo mollubworomokwanyokwe toolluro amoropiyaboka su tooro aikomgu plaino sumaveyokwe kemi a'mwo aguto toollu kuuru'maroporogano. Toro tooro a'mwo ki'nato womdokwe tekwo ilaiyo aiko te me'no sukulnoka toollu kwonopekono.
Jisasol abekanyo pubuulluro kwolaiyo toollu aiyo aiko te amodukavoka tovinokwono
11Iruko aikomguda'ai tollugwoji Jisasol wagwolago puvino avlavokaikono. Wagwolago su tovino yovo tov Nainovokwono. Toro pla'mduke toga gamoro uumjunyokwe toorogai'aro a'mwo abolo kwolallo bwotonyo togai'aro ton kweke avlavopogano. 12Toro plaino sumaveyokwe Jisasol wagwolago tovi kuullo'moneyokwe noullo tovi wobo toru ai'movokaikono. Toro ki'mo'mduke toga a'mwo pworo wagwolago su tovida'ai a'mwo bwiyo pwollu bomokalokwodopure toorai kwonokaikono. A'mwo bwiyo su tool abekanyo pubuulluro muugunyekono. Abekanyo su tobuul kwolaiyo gabovo pworogai'aro nonagutokwono. Aki abekanyo tobuulluro muugunyo pwolnodo su tool me'no abolokaikono. Toro te abekanyo su tobuuke'aro a'mwo abolo kwolallo abomokalokwopo togai'aro su ton kula'nyonmaiyo. 13Toro ton bomokalokwodopure toga Aguto tool abekanyo su tobuullu wonyuno sumaiyokwe kalo wino'no aro kuudokaikono. “Guu kumdo madubinono.” Kuudokaikono. 14Toro wuujuno sumaiyokwe a'mwo nobomokalokwodopure toorai wobo toru uuwo'no i'buronyuko tovi gami ato tokwe kuubogai'nokaikono. Jisasol toro kuubogai'noka toga a'mwo abomokalokwiyajupo su tooro kuwai nokwo kuuloda'mno soporogano. Toro kuuloda'mdopure toga Jisasol a'mwo bwiyo toollu aro kuudokaikono. “Muugunyoloo, guu neya dodukavono, agudumono.” 15Jisasol toro kuudoka kuga'gwo kuuno muugunyo bwiyo su tool dukaino sumaiyokwe yogalo adodukovomwalokaikono. Toro dodukovomwalno sumaiyokwe Jisasol a'mwo muugunyo su toollu gami ganeyago tovuro ato tovi aikomgu kuubweyokaikono.
16Jisasolluro toro soka su tovino yiuwi'nokai ton wonyuno sumaveyokwe luko bwotonyo amorumoukuropiyopogano. Toro morumoukuropiyo'mno Gooti toollu ilomodomoropiyo'moneyokwe aro ajunopogano. “Oo proofet aguto pwol nemi akuuto toru me'no dobai'mo'mwallo.” Aki puruv aro ajunopogano. “Oo Gooti tool gamoro a'mwo abolo tonollu me'no abonekuru'ma'mwallukoldeyo.” Ajunopogano. 17Aki Jisasolluro soka su tovino kuuguudo tov yiuwi'nokai kwako Juudiya tomge'aro aki yiuwi'nokai kwako aiyowomno mwodovoma'dupudo tomge'aro tomuu abomje'nugoulokakwono.
Wonyo Galuvollokwe Joonol gamoro uumjunyokwe pworallu Jisasollomno amodapiyoka tovinokwono
(Matyuu 11:2-19)
18Joonolluro uumjunyokwe tooro Jisasolluro soka su tovino kuuguudo tov wuu'no'mno Joonollu abuudoporogano. 19Toro kuudopo tovi Joonol wuu'nyuno sumaiyokwe gami uumjunyokwe pworallu adomarokaikono. Toro toorallu gamoro yamuugojo purukwe Aguto Jisasollu wuudoganbulluno'moneyokwe amodapiyokaikono. Joonolluro yamuugojo su tov arokwono. “Gooti toolluro nekullo'mwojo'moneyokwe ajesoka Krais toolluno sogwollo kinodowado su tool guu kwekudukono? Oo a'mwo pwolluno sogwollo kuuno kinmwalanonoldukono?” 20Joonolluro yamuugojo su tokwe gamoro uumjunyokwe tooral momwora'no sumaleyokwe Jisasollomno abolorakono. Toro tooral Jisasollu aro abuudolorakono. “Wonyo Galuvollokwe Joonol gumi yamuugojo aro tokwe nami gumiyomno amanakwopiyamokanakono. Gooti toolluro nekullo'mwojo'moneyokwe ajesoka Krais toolluno sogwollo kinodowado su tool guu kwekudukono? Oo a'mwo pwolluno sogwollo kuuno kinmwalanonoldukono?” Kuudoganolorakono.
