Luuk 8

Abolo pun Jisasollu kuumjunopo tovinokwono

1Toruda'ai Jisasol yiuwi'nokai wagwolago togai'aro ajumiyo togai'aro tonyu aguto kig Gooti toolluro mido mollomwalo tovino kuuguudo sugudo tokwe mokaulodawo amoruudomollajukekono. Aki toro amoruudomollajuko toga gamoro 12-pela uumjunyokwe tooro kweke somollajuporogano. 2Aki abolo Jisasollu uumjunyokwe pugai'aro kun kuruv kweke somollajupogano. Abolo su tonyuro punyu Jisasol sumdomgu kuullo ma'no ma'no kuulomwalodopure toorai me'no amodovomjapiyajukekono. Aki abolo su tonyuda'ai nobollokwe tonyu me'no sukullajukogano. Abolo su tonyuno yovo tov puruv wagwolago Makdalada'ai Mariyavokwono. Abolo su tovi sumdomgu 7-pela kuullo ma'no ma'nodo tooro kuulomwalodopure toorai Jisasol me'no amodovomjapiyoka tov kurukwono. 3Aki abolo puruv Kuusolluro abolo Joowanovokwono. Kuusol aguto kig Herootolluro ago tovi mido mollomwalodowodekono. Aki abolo puruv Suusanavokwono. Aki abolo bwotonyago pugai'aro ton Jisaseke'aro gamoro uumjunyokwe toorogai'aro togai somollajupogano. Toro ton kevnokwenyuro nuugwiyo togai mokabodupu Jisaseke tooravuro mujonomwekovla'mwalpino'moneyokwe ton biyomokabodupu kwiyo'mwojomollajupogano.#Mt. 27:55,56; Mk. 15:40,41; Lk. 23:49

A'mwo pulollosi womdokwe pwolluno yovekurajo tovinokwono

(Matyuu 13:1-9; Mak 4:1-9)

4Aki wagwolago go'no go'nodo tomuuda'ai a'mwo abolo kwolallo bwotonyago ton Jisasollomno bo'mno abi'bwo'nopogano. Toro bi'bwo'nodopure tonyu Jisasol yovekurajo kuuguudo puruv aro kuudokaikono. 5“A'mwo pwol gami wit sulo ton pulolloso'mo tool gami womdo tomuuno avlavokaikono. Toro plaino sumaiyokwe wit sulo novlollosoduke pun puuto tovi muunyu toru abwolorapogano. Toro abwolorapo su tonyu a'mwo tooro suvlo movekuromollo'mno punyu sulugumdo tomuuda'ai dokato tooro abwolomonopiyopogano. 6Aki ikulwiyo pun kwako sulwomdokwe tomuu abwolorapogano. Ikulwiyo abwolorapo su ton ilaiyo abilorouwiyapo kuvi kuruv kwako tov wonyo nonaguto tovino tov yere abuukuropiyopogano. 7Aki ikulwiyo pun kwako aulewomdokwe tomuu abwolorapogano. Toro abwolorapo tonyu aulolo ton aguto gullo'mno abu'duvolomaropogano. 8Aki ikulwiyo pun kwako ilaiyo tovi abwolorapogano. Toro abwolorapo su ton ilaiyo to'no gulluno sumaveyokwe sulo ai'nopogano. Sulo ai'nopo su ton 100 tomgu'aro ai'nugoulapogano.” Jisasol yovekurajo su tov wuujuno sumaiyokwe aki guureji aro kuudokaikono. “A'mwo pwol kuuguudo akavi youromallo'mo kwino'ji su tool po'dogalo neya wuu'nono.” Kuudokaikono.

