Luuk 9

Jisasol gamoro 12-pela uumjunyokwe toorai moruudomollo'moneyokwe amorapiyoka tovinokwono

(Matyuu 10:5-15; Mak 6:7-13)

1Toruda'ai Jisasol gami 12-pela uumjunyokwe toorai, “Dobiloo,” doma'no sumaiyokwe kuullo ma'no ma'nodo toorai modovomjapiyo'moneyokwe jurogudo tov kuubweyokaikono. Aki yiuwi'nokai nobolluwuulo tonyu ikullo'moneyokwe jurogudo tokwe'aro kuubweyokaikono. 2Aki Jisasol aro amodapiyokaikono. “Kevu plavopi a'mwo abolo tonyu aguto kig Gooti toolluro mido mollomwallo tovi kuulomwallo'moneyokwe tovino domoruudomollogaulo. Aki toro toorekul a'mwo abolo nobollokwe tobuurai jukulmovlavogaulo.” Jisasol toro wuudo'no amorapiyokaikono.

3Jisasol gami 12-pela uumjunyokwe toorai nomodapiyo'mo tool aro kuudokaikono. “Kevu noonyumwonyu pugai mamokavlapinorekikono. Yodeko tokwe'aro kuto tokwe'aro bret tokwe'aro nuugwiyo tokwe'aro togai mamokavlapinorekikono. Aki toro toorekul youro puruval mamokavlapinorekikono. 4Aki kevu wagwolago puvi ai'mopi toru ago yiuno puru'mono aulapi su tovi sa'mo toga ago su to kuvino to'no wo'mwalpinorekikono. Toro toorekul ago puruvi puruvi mwo'mwalpinorekikono. Toro kworekul kuruv yiuno wagwolago su toru wuugollu'meyo'mo toga'no ago su tovi nokwo dukwopiyopi plapinorekikono.” Kuudokaikono.

5 # Lk. 10:4-11; Krt. 13:51 Toro wuujuno sumaiyokwe aki aro kuudokaikono. “A'mwo buro'nyo buro'nyomuuda'airodeyo tooro kemi maikwonyubusuko yopi aki kemoro yogalo tovi muu'nyubusuko supi tov kevu wagwolago su toru neya duugollu'meyulo. A'mwo su toro supi tooravuro ma'no ma'nodo tovino kuu'maiyo toru'no wuuduuwallo'mo toorekul kemoro suvlo tovida'ai sullukwako kwosuko tov ago su toru neya luvourokurosopi dovlaiyulo.” Kuudokaikono. 6Toro amodapiyoka tooro wuugollu'mo'mno sumaveyokwe wagwolago go'no go'nodo tomuu kuuguudo sugudo tokwe amoruudomollajuporogano. Aki toro tooro yiuwi'nokai su tomuuda'ai a'mwo abolo nobolluwuulokwe tonyu sukullajuporogano.

Herootol Jisasolluno ala'mwoldukoneyokwe noo'nookwo sajuko tovinokwono

(Matyuu 14:1-2; Mak 6:14-16)

7 # Mt. 16:14; Mk. 8:28; Lk. 9:19 To'no'gwowi a'mwo aguto Herootol Jisasolluno kuuguudo bomje'nugouloduke tovi kuu'nokaikono. Herootol kwako bwotonyo aval aval adovarojungiko tonyuda'ai puruvi mido amollomwallajukekono. Toro tool Jisasolluno kuuguudo bomje'nugouloduke tovi wuu'nyuno sumaiyokwe kuudo kwolallo sourukwapiyajukekono. Su tov aro tovinokwono. A'mwo pworo Jisasolluno aro ajajuporogano. “Oo a'mwo akaigwol Wonyo Galuvollokwe Joonekono. Su tool a'mwo me'no bolodupudo tomuuda'ai aiyo aiko te adukavoka tool kwekono.” Ajajupekono. 8Aki a'mwo pworo aro ajajuporogano. “Oo a'mwo su tool Ilaijaikono.” Aki pworo aro ajajuporogano. “A'mwo su tool aiyogasuro proofet amwallajupo tooravuro pwol aiyo aiko te adukavoka tool kwekono.” 9Toro yajunodopure kuvi kuruv Herootolno'gwowi su tonyu wuu'nodowo aro ajajukekono. “Nuu Joonolluro mido tovi me'no adovolugulomarekono. Toro kuvi kuruv a'mwo su toolluno kuuguudo bomje'nugouloduke tovi kuu'numwako su tool ala'mwoldukono?” Ajajukekono. Aki toro tool Jisasollu sumdo wonyo'mo kwinyajukekono.