21Su toro kuudoganolo toga Jisasol a'mwo abolo nobolluwuulo go'no go'nodokwe togai'aro kuullo ma'no ma'no kuulomwalodupudo togai'aro bwotonyago tonyu sukullajukekono. Aki sumnowojokwe bwotonyago kunyu kuruv ato tokwe uubogai'noduke tovida'ai sumdo ainyajupogano. 22Su toro ikulno sumaiyokwe Jisasol Joonolluro uumjunyokwe su toorallu aro kuudokaikono. “Kevu Joonollomno aikomgu plavo'bullu yiuwi'nokai me'no kwonmalo togai'aro aki kaduko me'no kuu'numwakulo togai'aro su tonyuno neya duujulo. “A'mwo abolo sumnowojokwe ton sumdo kinodupudogano. Aki a'mwo abolo suvlato abolopingikokwe ton kado yomollodupudogano. Aki a'mwo abolo wonawiyo nobollokwe ton me'no ikulnodupudogano. Aki a'mwo abolo kadu'nollukullokwe ton aki aiko te kaduko wuu'nodupudogano. Aki me'no abollungopo ton aiyo aiko te duka'mdupudogano. Aki kuuguudo sugudo moruudodopure tovi a'mwo abolo apoo'nyaiyo tobuuro me'no wuu'nodupudogano. 23Aki a'mwo pwol mino buulo manugunyumopiyo'ji su tool ilaiyo nokwo yonekono, duujulo.” Jisasol toro amodapiyokaikono.
24Joonolluro uumjunyokwe amodapiyoka su tooral me'no wuugollu'mo'mno sumaleyokwe Jisasol a'mwo abolo kwolallo abi'bwo'nopo tonyu Joonolluno aro kuudokaikono. “Kevu kuudo pun jaullulo. Kevu a'mwomaiyo kwako yalukullo toru'no avlaiyajupo tov buro'nyo tovi wonyo'moneyokwe avlaiyajupogaikuldukono? Kevu a'mwo pwollu bevrapto tovi dolo mollodowo'jure tovida'ai amogaloduptowoso'ji pullugwobusuko wonyo'moneyokwe avlaiyajupogaikulmaiyo. 25Aki kevu a'mwo pwol youro sugumaluko tokwe yesodowo'jure pwollu wonyo'moneyokwe avlaiyajupogaikulmaiyo. Kuudo neya jaullulo. A'mwo youro sugumaluko yesodupudo su tooro a'mwo aguto kig tooravuro ago tonyu anakuuto tomuu kuulomwalodupudorogano. 26Toro kuvi kuruv kevu proofet pwolluno'gwowi sumdo wonyo'moneyokwe kwako yalukullo toru'no avlaiyajupogaikikono. Toro toolluno aro ikudumo'mokwono. A'mwo su tool proofet kuvinono sumo'nokaikono. Aki toro tool proofet yiuwi'nokai pworai me'no kuuwoleyajukekono. 27Proofet su toolluno aiyoga Gooti toolluro yogalo tovi me'no ajakwollajupekono. Toro toolluno sakwollungiko tov arokwono.
“Duu'nono. Nuvu moro a'mwo modomollokwe pwollu morapiyo'mi gumi sumdomgu wanonekono. Toro tool wanowo'ji guvu a'mwo abolo tonyu wuuru'mallo'moneyokwe puuto tovi yovo'dogalagubweyonekono.”
Sakwollungikokwono. Proofet yogalo ajakwollopo su tool Joonol kwekono.
28Toro te nuu aro ikudumo'mokwono. Yiuwi'nokai a'mwo abolo tonyuro yowosungelabodopure tovida'ai a'mwo imo'nodupudo tooro Joonollu ku'nono muuwolo'mdupudorogano. Toro kuvi kuruv aguto kig Gooti toolluro mido mollomwalo tovi yiuwi'nokai a'mwo kuulomwalodupudo toorono'gwowi aguto mimo'nodupudo kwekwojo kuruv Joonollu me'no uuwolo'mdupudorogano.”
29 #
Mt. 21:32; Lk. 3:12 Jisasolluro toro kuudoka tovi yiuwi'nokai a'mwo abolo togai'aro takis nuugwiyo ma'dupudo toorogai'aro ton wuu'nyuno sumaveyokwe aro adopogano. “Oo Gooti tool pasudo idopto'nodo to'no yokwekono.” Adopogano. A'mwo abolo su ton Joonolluro ato tovida'ai wonyo me'no kuuvollunopo tovino tov su toro adopogano. 30Toro kuvi kuruv Farasi toorogai'aro loowo tovino pi'mwo kuudokwe toorogai'aro toorono'gwowi Joonolluro ato tovida'ai wonyo muuvollunoporogano. Su tov aro tovinokwono. Gooti toolluro wiyo'mwojo'moneyokwe puuto soulosoka tovi buulo me'no kuugunyumopiyajuporogano.
