Mak 13
13
A'mwo pworo Gooti toollu ilomoropiyo'moneyokwe ago tov nomouropipino tovinokwono
(Matyuu 24:1-2; Luuk 21:5-6)
1Toruda'ai Jisaseke'aro gamoro uumjunyokwe toorogai'aro tooro Gooti toollu ilomoropiyo'moneyokwe ago towaida'ai abolokwoporogano. Toro bolokwino sumaveyokwe gamoro uumjunyokwe pwol kuudokaikono. “Ibwasokweyoloo, sulo sugumaluko amodumellungiko togai'aro ago sugumaluko amojungiko togai'aro tonyu doonono.” Kuudokaikono. 2Toro kuudoka toollu Jisasol kuudokaikono. “Tade, noonmwakono. Toro kuvi kuruv puga ago sugumaluko kwonmwakudo su tonyu a'mwo pumuuda'ai pworo bopi nobomourodukwopipinogano. Aki yiuwi'nokai sulo bwaku bwakuto amodumellungiko kunyu kuruv mourodukwopiyopi yiuno pwolnodo kwol kuruv mworonokwono.” Kuudokaikono.
Jisasol, “tabunyuwuulo bwotonyago pun nobai'mopinogano,” adoka tovinokwono
(Matyuu 24:3-14; Luuk 21:7-19)
3Toruda'ai wagwolago Jeruusalemda'ai bolokwino sumaveyokwe Muumuudo Oolip toollu igo'mguuno ilno sumaveyokwe amwaloporogano. Mwalno sumaveyokwe toga Jisasol judo tool Gooti toollu ilomoropiyo'moneyokwe ago tovi ilomuugonoraboduke toga gamoro uumjunyokwe yiuno Jooneke Jemseke Pitaike Adruu'weke tooro bino sumaveyokwe Jisasollu yamuugojo aro abuudoganoporogano. 4“Yiuwi'nokai anekudumado su ton buro'nyo toga kuvinono bai'mopinodeyo? Aki burowo'nyo duuwallo jurogudo tovi wonowa'ji kuudo youromaranonoldeyo. Oo aga yiuwi'nokai anekudumado su ton nobai'mopino wobo toga'deyo. Toro tovino nokwo nekudubinekudeyo?”
5Toro samuugojopo toorai Jisasol kuudokaikono. “A'mwo pwol kuunano nyoukuu'naikudo'jokweyo'mo kevu wako neya dou'nyulo. 6Lukomgu a'mwo bwotonyago pworo youkuu'naikujo'mo tooraida'ai pwol bowo'ji donekono. “Nuu Krais toonyugono.” Aki gabovo pwol puga bowo'ji aval'no baikudonekono. Bwotonyago tooro tono tono biyou'kuu'naikudupinorogano. Toro tooro moro yovo tovida'ai a'mwo abolo bwotonyago tonyu youkuu'nuudupinorogano.
7Aki lukomgu molo bwotonyo judo'no judo'nodo ingovla'mdopure tooraino yogalo tokwe'aro aki molo bwotonyo tonyuno puu'yogalo tokwe'aro tovalluno kevu kuu'nupi toga luko mipinono. Su toro tov neya abai'mowono. Toro abai'mowo'ji kuvi kuruv aiyowo'moga'maiyo. 8Toro toga a'mwo kwako pumuuda'ai pworo kwako pumuuda'ai pworogai molo inpinorogano. Aki a'mwo aguto kig pworavuro kantri pun a'mwo aguto kig gabovo tooravuro kantri togai molo inpinorogano. Toro yodopure toga aki wunyu wunyu pun kwako go'no go'nodo tomuu nobai'mopinogano. Aki pumuu muju'wuulo pun nobai'mopinogano. Yiuwi'nokai tabunyuwuulo su ton muudu'nodogano. Yovekurajo puruv arokwono. Yiuwi'nokai tabunyuwuulo su toro ton abolo puruv kwolaiyo sumwolukokwe tov tuko muudu'no doudopiyabodowodo to'busuko kubalno yiuwi'nokai tabunyuwuulo su ton muudu'nodogano.