Jisasolluro yovekurajo togai sodubwasajuko kavlo tovinokwono

(Matyuu 13:10-17; Mak 4:10-12)

9Aki Jisasolluro uumjunyokwe tooro yovekurajo su tovuro kavlo tovino abuudoganoporogano. 10Toro abuudoganopo toorai Jisasol aro kuudokaikono. “Aguto kig Gooti toolluro mido mollomwalodowodo tovino kavlo tov yiulo apuu'naso. Kavlo su tovino nuu yodekubwasodumdo tov kevu me'no youroma'dupudorekikono. Toro kuvi kuruv a'mwo pworono'gwowi kavlo su tovino nyouromapiyokwe yiuno yovekurajo to'no yodubwasodumdonyugono. Su tov aro tovino'mokwono. Su tooro wonyuno wonyuno yopi kworo kuruv mwonyubusuko to'no yopi kavlo tovino miyouromapinorogano. Aki wuu'nyuno wuu'nyuno yopi kworo kuruv muu'nyubusuko to'no yopi kavlo tovino miyouromapinorogano.”

A'mwo pulollosi womdokwe toolluno yovekurajo kavlo tovinokwono

(Matyuu 13:18-23; Mak 4:13-20)

11“Toro te yovekurajo tovino kavlo tov arokwono. Wit sulo ton Gooti toolluro yogalo tovino'busukogano. 12Wit sulo pun puuto tovi muunyu toru abwolorapo su ton a'mwo abolo punyuno'busukogano. A'mwo abolo su ton Gooti toolluro yogalo tovi me'no wuu'nodupudogano. Toro wuu'nodupudo kun kuruv kuudo kuubwepi su ton nobirolo'nugolokuupiyokwe Satanyol yere bowo'ji kemoro poowokalago tovida'ai yogalo su tovi bomodukwopiyodowodekono.

13Aki wit sulo pun sulwomdo tomuu abwolorapo su ton a'mwo abolo punyuno'busukogano. A'mwo abolo su ton Gooti toolluro yogalo tovi me'no kuu'nupi toga ilaiyo molloma'dupudogano. Ilaiyo mollomaropi kun kuruv puluko nonaguto to'busuko imo'nodupudogano. Toro ton kemoro kuudo uubweyodupudo tov yiuno kula'nyo toga'gwono uubweyopi kun kuruv lukomgu tabunyu pun yamju abwiyogano'ji toga Gooti toollu yere wuugollu'mo'mdupudogano.

14Aki wit sulo pun aulewomdo tomuu abwolorapo su tov a'mwo abolo punyuno'busukogano. A'mwo abolo su ton Gooti toolluro yogalo tovi wuu'nodupudogano. Toro wuu'nodupudo kun kuruv yomjomwekovla'mdupudo toga kwako akavida'ai kuto ivito tonyu mallo'mo kuudo tokwe'aro kuto ivito bwotonyagokwe imo'nyo'mo kuudo tokwe'aro kemoro kwa'mgu kulako tonyu ilaiyo igollunyo'mo kuudo togai'aro yiuwi'nokai su ton Gooti toolluro yogalo tovi bu'duvoloma'dupudogano. Toro bu'duvoloma'dowo'jure tovida'ai jurogudo imo'nyo'mo tov ku'nono mimo'nodupudogano. Aki toro ton sulo mai'nodupudogano.

15Aki wit sulo pun kwako ilaiyo tovi abwolorapo su ton a'mwo abolo punyuno'busukogano. A'mwo abolo su ton Gooti toolluro yogalo tovi wuu'nodupudo toga kemoro poowokalago kuunodo tousogai gudupola'dupudogano. Toro ton puluko tov kwako tovi anakuuto tomuu kuulolukumowopiyodowodo to'busuko kubalno Gooti toolluro yogalo tov kemoro poowokalago tovi anakuuto tomuu kuulolukumowopiyodowodokwono. Toro te a'mwo abolo su ton jurogudo imo'nugovlavopi sulo bwotonyago ki'nodupudogano.”