31Aki Jisasol aro adokaikono. “Nuu a'mwo abolo agasuro mwalodupudo tonyuno yovekurajo kuuguudo puruv ikudumo'mokwono. A'mwo abolo su ton nuuge'aro Jooneke'aro toonalluro yodubwasodowole tovi me'no wuu'nodupudo kuvi kuruv aro tonbusuko imo'nodupudogano. 32Kwoloraiyo ton maket tomuu mwalopi kemi ibwoto'nyo tonyu biyolyogalo aro duu'mwojodupudogano. Nevu dato ilaiyo pun nogunyo tokwe airapimawo kuvi kuruv kevu kworomo mimapogaikikono. Aki lukomgu kalo'mo dato pun airapimawo kuvi kuruv kevu kumdato madumapogaikikono.
33Su toro to'busuko kubalno Wonyo Galuvollokwe Joonol aboka toga wosamujuko togai wain wonyo togai tonyuno kumako mwalo'no boduke toolluno kevu aro dodupudorekikono. “Oo a'mwo su tool kuullo ma'no ma'nodokwe pwekono.” Dodupudorekikono. 34Toro kuvi kuruv A'mwo Kwolaiyo Kuunodo toonyu wosamujuko togai wain wonyo togai nomwalono bodore toonyuno aro dodupudorekikono. “A'mwo su tool wosamujuko to'no nyuno nyuno yodowodo kwol kuruv nonugollu'meyo'mo mwinodowodekono. Aki toro tool wain wonyo bwotonyago nodowodo tovida'ai amomo yokwekono. Aki a'mwo su tool takis nuugwiyo mallokwe toorogai'aro a'mwo ma'no ma'nodokwe toorogai'aro toorogai ibwoto'nodowodo tov ilaiyo'maiyo!” 35Kevu mino su toro dodupudo kuvi kuruv Jooneke'aro nuuge'aro toonalno'gwowi Gooti toolluro pi'mwo kuudo tovi uumjunodowolonakono. Aki Gooti toolluro kwoloraiyo imo'nodupudo ton pi'mwo kuudo su tovi kuumjunpi tov aro tovino kuu'maiyo toru'no bomollolupto'nosupinokwono. Oo Gooti toolluro pi'mwo kuudo su tov nebal'nodokwono, bomollolupto'nosupinokwono.” Jisasol toro kuudokaikono.
Jisasol abolo pubuulluro ma'no ma'no yodowodo tovuro kirumwallo tovi amodukwopiyoka tovinokwono
36Toruda'ai Farasi pwol Jisasollu aro kuudoganokaikono. “Guu nuuge wosamujuko pun nomwallo'moneyokwe nokwo bubinekudeyo?” Toro kuudoganoka tovi Jisasol a'mwo su toolluro ago tovi plaino sumaiyokwe aulonomwalokaikono. 37#Mt. 26:7; Mk. 14:3; Jn. 12:3Toro kuulonomwaloduke toga wagwolago su tovida'ai abolo ma'no ma'no yodowodo puruv Jisasol Farasi toolluro ago tovi kuulonomwaloduke toolluno me'no kuu'nokakwono. Toro wuu'nyuno sumaiyokwe abolo su tov wobeya sudo kuunyokwe munollo purukwe amokabokakwono. Munollo su tov sulo tovida'ai bootool sakwollungiko tovi surosungiko tokwe amokabokakwono. 38Toro mokabino sumaiyokwe Jisasollu buulo tomuu gamoro suvlo dolago toru boda'mno sumaiyokwe kumdo ajajukokwono. Abolo su tovuro kumdaluko tov Jisasolluro suvlo tovi abwolubweyajukokwono. Toro bwolubweyoduke toga gavnokwe tobuulluro midoto tokwe malluno sumaiyokwe Jisasolluro suvlo tovida'ai kumdaluko su tovi yaluko amollelowopiyokakwono. Aki toro tov Jisasolluro suvlo tovallu molluduuduulo wiyo'no wobeya sudo kuunyokwe munollo tov aimovobweyokakwono.
39Abolo tovuro su toro yoduke tovi Farasi tool wonyuno sumaiyokwe gavnokwe tool aro sajunokaikono. “A'mwo akal proofet kuunodolno'juki abolo kuubogai'napiko su tovino kuudo souromarowo'jujukekono, Oo abolo ma'no ma'nodo'mdeyo, kuudo nokwo souromarowo'jujukekono.” Farasi tool su toro sajunokaikono. 40Toro yajunoduke toollu Jisasol aro kuudokaikono. “Saimoonoloo, nuu gumi kuuguudo pun gujo'mo anyunadopiyo.” Kuudokaikono. Toro kuudoka tovi Saimoonol Jisasollu kuudokaikono. “Ibwasokweyoloo, guu nokwo nyudubinokwono.” Kuudokaikono.
