Mak 11

Jisasol a'mwo aguto kig pwolbusuko wagwolago Jeruusalem tovi auloka tovinokwono

(Matyuu 21:1-11; Luuk 19:28-40; Joon 12:12-19)

1Jisaseke'aro gami uumjunyokwe toorogai'aro tooro Jeruusalem'no wobo toru ai'movoporogano. Toro ai'movopo su toru Muumuudo Oolip toollu do'gwapiyo tomuu wagwolago puruval Betanike Betifejeke su toval wo'dubulorukono. Toro tovalluro kwa'mgu toru mwalo'mno Jisasol gami uumjunyokwe pworallu amodapiyokaikono. 2Toro toorallu aro amodapiyokaikono. “Ago wagwolago akaijuvi kuulabullunorakikono. Toro kuula'bullu toga doonki muugunyo pwol milomwalodupudo toollu yere wonbullunorakikono. Toro toollu wuulo tovi ikwolapiyo'bullu donumokabilo. 3Toro yodo'bule toga a'mwo pwol, Buro'nyo'mo jadokuulo? Yamuugojo toro aikullo'ji tov aro duujulo. Aguto Jisasol womdo yono'mekono. Toro tool me'no yopiyowo'ji toga akawai'no aki aiko te yere mogwopiyabwonekono. Toro duujulo.” Kuudokaikono. 4Toro tooral plaino sumaleyokwe doonki muugunyo pwol anoullo wobo toru puuto tovi ai'duvolludapiyopo toollu wonolno wuulo tovi sukwolapiyolorakono. 5Toro yodole toga a'mwo pworo wobo toru adaiyajupo tooro wono'mno aro kuudoganoporogano. “Kevu doonki muugunyo su toollu buro'nyo ibulluno'mo toorakul jukwolapiyadokuulo?” 6Toro kuudoganopo tooral Jisasolluro kuudoka tomgu'aro to'no kuudolorakono. Toro toorallu doonki muugunyo tool amokwanbuleyokwe nokwo wonyapino soporogano. 7Toro tooral doonki muugunyo toollu Jisasollomno amokabolorakono. Kemoro nobwaiyo tov doonki muugunyo toolluro buulo tovi sulosolo tovi Jisasol muunyu toru sulomwalokaikono. 8A'mwo abolo bwotonyago ton kemi nobwaiyo ton puuto kuullo'moneyokwe tovi alobiyosopogano. Aki ikuuwopto ton peyomora'mno alobiyosopogano. Jisasol kuulaboduke toollu ilaiyo mollo'mo ton toro alobiyosopogano. 9Toro ino sumaveyokwe Jisasol puuto tovi nouloduke toollu pun sumdomgu pun lukomgu deko aro aduumjunopogano.

“Anekullo'mwojonoo, ilaiyokwono. Gooti toolluro sugumaluko to'no kwosungiko akallu amonekwopiyabokaikono. Toro tool Aguto toolluro yovo tovida'ai abumokaikono. Ilaiyokwono. 10Nemi nellukweyago aguto kig Devitolluro mido amollomwallajuko to'busuko kubalno aga kuga kuruv aki aiko te boneki'mowono'mo sadopiyo. Toro te Gooti tool gamoro sugumaluko tov kuubwemaiyo. Ilaiyokwono. Muunyu kai'muuda'ai tool anekullo'mwojonoo!”

Jisasollu ilaiyo mollomallo'mo ton toro aduumjunopogano.

11Jisasol wagwolago Jeruusalem'no kuulno sumaiyokwe Gooti toollu ilomoropiyo'moneyokwe ago tovi auloonomollokaikono. Yiuwi'nokai kuula'dopure tonyu me'no wonomolluno sumaiyokwe abolokwokaikono. Toro bolokwino sumaiyokwe sulato me'no soka tovino tov Jisasol gami 12-pela uumjunyokwe toorogai wagwolago Betani'no aki aiko te avlavokaikono.