Bakokwe gworeko tov yiulo tomuu mapuuroso'moneyokwe tovinokwono

(Mak 4:21-25)

16 # Mt. 5:15; Lk. 11:33 “A'mwo pwol gworeko amuugutowo'ji toga nobwososo'moneyokwe puvi dolago tomuu maluudapiyonekono. Kwa'bootoollo'mdeyo oo noluuleyo'mdeyo tovi dolago tomuu maluudapiyonekono. Toro kwol kuruv gworeko me'no amuugutowo'ji su tov gworeko gudupolallo'moneyokwe tovi muunyu toru'no'gwowi noluudapiyonekono. Toro aluudapiyo'ji toga a'mwo abolo ago tovi aulomwalodupi ton bako su tovi nokwo wonmwalpinogano. 17#Mt. 10:26; Lk. 12:2Toro to'busuko kubalno yiuwi'nokai yiulo apuu'nakopo togai'aro yiulo yogalo kugai'aro yiuwi'nokai su tonyuno kuudo youromallo'moneyokwe kuu'maiyo toru'no nobomollolupto'nosonogano. 18#Mt. 25:29; Lk. 19:26Toro te kevu po'dogalo neya duu'nyulo. A'mwo pwol kavlo tovino kuudo souromaro'ji toollu Gooti tool kuudo pugai'aro nuuwiyonekono. Toro kuvi kuruv a'mwo pwol moro yogalo tovi muu'nyubusuko yowo'ji kavlo tovino kuudo miyouromaro'ji toolluno'gwowi gamoro kuudo pwekwono uubweyodowo'jure su tobuurai Gooti tool nomodukwopiyonekono.”

Jisasollu ganeyago gagwai'yago wimo'nodupudo tonyunokwono

(Matyuu 12:46-50; Mak 3:31-35)

19Toruda'ai Jisasollu ganeyago tokwe'aro gagwai'yago toorogai'aro ton bo'mno abai'movopogano. Toro bai'mo'mno sumaveyokwe a'mwo abolo kwolallo bwotonyago ton Jisasollu aiyowomno momwodovoma'dopure tovino tov ago tovi ku'nono maulluru'maropogano. 20Toro te a'mwo pworo Jisasollu aro kuudoporogano. “Gumi juneyago tokwe'aro jugwai'yago toorogai'aro ton gumi gwonyo'mo kwa'mgu tomuu abodakwovo.” Kuudoporogano. 21Toro kuudopo tovi Jisasol aro kuudokaikono. “Kevu pugaikul Gooti toolluro yogalo tovi kaduko yodupu kuvinono kuumjunmwakopo togaikul mi nyuneyago nyugwai'yago nyumo'nodupudogaikikono.” Kuudokaikono.

Jisasol dole'manollo tokwe'aro wonyo luwagu luwaguto tokwe'aro tovallu aduullukuroka tovinokwono

(Matyuu 8:23-27; Mak 4:35-41)

22Iruko pullugwoji Jisaseke'aro gami uumjunyokwe toorogai'aro tooro boot puvi sulomwaloporogano. Toro ilomwalno sumaveyokwe Jisasol aro kuudokaikono. “Nevu wonyo buugo tovi igo'mguuno ilowano.” Toro wuujuno sumaiyokwe avlavoporogano. 23Toro tooro wonyo buugo tovi akuuto tomuu kuuno pla'mdopure toga Jisasol sa'mo winoduke tool sa kworokaikono. Toro wo'duke toga dole'manollo bwotonyo puruv sumo'nokakwono. Dole'manollo sumo'noka su tovida'ai wonyo tov boot toollu mabakuu'nyo abilowakuu'nokakwono. Toro imo'nyuno sumaiyokwe kaiyako i'nyo'mo soporogano. 24Toro yodopure toga Jisasolluro uumjunyokwe tooro Jisasol sa wo'duke toollu ajudukuuroporogano. Toro judukuu'no sumaveyokwe aro kuudoporogano. “Agutoloo, Agutoloo, nevu nobolopiyo'mo sumwakuuwonoo.” Kuudoporogano.

