Mak 12
12
Wain ikulsulo womdo tovi jukwo toolluno yovekurajo kuuguudo tovinokwono
(Matyuu 21:33-46; Luuk 20:9-19)
1Toruda'ai Jisasol Juu a'mwo aguto su toorai yovekurajo kuuguudo togai sodubwasajukekono. Gamoro yovekurajo kuuguudo puruv aro kuudokaikono. “A'mwo pwol wain ikulsulo womdo puruv audokaikono. Toro kuujuno sumaiyokwe kuurupto killo'moneyokwe sulo togai aluvagilovokaikono. Aki wain ikulsulo tonyu gurojo'moneyokwe buuso purukwe'aro alsokaikono. Toro ilsuno sumaiyokwe duuwato'mo agumi'ago puruv amodokaikono. Toro tool kantri manyu pumuuno plaiyo'mo kwinokaikono. Toro tool gamoro womdo su tovi mollomwalmwalpino'moneyokwe a'mwo pworai ajesokaikono. Toro ajesoka su toorai aro kuudokaikono. Wain ikulsulo ton doumju'bworonekubweyogaulo. Lukomgu gekwono gekwono maranokwono. Toro wuujuno sumaiyokwe wain sulo womdo tovi jukwo tool kantri manyu tomuuno avlavokaikono. 2Toro tool plaino sumaiyokwe kantri manyu su tomuu amwallajukekono. Toro mwalno sumaiyokwe ikulsulo nomuujo'moneyokwe toga gamiyo'mo tekwo anumokabwoneyokwe gami a'mwo ki'nato womdokwe pwollu aiko tomgu amodapiyokaikono. 3Toro amodapiyoka tool plaino sumaiyokwe ikulsul womdo su toru abai'movokaikono. Toro bai'mo'mduke toollu a'mwo amoduvomwallajupo tooro galomworaro'mno iwago aromiyopekono. Toro romino sumaveyokwe ikulsulo nonagutokwe toollu amodovomjapiyopekono. 4Toruda'ai womdo su tovuro jukwo tool gami a'mwo ki'nato womdokwe gabovo pwollu aki aiko te amorapiyokaikono. Toro amorapiyoka toollu gamoro mido tovi kwa'dalo moluvomaro'mno kaiya'no yogalo wuujuno sumaveyokwe wogulo amodowo'galapiyopekono. 5Aki ikulsul womdo tovuro jukwo tool ki'nato womdokwe gabovo pwollu aiko te amorapiyokaikono. Toro amorapiyoka toollu yiuno'no aromiyosopekono. Toruda'ai aki aiko te ki'nato womdokwe bwotonyago pworo, pwolno pwolno amorapiyokaikono. Toro amorapiyoka tooravuro pworai iwago aromiyoporogano. Aki pworai yiuno'no aromiyosoporogano. 6Toruda'ai womdo tovi jukwo tool nomorapiyo'mo tov yiuno pwolno sugullokaikono. Toro sugulloka su tool gamoro kwolaiyo kalo buuropino winodowodo tookono. Toro toolluno aro kuudo saurokaikono. Moro kwolaiyo kuunodo akalluno'gwowi amorapimi toollu a'mwo tooro kwako tomuu'aro wiyopi gamoro yogalo tovi neya wuu'nupinekono. Saurokaikono. Toro kuudo yau'no sumaiyokwe amorapiyokaikono. 7Toro modapino sumaiyokwe kwolaiyo su tool ikulsul womdo toru abai'movokaikono. Toro bai'mo'mduke kwollu kuruv a'mwo womdo tovi amoduvomwallajupo tooro kinodokwopiyomaro'mno aro sajunoporogano. “Kwolaiyo akal ganumiyago toolluro noonyumwonyu tonyu nomaronekono. Toro toollu aromiyosa'ji tov ganumiyago toolluro ton yiuno nevnokwe toonolno maranokwono. Toro toollu aromiyosano.” Sajunoporogano. 8Toro tooro kwolaiyo toollu galomworaro'mno aromiyosoporogano. Me'no romiyosuno sumaveyokwe wain womdo tovi kwa'mgu tomgu abilomodukwopiyopekono.