Jisasol iko fik pwollu, “Mai'nugovla'mwalbinekugono,” kuudoka tovinokwono

(Matyuu 21:18-19)

12Betani toru ki'mo'mno sumaveyokwe iruko aikomguda'ai tollugwoji wagwolago su toruda'ai bolokwino sumaveyokwe puuto tovi plavo'mno Jisasol mujuko kwinokaikono. 13Toro tool manyu toruda'ai iko fik pwol gamoro kuuwopto ina'duke toollu kwonokaikono. Toro wonyuno sumaiyokwe gamoro sulo pun yo'mgonomuudanyo'moneyokwe tool kuuwokaikono. Toro wino sumaiyokwe iko su tool ikulsulo pun mai'nyo'mo tool yiuno kuuwopto tono ina'dopure toollu kwonokaikono. Toro tov aro tovinokwono. Su toro toga fik tooravuro sulo ki'nyo'moneyokwe kuulouloga'maiyo. Toro tovino tov yiuno kuuwopto tono kwonokaikono. 14Jisasol toro tovi wonyuno sumaiyokwe iko toollu yogalo aro amojurugolokaikono. “Agada'ai sulo mai'nugovla'mwalbinekugono. Toro tookujuda'ai yiunokuudo mamuudogungovla'mwalanekugono.” Amojurugolokaikono. Toro wuudoduke toga Jisasolluro uumjunyokwe tooro au'nallajuporogano.

Gooti toollu ilomoropiyo'moneyokwe ago tovida'ai a'mwo mubiyo dalo'nyo yodopure toorai Jisasol abilomodovomjopiyoka tovinokwono

(Matyuu 21:12-17; Luuk 19:45-48; Joon 2:13-22)

15Toro tooro plaino sumaveyokwe wagwolago Jeruusalem tovi aki aiko te ai'movoporogano. Jisasol Gooti toollu ilomoropiyo'moneyokwe ago tovuro agwapto toru aulokaikono. Kuulno sumaiyokwe a'mwo abolo ton mubiyo dalo'nyo inodopure tonyu abilomodovomjopiyokaikono. Toro bilomovomjopino sumaiyokwe a'mwo nuugwiyo yodalopto yodopure tooravuro noluuleyo tonyu amourotowapiyokaikono. Aki dokato sobuuro toorai yodalopto yodupudo tooravuro noluuleyo kunyu kuruv amourotowapiyokaikono. 16Aki a'mwo pworo kemi kuto ivito tonyu pumuuno mokavlaiyo'mo tooro Gooti toollu ilomoropiyo'moneyokwe ago tovuro agwapto toru'aro mokaulabodopure toorai aduullukurokaikono. 17Toro ino sumaiyokwe toga aro sodubwasokaikono. “Gooti toolluro kuuguudo tovi aro sakwollungikokwono. “Moro ago tov yiuwi'nokai a'mwo bomwallo tooro subusu'nyogalo jo'moneyokwe agokwono. Adupuro.” Toro sakwollungiko kuvi kuruv aga'no'gwowi a'mwo kuukokwe tooravuro yiulo kuupuu'na'dupudo ago to'busuko aikullumo'nadopiyo.” Kuudokaikono.

18Toro wuujuno sumaiyokwe a'mwo abolo kwolallo tonyu sodubwasokaikono. Toro ibwasoduke tovino yiuwi'nokai a'mwo abolo ton wuu'no'mno kuudo kwolallo sourukwapiyoporogano. Toro yourukwapiyodopure tovino pris mido mollomwalokwe toorogai'aro loowo tovino pi'mwo kuudokwe toorogai'aro tooro wono'mno Jisasolluno kwekuullu kuudo sauroporogano. Toro te a'mwo su tooro Jisasollu romiyoso'mo tovino soureya'mgonoporogano. 19Toruda'ai dugumdo kimwonyoduke toga Jisaseke'aro gami uumjunyokwe toorogai'aro tooro pumuu wollo'mo tooro wagwolago Jeruusalemda'ai abolokwoporogano.

Jisasolluro aro adoka tovinokwono. A'mwo pwol noonyumwonyu pun imo'nono kuudo yaurowo'ji subusu'nyogalo ado'ji tov kuvinono imo'nonokwono

(Matyuu 21:20-22)