Toro kuudopo tovi Jisasol dole'manollo tokwe'aro wonyo luwagu luwaguto sajuko togai'aro tonyu yogalo amojurugolokaikono. Toro amojurugoloka kuga'gwo kuuno dole'manollo tov imwogapiyo'no wonyo buugo tov kaveno boroollo amjo'mawokakwono. 25Toro duulluku'no sumaiyokwe gami uumjunyokwe toorai aro kuudokaikono. “Kevu mino kuudo yere manubwemwakovo.” Toro wuujuno sumaiyokwe gamoro uumjunyokwe tooro luko morumoukuropiyo'mno aro sajunoporogano. “Aiyoo, dole'manollo tokwe'aro wonyo tokwe'aro toval a'mwo akalluro yogalo duuwiyoduke tovi kuvinono kuumjunmalovakono. Toro te a'mwo judo pumgu'aro akal ala'mwoldukono?” Sajunoporogano.

Jisasol wagwolago Geraseda'ai a'mwo kuullo ma'no ma'nodokwe pwollu sukuloka tovinokwono

(Matyuu 8:28-34; Mak 5:1-20)

26Toruda'ai Jisaseke'aro gami uumjunyokwe toorogai'aro tooro wonyo buugo Galilida'ai igo'mgu iloga'mo'mno sumaveyokwe Geraseda'ai tooravuro aga tomuu sule'movaporogano. 27Toro ile'mo'mno sumaveyokwe boot tovida'ai kwako tovi bwolodukwopiya'mno wagwolago su tovida'ai a'mwo pwol kuullo ma'no ma'nodo tooro winalo'mdupudo tool abokaikono. A'mwo su tool manyu togada'ai youro ton miro'nyajukekono. Aki toro tool ago puvi mamwallajukekono. Toro kwol kuruv a'mwo buuso tomuu amwallajukekono. 28-29Toro toollu kuullo ma'no ma'nodo tool mido mollomwalodowo bwotonyago toga gamoro kulako tovi mido amomjomwekovlaiyajukekono. A'mwo duuwatokwe pworo a'mwo su toollu senyo wuulo togai hankaf wuulo togai agalerosajupekono. Toro kwol kuruv wuulo su tonyu ru'mdowapiyodowo kwako a'mwomaiyo kuu'maiyo toru'no kano kano avlaiyajukekono. Toro tekwo Jisasollu wonyuno sumaiyokwe kwollomno kano kano bo'no Jisasolluro sumdollu toru suduko abinuguto'nokaikono. Toro binuguto'noduke toga Jisasol kuullo ma'no ma'nodo toollu abuugollu'mokalokwoneyokwe aduuwiyokaikono. Toro aduuwiyoka tovino tov kuullo ma'no ma'nodo tool deko bwotonyo aro adokaikono. “Jisasoloo, guu Gooti Yiuwi'nokai Tonyu Uuwolo'mdowodo toolluro Kwolaiyekugono. Toro tooku mi buro'nyo nyubino'mekudeyo? Mi kaiyako nyanyugolbiyokweyo'mo Gooti toollu subuu'yamju neya duuwiyono.” Kuudokaikono.

30Toro kuudoka tovi Jisasol aro kuudoganokaikono. “Gumino yovo tov ala'mwolekudeyo?” Toro kuudoganoka tovi kuullo ma'no ma'nodo tool kuudokaikono. “Nemino yovo tov Kwolallu'woleyonogano.” Kuudokaikono. Yovo su tov aro tovinokwono. Kuullo ma'no ma'nodo bwotonyago tooro a'mwo su tekwoji kuulomwalodupudo tovino tov yovo su toro sowa'noporogano. 31Toro te kuullo ma'no ma'nodo su tooro kuuraibuuso daneyajokwe tovino nomodovomjonekwapiyo'jokweyo'mo Jisasollu wuudoganyuno wuudoganyuno soporogano.