9Toruda'ai wain womdo tovi jukwo tool abwo'ji toga adado yonoldeyo? Aro yonekono. A'mwo wain ikulsul womdo tovi amollomwallajupo toorai boromiyosonekono. Romiyosowo'ji gami wain womdo tovi mollomwalpino'moneyokwe a'mwo muuduko pworai jesonekono.” Kuudokaikono. 10#Mt. 21:42; Lk. 20:17; Krt. 4:11; Ef. 2:20; 1Pt. 2:4-7Jisasol yovekurajo kuuguudo su tov me'no wuujuno sumaiyokwe aro kuudokaikono. “Kevu Gooti toolluro yogalo sakwollungiko tovi me'no wonodupudorekikono. Yogalo su tov arokwono.
“Sulo pwollu a'mwo sulago mojokwe tooro biyolsumdo ino sumaveyokwe amodukwopiyopekono. Toro amodukwopiyopo kwollu kuruv Gooti tool sulo su toollu malluno yodowo ago tov kwollu muunyu toru amodumokaikono. Toro tovi aga'no'gwowi sulo su tool yiuwi'nokai ago mojo'mo tonyu kuuwolo'mwallo.
11Toro tov yiuno Gooti Aguto toolluro tovida'ai sumo'numoka tovi wonodowa nemoro sumdo tovi sugumaluko anekullumo'nadopiyo.”
Toro sakwollungikokwono. Kevu Gooti toolluro yogalo su toro sakwollungiko tovi mwonodupudorekuldeyo?” Jisasol toro kuudokaikono.
12Juu tooravuro mido mollomwalokwe tooro Jisasolluro yovekurajo kuuguudo su tovi wuu'no'mno aro kuudo sauroporogano. Oo nemino dodadopiyo. Toro kuudo yau'no sumaveyokwe Jisasollu galomworallo'mo kwinoporogano. Toro kwinopo kworo kuruv a'mwo abolo tonyuno luko ino sumaveyokwe Jisasollu wuugollu'movo'mno avlavoporogano.
“Sisa toollu takis nuugwiyo uubiyo'mo tov yowa'nodo'mdukono?” Samuugojopo tovinokwono
(Matyuu 22:15-22; Luuk 20:20-26)
13Toruda'ai Juu tooravuro mido mollomwalo pworo Jisasollu kooti yogalo duuwiyo'moneyokwe aro kuudo saullajuporogano. Nemida'ai a'mwo pworo Jisasollu yourowabwollo'moneyokwe soukuu'nuudupi toga kaiya'no ado'ji tovi'aro nevu nokwo mworaranekono. Toro yau'dupudo tooro Farasi pworogai'aro Herootolluro uumjunyokwe pworogai'aro toorai Jisasollomno amorapiyoporogano. 14Toro amorapiyopo tooro bino sumaveyokwe aro kuudoporogano. “Ibwasokweyoloo, guu nebal'no yogalo to'no jokwekugono. Aki yiuwi'nokai a'mwo abolo tonyu avalousuno mollokweyekugono. Yovokwerodeyo oo yovomaiyokwerodeyo kworai kuruv Gooti toolluro puuto tovino nebal'no yodubwasodumdekugono. Toro tooku donekudono. Roomda'ai a'mwo aguto bomwallo Sisa toollu takis nuugwiyo uubiyo'mo tov yowa'nodo'mdukono? Nevu nuubiyano'mdukono oo muubiyano'mdukono?” Kuudoporogano.
15Toro kuudopo tooraino Jisasol aro souroonokaikono. Oo kuunanokwerodeyo. Toro youroonyuno sumaiyokwe aro kuudokaikono. “Kevu buro'nyo'mo jokuu'nanyudadokwovo?” Wuujuno sumaiyokwe kuudokaikono. “Kevu silva nuugwiyo sulo pullu donumokabilo.” Kuudokaikono. 16Toro tooro sulo pullu kuumokaboporogano. Mokabino sumaveyokwe toga Jisasol kuudoganokaikono. “Nuugwiyo akavi ala'mwolluro sumdomago tokwe'aro yovo tokwe'aro tovallu doonadokwovo?” Toro kuudoganoka tooro kuudoporogano. “Sisa toollu kwonmwakuuwono.” 17Toro kuudopo toorai Jisasol kuudokaikono. “Sisa toolluro tonyu Sisa toollu neya duuwiyogaulo. Aki Gooti toolluro tonyuno'gwowi Gooti toollu neya duuwiyogaulo.” Kuudokaikono. Jisasolluro toro kuudoka tovi wuu'no'mno kuudo kwolallo sourukwapiyoporogano.