20Toro tooro iruko aikomguda'ai lomwo tollugwoji plavo'mno Jisasolluro iko fik kuudoka toollu uuwoleyo'mo tomgu'aro avlavoporogano. Toro plaino sumaveyokwe iko su toollu aiko te kwonoporogano. Iko su tool yiuno puluko tovida'ai i'muu pilo tovino me'no aluuropingiko toollu kwonoporogano. 21Toro tovi wono'mno Pital iko fik su toollu Jisasolluro kuudoka tovino aki aiko te kuudo yauro'no aro kuudokaikono. “Ibwasokweyoloo, doonono. Guu iko akallu magu'nyogalo aduuwimwa'judo tool aga noluullekono.” Kuudokaikono. 22Pital toro wuujuno sumaiyokwe Jisasol aro kuudokaikono. “Kevu kemoro kuudo tov Gooti toolluno duubweyulo. 23#Mt. 17:20-21; 1Krn. 13:2Nuu nebal'no ikudumo'monyugono. A'mwo pwol Gooti toolluno kuudo kuubweyo'ji tool gami poowokalago tovi kuudo noullo maullo nyauro'jo. Toro kwol kuruv, Oo kuvinono imo'nono'mdeyo, kuudo sauro'ji to'gwowi Gooti tool kuvinono yonekono. Toro te a'mwo Gooti toolluno kuudo kuubweyo'ji su tool muumuudo pwollu kuudo'ji tov, “Ilojo'mowopiyabo'bi soolwaravi dooluvollunawonoo,” kuudo'ji tov kuvinono imo'nonokwono. 24Toro te nuu aro ikudumo'mokwono. Kevu subusu'nyogalo tov, Kuvinono anyumo'nonoo, kuudo yauropi adupi tov kuvinono ikullumo'nonokwono.” Kuudokaikono.

25-26 # Mt. 6:14,15 “Aki kevu subusu'nyogalo wuujo'mo toorekul sulodapi toga a'mwo pwolluro ma'no ma'no aikullo'ji tovuro kirumwallo tov neya domoruudukwopiyogaulo. Toro amoruudukwopipi tov kemi Tellunumiyago muunyu kai'muu amwalluko kwol kuruv kemoro ma'no ma'nodo tovuro kirumwallo tovi nomaikudukwopiyonekono.”

Pworo Jisasollu, “Gumoro jurogudo tov adadokwe dukomolladokuuno,” kuudoganopo tovinokwono

(Matyuu 21:23-27; Luuk 20:1-8)

27Toruda'ai Jisaseke'aro gamoro uumjunyokwe toorogai'aro tooro plaino sumaveyokwe Jeruusalem aiko toru'no ai'movoporogano. Toro ki'mo'mno sumaveyokwe Jisasol Gooti toollu ilomoropiyo'moneyokwe ago tovuro agwapto tomuu aullomollajukekono. Toro kuullomolloduke toga pris mido mollomwalokwe toorogai'aro loowo tovino pi'mwo kuudokwe toorogai'aro Juu tooravuro mido mollomwalokwe pworogai'aro tooro Jisasollomno aboporogano. 28Toro tooro bino sumaveyokwe Jisasollu aro kuudoganoporogano. “Gumoro jurogudo akav adadokwe dukomolladokuuno? Aki ala'mwol, Nokwo mollubinokwono, agudokakwe domolladokuuno?” Kuudoganoporogano.

29Toro kuudoganopo toorai Jisasol kuudokaikono. “Nuu yamuugojo puru'mono ikudumonyugono. Toro saikumgojumi tovi anyudupi tov nuu moro mollodumdo ajanubweyoka toolluno nokwo ikudumonyugono.” 30Toro wuujuno sumaiyokwe aro samuugojokaikono. “Joonolluro wonyo agaluvollajuko tov muunyu kai'muuda'aiyo'mdukono oo a'mwo tooraida'aiyo'mdukono? Kevu donyujulo.” Kuudokaikono.

31Toro samuugojoka su tovino kevnokwe tooro aro sajunoporogano. “Nevu, Muunyu kai'muuda'aiyokwono, kuuda'ji tov nekudonekono. Kevu buro'nyo'mo kuudo muubweyajuporekuldeyo? Nekudonekono. 32Aki toro kuvi kuruv Joonolluro sajuko tovino, A'mwo tooraida'aiyokwono, kuuda'ji tov kwolallo bwotonyago ton molo nonekullupiyo.” Toro kuudo yauro'mno luko soporogano. Su tov aro tovinokwono. Kwolallo ton Joonolluno kuudo yau'dupudogano. Oo proofet kuunodo pwekono. Toro kuudo yau'dopure tonyuno tov luko soporogano. 33Toro tooro Jisasolluro yamuugojo kwiyoka tovino kuudoporogano. “Nevu kuudo miyau'mwakuuwono.” Toro kuudopo toorai Jisasol kuudokaikono. “Kevu manyudumapo tovino tov nuu kwonyu kuruv moro jurogudo mollodumdo ajanubweyoka toolluno maikudumonyugono.” Kuudokaikono.

Currently Selected:

Mak 11: SMB

Highlight

Copy