32Toro towai wobo toru sa'aiyo pworo ai'duvollajupo su tooro muumuudo toollu anodaiyajuporogano. Toro te kuullo ma'no ma'nodo tooro Jisasollu guureji aro kuudoganoporogano. “Nevu sa'aiyo su toorai kuulowano'moneyokwe guu nokwo pwo'bworonekuuwapibinekudeyo?” Kuudoganoporogano. Toro kuudoganopo toorai Jisasol nokwo pwo'bworapino sokaikono. 33Toro te kuullo ma'no ma'nodo tooro a'mwo aulomwallajupo su toolluda'ai buugollu'mokalokwino sumaveyokwe sa'aiyo toorai aulaporogano. Toro kuulno sumaveyokwe toga sa'aiyo tooro muumuudo towaida'ai kuukuulo tomuuno kano kano wolno sumaveyokwe wonyo buugo tov ame'nyudapiyokarogano.

34Toro me'nyudapiyoduke tovi a'mwo sa'aiyo su toorai ai'duvollajupo tooro amuugonallajuporogano. Toro tooro Jisasolluro soka su tovi me'no wonyuno sumaveyokwe toga kano kano plavo'mno wagwolago togai'aro womnago togai'aro tomuuda'ai a'mwo abolo tonyu kuudomolloporogano. 35Toro kuudomollopo tovi a'mwo abolo ton wuu'nyuno sumaveyokwe buro'nyo sumo'numoka'mdukoneyokwe tovino kevnokwe ton wonyo'mo abopogano. Toro bino sumaveyokwe a'mwo kuullo ma'no ma'nodokwe me'no sukulnoka toollu kwonopo tov Jisasolluro suvlo dolago tomuu mwaloduke toollu kwonopekono. Aki toro tekwo youro togai yeso'no amomo maiyo kuunodo tool mwaloduke kwonopekono. Toro sukuloka su toollu wonyuno sumaveyokwe luko sopogano.

36Aki a'mwo abolo pun Jisasolluro ikuloduke su tovi me'no amuugonallajupogano. Toro ton kuullo ma'no ma'nodo tooro a'mwo su toollu kuulomwalodopure toorai amodovomjapiyoka tovino yiuwi'nokai a'mwo abolo punyu sodubwosomollopogano. 37Yiuwi'nokai kwako Geraseda'ai a'mwo abolo mwalodupudo ton wuu'nyuno sumaveyokwe luko bwotonyo yo'mno Jisasollu aro kuudoganopogano. “Oo nemoro amwakuuwo akaru guu yowa'no wuugollu'mo'binekudeyo?” Kuudoganopogano. Toro kuudoganopo tovi Jisasol boot tovi ilomwalno sumaiyokwe aikomgu suloga'movokaikono.

38Jisasol novlaiyo'mo yoduke toga a'mwo kuullo ma'no ma'nodokwe me'no sukuloka tekwo Jisasollu guureji aro wuudoganyuno wuudoganyuno sokaikono. “Oo guuge yowa'no plawosunonyudukono?” Kuudoganokaikono. Toro kuudoganoka kuvi kuruv Jisasol aro amodapiyokaikono. 39“Guu gumi ago tomuuno plavo'bi guuge avalo amwakopo tonyu yiuwi'nokai Gooti toolluro ilaiyo bwotonyo agubwemoka tonyuno duudawono.” Amodapiyokaikono. Toro te a'mwo tool plaino sumaiyokwe yiuwi'nokai wagwolago tomuu a'mwo abolo tonyu amoruudomollajukekono. Yiuwi'nokai Jisasolluro ilaiyo kwiyo'mwojoka su tonyuno kuu'maiyo toru amoruudomollajukekono.