Sajuusi tooro Jisasollu a'mwo me'no abollungopo tooro aiyo aiko te adukapi tooraino samuugojopo tovinokwono
(Matyuu 22:23-33; Luuk 20:27-40)
18 #
Krt. 23:8
Toruda'ai Juu a'mwo pworo Sajuusiyoravo dodupudo su tooro Jisasollomno aboporogano. Sajuusi tooro aro kuudo yau'dupudorogano. A'mwo me'no abollungiko tooro aiyo aiko te madukapinorogano. Toro yau'dupudo tooro Jisasollomno bo'mno aro kuudoporogano. 19“Ibwasokweyoloo, Moosesolluro sakwollungiko puruv arokwono. “A'mwo pwol kwolaiyo miyawosunowo'ji abolo'ji tov gami gagwai'yago pwol gamoro abolo kanyu su tovi neya amarono. Gagwai'yago tool marowo'ji kwolaiyo sawosuno'ji tooro gadai'yago toolluro aiko toru'no mapinorogano.” Toro sakwollungikokwono.” 20Sajuusi tooro toro wuujuno sumaveyokwe aki aro kuudoporogano. “Puga a'mwo atobuul ato pworal todoroto amwallajuporogano. Toro todorotavuro sumdomguda'ai tool abolo puruvi maro'no kwoloraiyo miyawosuno'no abolokaikono. 21Aki kwolluroda'ai kwol kuruv abolo kanyu su tovi malluno sumaiyokwe kwolaiyo mamollawosuno'no abolokaikono. Aki kwolluroda'ai kwol kuruv aval'no sokaikono. 22Tono tono yo'mno abolo avalo su tovi kwolaiyo pwolnodo kwollu kuruv mamollawosuno'mno yiuwi'nokai atobuul ato pworal todoroto abolopiyoporogano. Aki aiyowo'mo toga abolo kurukwe'aro abolokakwono.” 23Toro wuujuno sumaveyokwe aro samuugojoporogano. “Yiuwi'nokai abollungiko atobuul ato pworal su todoroto abolo su tovi amaropo tooraino tov aiyo aiko te adukapi toga gadoolluro abolo kuunodo wimo'nono'mdukono?”
24Toro samuugojopo toorai Jisasol kuudokaikono. “Kemoro kuudo tov po'dogalo miyau'mwakovo. Kevu Gooti toolluro yogalo sakwollungiko togai'aro gamoro jurogudo tokwe'aro tovalluno kuudo miyouroma'mwakovo. 25Me'no abollungiko tooro aiyo aiko te adukapi toga a'mwo tooro abolo tonyu mamapinorogano. Aki abolo ton a'mwo toorai muuma'nupinogano. Toro ton muunyu kai'muuda'ai ensel miyoma'nodupudo toorobusuko mwalpinogano.
26 #
Moll. 3:6
Kevu me'no abollungopo tooraino aiyo aiko te duka'mdupudo tovino Moosesolluro sakwolloka tovi mwonodupudorekuldeyo? Moosesollu Gooti tool i'jurako widuko bomjonugeloduke tovi anakuuto tomuuda'ai aro kuudokaikono. Nuvu Eburaiyameke Aisakeke Jekoopeke toorai Gooti toonyugono. Moosesolluro toro sakwolloka tovi mwonodupudorekuldeyo?” Kuudokaikono. 27“Kevu Gooti toolluno aro kuudo nyaupiyo. Oo a'mwo me'no abollungopo tooravuro Gootoldeyo. Kuudo nyaupiyo. Toro kuvi kuruv Gooti tool aiyo mwallokwe tooraino'gwowi Gootekono. Gooti tool Eburaiyameke'aro Aisakeke'aro Jekoopeke'aro tooro me'no abolopo su tooraino, Aiyorodeyo, kuudo yau'dowodorogano. Gooti toolluro toro kuudo yau'dowodo tovino tov kevu a'mwo me'no bolodupudo tooraino, “Madukapinorogano,” dodupudo toorekul kaiya'no kuudo maluko yaullokwerekikono.” Jisasol Sajuusi toorai toro kuudokaikono.