9 #
Mt. 10:17-20; Lk. 12:11,12 Toro tovino tov kevu neya doguul'mwonyogaulo. Su toro toga a'mwo pworo kevu mino kuudo nubweyodupudo toorekullu kaunsel tooro kooti yogalo daikullo'moneyokwe Juu tooravuro i'bwo'nyago tovi galekumokaulapi iwago ikuromipinorogano. Aki toro toorekullu a'mwo aguto gavman womdokwe pworogai'aro a'mwo aguto kig pworogai'aro tooravuro sumdollu toru kooti yogalo daikullo'mo mekudapipinorogano. Toro amekudapipi toga kevu moro a'mwo kuunodo toorekulluno tov mino ibwosunyo kuuguudo tov wuudupinorekikono. 10Toro kuvi kuruv yiuwi'nokai su ton yere mabai'mo'mdopure toga sumdomgu mino kuuguudo sugudo tov yiuwi'nokai tomuuda'ai a'mwo abolo tonyu neya moruudomollupinokwono. Toro moruudomollodopure tovida'ai neya abomje'nugoulawono. 11Toro te lukomgu kemi galekumworaropi kooti yogalo'mo morekwapipinorekikono. Toro amorekwapipi toga kemoro yogalo burowo'nyovo wuudanonoldukoneyokwe tovino kuudo kwolallo miyourukwapipinono. Gooti tool kemoro yogalo wuujo'moneyokwe tov nekullabwonekono. Toro ikullabodowo'jure toga nokwo wuudupinorekikono. Su toro wuujo'mo tov kemoro'maiyo. Toro kuvi kuruv Gooti toolluro Kuullo tool kemi daikullodowo'jure tovida'ai to'gwowi nokwo wuudupinorekikono. 12Aki toro toga a'mwo pworo kemi kuugwai'yagorodeyo kuudai'yagorodeyo toorai aromiyosupureyokweyo'mo a'mwo gabovo pworavuro ato tonyu morubwepinorogano. Aki a'mwo pworo kemi kwolaiyo kuunodo toorai aromiyosupureyokweyo'mo a'mwo gabovo pworavuro ato tonyu morubwepinorogano. Aki kwoloraiyo pun kemi kuunum kwolabolo tonyu aromiyosupureyokweyo'mo kisuvolo wiyopi a'mwo gabovo pworavuro ato tonyu morubwepinogano. 13#Mt. 10:22Yiuwi'nokai a'mwo abolo ton kevu mi numjunodupudo togaikulluno surodo'mo ipinogano. Toro tovi kevu mi numjunodupudo togaikulluda'ai pwol mi buulo manyugunyumopiyo'mo tool numjunyuno numjunyuno yowo'ji yiuno abolo'ji toga'no so'ji toollu lukomgu Gooti tool gavuge aiyo yiunokuudo mujomwekovlaiyo'moneyokwe nuuwiyo'mwojonekono.”