Jisasol taiyo me'no aboloka puvi aiyo aiko te amodukavoka tovinokwono

(Matyuu 9:18-26; Mak 5:21-43)

40Toruda'ai Jisasol boot tovi'aro wonyo buugo tovi aikomgu kuuwokaikono. Toro wino sumaiyokwe Galiliyovuro wolo toru ki'mo'mduke toga kwolallo bwotonyago ton ilaiyo amollomaropekono. Su tov aro tovinokwono. Jisasol yere mai'mo'mduke togada'ai a'mwo abolo kwolallo su ton sogwollo me'no kwinyajupogano. 41Toro te Jisasol su towai ki'mo'mduke toga Juu tooravuro i'bwo'nyago puvida'ai a'mwo mido mollomwalokwe pwol abokaikono. A'mwo su toolluno yovo tov Jairasolekono. Toro tool bino sumaiyokwe Jisasolluro suvlo dolago toru suduko abinuguto'nokaikono. Toro binuguto'nyuno sumaiyokwe Jisasol gamoro ago tovi nokwo plawosunoldukoneyokwe tovino guureji kuudoganokaikono. 42Su tov aro tovinokwono. A'mwo su tool kwoloraiyo bwotonyago maiyekono. Toro kwol kuruv taiyo yiuno puru'monodokwekono. Toro tool gami taiyo yiuno puru'monodo su tov 12-pela kworomo me'no kuuwolo'nyungikokwono. Toro tobuul ganumiyago toolluro ago tovi nobollo'mo yoduke tovino'mo Jisasollomno abokaikono. Toro bo'no abuudoganoka tovi Jisasol taiyo su tobuul wo'duke ago tovino avlavokaikono. Toro pla'mduke toga a'mwo abolo bwotonyago ton merobuu'buullopiyo'mno gulluto'nyo gulluto'nyo avlavopogano.

43Toro yovla'mdopure toga abolo nobollokwe pubuul kwolallo su tonyu kuumjunokakwono. Abolo su tobuulluro nobollo tov abewo'nyo to'no to'no yoduke tov 12-pela kworomo tobuul kuuwolo'nokakwono. Aki abolo su tobuul gami nobollo su tovi ikulnyo'moneyokwe dookta bwotonyago tooraiyomno pla'mdowo gami yiuwi'nokai nuugwiyo ton adukwopiyajukokwono. Toro dukwopiyoduke kuvi kuruv yiuwi'nokai tooro ku'nono mwikullajupokwono. 44Toro te abolo su tobuul Jisasolluro buulo tomuu'aro kuulno sumaiyokwe Jisasolluro yiuno youro do'gwapiyo tovino to'no kuubogai'nokakwono. Toro kuubogai'noka kuga'gwo kuuno gamoro abewo'nyo to'no to'no yodowodo nobollo su tov yaluko yiuno'no amelopiyokakwono.

45Abolo tov toro yoduke toga Jisasol aro adokaikono. “Ei, moro youro tovi anubogai'numoka tool ala'mwoldeyo?” Adokaikono. Toro adoka tovi yiuwi'nokai kwolallo ton, Awiyoo, to'no kuudumoulapogano. Toro kuvi kuruv Pital Jisasollu aro kuudoganokaikono. “Agutoloo, kwolallo bwotonyago ton gulluto'nyo gulluto'nyo pla'mdopure tonyu guu mwonyujadokuuno?” 46Toro kuudoganoka kuvi kuruv Jisasol aro adokaikono. “Nuu aro tovi me'no subwosunmonyugono. Moro jurogudo pun nobolokwoduke tovi me'no subwosunmonyugono.” Adokaikono. 47Toro wuudoduke toga abolo sukulnoka su tobuul kuudo saurokakwono. Oo Jisasollu kuubogai'numo tobuunyu yiulo ku'nono miyapuu'numobuunyudeyo. Su toro kuudo yau'no sumaiyokwe luko bwotonyo yo'no Jisasolluro sumdomago toru abomuulo'narokakwono. Toro bomuulo'na'no sumaiyokwe yiuwi'nokai a'mwo abolo ton muugona'dopure kuu'maiyo toru Jisasollu kuubogai'noka tovino kavlo tov sodubwasokakwono. Aki Jisasolluro youro tovi kuubogai'noka kuga'gwo kuuno me'no sukulnoka tovino yiuno kuu'maiyo toru'no adodowiyoku'bworosunokakwono. 48Toro dodowiyoku'bworosunoduke tovi Jisasol kuudokaikono. “Abewalobuuloo, gumoro kuudo anubwemado tovino tov agujukulmono. Toro tobuuku sumwoluko tov kavo woso'bi duuwanono.” Kuudokaikono.