Loowo puruv yiuwi'nokai loowo punyu uuwolo'mdowodo tovinokwono
(Matyuu 22:34-40; Luuk 10:25-28)
28Toro tooro Jisasollu youkuu'nuujo'moneyokwe kuuguudo tov wuudodopure toga a'mwo loowo tovino pi'mwo kuudokwe pwol au'nallajukekono. Toro tool Jisasolluro pi'mwono wuudoduke tovi wuu'no'no Jisasollu abuudokaikono. “Burowo'nyo loowo tov yiuwi'nokai loowo punyu duuwolo'mwallo?” Kuudokaikono. 29Toro kuudoka toollu Jisasol kuudokaikono. “Loowo puruv yiuwi'nokai loowo punyu kuuwolo'mwalluko tov arokwono. Isuraiyoloravoo, duu'nyulo. Nemi Gooti Aguto kuunodo tool yiuno pwolnodekono. 30Toro toolluno guu kalo buuropino neya domollono. Toro tooku gumoro yiuwi'nokai poowokalago tokwe'aro gumoro yiuwi'nokai sumwoluko tokwe'aro gumoro yiuwi'nokai kuudo tokwe'aro gumoro yiuwi'nokai jurogudo tokwe'aro togai gumi Aguto Gooti pwolnodo su toolluno kalo buuropino neya domollono. Loowo su tov yiuwi'nokai loowo gabovo tonyu kuuwolo'mwallo. 31Aki toruda'ai loowo iwapiyo puruv arokwono. Guvu yiuwi'nokai a'mwo abolo pwolno puru'mono kuuru'ma'bi tonyuno kalo buuropino neya domollono. Guvnokwekujuno gujunodowodo kubalno toro tonyuno aval'no neya domollono. Loowo iwapiyo tov torokwono. Loowo su toro tovallu loowo puru'monodo kuruv muuwolo'mwallo.” Kuudokaikono.
32Jisasol toro wuujuno sumaiyokwe loowo tovino pi'mwo kuudokwe tool kuudokaikono. “Ibwasokwe tooku, gumoro adumado tov, Gooti tool pwolnodekono. Toro toolbusuko pwol nonagutomuugono. Gumoro toro adumado tov kuvi kuunogano. 33Aki a'mwo pwol Gooti toolluno kalo buuropino neya amollono. Gamoro yiuwi'nokai poowokalago tokwe'aro gamoro yiuwi'nokai kuudo tokwe'aro gamoro yiuwi'nokai jurogudo tokwe'aro togai kalo buuropino neya amollono. Aki gavnokweyolluno poowokalago kalo buuropino winodowodo kubalno yiuwi'nokai a'mwo abolo pwolno puru'mono kuuru'maro'ji su to kunyu kuruv kalo buuropino neya amollono. Loowo su toval yiuwi'nokai Gooti toollu ilomoropiyo'moneyokwe sipsiporodeyo toorai romiroudapiyodupudo tonyu uuwolo'mdubulovakono.” Kuudokaikono.
34 #
Lk. 10:25-28
A'mwo su tool pi'mwono wuudoduke tovi Jisasol wuu'nyuno sumaiyokwe aro kuudokaikono. “Guu aguto kig Gooti toolluro mido mollomwalodowodo tovi dolago tomuu boulomwallo'mo wobo toru sadokuuno.” Kuudokaikono.
Jisasolluro yogalo wuudoduke su tonyu a'mwo yiuwi'nokai tooro wuu'no'mno luko soporogano. Toro te a'mwo pwol Jisasollu wuudoganyo'mo tov nonaguto sumo'nokakwono.
Devitolluro jukweyago kwolaiyo Krais toolluno kuuguudo tovinokwono
(Matyuu 22:41-46; Luuk 20:41-44)
35Toruda'ai Jisasol Gooti toollu ilomoropiyo'moneyokwe ago tovuro agwapto toru kuula'no sodubwasokaikono. Toro yodubwasuno sumaiyokwe toga aro adokaikono. “Loowo tovino pi'mwo kuudokwe tooro aro dodupudorogano. “Krais tool Devitolluro jukweyago kwolaiyo tooraida'ai imo'nonekono.” Toro dodupudo su tov adadomgu'aro imo'nono'mdukono? 36Gooti toolluro Kuullo tool Devitolluro kuudo tovi wiyoduke toga Devitol aro ajakwollokaikono.