41Toro kuudoka toollu Jisasol yovekurajo puruv aro kuudokaikono. “A'mwo pwol a'mwo pworallu dinau nuugwiyo pun kwiyokaikono. A'mwo su tooralluro pwollu nuugwiyo tov 100 kina tomgu'aro kwiyokaikono. Aki pwollu dinau tov 10 kina tomgu'aro kwiyokaikono. 42Toro wino sumaiyokwe yiuwi'nokai a'mwo su tooral a'mwo toolluro dinau nuugwiyo tovi aikomgu uubiyo'mo tov supto solorakono. Toro yodole toga a'mwo tool aro kuudokaikono. Oo nuu kemoro dinau tov me'no amaikudukwopimokwono. Toro tovino tov kevu moro nuugwiyo tov aikomgu manubibullunorakikono.” Kuudokaikono. Jisasol yovekurajo su tov wuujuno sumaiyokwe Saimoonollu aro kuudokaikono. “A'mwo su tooralluro dinau tov me'no amodukwopiyoka tovino tov yiuwi'nokai tooral a'mwo su toolluno kalo buuropino winmwalbullunorakono. Toro kuvi kuruv ala'mwolluro kalo buuropinodo tov bwotonyo kuuno wingovla'mwalono'mdeyo?” Kuudoganokaikono. 43Toro kuudoganoka tovi Saimoonol aro kuudokaikono. “Nuu aro kuudo sau'mwakono. A'mwo dinau bwotonyo tovi amodukwopiyoka su tool a'mwo toolluno kalo buuropino guureji wingovla'mwalonekono, kuudo sau'mwakono.” Kuudokaikono. Toro kuudoka tovi Jisasol kuudokaikono. “Guu pi'mwono agallainyubwo'modekugono.” Kuudokaikono.
44Jisasol toro wuujuno sumaiyokwe aki abolo tovi gunyubworoono'no Saimoonollu aro kuudokaikono. “Guu abolo akavi doonono. Nuu gumoro ago akavi aulamo toga moro suvlo tovallu yal'meyo'moneyokwe wonyo pun manyamodekugono. Toro kuvi kuruv abolo aka'gwowi gami midoto tokwe momwora'dowo gavnokweyovuro kumdaluko tov moro suvlo tovi bwolonubweyoduke tovi yaluko amollelowopimokakwono. 45Aki guu mi ilaiyo mollonumallo'moneyokwe molluduuduulo manyamodekugono. Toro kuvi kuruv abolo su to'gwowi nuu aulamo togada'ai moro suvlo tovallu molluduuduulo kuuno amollugikokwono. 46Aki guu moro mido tovi muunyu toru munollo tokwe maimovanubwemadekugono. Toro kuvi kuruv abolo su to'gwowi moro suvlo tovallu wobeya sudo kuunyokwe munollo tokwe aimovanubwemokakwono.
47Toro tovino tov nuu aro gudumo'mokwono. Gooti tool abolo su tovuro ma'no ma'no pasudo bwotonyago tonyuro kirumwallo tov me'no amodukwopimokaikono. Su tov aro tovinokwono. Abolo su tov numino kalo buuropino guureji kwinmokakwono. Toro kuvi kuruv a'mwo pwol ma'no ma'no bwotonyago miyo'ji to'gwowi Gooti tool a'mwo su toolluro ma'no ma'no pasudo pwekwonodo tekwojuno kirumwallo tovi modukwopiyodowo'jure toga a'mwo su tool Gooti toolluno kalo buuropino yiuno pwekwono to'no winmwalonekono.” Kuudokaikono. 48Jisasol Saimoonollu toro wuujuno sumaiyokwe aki abolo tovi aro kuudokaikono. “Nuu gumoro ma'no ma'no pasudo tovuro kirumwallo tovi amagudukwopimono.” Kuudokaikono.
49Toro kuudoka toga a'mwo Jisaseke aulonomwallajupo tooro aro sajunoporogano. “Awi, ala'mwol aro nokwo donoldukono? “Nuu gumoro ma'no ma'no pasudo tovuro kirumwallo tovi amagudukwopimwakono.” A'mwo su toro dodowodo tool ala'mwoldukono?” Sajunoporogano. 50Aki Jisasol abolo su tovi kuudokaikono. “Guu numi kuudo anubwemado tovino tov Gooti tool gumi ma'no ma'nodo tovuro kirumwallo tovida'ai me'no abomollurolovogumokalokuumokaikono. Toro te gumi sumwoluko tov kavo woso'bi nokwo pla'bino'guugono.” Kuudokaikono.
Currently Selected:
Luuk 7: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