Jisasol a'mwo 5,000 toorai wosamujuko kwiyoka tovinokwono

(Matyuu 14:13-21; Mak 6:30-44; Joon 6:1-13)

10Toruda'ai Jisasolluro kuurotokwe tooro aikomgu bino sumaveyokwe Jisaseke su'bwo'nomwaloporogano. Toro i'bwo'nomwalno sumaveyokwe yiuwi'nokai tooro kemoro womdo amjumovlaiyajupo tonyuno Jisasollu sodubwasoporogano. Toro yodubwasodopure tovi Jisasol wuu'nyuno sumaiyokwe gami uumjunyokwe toorai mokavlavo'no a'mwo abolo kwolallo tonyu kuugollu'movoporogano. Toro tooro wagwolago puvino avlavoporogano. Wagwolago su tovino yovo tov Betisaidavokwono. 11Toro tomuuno pla'mdopure toga a'mwo abolo kwolallo ton wuu'nyuno sumaveyokwe kumuuno kuumjunopogano. Toro uumjunyuno sumaveyokwe Jisasollu abuuru'maropogano. Toro buuru'ma'dopure tonyu Jisasol ilaiyo amollomarokaikono. Ilaiyo molloma'no sumaiyokwe aguto kig Gooti toolluro mido mollomwalo tovino sodubwasajukekono. Aki yiuwi'nokai a'mwo abolo nobollokwe mokabodopure tonyu sukullajukekono.

12Toruda'ai sulato junyo'mo yoduke toga 12-pela uumjunyokwe tooro bo'mno Jisasollu aro abuudoporogano. “Nevu judo akamuu amwakuuwono. Toro te a'mwo abolo tonyu guu neya domodapiyono. Toro amodapibi ton kemi wosamujuko nonyo'mo tokwe'aro sa wollo'mo ago tokwe'aro noonyumwonyu supto supi su tonyuno nokwo mubipinogano.” Kuudoporogano. 13Toro kuudopo kuvi kuruv Jisasol aro kuudokaikono. “Kevnokwe toorekul a'mwo abolo su ton nonyo'moneyokwe wosamujuko pun neya duuwiyulo.” Toro kuudoka tooro aro kuudoporogano. “Nevu bret yiuno atobuul pubuuke'aro domwoga pworake'aro to'no amworakuuwono. Toro te yiuwi'nokai a'mwo abolo su ton nokwo nupino'moneyokwe nevu plavowa'ji wosamujuko bwotonyago tonyu ku'nono mabiyomorowanonogano.” Kuudoporogano. 14Kwolallo su tonyuro yiuno a'mwo tooro 5,000 toorogano. Toro te Jisasol gami uumjunyokwe toorai aro kuudokaikono. “A'mwo kwolallo su ton 50-pela tomgu'aro go'no go'no muudukuu'nopi kabimwomdo toru wolomwalpureyokwe duujulo.” Kuudokaikono.

15Toro kuudoka tovi gamoro uumjunyokwe tooro kuvinono soporogano. Toro tooro a'mwo abolo tonyu momuudeyomwalluno sumaveyokwe kwolomwalopogano. 16Toro mwalodopure toga Jisasol bret atobuul tobuuke'aro domwoga toorake'aro tonyu malluno sumaiyokwe muunyu kai'muuno iloonyopiya'no wosamujuko su tonyuno Gooti toollu, “Nenyoo,” kuudokaikono. Toro wuujuno sumaiyokwe bret tov buudeno buudeno sumaiyokwe gami uumjunyokwe toorai a'mwo abolo tonyu uumallupureyokwe amorapiyokaikono. 17A'mwo kwolallo yiuwi'nokai amwalopo ton wosamujuko su tov nyuno nyuno sumaveyokwe sumwoluko kwitovoka ton anugollu'movopogano. Toro anugollu'movopo tonyu wosamujuko nobuudeyo togai basket tov 12-pela tobuullu amollutowosopogano. Toro sutowosungiko tonyu Jisasolluro uumjunyokwe tooro yomollo'mno amollu'bworomaroporogano.