49Jisasol abolo tovi toro wuudoduke toga Juu tooravuro i'bwo'nyago tovida'ai a'mwo mido mollomwalokwe tool Jisaseke kuuno adaiyajukekono. Toro da'mduke toollu gamoro ago tovida'ai yogalokwe pworo bino sumaveyokwe aro kuudoporogano. “Gumoro taiyo tov me'no abolmokakwono. Toro te aga'no'gwowi guu ibwasokwe su toollu nuumjuku'biyo.” Kuudoporogano. 50Toro wuudodopure toga Jisasol wuu'no'no kwol kuruv a'mwo su toollu aro kuudokaikono. “Guu luko mibinono. Gumoro kuudo tov yiuno mino to'no donubweyono. Guu su toro anubwebi tov gumoro taiyo tov ilaiyo aiko te nyumo'nonokwono.” Kuudokaikono. 51Toro wuujuno sumaiyokwe Jisasol a'mwo su toolluro ago tovi ki'movo'no yiuwi'nokai a'mwo abolo tonyu nomjonumokaulapiyokwe aduumjukurokaikono. Toro duumjuku'no sumaiyokwe yiuno Pitaike'aro Jemseke Jooneke todorake'aro aki taiyo tovuro ganumiyago ganeyago teyauke'aro tonyuno to'no amokaulokaikono. 52Toro mokaulno sumaiyokwe yiuwi'nokai ago su tovi kanyu mwalo'mno kumdato deraunodopure tonyu Jisasol kuulluru'maro'no aro kuudokaikono. “Kevu buro'nyo'mo kumdato doderaunadokwovo? Taiyo su tov mabolmokakwono. Yiuno sa to'no kwoso.” Kuudokaikono.

53Toro kuudoka tovino a'mwo abolo kumdato auloderaunyajupo ton kuudo me'no souromaropogano. Oo taiyo su tov me'no abolmokakwono. Toro kuudo youroma'no sumaveyokwe Jisasollu burekakwo amadopogano. 54Toro kuvi kuruv Jisasol taiyo tovuro ato tovi malluno sumaiyokwe guureji aro kuudokaikono. “Taiyobuuloo, dodukavono.” 55Toro kuudoka kuga'gwo kuuno taiyo tovuro kuullo tov aikomgu kuulno sumaiyokwe taiyo tobuul aiyo aiko te adukavokakwono. Me'no dukaino sumaiyokwe toga Jisasol a'mwo abolo tonyu guureji aro aduuwiyokaikono. “Kevu taiyo tovi wosamujuko nonyo'mo pun duuwiyulo.” Aduuwiyokaikono. 56Taiyo tovi toro adodukavoka su tovi gami kuunum kwolabolo teyaul wonyuno sumaleyokwe mollolokurosi bwotonyo soleyaukono. Toro yodole kuvi kuruv Jisasol a'mwo kwolabolo su teyaullu aro aduullukurokaikono. “Kemoro taiyo tovi kwimo'numoka akavino a'mwo abolo punyu muudubullunono.” Aduullukurokaikono.

Currently Selected:

Luuk 8: SMB

Highlight

Copy