“Gooti tool numoro Aguto toollu aro kuudokaikono. Guu moro anato toru bomwalo'bi nuuge mwalbinekugono. Toro mwalodo'bure toga nuu gumi ikomago toorai maro'mi gumi dolago tomuu bomagubwemorogano.”
Gooti toolluro adoka su tovino Devitol toro ajakwollokaikono.” 37Toro juno sumaiyokwe Jisasol loowo tovino pi'mwo kuudokwe toorai kuudokaikono. “Devitol Krais toolluno, “Agutoloo,” adoka tov Aguto su tool Devitolluro jukweyago kwolaiyo tekwobusuko adadomgu'aro imo'nonoldukono?” Jisasol loowo tovino pi'mwo kuudokwe toorai duullukullo'moneyokwe su toro kuudokaikono. Jisasol toro yodubwasoduke tovi a'mwo abolo ton wuu'no'mno ilaiyo sopogano.
Loowo tovino midokwe tooravuro youkuu'najo'mo yodupudo tovinokwono
(Matyuu 23:1-36; Luuk 11:37-54, 20:45-47)
38Aki Jisasol a'mwo abolo tonyu sodubwosumovlavokaikono. Toro sodubwosumovlavoka su tonyuda'ai puruv arokwono. “Kevu a'mwo loowo tovino pi'mwo kuudokwe tooravuro ibwaso tonyuno wako neya dou'nogaulo. A'mwo su tooro aro yokwerogano. Ilaiyo amollonekumapureyokweyo'mo tooro youro kumi'yago touso mollosopi maket tomuu yomollokwerogano. 39Aki toro tooro i'bwo'nyago toruke'aro lubullu doto yanodupudo toruke'aro toru yiuwi'nokai a'mwo abolo ton anekwonpureyokweyo'mo tooro yiuno sumdollu toru'no kuulomwallo'mo winyokwerogano. 40Aki toro tooro kanyu abolo tonyuro kuto ivito ton kuuko mallo'mo tooro jokuuromallokwerogano. Aki toro tooro a'mwo abolo ton anekwonpureyokweyo'mo tooro subusu'nyogalo tov bwotonyo kumi'yago mujodumovlaiyokwerogano. Su toro tooravuro kooti yogalo abwo'ji toga jul'nyo kuunodo tov nomapinorogano. Su toro tooravuro ibwaso tonyuno kevu wako neya dou'nogaulo.” Kuudokaikono.
Abolo kanyu pubuul Gooti toollu wiyo'moneyokwe nuugwiyo surosoka tovinokwono
(Luuk 21:1-4)
41Jisasol toro wuujuno sumaiyokwe Gooti toollu ilomoropiyo'moneyokwe ago tovuro nuugwiyo iroso'mo bookis tovi wobo toru kwolomwalokaikono. Toro mwalno sumaiyokwe a'mwo abolo ton nuugwiyo irosodopure tonyu amuugonallajukekono. A'mwo kuto ivito bwotonyagokwe tooro nuugwiyo bwotonyo ton surosajuporogano. Bwotonyago tooro toro irosodopure toorai amuugonallajukekono. 42Toro boullurosodopure toga abolo kanyu pubuul nuugwiyo sulo sallukwa'jo pullal aullurosokakwono. Sulo sallukwa'jo su tollal wan-toea tollugwobusukollakono. 43Abolo kanyu su tobuul nuugwiyo bookis tovi toro kuullurosoduke toga Jisasol wono'no gami uumjunyokwe toorai domaro'no kuudokaikono. “Nuu nebal'no ikudumo'mokwono. Abolo kanyu akabuulluro nuugwiyo surosumoka su tov yiuwi'nokai nuugwiyo aboullurosumapo punyu kuuwolo'mwallo. 44Toro aikudumo tov aro tovinokwono. Pworo bwotonyagokwe kworo kuruv pwekwono abwollurosumaporogano. Toro kuvi kuruv abolo su tobuulno'gwowi gamoro yiuwi'nokai tov aboullurosumokakwono. Gami nomwallo'mo kugai'aro aboullurosumokakwono. Toro tovinokwono.” Kuudokaikono.
Currently Selected:
Mak 12: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