Pital Jisasolluno tov, ala'mwoldukoneyokwe tovino kuu'maiyo toru'no adodowiyoku'bworosoka tovinokwono

(Matyuu 16:13-19; Mak 8:27-29)

18Toruda'ai puga Jisasol judo tool mwalo'no Gooti toollu subusu'nyogalo kuujajukekono. Toro wuudoduke tomuu yiuno gamoro uumjunyokwe tooro kweke amwallajuporogano. Toro mwalodopure toorai Jisasol aro samuugojokaikono. “A'mwo abolo kwolallo ton mino tov, Ala'mwekono, nyudodupudonyudukono?” Samuugojokaikono. 19#Mt. 14:1,2; Mk. 6:14,15; Lk. 9:7,8Toro samuugojoka tooro kuudoporogano. “Pworo gumino tov, Wonyo Galuvollokwe Joonekono, gudodupudorogano. Toro kuvi kuruv pworo gumino tov, Ilaijaikono, gudodupudorogano. Aki pworo, aiyogasuro proofet amwallajupo tooravuro pwol aiyo aiko te adukavoka tool kwekono, gudodupudorogano.” Kuudoporogano. 20#Jn. 6:68,69Toro kuudopo tool aro samuugojokaikono. “A'mwo pworo mino tov toro nyudodupudo kuvi kuruv kevu toorekulno'gwowi, Ala'mwekono, kuudo jukiyanuu'mwakovo?” Samuugojokaikono. Toro yamuugojododuke toga Pital kuudokaikono. “Guu Gooti toolluro amonekwopiyaboka Krais tookugono.” Kuudokaikono.

Jisasol, “Nuu bolo'mi aiyo aiko te noduka'monyugono,” adoka tovinokwono

(Matyuu 16:20-28; Mak 8:30—9:1)

21Toro te Jisasol gami uumjunyokwe toorai guureji aro aduullukurokaikono. “Mino tov, Krais tool kwekono, yogalo su tokwe kevu a'mwo abolo punyu muudupinono.” Aduullukurokaikono. 22Toro duulluku'no sumaiyokwe aki aro sodubwasokaikono. “A'mwo Kwolaiyo Kuunodo toonyu dado go'no go'no bwotonyago pun nonuunononyugono. Toro toonyu Juu tooravuro mido mollomwalokwe toorogai'aro pris mido mollomwalokwe toorogai'aro loowo tovino pi'mwo kuudokwe toorogai'aro tooro mino buulo nuugunyumopiyopi noromiyanubwepinonyugono. Toro aromiyanubwepi toga iruko pullapullu nuwolo'nowo'ji aki aiko te noduka'monyugono.” Kuudokaikono.

23 # Mt. 10:38; Lk. 14:27 Aki Jisasol yiuwi'nokai toorai aro kuudokaikono. “A'mwo pwol numi numjunyo'mo kwino'ji su tool gavnokwelluro ilaiyo igollunyo'mo kuudo toorai neya yogallu'mowonekono. Yowo'ji gami i'noguropte tokwe momworarowo'ji mi neya numjunonekono. A'mwo su tool nobolmonyudeyo kuudo yaurowo'ji kwol kuruv neya anumjunono. 24#Mt. 10:39; Lk. 17:33; Jn. 12:25Aki a'mwo pwol gavnokweyolluro kulako tovida'ai aiyo mwallo'mo tovino to'no wiyo'mwoju'nonekono. Toro kwiyo'mwoju'no'ji su tool aiyo yiunokuudo mujomwekovlaiyo'moneyokwe to'gwowi ku'nono mwiyo'mwoju'nonekono. Toro kuvi kuruv a'mwo pwolno'gwowi mino kuudo nubweyodowo'jure tovida'ai gavnokweyolluro kulako tovida'ai aiyo tov nokwo yovlawonokwono. Toro sovlawo'ji kuvi kuruv aiyo yiunokuudo mujomwekovlaiyo'moneyokwe to'gwowi nomaronekono. 25Aki a'mwo pwol yiuwi'nokai kwako akavida'ai ton marowo'ji abolo'ji toga yiuwi'nokai amaro'ji su ton aiyo yiunokuudo mujomwekovlaiyo'moneyokwe tovi mallo'mo tov nokwo wiyo'mwojupinoldukono? Awiyo. Yiuwi'nokai su ton aiyo yiunokuudo mujomwekovlaiyo'moneyokwe tovi mallo'mo tov ku'nono mwiyo'mwojupinekono.