Kirovanyuvanyu kuumwiyo pwol nobai'mowono tovinokwono
(Matyuu 24:15-28; Luuk 21:20-24)
14To'no'gwowi Jisasol kuudokaikono. “Kuuguudo akavi amojagilo'ji tool kavlo tovino neya youromarono. Kuuguudo tov arokwono. A'mwo kirovanyuvanyu kuumwiyo pwolluno Gooti tool surodo wuunodowodekono. Toro tool a'mwo tooro maullo'moneyokwe babo kwosungiko toru kuuloda'mdowo'jure toollu kwonpi toga yiuwi'nokai Juudiyada'ai mwalodupudo ton muumuudo tooraiyomno lukado neya avlapuro. 15#Lk. 17:31Aki a'mwo pwol ago puvi muunyu tomuu aluulowosungiko towai sulomwalodo'ji tool kirovanyuvanyu kuumwiyo su toolluno kuu'no'ji toga aki aiko te wolabowo'ji ago tovi gami kuto ivito kuulomallo'mo noulawo'jo. Yiuno lukado to'no neya avlawono. 16Aki a'mwo pwol gami wosamju'womdo toru amwalodo'ji tool gami nobwaiyo ton mallo'mo aki aiko te nyagunyumo'no'jo. Lukado neya avlawono. 17Toro toga abolo sumwolukokweyodeyo oo abolo kwoloraiyo tonyu amdo manarukuu'nyokweyodeyo tobuuro lukado plaiyo'mo tov tabunyu kuunodo wimo'nonobuurogano. 18Toro te lukado su tov modoga toga nyumo'no'jokwe tovino Gooti toollu subusu'nyogalo neya duudogaulo. 19#Ado. 7:14Kirovanyuvanyu kuumwiyo su tool abai'mowo'ji toga tabunyuwuulo bwotonyo tov imo'nonokwono. Aiyoga Gooti toolluro yiuwi'nokai tonyu sokwollosoka togada'ai yiuno aga'no tabunyuwuulo su to'busuko puruv mimo'nodowodokwono. Aki lukomgu kuga kuruv tabunyuwuulo su to'busuko puruv mimo'nonokwono. 20Gooti Aguto tool aro kuudo saurokaikono. Yiuwi'nokai kwako akavida'ai a'mwo abolo ton yiunokuudo nyemnopipiyo. Aki moro a'mwo abolo me'no ajesungiko su ton nobolopipiyo. Toro te nuu tabunyu su tovuro iruko tobuullu pubuul nodovomokwolamonyugono. Saurokaikono. Toro kuudo sauroka tovino tov tabunyuwuulo abai'mowo'ji tovuro iruko tobuullu pubuul nodovomokwolabwonekono.
21Toro toga a'mwo pwol aro abaikudo'ji tov, “Kevu bopi Krais amwalluko akallu bwonyulo,” aikudo'ji tov kevu kuudo muubwepinono. Aki a'mwo pwol aro aikudo'ji tov. “Kevu kaimuuno plavopi Krais amwalluko toollu doonyulo,” aikudo'ji tov kuudo muubwepinono. 22Su tov aro tovinokwono. A'mwo kuunano yogalo youkuu'najokwe pworo bopi aro dupinorogano. “Nuu Krais toonyugono.” Aki pworo aro dupinorogano. “Nuu proofet toonyugono.” Toro tooro kaiya'nodo tomuuno mollubworomokavlaiyo'mo tooro duuwallo jurogudo pun wuuduuwallupinorogano. Toro tooro Gooti toolluro a'mwo abolo me'no ajesungiko tonyu ki'nomallo'mo winodopure kworo kuruv ku'nono mai'nomapinorogano. 23Yiuwi'nokai nyumo'nono su tonyuno nuu duudapi yogalo me'no aikullumonyugono. Toro tovino tov kevu wako neya dou'nogaulo.” Jisasol toro kuudokaikono.
A'mwo Kwolaiyo Kuunodo toolluro lukomgu bwono tovinokwono
(Matyuu 24:29-31; Luuk 21:25-28)
24 #
Ado. 6:12
Toruda'ai aki Jisasol aro kuudokaikono. “Tabunyuwuulo su tov me'no abawo'ji toga kuujo tool dugumdo kimwonyowo'ji lobako tool mawonekono. 25#Ado. 6:13Aki sullugabwo muunyu kai'muuda'ai ton nobwolomwekuupinogano. Aki muunyu kai'muuda'ai jurogudokwe kwokopo ton yaudo yaudo nyunuuguupinogano. 26#Ado. 1:7Toro toga A'mwo Kwolaiyo Kuunodo toonyu moro jurogudo kuunodo tokwe bako bwotonyo tokwe sulu'wo tovi wolabodo'mure toga nuwonpinonyugono. 27Su toro toga moro yiuwi'nokai a'mwo abolo ajesungiko tonyu bomollu'bwollo'moneyokwe moro ensel toorai morapimonyugono. Toro amorapimi toga moro a'mwo abolo ajesungiko ton kwako tokwe sulugumdo tokwe tovalluro aiyo'wo do'gwapiyo tomuuda'ai yiuwi'nokai amjomwekwingopo su tonyu miyomno bomollu'bwo'mogano.” Jisasol toro kuudokaikono.