26Aki a'mwo pwol mino tokwe'aro moro yogalo tokwe'aro tonyuno wogulo'mo nyo'jo. A'mwo mino wogulo so'ji su toollu lukomgu nuu A'mwo Kwolaiyo Kuunodo toonyu bo'mi nuu kwonyu kuruv a'mwo toolluno wogulo'mo imekono. Nuu kuvinono abumi su toga moro jurogudo tokwe'aro mi Nyunumiyago toolluro bako bwotonyo pwopiyodowodo tokwe'aro aki gamoro ensel tooravuro jurogudo tokwe'aro togai nomokamonyugono. 27Nebal'no ikudumo'mokwono. Su toro tov kuvinono bai'mo'mdowo'jure tovi kevu akaru adakwopo pworekul yere mabolodopure toga noonpinorekikono. Aro tovi wonpinorekikono. Aguto kig Gooti toolluro mido mollomwalono tov kuu'maiyo toru'no mokabodowo'jure tovi noonpinorekikono.” Kuudokaikono.

Jisasolluro kulako tov judo pumgu'aro amoropiyoka tovinokwono

(Matyuu 17:1-13; Mak 9:2-13)

28Toruda'ai 8-pela iruko tobuul me'no abawoka toga Jisasol subusu'nyogalo jo'moneyokwe muumuudo pwollu muunyu tomuuno sulokaikono. Toro suloka toga yiuno Pitaike Jemseke Jooneke toorai momwora'no sumaiyokwe muumuudo su toollomno amokailokaikono. Toro mokailno sumaiyokwe subusu'nyogalo ajajukekono. 29Subusu'nyogalo toro doduke toga gamoro uumjunyokwe pworapwol amokailoka su tooro aro tovi amuugonaroporogano. Jisasolluro sumdomago tov judo pumgu'aro kulako moropiyoduke tovi kwonoporogano. Aki bako pwopiyodowodo to'busuko kubalno gamoro youro kuruv wiya'jo to'no moropiyoduke tovi kwonoporogano.

30Su toro tovi muugona'dopure toga a'mwo pworal Jisaseke kuuguudo juda'nodopure toorai kwonoporogano. A'mwo su tooralluno yovo tov Mooseseke Ilaijaike toorakono. 31Toro tooral bako bwotonyo tovi akuuto toru biyalo'nyuno sumaleyokwe Jisaseke kuuguudo adolorakono. Kuuguudo su tov Jisasol wagwolago Jeruusalem tovi wobo toga nobolono tovino ajuda'noporogano. 32Toro tooral yere mabiyalo'nodole toga a'mwo Jisaseke amwalopo toorogai'aro Pitaike'aro tooro sa'mo bwotonyo wino'mno sa kworoporogano. Toro kuvi kuruv adukovomwalopo toga Jisasolluro bako bwotonyo pwopiyoduke tovi kwonopogano. Aki a'mwo Jisaseke da'mdole kworallu kuruv kwonoporogano. 33Toro wonyuno sumaveyokwe a'mwo tooral nuugollu'meyo'mo yodole toga Pital Jisasollu aro kuudokaikono. “Agutoloo, nevu akawai amwakuuwo tov ilaiyokwono. Toro te nevu sel ago puruvapuruv amodano. Puruv gumiyo'mokwono. Puruv Moosesollo'mokwono. Puruv Ilaijallo'mokwono. Su toro amodano.” Pital gamoro yogalo kuudoka su tov burowo'nyovo wuudumonyudukoneyokwe tovino kuudo maiyokwe tool su toro kuudokaikono.

34Pital toro wuudoduke toga sulu'wo puruv aiyowomno abwolobu'duvolomarokakwono. Sulu'wo abwolobu'duvolomaroka su tovi anakuuto tomuu aulomwalopo tovino tov luko soporogano. 35#Mt. 3:17, 12:18; Mk. 1:11; Lk. 3:22; 2Pt. 1:17,18Aki sulu'wo su tovi anakuuto tomuuda'ai yogaimaguurai alokaboka puruv aro adokakwono. “Akal moro Kwolaiyekono. Aki moro me'no ajeso tool kwekono. Toro toolluro yogalo dodowo'jure tonyu neya duu'nogaulo.” Adokakwono. 36Yogaimaguurai su tov toro adoka toga yiuno Jisasol judo toolno da'mduke toollu kwonoporogano. Toro tooro lukomgu me'no kwonopo su tovino wuujo'moneyokwe kemoro mago tov mara'mdupu a'mwo pwolnodo kwollu kuruv muujajuporogano.

Jisasol kwolaiyo kuullo ma'no ma'nodokwe pwollu sukuloka tovinokwono

(Matyuu 17:14-21; Mak 9:14-29)

37Aki iruko aikomguda'ai tollugwoji muumuudo toolluda'ai kwolaboporogano. Toro wolabino sumaveyokwe a'mwo abolo kwolallo bwotonyago pun Jisasollu abuuru'maropogano. 38Kwolallo su tonyu anakuuto tomuuda'ai a'mwo pwol deko guureji aro kuudokaikono. “Ibwasokweyoloo, nuu guureji agudoganmono. Guu mi kwolaiyo amokamo akallu nokwo gallainyubwo'binekudukono? Su tov aro tovinokwono. Nuu kwolaiyo yiuno pwolnodokwenyugono. Kwolaiyo pwolnodo su tool akal kwekono. 39Toro toollu kuullo ma'no ma'nodo pwol mwora'dowo'jure toga deko jokwekono. Aki gulludubolo mollodowo'jure tovida'ai ibu'muudo tov lubiyodowodekono. Aki kaiyako igolodowo'jure tovida'ai muja'wuulo to'no ma'dowodekono. Kuullo ma'no ma'nodo su tool moro kwolaiyo toollu yere muugollu'mo'mdowodekono. 40Toro te gumoro gumjunyokwe tooro kuullo ma'no ma'nodo toollu modovomjapipino'moneyokwe nuvu guureji kuudoganmorogano. Toro kworo kuruv ku'nono mamodovomjapimaporogano.” Kuudokaikono.

41Toro wuujuno sumaiyokwe Jisasol aro adokaikono. “Kevu agasuro togaikul Gooti toolluro jurogudo tovino kuudo muubwemwakopogaikikono. Nuu kevuge manyu toga me'no mujomwekovla'mdumdonyugono. Aki manyu toga kemoro jul'nyo toorai mollovo'dogalmelabodumdonyugono. Toro kuvi kuruv kevu kuudo po'dogalo miyau'mwakopogaikikono.” Jisasol toro wuujuno sumaiyokwe a'mwo toollu aro kuudokaikono. “Gumi kwolaiyo toollu donumokabono.” Kuudokaikono. 42Toro wuujuno sumaiyokwe kwolaiyo toollu amokabokaikono. Toro mokaboduke toga kuullo ma'no ma'nodo tool kwolaiyo su toollu mogalowiyemwogapino sumaiyokwe gulludubolo kwiyokaikono. Toro kwiyoka kuvi kuruv Jisasol kuullo ma'no ma'nodo toollu yogalo guureji aduuwiyokaikono. Toro duuwino sumaiyokwe kwolaiyo toollu sukulokaikono. Me'no ikulno sumaiyokwe kwolaiyo su toollu gami ganumiyago toolluro ato tovi aikomgu kuubweyokaikono. 43Jisasol su toro sukuloka toga yiuwi'nokai a'mwo abolo ton Gooti toolluro jurogudo kuunodo su tovino kuudo kwolallo sourukwapiyopogano.