Iko fik toolluda'ai kuudo youromallo'mo tovinokwono
(Matyuu 24:32-35; Luuk 21:29-33)
28Toruda'ai Jisasol kuudokaikono. “Kevu aro kuudo jouromarogaulo. Oo tabunyuwuulo su tov nobai'mowono'mo toga'deyo, toro youromallo'moneyokwe tov yovekurajo akavi neya duu'nyulo. Aro to'busuko imo'nonokwono. Kevu iko fik toollu kwonpi tov gamoro pilo ton muudorolluko worowo'ji kuuwopto tov inowiyoku'bworosonokwono. Toro so'ji toga kuudo yaupinokwono. Oo kuujo atamdo tov wobo toga'deyo. 29Yovekurajo su to'busuko kubalno moro nyumo'nono aikudumo ton kuvinono bai'mo'mdowo'jure tonyu kwonpi toga kuudo youromapinokwono. Oo A'mwo Kwolaiyo Kuunodo tool nobai'mowono'mo wobo toga'deyo. Kuudo youromapinokwono.” Kuudokaikono. 30Toro wuujuno sumaiyokwe aki Jisasol aro kuudokaikono. “Nuu nebal'no ikudumo'monyugono. Su toro togasuro a'mwo tooro yiunokuudo miyemnopiyodopure toga yiuwi'nokai aikudumo su ton nobai'mopinogano. 31Toro te sulugumdo tokwe'aro kwako tokwe'aro toval nyounopibulluvakono. Toro kuvi kuruv moro yogalo to'gwowi yiunokuudo mujo'movla'mwalonokwono.” Jisasol toro kuudokaikono.
Noonyumwonyu su ton adoga bai'mowono'mdukoneyokwe tovino a'mwo pwolnodo kwol kuruv miyau'dowodo tovinokwono
(Matyuu 24:36-44)
32 #
Mt. 24:36
“Moro yiuwi'nokai aikudumo su tonyuno burowo'nyo irukollugwojudeyo oo burowo'nyo kuujo sumdollugwojudeyo adoga bai'mowono'mdukoneyokwe tovino a'mwo pwolnodo kwol kuruv kuudo miyau'mwallo. Aki muunyu kai'muuda'ai ensel kworo kuruv kuudo miyau'mwakovo. Aki nuu Gooti toolluro Kwolaiyo kwonyu kuruv kuudo miyau'mwakono. Yiuno mi Nyunumiyago judo toolno kuudo sau'mwallo.
33Toro ton adoga bai'mopino'mdukoneyokwe tovino kevu kuudo maiyo togaikulluno tov yiuwi'nokai toga neya yovraimwonyopi wako dou'nomwalogaulo. 34#Lk. 12:36-38Nuu plavo'mi aikomgu abumi tov aro to'busukokwono. A'mwo pwol manyu tomuu woromollo'mo tool gamoro ago tovi mollomwalpino'moneyokwe go'no go'no womdo ton gami womdokwe toorai wiyonekono. Yowo'ji noulloruda'ai duuwato womdokwe pwollu wuudonekono. Guu po'dogalo doduuwarogawono. Toro wuudowo'ji toga plawonekono. 35Womdokwe su tooro ago tovi jukwo tool adoga bai'mowonoldukoneyokwe tovino kuudomaiyorogano. Toro to'busuko kubalno moro aikomgu bumo tovino kevu kuudo miyau'mwakovo. Sulato toga'nonyudukono oo akuusuduko toga'nonyudukono oo kuukuuro muudu'no dodowo'jure toga'nonyudukono? Toro tovino kevu kuudomaiyorekikono. Toro toorekul wako neya dou'nomwalogaulo. 36Nuu yere abumi toga kevu sa kuuno wo'dopure togaikullu nobaikwonmiyo. 37Toro tovi kevu wako neya dou'nomwalogaulo. Aki moro aikudumwako su ton yiuwi'nokai a'mwo abolo kunyuda'aiyo'mokwono.” Kuudokaikono.
Currently Selected:
Mak 13: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