Jisasol gamoro nobollo'mo tokwe'aro aiyo aiko te nodukaiyo'mo tokwe'aro tovalluno aiko te kuudoka tovinokwono

(Matyuu 17:22-23; Mak 9:30-32)

Kuudo kwolallo su toro yourukwapiyodopure toga Jisasol gami uumjunyokwe toorai aro kuudokaikono. 44“Yogalo ikudumo akav kemi kaduko tonyu neya kuulolukumovaikwopiyonokwono. Yogalo su tov arokwono. A'mwo pworo nuu A'mwo Kwolaiyo Kuunodo toonyu galonumworaropi ikomago tooravuro ato tovi manubwepino'mo sadokwovo.” Kuudokaikono. 45Jisasol toro wuudoduke kuvi kuruv gamoro uumjunyokwe tooro kavlo su tovino kuudo miyouromaroporogano. Su tov aro tovinokwono. Jisasolluro kuuguudo wuudoduke tovino kavlo tov yiulo kupuu'na'dowodokwono. Aki uumjunyokwe tooro Jisasollu kavlo tovino anekudoneyokwe wuudoganyo'mo sopo kworo kuruv luko soporogano.

Jisasolluro uumjunyokwe tooro ala'mwol dukuuwolo'mwallokwe yogalo aullajunopo tovinokwono

(Matyuu 18:1-5; Mak 9:33-37)

46 # Lk. 22:24 Toruda'ai Jisasolluro uumjunyokwe tooro kevnokwe toorai akuuto toru yogalo aullajunoporogano. Su tov aro tovinokwono. Uumjunyokwe su toorai akuuto toruda'ai pwol, ala'mwol dukuuwolo'mwallokwe tovino yogalo aullajunoporogano. 47Toro kuvi kuruv Jisasol uumjunyokwe su tooravuro poowokalago tovida'ai kuudo kuullo'mowopiyodowodo su tovino me'no souromarokaikono. Toro youroma'no sumaiyokwe kwoloraiyo puvi maro'no gami da'mduke wobo toru amolludapiyokaikono. 48#Mt. 10:40; Lk. 10:16; Jn. 13:20Toro molludapino sumaiyokwe aro kuudokaikono. “A'mwo pwol kwoloraiyo akabuuraibusuko puvi mino yovo tovida'ai ilaiyo amollomaro'ji su tool nuu kwonyuda'ai ilaiyo amollunuma'mwallo. Aki a'mwo pwol mi ilaiyo amollunumaro'ji su tool mi kwolomonuwopiyaboka kwolluda'ai ilaiyo amolloma'mwallo. Su tov aro tovinokwono. Kemida'ai a'mwo pweku yiuwi'nokai a'mwo abolo punyu aiyowo'mo abwollumo'nabi su tooku a'mwo aguto kuunodo imo'nubinekugono.” Kuudokaikono.

A'mwo pwol nemi ikomago manekullumo'no'ji tool nemi avalo nonekullumo'nodowodo tovinokwono

(Mak 9:38-40)

49Toruda'ai Joonol Jisasollu aro kuudokaikono. “Agutoloo, a'mwo pwol gumino yovo tovida'ai kuullo ma'no ma'nodo toorai modovomjapiyoduke toollu nevu kwonowonogano. A'mwo su tool nevuge magumjunodowodekono. Toro toollu nevu uumjukuto sowonogano.” Kuudokaikono. 50Toro kuudoka kuvi kuruv Jisasol aro kuudokaikono. “Kevu a'mwo toollu uumjukuto mipinono. Su tov aro tovinokwono. A'mwo pwol kemi ikomago maikullumo'no'ji tool kemi avalo aikullumo'nadopiyo.” Kuudokaikono.

Kwako Samariyada'ai wagwolago puvi a'mwo abolo mwalodupudo ton Jisasollu ilaiyo mamollomaropo tovinokwono

51Gooti tool Jisasollu gamoro ago muunyu kai'muuno mokaillo'mo wobo toru ido'nugoboduke toga Jisasol gamoro kuullutago tov wagwolago Jeruusalem tovi plaiyo'mo kwinokaikono. 52Toro winyuno sumaiyokwe a'mwo kuurotokwe pworo gami sumdomgu wanpino'moneyokwe amodapiyokaikono. Toro tooro sumdomgu wano'mno Jisasol wobo toga ki'mowono toollo'mo yovrowosupino'moneyokwe kwako Samariyada'ai wagwolago puvi aulai'movoporogano. 53Toro aulai'movopo kuvi kuruv wagwolago su toruda'ai a'mwo abolo ton Jisasol gamoro kuullutago tov Jeruusalem'no plaiyo'mo winoduke toolluno tov ilaiyo mamollomaropekono. 54Jisasollu ilaiyo mamolloma'dopure su tovi gamoro uumjunyokwe Jemseke Jooneke tooral wonyuno sumaleyokwe Jisasollu aro kuudolorakono. “Agutoloo, navu Gooti toollu deko wuudowosi muunyu kai'muuda'ai dukworoka tov buuruko to'busuko kwolomoropiyabwo'ji tokwe a'mwo abolo su tonyu yiunokuudo monosono'mo dukogujunadopiyo?” Kuudolorakono. 55Toro kuudolo kuvi kuruv Jisasol a'mwo su toorallu gunyubworoonyuno sumaiyokwe yogalo amojurugolokaikono. 56Me'no mojurugolno sumaiyokwe Jisasol gami uumjunyokwe toorogai wagwolago pumuuno avlavoporogano.

Jisasol gami uumjunyo'mo winodopure tooraino adoka tovinokwono

(Matyuu 8:19-22)

57Toro te Jisasol gami uumjunyokwe toorogai puuto tomuu kuuno pla'mdopure toga a'mwo pwol Jisasollu aro abuudokaikono. “Nuu gumoro buro'nyo buro'nyomuudeyo avla'bi tomuu gumi gumjunmwalmonyugono.” Abuudokaikono. 58Toro abuudoka toollu Jisasol aro kuudokaikono. “Kuullujuluko fooks tooro noulomwallo'moneyokwe buuso ton kurukwerogano. Aki sulugumdo tovida'ai dokato tooro noulomwallo'moneyokwe kemi podo'ago ton kurukwerogano. Toro kuvi kuruv nuu A'mwo Kwolaiyo Kuunodo toonyuno'gwowi sa wollo'moneyokwe pumuu nonagutonyugono.” Kuudokaikono.

59Toro wuujuno sumaiyokwe aki Jisasol a'mwo gabovo pwollu aro kuudokaikono. “Guu mi donumjunogawono.” Kuudokaikono. Toro wuujuno sumaiyokwe a'mwo su tool aro kuudokaikono. “Agutoloo, nuu gumi gumjunyo'mo nyunodowodo kuvi kuruv sumdomgu mi nyunumiyago nobollo'mo sadopiko toollu neya molsoso'moneyokwe guu nuwonyapino jono.” Kuudokaikono. 60Toro kuudoka kuvi kuruv Jisasol kuudokaikono. “A'mwo abollungopo toorobusuko imo'nodupudo tooro kevnokwero nobolodopure toorai neya amolsosunogapuro. Guvno'gwowi neya plavo'bi aguto kig Gooti toolluro mido mollomwalo tovino domoruudomollogawono.” Kuudokaikono.

61Toro wuujuno sumaiyokwe aki uumjunyokwe gabovo pwol Jisasollu aro kuudokaikono. “Agutoloo, nuu gumi gumjunyo'mo nyunodowodo kuvi kuruv sumdomgu moro ago tovida'ai amwakopo togai me'no ajapina'ji toga'no'gwowi gumi nokwo gumjunmonyugono.” Kuudokaikono. 62Toro toollu Jisasol aro kuudokaikono. “A'mwo pwol womdo tovi aiyo yowo'ji toga gamoro noonyumwonyu tonyu wuugollu'mo'mdowodekono. Toro tonyu aiko te wonyo'mo agunyubworo'ji tov a'mwo su tool aguto kig Gooti toolluro mido mollomwalono tovino'mo womdo tov ku'nono mimwalonekono.” Kuudokaikono.

Currently Selected:

Luuk 9: SMB

Highlight

Copy